၁. မာရသုတ္တဝဏ္ဏနာ

၁၆၀. ရာဓသံယုတ္တဿ ပဌမေ မာရော ဝါ အဿာတိ မရဏံ ဝါ ဘဝေယျ. မာရေတာ ဝါတိ မာရေတဗ္ဗော ဝါ. ယော ဝါ ပန မီယတီတိ ယော ဝါ ပန မရတိ. နိဗ္ဗိဒတ္ထန္တိ နိဗ္ဗိဒါဉာဏတ္ထံ. နိဗ္ဗာနတ္ထာတိ ဖလဝိမုတ္တိ နာမေသာ အနုပါဒါနိဗ္ဗာနတ္ထာတိ အတ္ထော. အစ္စယာသီတိ အတိက္ကန္တောသိ. နိဗ္ဗာနောဂဓန္တိ နိဗ္ဗာနေ ပတိဋ္ဌိတံ. ဣဒံ မဂ္ဂဗြဟ္မစရိယံ နာမ နိဗ္ဗာနဗ္ဘန္တရေ ဝုဿတိ၊ န နိဗ္ဗာနံ အတိက္ကမိတွာတိ အတ္ထော. နိဗ္ဗာနပရိယောသာနန္တိ နိဗ္ဗာနံ အဿ ပရိယောသာနံ၊ နိပ္ဖတ္တိ နိဋ္ဌာတိ အတ္ထော. ပဌမံ.