ဒုတိယဂါထာသင်္ဂဏိကံ

စောဒနာဒိပုစ္ဆာဝိဿဇ္ဇနာဝဏ္ဏနာ

၃၅၉. ဒုတိယဂါထာသင်္ဂဏိယံ စောဒနာတိ ဝတ္ထုဉ္စ အာပတ္တိဉ္စ ဒဿေတွာ စောဒနာ. သာရဏာတိ ဒေါသသာရဏာ. သံဃော ကိမတ္ထာယာတိ သံဃသန္နိပါတော ကိမတ္ထာယ. မတိကမ္မံ ပန ကိဿ ကာရဏာတိ မတိကမ္မံ ဝုစ္စတိ မန္တဂ္ဂဟဏံ၊ တံ ကိဿ ကာရဏာတိ အတ္ထော.

စောဒနာ သာရဏတ္ထာယာတိ ဝုတ္တပ္ပကာရာ စောဒနာ၊ တေန စုဒိတကပုဂ္ဂလေန စောဒကဒေါသသာရဏတ္ထာယ. နိဂ္ဂဟတ္ထာယ သာရဏာတိ ဒေါသသာရဏာ ပန တဿ ပုဂ္ဂလဿ နိဂ္ဂဟတ္ထာယ. သံဃော ပရိဂ္ဂဟတ္ထာယာတိ တတ္ထ သန္နိပတိတော သံဃော ဝိနိစ္ဆယပရိဂ္ဂဟဏတ္ထာယ၊ ဓမ္မာဓမ္မံ တုလနတ္ထာယ သုဝိနိစ္ဆိတဒုဗ္ဗိနိစ္ဆိတံ ဇာနနတ္ထာယာတိ အတ္ထော. မတိကမ္မံ ပန ပါဋိယေက္ကန္တိ သုတ္တန္တိကတ္ထေရာနဉ္စ ဝိနယဓရတ္ထေရာနဉ္စ မန္တဂ္ဂဟဏံ ပါဋေက္ကံ ပါဋေက္ကံ ဝိနိစ္ဆယသန္နိဋ္ဌာပနတ္ထံ.

မာ ခေါ ပဋိဃန္တိ စုဒိတကေ ဝါ စောဒကေ ဝါ ကောပံ မာ ဇနယိ. သစေ အနုဝိဇ္ဇကော တုဝန္တိ သစေ တွံ သံဃမဇ္ဈေ ဩတိဏ္ဏံ အဓိကရဏံ ဝိနိစ္ဆိတုံ နိသိန္နော ဝိနယဓရော.

ဝိဂ္ဂါဟိကန္တိ ‘‘န တွံ ဣမံ ဓမ္မဝိနယံ အာဇာနာသီ’’တိအာဒိနယပ္ပဝတ္တံ. အနတ္ထသံဟိတန္တိ ယာ အနတ္ထံ ဇနယတိ၊ ပရိသံ ခေါဘေတွာ ဥဋ္ဌာပေတိ၊ ဧဝရူပိံ ကထံ မာ အဘဏိ. သုတ္တေ ဝိနယေ ဝါတိအာဒီသု သုတ္တံ နာမ ဥဘတောဝိဘင်္ဂေါ. ဝိနယော နာမ ခန္ဓကော. အနုလောမော နာမ ပရိဝါရော. ပညတ္တံ နာမ သကလံ ဝိနယပိဋကံ. အနုလောမိကံ နာမ စတ္တာရော မဟာပဒေသာ.

အနုယောဂဝတ္တံ နိသာမယာတိ အနုယုဉ္ဇနဝတ္တံ နိသာမေဟိ. ကုသလေန ဗုဒ္ဓိမတာ ကတန္တိ ဆေကေန ပဏ္ဍိတေန ဉာဏပါရမိပ္ပတ္တေန ဘဂဝတာ နီဟရိတွာ ဌပိတံ. သုဝုတ္တန္တိ သုပညာပိတံ. သိက္ခာပဒါနုလောမိကန္တိ သိက္ခာပဒါနံ အနုလောမံ. အယံ တာဝ ပဒတ္ထော၊ အယံ ပနေတ္ထ သာဓိပ္ပါယသင်္ခေပဝဏ္ဏနာ – ‘‘သစေ တွံ အနုဝိဇ္ဇကော၊ မာ သဟသာ ဘဏိ၊ မာ အနတ္ထသံဟိတံ ဝိဂ္ဂါဟိကကထံ ဘဏိ. ယံ ပန ကုသလေန ဗုဒ္ဓိမတာ လောကနာထေန ဧတေသု သုတ္တာဒီသု အနုယောဂဝတ္တံ ကထံ သုပညတ္တံ သဗ္ဗသိက္ခာပဒါနံ အနုလောမံ၊ တံ နိသာမယ တံ ဥပဓာရေဟီ’’တိ. ဂတိံ န နာသေန္တော သမ္ပရာယိကန္တိ အတ္တနော သမ္ပရာယေ သုဂတိနိဗ္ဗတ္တိံ အနာသေန္တော အနုယောဂဝတ္တံ နိသာမယ. ယော ဟိ တံ အနိသာမေတွာ အနုယုဉ္ဇတိ၊ သော သမ္ပရာယိကံ အတ္တနော ဂတိံ နာသေတိ၊ တသ္မာ တွံ အနာသေန္တော နိသာမယာတိ အတ္ထော. ဣဒါနိ တံ အနုယောဂဝတ္တံ ဒဿေတုံ ဟိတေသီတိအာဒိမာဟ. တတ္ထ ဟိတေသီတိ ဟိတံ ဧသန္တော ဂဝေသန္တော၊ မေတ္တဉ္စ မေတ္တာပုဗ္ဗဘာဂဉ္စ ဥပဋ္ဌပေတွာတိ အတ္ထော. ကာလေနာတိ ယုတ္တပတ္တကာလေန၊ အဇ္ဈေသိတကာလေယေဝ တဝ ဘာရေ ကတေ အနုယုဉ္ဇာတိ အတ္ထော.

သဟသာ ဝေါဟာရံ မာ ပဓာရေသီတိ ယော ဧတေသံ သဟသာ ဝေါဟာရော ဟောတိ၊ သဟသာ ဘာသိတံ၊ တံ မာ ပဓာရေသိ၊ မာ ဂဏှိတ္ထ.

ပဋိညာနုသန္ဓိတေန ကာရယေတိ ဧတ္ထ အနုသန္ဓိတန္တိ ကထာနုသန္ဓိ ဝုစ္စတိ၊ တသ္မာ ပဋိညာနုသန္ဓိနာ ကာရယေ၊ ကထာနုသန္ဓိံ သလ္လက္ခေတွာ ပဋိညာယ ကာရယေတိ အတ္ထော. အထ ဝါ ပဋိညာယ စ အနုသန္ဓိတေန စ ကာရယေ၊ လဇ္ဇိံ ပဋိညာယ ကာရယေ၊ အလဇ္ဇိံ ဝတ္တာနုသန္ဓိနာတိ အတ္ထော. တသ္မာ ဧဝ ပဋိညာ လဇ္ဇီသူတိ ဂါထမာဟ. တတ္ထ ဝတ္တာနုသန္ဓိတေန ကာရယေတိ ဝတ္တာနုသန္ဓိနာ ကာရယေ၊ ယာ အဿ ဝတ္တေန သဒ္ဓိံ ပဋိညာ သန္ဓိယတိ၊ တာယ ပဋိညာယ ကာရယေတိ အတ္ထော.

သဉ္စိစ္စာတိ ဇာနန္တော အာပဇ္ဇတိ. ပရိဂူဟတီတိ နိဂူဟတိ န ဒေသေတိ န ဝုဋ္ဌာတိ.

သာ အဟမ္ပိ ဇာနာမီတိ ယံ တုမှေဟိ ဝုတ္တံ၊ တံ သစ္စံ၊ အဟမ္ပိ နံ ဧဝမေဝ ဇာနာမိ. အညဉ္စ တာဟန္တိ အညဉ္စ တံ အဟံ ပုစ္ဆာမိ.

ပုဗ္ဗာပရံ န ဇာနာတီတိ ပုရေကထိတဉ္စ ပစ္ဆာကထိတဉ္စ န ဇာနာတိ. အကောဝိဒေါတိ တသ္မိံ ပုဗ္ဗာပရေ အကုသလော. အနုသန္ဓိဝစနပထံ န ဇာနာတီတိ ကထာနုသန္ဓိဝစနံ ဝိနိစ္ဆယာနုသန္ဓိဝစနဉ္စ န ဇာနာတိ.

သီလဝိပတ္တိယာ စောဒေတီတိ ဒွီဟိ အာပတ္တိက္ခန္ဓေဟိ စောဒေတိ. အာစာရဒိဋ္ဌိယာတိ အာစာရဝိပတ္တိယာ စေဝ ဒိဋ္ဌိဝိပတ္တိယာ စ. အာစာရဝိပတ္တိယာ စောဒေန္တော ပဉ္စဟာပတ္တိက္ခန္ဓေဟိ စောဒေတိ၊ ဒိဋ္ဌိဝိပတ္တိယာ စောဒေန္တော မိစ္ဆာဒိဋ္ဌိယာ စေဝ အန္တဂ္ဂါဟိကဒိဋ္ဌိယာ စ စောဒေတိ. အာဇီဝေနပိ စောဒေတီတိ အာဇီဝဟေတုပညတ္တေဟိ ဆဟိ သိက္ခာပဒေဟိ စောဒေတိ. သေသံ သဗ္ဗတ္ထ ဥတ္တာနမေဝါတိ.

ဒုတိယဂါထာသင်္ဂဏိကဝဏ္ဏနာ နိဋ္ဌိတာ.