၇. ပဉ္စာလစဏ္ဍသုတ္တဝဏ္ဏနာ

၈၈. သတ္တမေ သမ္ဗာဓေတိ နီဝရဏသမ္ဗာဓံ ကာမဂုဏသမ္ဗာဓန္တိ ဒွေ သမ္ဗာဓာ. တေသု ဣဓ နီဝရဏသမ္ဗာဓံ အဓိပ္ပေတံ. ဩကာသန္တိ ဈာနဿေတံ နာမံ. ပဋိလီနနိသဘောတိ ပဋိလီနသေဋ္ဌော. ပဋိလီနော နာမ ပဟီနမာနော ဝုစ္စတိ. ယထာဟ – ‘‘ကထဉ္စ၊ ဘိက္ခဝေ၊ ဘိက္ခု ပဋိလီနော ဟောတိ. ဣဓ၊ ဘိက္ခဝေ၊ ဘိက္ခုနော အသ္မိမာနော ပဟီနော ဟောတိ ဥစ္ဆိန္နမူလော တာလာဝတ္ထုကတော အနဘာဝံကတော အာယတိံ အနုပ္ပါဒဓမ္မော’’တိ (အ. နိ. ၄.၃၈၊ မဟာနိ. ၈၇). ပစ္စလတ္ထံသူတိ ပဋိလဘိံသု. သမ္မာ တေတိ ယေ နိဗ္ဗာနပတ္တိယာ သတိံ ပဋိလဘိံသု၊ တေ လောကုတ္တရသမာဓိနာပိ သုသမာဟိတာတိ မိဿကဇ္ဈာနံ ကထိတံ. သတ္တမံ.