၁. စန္ဒိမသသုတ္တဝဏ္ဏနာ

၉၂. ဒုတိယဝဂ္ဂဿ ပဌမေ ကစ္ဆေဝါတိ ကစ္ဆေ ဝိယ. ကစ္ဆေတိ ပဗ္ဗတကစ္ဆေပိ နဒီကစ္ဆေပိ. ဧကောဒိ နိပကာတိ ဧကဂ္ဂစိတ္တာ စေဝ ပညာနေပက္ကေန စ သမန္နာဂတာ. သတာတိ သတိမန္တော. ဣဒံ ဝုတ္တံ ဟောတိ – ယေ ဈာနာနိ လဘိတွာ ဧကောဒီ နိပကာ သတာ ဝိဟရန္တိ၊ တေ အမကသေ ပဗ္ဗတကစ္ဆေ ဝါ နဒီကစ္ဆေ ဝါ မဂါ ဝိယ သောတ္ထိံ ဂမိဿန္တီတိ. ပါရန္တိ နိဗ္ဗာနံ. အမ္ဗုဇောတိ မစ္ဆော. ရဏဉ္ဇဟာတိ ကိလေသဉ္ဇဟာ. ယေပိ ဈာနာနိ လဘိတွာ အပ္ပမတ္တာ ကိလေသေ ဇဟန္တိ၊ တေ သုတ္တဇာလံ ဘိန္ဒိတွာ မစ္ဆာ ဝိယ နိဗ္ဗာနံ ဂမိဿန္တီတိ ဝုတ္တံ ဟောတိ. ပဌမံ.