၂. သောမာသုတ္တဝဏ္ဏနာ

၁၆၃. ဒုတိယေ ဌာနန္တိ အရဟတ္တံ. ဒုရဘိသမ္ဘဝန္တိ ဒုပ္ပသဟံ. ဒွင်္ဂုလပညာယာတိ ပရိတ္တပညာယ. ယသ္မာ ဝါ ဒွီဟိ အင်္ဂုလေဟိ ကပ္ပါသဝဋ္ဋိံ ဂဟေတွာ သုတ္တံ ကန္တန္တိ၊ တသ္မာ ဣတ္ထီ ‘‘ဒွင်္ဂုလပညာ’’တိ ဝုစ္စတိ. ဉာဏမှိ ဝတ္တမာနမှီတိ ဖလသမာပတ္တိဉာဏေ ပဝတ္တမာနေ. ဓမ္မံ ဝိပဿတောတိ စတုသစ္စဓမ္မံ ဝိပဿန္တဿ၊ ပုဗ္ဗဘာဂေ ဝါ ဝိပဿနာယ အာရမ္မဏဘူတံ ခန္ဓပဉ္စကမေဝ. ကိဉ္စိ ဝါ ပန အညသ္မီတိ အညံ ဝါ ကိဉ္စိ ‘‘အဟံ အသ္မီ’’တိ တဏှာမာနဒိဋ္ဌိဝသေန ယဿ သိယာ. ဒုတိယံ.