၃-၄. အာယာစနဝဂ္ဂါဒိ

၁-၁၁. မာရာဒိသုတ္တဧကာဒသကဝဏ္ဏနာ

၁၈၂-၂၀၅. တတော ပရံ ဥတ္တာနတ္ထမေဝ. အယဉှိ ရာဓတ္ထေရော ပဋိဘာနိယတ္ထေရော နာမ. တထာဂတဿ ဣမံ ထေရံ ဒိသွာ သုခုမံ ကာရဏံ ဥပဋ္ဌာတိ. တေနဿ ဘဂဝါ နာနာနယေဟိ ဓမ္မံ ဒေသေတိ. ဧဝံ ဣမသ္မိံ ရာဓသံယုတ္တေ အာဒိတော ဒွေ ဝဂ္ဂါ ပုစ္ဆာဝသေန ဒေသိတာ၊ တတိယော အာယာစနေန၊ စတုတ္ထော ဥပနိသိန္နကကထာဝသေန. သကလမ္ပိ ပနေတံ ရာဓသံယုတ္တံ ထေရဿ ဝိမုတ္တိပရိပါစနီယဓမ္မဝသေနေဝ ဂဟိတန္တိ ဝေဒိတဗ္ဗံ.

ရာဓသံယုတ္တဝဏ္ဏနာ နိဋ္ဌိတာ.