၄. နန္ဒနသုတ္တဝဏ္ဏနာ

၉၅. စတုတ္ထေ ဂေါတမာတိ ဘဂဝန္တံ ဂေါတ္တေန အာလပတိ. အနာဝဋန္တိ တထာဂတဿ ဟိ သဗ္ဗညုတညာဏံ ပေသေန္တဿ ရုက္ခော ဝါ ပဗ္ဗတော ဝါ အာဝရိတုံ သမတ္ထော နာမ နတ္ထိ. တေနာဟ ‘‘အနာဝဋ’’န္တိ. ဣတိ တထာဂတံ ထောမေတွာ ဒေဝလောကေ အဘိသင်္ခတပဉှံ ပုစ္ဆန္တော ကထံဝိဓန္တိအာဒိမာဟ. တတ္ထ ဒုက္ခမတိစ္စ ဣရိယတီတိ ဒုက္ခံ အတိက္ကမိတွာ ဝိဟရတိ. သီလဝါတိ လောကိယလောကုတ္တရေန သီလေန သမန္နာဂတော ခီဏာသဝေါ. ပညာဒယောပိ မိဿကာယေဝ ဝေဒိတဗ္ဗာ. ပူဇယန္တီတိ ဂန္ဓပုပ္ဖါဒီဟိ ပူဇေန္တိ. စတုတ္ထံ.