၆. မလ္လိကာသုတ္တဝဏ္ဏနာ

၁၂၇. ဆဋ္ဌေ ဥပသင်္ကမီတိ မလ္လိကာယ ဒေဝိယာ ဂဗ္ဘဝုဋ္ဌာနကာလေ သူတိဃရံ ပဋိဇဂ္ဂါပေတွာ အာရက္ခံ ဒတွာ ဥပသင်္ကမိ. အနတ္တမနော အဟောသီတိ၊ ‘‘ဒုဂ္ဂတကုလဿ မေ ဓီတု မဟန္တံ ဣဿရိယံ ဒိန္နံ၊ သစေ ပုတ္တံ အလဘိဿ၊ မဟန္တံ သက္ကာရံ အဓိဂမိဿ၊ တတော ဒါနိ ပရိဟီနာ’’တိ အနတ္တမနော အဟောသိ. သေယျာတိ ဒန္ဓပညသ္မာ ဧလမူဂပုတ္တတော ဧကစ္စာ ဣတ္ထီယေဝ သေယျာ. ပေါသာတိ ပေါသေဟိ. ဇနာဓိပါတိ ဇနာဓိဘုံ ရာဇာနံ အာလပတိ. သဿုဒေဝါတိ သဿုသသုရဒေဝတာ. ဒိသမ္ပတီတိ ဒိသာဇေဋ္ဌကာ. တာဒိသာ သုဘဂိယာတိ တာဒိသာယ သုဘရိယာယ. ဆဋ္ဌံ.