၂. အယျိကာသုတ္တဝဏ္ဏနာ

၁၃၃. ဒုတိယေ ဇိဏ္ဏာတိ ဇရာဇိဏ္ဏာ. ဝုဍ္ဎာတိ ဝယောဝုဍ္ဎာ. မဟလ္လိကာတိ ဇာတိမဟလ္လိကာ. အဒ္ဓဂတာတိ အဒ္ဓံ စိရကာလံ အတိက္ကန္တာ. ဝယောအနုပ္ပတ္တာတိ ပစ္ဆိမဝယံ သမ္ပတ္တာ. ပိယာ မနာပါတိ ရညော ကိရ မာတရိ မတာယ အယျိကာ မာတုဋ္ဌာနေ ဌတွာ ပဋိဇဂ္ဂိ၊ တေနဿ အယျိကာယ ဗလဝပေမံ ဥပ္ပဇ္ဇိ. တသ္မာ ဧဝမာဟ. ဟတ္ထိရတနေနာတိ သတသဟဿဂ္ဃနကော ဟတ္ထီ သတသဟဿဂ္ဃနကေန အလင်္ကာရေန အလင်္ကတော ဟတ္ထိရတနံ နာမ. အဿရတနေပိ ဧသေဝ နယော. ဂါမဝရောပိ သတသဟဿုဋ္ဌာနကဂါမောဝ. သဗ္ဗာနိ တာနိ ဘေဒနဓမ္မာနီတိ တေသု ဟိ ကိဉ္စိ ကရိယမာနမေဝ ဘိဇ္ဇတိ၊ ကိဉ္စိ ကတပရိယောသိတံ စက္ကတော အနပနီတမေဝ၊ ကိဉ္စိ အပနေတွာ ဘူမိယံ ဌပိတမတ္တံ၊ ကိဉ္စိ တတော ပရံ၊ ဧဝမေဝ သတ္တေသုပိ ကောစိ ပဋိသန္ဓိံ ဂဟေတွာ မရတိ၊ ကောစိ မူဠှဂဗ္ဘာယ မာတရိ မာတုကုစ္ဆိတော အနိက္ခန္တောဝ၊ ကောစိ နိက္ခန္တမတ္တော၊ ကောစိ တတော ပရန္တိ. တသ္မာ ဧဝမာဟ. ဒုတိယံ.

၁၃၄. တတိယေ သဗ္ဗံ ဥတ္တာနမေဝ. တတိယံ.