၅. ဥပ္ပလဝဏ္ဏာသုတ္တဝဏ္ဏနာ

၁၆၆. ပဉ္စမေ သုပုပ္ဖိတဂ္ဂန္တိ အဂ္ဂတော ပဋ္ဌာယ သုဋ္ဌု ပုပ္ဖိတံ သာလရုက္ခံ. န စတ္ထိ တေ ဒုတိယာ ဝဏ္ဏဓာတူတိ တဝ ဝဏ္ဏဓာတုသဒိသာ ဒုတိယာ ဝဏ္ဏဓာတု နတ္ထိ၊ တယာ သဒိသာ အညာ ဘိက္ခုနီ နတ္ထီတိ ဝဒတိ. ဣဓာဂတာ တာဒိသိကာ ဘဝေယျုန္တိ ယထာ တွံ ဣဓာဂတာ ကိဉ္စိ သန္ထဝံ ဝါ သိနေဟံ ဝါ န လဘသိ၊ ဧဝမေဝံ တေပိ တယာဝ သဒိသာ ဘဝေယျုံ. ပခုမန္တရိကာယန္တိ ဒွိန္နံ အက္ခီနံ မဇ္ဈေ နာသဝံသေပိ တိဋ္ဌန္တိံ မံ န ပဿသိ. ဝသီဘူတမှီတိ ဝသီဘူတာ အသ္မိ. ပဉ္စမံ.