၃. ကိသာဂေါတမီသုတ္တဝဏ္ဏနာ

၁၆၄. တတိယေ ကိသာဂေါတမီတိ အပ္ပမံသလောဟိတတာယ ကိသာ၊ ဂေါတမီတိ ပနဿာ နာမံ. ပုဗ္ဗေ ကိရ သာဝတ္ထိယံ ဧကသ္မိံ ကုလေ အသီတိကောဋိဓနံ သဗ္ဗံ အင်္ဂါရာဝ ဇာတံ. ကုဋုမ္ဗိကော အင်္ဂါရဇာတာနိ အနီဟရိတွာ – ‘‘အဝဿံ ကောစိ ပုညဝါ ဘဝိဿတိ၊ တဿ ပုညေန ပုန ပါကတိကံ ဘဝိဿတီ’’တိ သုဝဏ္ဏဟိရညဿ စာဋိယော ပူရေတွာ အာပဏေ ဌပေတွာ သမီပေ နိသီဒိ. အထေကာ ဒုဂ္ဂတကုလဿ ဓီတာ – ‘‘အဍ္ဎမာသကံ ဂဟေတွာ ဒါရုသာကံ အာဟရိဿာမီ’’တိ ဝီထိံ ဂတာ တံ ဒိသွာ ကုဋုမ္ဗိကံ အာဟ – ‘‘အာပဏေ တာဝ ဓနံ ဧတ္တကံ၊ ဂေဟေ ကိတ္တကံ ဘဝိဿတီ’’တိ. ကိံ ဒိသွာ အမ္မ ဧဝံ ကထေသီတိ? ဣမံ ဟိရညသုဝဏ္ဏန္တိ. သော ‘‘ပုညဝတီ ဧသာ ဘဝိဿတီ’’တိ တဿာ ဝသနဋ္ဌာနံ ပုစ္ဆိတွာ အာပဏေ ဘဏ္ဍံ ပဋိသာမေတွာ တဿာ မာတာပိတရော ဥပသင်္ကမိတွာ ဧဝမာဟ – ‘‘အမှာကံ ဂေဟေ ဝယပ္ပတ္တော ဒါရကော အတ္ထိ၊ တဿေတံ ဒါရိကံ ဒေထာ’’တိ. ကိံ သာမိ ဒုဂ္ဂတေဟိ သဒ္ဓိံ ကေဠိံ ကရောသီတိ? မိတ္တသန္ထဝေါ နာမ ဒုဂ္ဂတေဟိပိ သဒ္ဓိံ ဟောတိ၊ ဒေထ နံ၊ ကုဋုမ္ဗသာမိနီ ဘဝိဿတီတိ နံ ဂဟေတွာ ဃရံ အာနေသိ. သာ သံဝါသမနွာယ ပုတ္တံ ဝိဇာတာ. ပုတ္တော ပဒသာ အာဟိဏ္ဍနကာလေ ကာလမကာသိ. သာ ဒုဂ္ဂတကုလေ ဥပ္ပဇ္ဇိတွာ မဟာကုလံ ဂန္တွာပိ ‘‘ပုတ္တဝိနာသံ ပတ္တာမှီ’’တိ ဥပ္ပန္နဗလဝသောကာ ပုတ္တဿ သရီရကိစ္စံ ဝါရေတွာ တံ မတကဠေဝရံ အာဒါယ နဂရေ ဝိပ္ပလပန္တီ စရတိ.

ဧကဒိဝသံ မဟတိယာ ဗုဒ္ဓဝီထိယာ ဒသဗလဿ သန္တိကံ ဂန္တွာ – ‘‘ပုတ္တဿ မေ အရောဂဘာဝတ္ထာယ ဘေသဇ္ဇံ ဒေထ ဘဂဝါ’’တိ အာဟ. ဂစ္ဆ သာဝတ္ထိံ အာဟိဏ္ဍိတွာ ယသ္မိံ ဂေဟေ မတပုဗ္ဗော နတ္ထိ၊ တတော သိဒ္ဓတ္ထကံ အာဟရ၊ ပုတ္တဿ တေ ဘေသဇ္ဇံ ဘဝိဿတီတိ. သာ နဂရံ ပဝိသိတွာ ဓုရဂေဟတော ပဋ္ဌာယ ဘဂဝတာ ဝုတ္တနယေန ဂန္တွာ သိဒ္ဓတ္ထကံ ယာစန္တီ ဃရေ ဃရေ၊ ‘‘ကုတော တွံ ဧဝရူပံ ဃရံ ပဿိဿသီ’’တိ ဝုတ္တာ ကတိပယာနိ ဂေဟာနိ အာဟိဏ္ဍိတွာ – ‘‘သဗ္ဗေသမ္ပိ ကိရာယံ ဓမ္မတာ၊ န မယှံ ပုတ္တဿေဝါ’’တိ သာလာယံ ဆဝံ ဆဍ္ဍေတွာ ပဗ္ဗဇ္ဇံ ယာစိ. သတ္ထာ ‘‘ဣမံ ပဗ္ဗာဇေတူ’’တိ ဘိက္ခုနိဥပဿယံ ပေသေသိ. သာ ခုရဂ္ဂေယေဝ အရဟတ္တံ ပါပုဏိ. ဣမံ ထေရိံ သန္ဓာယ ‘‘အထ ခေါ ကိသာဂေါတမီ’’တိ ဝုတ္တံ.

ဧကမာသီတိ ဧကာ အာသိ. ရုဒမ္မုခီတိ ရုဒမာနမုခီ ဝိယ. အစ္စန္တံ မတပုတ္တာမှီတိ ဧတ္ထ အန္တံ အတီတံ အစ္စန္တံ၊ ဘာဝနပုံသကမေတံ. ဣဒံ ဝုတ္တံ ဟောတိ – ယထာ ပုတ္တမရဏံ အန္တံ အတီတံ ဟောတိ၊ ဧဝံ မတပုတ္တာ အဟံ၊ ဣဒါနိ မမ ပုန ပုတ္တမရဏံ နာမ နတ္ထိ. ပုရိသာ ဧတဒန္တိကာတိ ပုရိသာပိ မေ ဧတဒန္တိကာဝ. ယော မေ ပုတ္တမရဏဿ အန္တော၊ ပုရိသာနမ္ပိ မေ ဧသေဝန္တော၊ အဘဗ္ဗာ အဟံ ဣဒါနိ ပုရိသံ ဂဝေသိတုန္တိ. သဗ္ဗတ္ထ ဝိဟတာ နန္ဒီတိ သဗ္ဗေသု ခန္ဓာယတနဓာတုဘဝယောနိဂတိဌိတိနိဝါသေသု မမ တဏှာနန္ဒီ ဝိဟတာ. တမောက္ခန္ဓောတိ အဝိဇ္ဇာက္ခန္ဓော. ပဒါလိတောတိ ဉာဏေန ဘိန္နော. တတိယံ.