၁. ကောသိယသိက္ခာပဒဝဏ္ဏနာ
၅၄၂. တေန သမယေနာတိ ကောသိယသိက္ခာပဒံ. တတ္ထ သန္ထရိတွာ ကတံ ဟောတီတိ သမေ ဘူမိဘာဂေ ကောသိယံသူနိ ဥပရူပရိ သန္ထရိတွာ ကဉ္ဇိကာဒီဟိ သိဉ္စိတွာ ကတံ ဟောတိ. ဧကေနပိ ကောသိယံသုနာ မိဿိတွာတိ တိဋ္ဌတု အတ္တနော ရုစိဝသေန မိဿိတံ၊ သစေပိ တဿ ကရဏဋ္ဌာနေ ဝါတော ဧကံ ကောသိယံသုံ အာနေတွာ ပါတေတိ၊ ဧဝမ္ပိ မိဿေတွာ ကတမေဝ ဟောတီတိ. သေသံ ဥတ္တာနတ္ထမေဝ.
ဆသမုဋ္ဌာနံ၊ ကိရိယံ၊ နောသညာဝိမောက္ခံ၊ အစိတ္တကံ ပဏ္ဏတ္တိဝဇ္ဇံ၊ ကာယကမ္မဝစီကမ္မံ၊
တိစိတ္တံ၊ တိဝေဒနန္တိ.
ကောသိယသိက္ခာပဒဝဏ္ဏနာ နိဋ္ဌိတာ.