၅. ပါဋိဒေသနီယကဏ္ဍံ (ဘိက္ခုနီဝိဘင်္ဂဝဏ္ဏနာ)

ပါဋိဒေသနီယသိက္ခာပဒဝဏ္ဏနာ

ပါဋိဒေသနီယာ နာမ၊ ခုဒ္ဒကာနံ အနန္တရာ၊

ယေ ဓမ္မာ အဋ္ဌ အာရုဠှာ၊ သင်္ခေပေနေဝ သင်္ဂဟံ၊

တေသံ ပဝတ္တတေ ဧသာ၊ သင်္ခေပေနေဝ ဝဏ္ဏနာ.

၁၂၂၈. ယာနိ ဟိ ဧတ္ထ ပါဠိယံ သပ္ပိတေလာဒီနိ နိဒ္ဒိဋ္ဌာနိ၊ တာနိယေဝ ဝိညာပေတွာ ဘုဉ္ဇန္တိယာ ပါဋိဒေသနီယာ. ပါဠိဝိနိမုတ္တကေသု ပန သဗ္ဗေသု ဒုက္ကဋံ. သေသမေတ္ထ ဥတ္တာနမေဝ. အဋ္ဌဝိဓမ္ပိ ပနေတံ ပါဋိဒေသနီယံ စတုသမုဋ္ဌာနံ – ကာယတော ကာယဝါစတော ကာယစိတ္တတော ကာယဝါစာစိတ္တတော စ သမုဋ္ဌာတိ၊ ကိရိယံ နောသညာဝိမောက္ခံ၊ အစိတ္တကံ၊ ပဏ္ဏတ္တိဝဇ္ဇံ၊ ကာယကမ္မံ၊ ဝစီကမ္မံ၊ တိစိတ္တံ၊ တိဝေဒနန္တိ.

ပါဋိဒေသနီယဝဏ္ဏနာ နိဋ္ဌိတာ.

ပါဋိဒေသနီယကဏ္ဍံ နိဋ္ဌိတံ.

သေခိယာ ပန ဥဒ္ဒိဋ္ဌာ၊ ယေ ဓမ္မာ ပဉ္စသတ္တတိ၊

တေသံ အနန္တရာယေဝ၊ သတ္တာဓိကရဏဝှယာ.

မဟာဝိဘင်္ဂေ ယော ဝုတ္တော၊ တေသံ အတ္ထဝိနိစ္ဆယော၊

ဘိက္ခုနီနံ ဝိဘင်္ဂေပိ၊ တာဒိသံယေဝ တံ ဝိဒူ.

ယသ္မာ တသ္မာ ဝိသုံ တေသံ၊ ဓမ္မာနံ အတ္ထဝဏ္ဏနာ၊

န ဝုတ္တာ တတ္ထ ယာ ဝုတ္တာ၊ ဝုတ္တာယေဝ ဟိ သာ ဣဓာတိ.

သမန္တပါသာဒိကာယ ဝိနယသံဝဏ္ဏနာယ

ဘိက္ခုနီဝိဘင်္ဂဝဏ္ဏနာ နိဋ္ဌိတာ.

သဗ္ဗာသဝပဟံ ဧသာ၊ နိဋ္ဌိတာ ဝဏ္ဏနာ ယထာ၊

သဗ္ဗာသဝပဟံ မဂ္ဂံ၊ ပတွာ ပဿန္တု နိဗ္ဗုတိန္တိ.

ဥဘတောဝိဘင်္ဂဋ္ဌကထာ နိဋ္ဌိတာ.