၃. တတိယဝဂ္ဂေါ

၁. ပုဂ္ဂလသုတ္တဝဏ္ဏနာ

၁၃၂. တတိယဝဂ္ဂဿ ပဌမေ ‘‘နီစေ ကုလေ ပစ္စာဇာတော’’တိအာဒိကေန တမေန ယုတ္တောတိ တမော. ကာယဒုစ္စရိတာဒီဟိ ပုန နိရယတမူပဂမနတော တမပရာယဏော. ဣတိ ဥဘယေနပိ ခန္ဓတမောဝ ကထိတော ဟောတိ. ‘‘ဥစ္စေ ကုလေ ပစ္စာဇာတော’’တိအာဒိကေန ဇောတိနာ ယုတ္တတော ဇောတိ၊ အာလောကီဘူတောတိ ဝုတ္တံ ဟောတိ. ကာယသုစရိတာဒီဟိ ပုန သဂ္ဂူပပတ္တိဇောတိဘာဝူပဂမနတော ဇောတိပရာယဏော. ဣမိနာ နယေန ဣတရေပိ ဒွေ ဝေဒိတဗ္ဗာ.

ဝေနကုလေတိ ဝိလီဝကာရကုလေ. နေသာဒကုလေတိ မိဂလုဒ္ဒကာဒီနံ ကုလေ. ရထကာရကုလေတိ စမ္မကာရကုလေ. ပုက္ကုသကုလေတိ ပုပ္ဖဆဍ္ဍကကုလေ. ကသိရဝုတ္တိကေတိ ဒုက္ခဝုတ္တိကေ. ဒုဗ္ဗဏ္ဏောတိ ပံသုပိသာစကော ဝိယ ဈာမခါဏုဝဏ္ဏော. ဒုဒ္ဒသိကောတိ ဝိဇာတမာတုယာပိ အမနာပဒဿနော. ဩကောဋိမကောတိ လကုဏ္ဍကော. ကာဏောတိ ဧကက္ခိကာဏော ဝါ ဥဘယက္ခိကာဏော ဝါ. ကုဏီတိ ဧကဟတ္ထကုဏီ ဝါ ဥဘယဟတ္ထကုဏီ ဝါ. ခဉ္ဇောတိ ဧကပါဒခဉ္ဇော ဝါ ဥဘယပါဒခဉ္ဇော ဝါ. ပက္ခဟတောတိ ဟတပက္ခော ပီဌသပ္ပီ. ပဒီပေယျဿာတိ တေလကပလ္လကာဒိနော ပဒီပဥပကရဏဿ. ဧဝံ ခေါ၊ မဟာရာဇာတိ ဧတ္ထ ဧကော ပုဂ္ဂလော ဗဟိဒ္ဓါ အာလောကံ အဒိသွာ မာတုကုစ္ဆိသ္မိံယေဝ ကာလံ ကတွာ အပါယေသု နိဗ္ဗတ္တန္တော သကလံ ကပ္ပမ္ပိ သံသရတိ၊ သောပိ တမောတမပရာယဏောဝ. သော ပန ကုဟကပုဂ္ဂလော ဘဝေယျ. ကုဟကဿ ဟိ ဧဝရူပါ နိဗ္ဗတ္တိ ဟောတီတိ ဝုတ္တံ.

ဧတ္ထ စ ‘‘နီစေ ကုလေ ပစ္စာဇာတော ဟောတိ စဏ္ဍာလကုလေ ဝါ’’တိအာဒီဟိ အာဂမနဝိပတ္တိ စေဝ ပုဗ္ဗုပ္ပန္နပစ္စယဝိပတ္တိ စ ဒဿိတာ. ဒလိဒ္ဒေတိအာဒီဟိ ပဝတ္တပစ္စယဝိပတ္တိ. ကသိရဝုတ္တိကေတိအာဒီဟိ အာဇီဝုပါယဝိပတ္တိ. ဒုဗ္ဗဏ္ဏောတိအာဒီဟိ အတ္တဘာဝဝိပတ္တိ. ဗဝှါဗာဓောတိအာဒီဟိ ဒုက္ခကာရဏသမာယောဂေါ. န လာဘီတိအာဒီဟိ သုခကာရဏဝိပတ္တိ စေဝ ဥပဘောဂဝိပတ္တိ စ. ကာယေန ဒုစ္စရိတန္တိအာဒီဟိ တမပရာယဏဘာဝဿ ကာရဏသမာယောဂေါ. ကာယဿ ဘေဒါတိအာဒီဟိ သမ္ပရာယိကတမူပဂမော. သုက္ကပက္ခော ဝုတ္တပဋိပက္ခနယေန ဝေဒိတဗ္ဗော.

အက္ကောသတီတိ ဒသဟိ အက္ကောသဝတ္ထူဟိ အက္ကောသတိ. ပရိဘာသတီတိ၊ ‘‘ကသ္မာ တိဋ္ဌထ? ကိံ တုမှေဟိ အမှာကံ ကသိကမ္မာဒီနိ ကတာနီ’’တိအာဒီဟိ? ပရိဘဝဝစနေဟိ ပရိဘာသတိ. ရောသကောတိ ဃဋ္ဋကော. အဗျဂ္ဂမနသောတိ ဧကဂ္ဂစိတ္တော. ပဌမံ.

၂. အယျိကာသုတ္တဝဏ္ဏနာ

၁၃၃. ဒုတိယေ ဇိဏ္ဏာတိ ဇရာဇိဏ္ဏာ. ဝုဍ္ဎာတိ ဝယောဝုဍ္ဎာ. မဟလ္လိကာတိ ဇာတိမဟလ္လိကာ. အဒ္ဓဂတာတိ အဒ္ဓံ စိရကာလံ အတိက္ကန္တာ. ဝယောအနုပ္ပတ္တာတိ ပစ္ဆိမဝယံ သမ္ပတ္တာ. ပိယာ မနာပါတိ ရညော ကိရ မာတရိ မတာယ အယျိကာ မာတုဋ္ဌာနေ ဌတွာ ပဋိဇဂ္ဂိ၊ တေနဿ အယျိကာယ ဗလဝပေမံ ဥပ္ပဇ္ဇိ. တသ္မာ ဧဝမာဟ. ဟတ္ထိရတနေနာတိ သတသဟဿဂ္ဃနကော ဟတ္ထီ သတသဟဿဂ္ဃနကေန အလင်္ကာရေန အလင်္ကတော ဟတ္ထိရတနံ နာမ. အဿရတနေပိ ဧသေဝ နယော. ဂါမဝရောပိ သတသဟဿုဋ္ဌာနကဂါမောဝ. သဗ္ဗာနိ တာနိ ဘေဒနဓမ္မာနီတိ တေသု ဟိ ကိဉ္စိ ကရိယမာနမေဝ ဘိဇ္ဇတိ၊ ကိဉ္စိ ကတပရိယောသိတံ စက္ကတော အနပနီတမေဝ၊ ကိဉ္စိ အပနေတွာ ဘူမိယံ ဌပိတမတ္တံ၊ ကိဉ္စိ တတော ပရံ၊ ဧဝမေဝ သတ္တေသုပိ ကောစိ ပဋိသန္ဓိံ ဂဟေတွာ မရတိ၊ ကောစိ မူဠှဂဗ္ဘာယ မာတရိ မာတုကုစ္ဆိတော အနိက္ခန္တောဝ၊ ကောစိ နိက္ခန္တမတ္တော၊ ကောစိ တတော ပရန္တိ. တသ္မာ ဧဝမာဟ. ဒုတိယံ.

၁၃၄. တတိယေ သဗ္ဗံ ဥတ္တာနမေဝ. တတိယံ.

၄. ဣဿတ္တသုတ္တဝဏ္ဏနာ

၁၃၅. စတုတ္ထဿ အဋ္ဌုပ္ပတ္တိကော နိက္ခေပေါ. ဘဂဝတော ကိရ ပဌမဗောဓိယံ မဟာလာဘသက္ကာရော ဥဒပါဒိ ဘိက္ခုသံဃဿ စ. တိတ္ထိယာ ဟတလာဘသက္ကာရာ ဟုတွာ ကုလေသု ဧဝံ ကန္ထေန္တာ ဝိစရန္တိ – ‘‘သမဏော ဂေါတမော ဧဝမာဟ၊ ‘မယှမေဝ ဒါနံ ဒါတဗ္ဗံ၊ န အညေသံ ဒါနံ ဒါတဗ္ဗံ. မယှမေဝ သာဝကာနံ ဒါနံ ဒါတဗ္ဗံ၊ န အညေသံ သာဝကာနံ ဒါနံ ဒါတဗ္ဗံ. မယှမေဝ ဒိန္နံ မဟပ္ဖလံ၊ န အညေသံ ဒိန္နံ မဟပ္ဖလံ. မယှမေဝ သာဝကာနံ ဒိန္နံ မဟပ္ဖလံ၊ န အညေသံ သာဝကာနံ ဒိန္နံ မဟပ္ဖလ’န္တိ. ယုတ္တံ နု ခေါ သယမ္ပိ ဘိက္ခာစာရနိဿိတေန ပရေသံ ဘိက္ခာစာရနိဿိတာနံ စတုန္နံ ပစ္စယာနံ အန္တရာယံ ကာတုံ၊ အယုတ္တံ ကရောတိ အနနုစ္ဆဝိက’’န္တိ. သာ ကထာ ပတ္ထရမာနာ ရာဇကုလံ သမ္ပတ္တာ. ရာဇာ သုတွာ စိန္တေသိ – ‘‘အဋ္ဌာနမေတံ ယံ တထာဂတော ပရေသံ လာဘန္တရာယံ ကရေယျ. ဧတေ တထာဂတဿ အလာဘာယ အယသာယ ပရိသက္ကန္တိ. သစာဟံ ဣဓေဝ ဌတွာ ‘မာ ဧဝံ အဝေါစုတ္ထ၊ န သတ္ထာ ဧဝံ ကထေတီ’တိ ဝဒေယျံ၊ ဧဝံ သာ ကထာ နိဇ္ဈတ္တိံ န ဂစ္ဆေယျ၊ ဣမဿ မဟာဇနဿ သန္နိပတိတကာလေယေဝ နံ နိဇ္ဈာပေဿာမီ’’တိ ဧကံ ဆဏဒိဝသံ အာဂမေန္တော တုဏှီ အဟောသိ.

အပရေန သမယေန မဟာဆဏေ သမ္ပတ္တေ ‘‘အယံ ဣမဿ ကာလော’’တိ နဂရေ ဘေရိံ စရာပေသိ – ‘‘သဒ္ဓါ ဝါ အဿဒ္ဓါ ဝါ သမ္မာဒိဋ္ဌိကာ ဝါ မိစ္ဆာဒိဋ္ဌိကာ ဝါ ဂေဟရက္ခကေ ဒါရကေ ဝါ မာတုဂါမေ ဝါ ဌပေတွာ အဝသေသာ ယေ ဝိဟာရံ နာဂစ္ဆန္တိ၊ ပညာသံ ဒဏ္ဍော’’တိ. သယမ္ပိ ပါတောဝ နှတွာ ကတပါတရာသော သဗ္ဗာဘရဏပဋိမဏ္ဍိတော မဟတာ ဗလကာယေန သဒ္ဓိံ ဝိဟာရံ အဂမာသိ. ဂစ္ဆန္တော စ စိန္တေသိ – ‘‘ဘဂဝါ တုမှေ ကိရ ဧဝံ ဝဒထ ‘မယှမေဝ ဒါနံ ဒါတဗ္ဗံ။ပေ။ န အညေသံ သာဝကာနံ ဒိန္နံ မဟပ္ဖလ’န္တိ ဧဝံ ပုစ္ဆိတုံ အယုတ္တံ၊ ပဉှမေဝ ပုစ္ဆိဿာမိ၊ ပဉှံ ကထေန္တော စ မေ ဘဂဝါ အဝသာနေ တိတ္ထိယာနံ ဝါဒံ ဘဉ္ဇိဿတီ’’တိ. သော ပဉှံ ပုစ္ဆန္တော ကတ္ထ နု ခေါ၊ ဘန္တေ၊ ဒါနံ ဒါတဗ္ဗန္တိ အာဟ. ယတ္ထာတိ ယသ္မိံ ပုဂ္ဂလေ စိတ္တံ ပသီဒတိ၊ တသ္မိံ ဒါတဗ္ဗံ၊ တဿ ဝါ ဒါတဗ္ဗန္တိ အတ္ထော.

ဧဝံ ဝုတ္တေ ရာဇာ ယေဟိ မနုဿေဟိ တိတ္ထိယာနံ ဝစနံ အာရောစိတံ၊ တေ ဩလောကေသိ. တေ ရညာ ဩလောကိတမတ္တာဝ မင်္ကုဘူတာ အဓောမုခါ ပါဒင်္ဂုဋ္ဌကေန ဘူမိံ လေခမာနာ အဋ္ဌံသု. ရာဇာ – ‘‘ဧကပဒေနေဝ၊ ဘန္တေ၊ ဟတာ တိတ္ထိယာ’’တိ မဟာဇနံ သာဝေန္တော မဟာသဒ္ဒေန အဘာသိ. ဧဝဉ္စ ပန ဘာသိတွာ – ‘‘ဘဂဝါ စိတ္တံ နာမ နိဂဏ္ဌာစေလကပရိဗ္ဗာဇကာဒီသု ယတ္ထ ကတ္ထစိ ပသီဒတိ၊ ကတ္ထ ပန၊ ဘန္တေ၊ ဒိန္နံ မဟပ္ဖလ’’န္တိ ပုစ္ဆိ. အညံ ခေါ ဧတန္တိ၊ ‘‘မဟာရာဇ၊ အညံ တယာ ပဌမံ ပုစ္ဆိတံ၊ အညံ ပစ္ဆာ၊ သလ္လက္ခေဟိ ဧတံ၊ ပဉှာကထနံ ပန မယှံ ဘာရော’’တိ ဝတွာ သီလဝတော ခေါတိအာဒိမာဟ. တတ္ထ ဣဓ တျဿာတိ ဣဓ တေ အဿ. သမုပဗျူဠှောတိ ရာသိဘူတော. အသိက္ခိတောတိ ဓနုသိပ္ပေ အသိက္ခိတော. အကတဟတ္ထောတိ မုဋ္ဌိဗန္ဓာဒိဝသေန အသမ္ပာဒိတဟတ္ထော. အကတယောဂ္ဂေါတိ တိဏပုဉ္ဇမတ္တိကာပုဉ္ဇာဒီသု အကတပရိစယော. အကတူပါသနောတိ ရာဇရာဇမဟာမတ္တာနံ အဒဿိတသရက္ခေပေါ. ဆမ္ဘီတိ ပဝေဓိတကာယော.

ကာမစ္ဆန္ဒော ပဟီနောတိအာဒီသု အရဟတ္တမဂ္ဂေန ကာမစ္ဆန္ဒော ပဟီနော ဟောတိ၊ အနာဂါမိမဂ္ဂေန ဗျာပါဒေါ၊ အရဟတ္တမဂ္ဂေနေဝ ထိနမိဒ္ဓံ၊ တထာ ဥဒ္ဓစ္စံ၊ တတိယေနေဝ ကုက္ကုစ္စံ၊ ပဌမမဂ္ဂေန ဝိစိကိစ္ဆာ ပဟီနာ ဟောတိ. အသေက္ခေန သီလက္ခန္ဓေနာတိ အသေက္ခဿ သီလက္ခန္ဓော အသေက္ခော သီလက္ခန္ဓော နာမ. ဧသ နယော သဗ္ဗတ္ထ. ဧတ္ထ စ ပုရိမေဟိ စတူဟိ ပဒေဟိ လောကိယလောကုတ္တရသီလသမာဓိပညာဝိမုတ္တိယော ကထိတာ. ဝိမုတ္တိဉာဏဒဿနံ ပစ္စဝေက္ခဏဉာဏံ ဟောတိ၊ တံ လောကိယမေဝ.

ဣဿတ္တန္တိ ဥသုသိပ္ပံ. ဗလဝီရိယန္တိ ဧတ္ထ ဗလံ နာမ ဝါယောဓာတု၊ ဝီရိယံ ကာယိကစေတသိကဝီရိယမေဝ. ဘရေတိ ဘရေယျ. နာသူရံ ဇာတိပစ္စယာတိ၊ ‘‘အယံ ဇာတိသမ္ပန္နော’’တိ ဧဝံ ဇာတိကာရဏာ အသူရံ န ဘရေယျ.

ခန္တိသောရစ္စန္တိ ဧတ္ထ ခန္တီတိ အဓိဝါသနခန္တိ၊ သောရစ္စန္တိ အရဟတ္တံ. ဓမ္မာတိ ဧတေ ဒွေ ဓမ္မာ. အဿမေတိ အာဝသထေ. ဝိဝနေတိ အရညဋ္ဌာနေ၊ နိရုဒကေ အရညေ စတုရဿပေါက္ခရဏိအာဒီနိ ကာရယေတိ အတ္ထော. ဒုဂ္ဂေတိ ဝိသမဋ္ဌာနေ. သင်္ကမနာနီတိ ပဏ္ဏာသဟတ္ထသဋ္ဌိဟတ္ထာနိ သမောကိဏ္ဏပရိသုဒ္ဓဝါလိကာနိ သင်္ကမနာနိ ကရေယျ.

ဣဒါနိ ဧတေသု အရညသေနာသနေသု ဝသန္တာနံ ဘိက္ခူနံ ဘိက္ခာစာရဝတ္တံ အာစိက္ခန္တော အန္နံ ပါနန္တိအာဒိမာဟ. တတ္ထ သေနာသနာနီတိ မဉ္စပီဌာဒီနိ. ဝိပ္ပသန္နေနာတိ ခီဏာသဝဿ ဒေန္တောပိ သကင်္ခေန ကိလေသမလိနေန စိတ္တေန အဒတွာ ဝိပ္ပသန္နေနေဝ စိတ္တေန ဒဒေယျ. ထနယန္တိ ဂဇ္ဇန္တော. သတက္ကကူတိ သတသိခရော၊ အနေကကူဋောတိ အတ္ထော. အဘိသင်္ခစ္စာတိ အဘိသင်္ခရိတွာ သမောဓာနေတွာ ရာသိံ ကတွာ.

အာမောဒမာနောတိ တုဋ္ဌမာနသော ဟုတွာ. ပကိရေတီတိ ဒါနဂ္ဂေ ဝိစိရတိ၊ ပကိရန္တော ဝိယ ဝါ ဒါနံ ဒေတိ. ပုညဓာရာတိ အနေကဒါနစေတနာမယာ ပုညဓာရာ. ဒါတာရံ အဘိဝဿတီတိ ယထာ အာကာသေ သမုဋ္ဌိတမေဃတော နိက္ခန္တာ ဥဒကဓာရာ ပထဝိံ သိနေဟယန္တီ တေမေန္တီ ကိလေဒယန္တီ အဘိဝဿတိ၊ ဧဝမေဝ အယမ္ပိ ဒါယကဿ အဗ္ဘန္တရေ ဥပ္ပန္နာ ပုညဓာရာ တမေဝ ဒါတာရံ အန္တော သိနေဟေတိ ပူရေတိ အဘိသန္ဒေတိ. တေန ဝုတ္တံ ‘‘ဒါတာရံ အဘိဝဿတီ’’တိ. စတုတ္ထံ.

၅. ပဗ္ဗတူပမသုတ္တဝဏ္ဏနာ

၁၃၆. ပဉ္စမေ မုဒ္ဓါဝသိတ္တာနန္တိ ခတ္တိယာဘိသေကေန မုဒ္ဓနိ အဝသိတ္တာနံ ကတာဘိသေကာနံ. ကာမဂေဓပရိယုဋ္ဌိတာနန္တိ ကာမေသု ဂေဓေန ပရိယုဋ္ဌိတာနံ အဘိဘူတာနံ. ဇနပဒတ္ထာဝရိယပ္ပတ္တာနန္တိ ဇနပဒေ ထိရဘာဝပ္ပတ္တာနံ. ရာဇကရဏီယာနီတိ ရာဇကမ္မာနိ ရာဇူဟိ ကတ္တဗ္ဗကိစ္စာနိ. တေသု ခွာဟန္တိ တေသု အဟံ. ဥသုက္ကမာပန္နောတိ ဗျာပါရံ အာပန္နော. ဧသ ကိရ ရာဇာ ဒိဝသဿ တိက္ခတ္တုံ ဘဂဝတော ဥပဋ္ဌာနံ ဂစ္ဆတိ၊ အန္တရာဂမနာနိ ဗဟူနိပိ ဟောန္တိ. တဿ နိဗဒ္ဓံ ဂစ္ဆတော ဗလကာယော မဟာပိ ဟောတိ အပ္ပေါပိ. အထေကဒိဝသံ ပဉ္စသတာ စောရာ စိန္တယိံသု – ‘‘အယံ ရာဇာ အဝေလာယ အပ္ပေန ဗလေန သမဏဿ ဂေါတမဿ ဥပဋ္ဌာနံ ဂစ္ဆတိ၊ အန္တရာမဂ္ဂေ နံ ဂဟေတွာ ရဇ္ဇံ ဂဏှိဿာမာ’’တိ. တေ အန္ဓဝနေ နိလီယိံသု. ရာဇာနော စ နာမ မဟာပုညာ ဟောန္တိ. အထ တေသံယေဝ အဗ္ဘန္တရတော ဧကော ပုရိသော နိက္ခမိတွာ ရညော အာရောစေသိ. ရာဇာ မဟန္တံ ဗလကာယံ အာဒါယ အန္ဓဝနံ ပရိဝါရေတွာ တေ သဗ္ဗေ ဂဟေတွာ အန္ဓဝနတော ယာဝ နဂရဒွါရာ မဂ္ဂဿ ဥဘောသု ပဿေသု ယထာ အညမညံ စက္ခုနာ စက္ခုံ ဥပနိဗန္ဓိတွာ ဩလောကေန္တိ၊ ဧဝံ အာသန္နာနိ သူလာနိ ရောပါပေတွာ သူလေသု ဥတ္တာသေသိ. ဣဒံ သန္ဓာယ ဧဝမာဟ.

အထ သတ္ထာ စိန္တေသိ – ‘‘သစာဟံ ဝက္ခာမိ၊ ‘မဟာရာဇ၊ မာဒိသေ နာမ သမ္မာသမ္ဗုဒ္ဓေ ဓုရဝိဟာရေ ဝသန္တေ တယာ ဧဝရူပံ ဒါရုဏံ ကမ္မံ ကတံ၊ အယုတ္တံ တေ ကတ’န္တိ၊ အထာယံ ရာဇာ မင်္ကု ဟုတွာ သန္ထမ္ဘိတုံ န သက္ကုဏေယျ၊ ပရိယာယေန ဓမ္မံ ကထေန္တဿေဝ မေ သလ္လက္ခေဿတီ’’တိ ဓမ္မဒေသနံ အာရဘန္တော တံ ကိံ မညသီတိအာဒိမာဟ. တတ္ထ သဒ္ဓါယိကောတိ သဒ္ဓါတဗ္ဗော၊ ယဿ တွံ ဝစနံ သဒ္ဒဟသီတိ အတ္ထော. ပစ္စယိကောတိ တဿေဝ ဝေဝစနံ၊ ယဿ ဝစနံ ပတ္တိယာယသီတိ အတ္ထော. အဗ္ဘသမန္တိ အာကာသသမံ. နိပ္ပေါထေန္တော အာဂစ္ဆတီတိ ပထဝိတလတော ယာဝ အကနိဋ္ဌဗြဟ္မလောကာ သဗ္ဗေ သတ္တေ သဏှကရဏီယံ တိဏစုဏ္ဏံ ဝိယ ကရောန္တော ပိသန္တော အာဂစ္ဆတိ.

အညတြ ဓမ္မစရိယာယာတိ ဌပေတွာ ဓမ္မစရိယံ အညံ ကာတဗ္ဗံ နတ္ထိ၊ ဒသကုသလကမ္မပထသင်္ခါတာ ဓမ္မစရိယာဝ ကတ္တဗ္ဗာ၊ ဘန္တေတိ – သမစရိယာဒီနိ တဿေဝ ဝေဝစနာနိ. အာရောစေမီတိ အာစိက္ခာမိ. ပဋိဝေဒယာမီတိ ဇာနာပေမိ. အဓိဝတ္တတီတိ အဇ္ဈောတ္ထရတိ. ဟတ္ထိယုဒ္ဓါနီတိ နာဠာဂိရိသဒိသေ ဟေမကပ္ပနေ နာဂေ အဘိရုယှ ယုဇ္ဈိတဗ္ဗယုဒ္ဓါနိ. ဂတီတိ နိပ္ဖတ္တိ. ဝိသယောတိ ဩကာသော၊ သမတ္ထဘာဝေါ ဝါ. န ဟိ သက္ကာ တေဟိ ဇရာမရဏံ ပဋိဗာဟိတုံ. မန္တိနော မဟာမတ္တာတိ မန္တသမ္ပန္နာ မဟောသဓဝိဓုရပဏ္ဍိတာဒိသဒိသာ မဟာအမစ္စာ. ဘူမိဂတန္တိ မဟာလောဟကုမ္ဘိယော ပူရေတွာ ဘူမိယံ ဌပိတံ. ဝေဟာသဋ္ဌန္တိ စမ္မပသိဗ္ဗကေ ပူရေတွာ တုလာသင်္ဃာဋာဒီသု လဂ္ဂေတွာ စေဝ နိယျုဟာဒီသု စ ပူရေတွာ ဌပိတံ. ဥပလာပေတုန္တိ အညမညံ ဘိန္ဒိတုံ. ယထာ ဒွေ ဇနာ ဧကေန မဂ္ဂေန န ဂစ္ဆန္တိ ဧဝံ ကာတုံ.

နဘံ အာဟစ္စာတိ အာကာသံ ပူရေတွာ. ဧဝံ ဇရာ စ မစ္စု စာတိ ဣဓ ဒွေယေဝ ပဗ္ဗတာ ဂဟိတာ၊ ရာဇောဝါဒေ ပန ‘‘ဇရာ အာဂစ္ဆတိ သဗ္ဗယောဗ္ဗနံ ဝိလုမ္ပမာနာ’’တိ ဧဝံ ဇရာ မရဏံ ဗျာဓိ ဝိပတ္တီတိ စတ္တာရောပေတေ အာဂတာဝ. တသ္မာတိ ယသ္မာ ဟတ္ထိယုဒ္ဓါဒီဟိ ဇရာမရဏံ ဇိနိတုံ န သက္ကာ၊ တသ္မာ. သဒ္ဓံ နိဝေသယေတိ သဒ္ဓံ နိဝေသေယျ၊ ပတိဋ္ဌာပေယျာတိ. ပဉ္စမံ.

တတိယော ဝဂ္ဂေါ.

ဣတိ သာရတ္ထပ္ပကာသိနိယာ

သံယုတ္တနိကာယ-အဋ္ဌကထာယ

ကောသလသံယုတ္တဝဏ္ဏနာ နိဋ္ဌိတာ.