၆. စာလာသုတ္တဝဏ္ဏနာ

၁၆၇. ဆဋ္ဌေ ကော နု တံ ဣဒမာဒပယီတိ ကော နု မန္ဒဗုဒ္ဓိ ဗာလော တံ ဧဝံ ဂါဟာပေသိ? ပရိက္လေသန္တိ အညမ္ပိ နာနပ္ပကာရံ ဥပဒ္ဒဝံ. ဣဒါနိ ယံ မာရော အာဟ – ‘‘ကော နု တံ ဣဒမာဒပယီ’’တိ၊ တံ မဒ္ဒန္တီ – ‘‘န မံ အန္ဓဗာလော အာဒပေသိ၊ လောကေ ပန အဂ္ဂပုဂ္ဂလော သတ္ထာ ဓမ္မံ ဒေသေသီ’’တိ ဒဿေတုံ၊ ဗုဒ္ဓေါတိအာဒိမာဟ. တတ္ထ သစ္စေ နိဝေသယီတိ ပရမတ္ထသစ္စေ နိဗ္ဗာနေ နိဝေသေသိ. နိရောဓံ အပ္ပဇာနန္တာတိ နိရောဓသစ္စံ အဇာနန္တာ. ဆဋ္ဌံ.