၁. ပဌမဝဂ္ဂေါ

၁. ပဌမကဿပသုတ္တဝဏ္ဏနာ

၈၂. ဒေဝပုတ္တသံယုတ္တဿ ပဌမေ ဒေဝပုတ္တောတိ ဒေဝါနဉှိ အင်္ကေ နိဗ္ဗတ္တာ ပုရိသာ ဒေဝပုတ္တာ နာမ၊ ဣတ္ထိယော ဒေဝဓီတရော နာမ ဟောန္တိ. နာမဝသေန အပါကဋာဝ ‘‘အညတရာ ဒေဝတာ’’တိ ဝုစ္စတိ၊ ပါကဋော ‘‘ဣတ္ထန္နာမော ဒေဝပုတ္တော’’တိ. တသ္မာ ဟေဋ္ဌာ ‘‘အညတရာ ဒေဝတာ’’တိ ဝတွာ ဣဓ ‘‘ဒေဝပုတ္တော’’တိ ဝုတ္တံ. အနုသာသန္တိ အနုသိဋ္ဌိံ. အယံ ကိရ ဒေဝပုတ္တော ဘဂဝတာ သမ္ဗောဓိတော သတ္တမေ ဝဿေ ယမကပါဋိဟာရိယံ ကတွာ တိဒသပုရေ ဝဿံ ဥပဂမ္မ အဘိဓမ္မံ ဒေသေန္တေန ဈာနဝိဘင်္ဂေ – ‘‘ဘိက္ခူတိ သမညာယ ဘိက္ခု၊ ပဋိညာယ ဘိက္ခူ’’တိ (ဝိဘ. ၅၁၀). ဧဝံ ဘိက္ခုနိဒ္ဒေသံ ကထိယမာနံ အဿောသိ. ‘‘ဧဝံ ဝိတက္ကေထ၊ မာ ဧဝံ ဝိတက္ကယိတ္ထ၊ ဧဝံ မနသိကရောထ၊ မာ ဧဝံ မနသာကတ္ထ. ဣဒံ ပဇဟထ၊ ဣဒံ ဥပသမ္ပဇ္ဇ ဝိဟရထာ’’တိ (ပါရာ. ၁၉). ဧဝရူပံ ပန ဘိက္ခုဩဝါဒံ ဘိက္ခုအနုသာသနံ န အဿောသိ. သော တံ သန္ဓာယ – ‘‘ဘိက္ခုံ ဘဂဝါ ပကာသေသိ၊ နော စ ဘိက္ခုနော အနုသာသ’’န္တိ အာဟ.

တေန ဟီတိ ယသ္မာ မယာ ဘိက္ခုနော အနုသိဋ္ဌိ န ပကာသိတာတိ ဝဒသိ၊ တသ္မာ. တညေဝေတ္ထ ပဋိဘာတူတိ တုယှေဝေသာ အနုသိဋ္ဌိပကာသနာ ဥပဋ္ဌာတူတိ. ယော ဟိ ပဉှံ ကထေတုကာမော ဟောတိ၊ န စ သက္ကောတိ သဗ္ဗညုတညာဏေန သဒ္ဓိံ သံသန္ဒိတွာ ကထေတုံ. ယော ဝါ န ကထေတုကာမော ဟောတိ၊ သက္ကောတိ ပန ကထေတုံ. ယော ဝါ နေဝ ကထေတုကာမော ဟောတိ၊ ကထေတုံ န စ သက္ကောတိ. သဗ္ဗေသမ္ပိ တေသံ ဘဂဝါ ပဉှံ ဘာရံ န ကရောတိ. အယံ ပန ဒေဝပုတ္တော ကထေတုကာမော စေဝ၊ သက္ကောတိ စ ကထေတုံ. တသ္မာ တဿေဝ ဘာရံ ကရောန္တော ဘဂဝါ ဧဝမာဟ. သောပိ ပဉှံ ကထေသိ.

တတ္ထ သုဘာသိတဿ သိက္ခေထာတိ သုဘာသိတံ သိက္ခေယျ၊ စတုသစ္စနိဿိတံ ဒသကထာဝတ္ထုနိဿိတံ သတ္တတိံသဗောဓိပက္ခိယနိဿိတံ စတုဗ္ဗိဓံ ဝစီသုစရိတမေဝ သိက္ခေယျ. သမဏူပါသနဿ စာတိ သမဏေဟိ ဥပါသိတဗ္ဗံ သမဏူပါသနံ နာမ အဋ္ဌတိံသဘေဒံ ကမ္မဋ္ဌာနံ၊ တမ္ပိ သိက္ခေယျ ဘာဝေယျာတိ အတ္ထော. ဗဟုဿုတာနံ ဝါ ဘိက္ခူနံ ဥပါသနမ္ပိ သမဏူပါသနံ. တမ္ပိ ‘ကိံ၊ ဘန္တေ၊ ကုသလ’’န္တိအာဒိနာ ပဉှပုစ္ဆနေန ပညာဝုဒ္ဓတ္ထံ သိက္ခေယျ. စိတ္တဝူပသမဿ စာတိ အဋ္ဌသမာပတ္တိဝသေန စိတ္တဝူပသမံ သိက္ခေယျ. ဣတိ ဒေဝပုတ္တေန တိဿော သိက္ခာ ကထိတာ ဟောန္တိ. ပုရိမပဒေန ဟိ အဓိသီလသိက္ခာ ကထိတာ၊ ဒုတိယပဒေန အဓိပညာသိက္ခာ၊ စိတ္တဝူပသမေန အဓိစိတ္တသိက္ခာတိ ဧဝံ ဣမာယ ဂါထာယ သကလမ္ပိ သာသနံ ပကာသိတမေဝ ဟောတိ. ပဌမံ.

၂. ဒုတိယကဿပသုတ္တဝဏ္ဏနာ

၈၃. ဒုတိယေ ဈာယီတိ ဒွီဟိ ဈာနေဟိ ဈာယီ. ဝိမုတ္တစိတ္တောတိ ကမ္မဋ္ဌာနဝိမုတ္တိယာ ဝိမုတ္တစိတ္တော. ဟဒယဿာနုပတ္တိန္တိ အရဟတ္တံ. လောကဿာတိ သင်္ခါရလောကဿ. အနိဿိတောတိ တဏှာဒိဋ္ဌီဟိ အနိဿိတော၊ တဏှာဒိဋ္ဌိယော ဝါ အနိဿိတော. တဒါနိသံသောတိ အရဟတ္တာနိသံသော. ဣဒံ ဝုတ္တံ ဟောတိ – အရဟတ္တာနိသံသော ဘိက္ခု အရဟတ္တံ ပတ္ထေန္တော ဈာယီ ဘဝေယျ၊ သုဝိမုတ္တစိတ္တော ဘဝေယျ၊ လောကဿ ဥဒယဗ္ဗယံ ဉတွာ အနိဿိတော ဘဝေယျ. တန္တိဓမ္မော ပန ဣမသ္မိံ သာသနေ ပုဗ္ဗဘာဂေါတိ. ဒုတိယံ.

၃-၄. မာဃသုတ္တာဒိဝဏ္ဏနာ

၈၄. တတိယေ မာဃောတိ သက္ကဿေတံ နာမံ. သွေဝ ဝတ္တေန အညေ အဘိဘဝိတွာ ဒေဝိဿရိယံ ပတ္တောတိ ဝတြဘူ၊ ဝတြနာမကံ ဝါ အသုရံ အဘိဘဝတီတိ ဝတြဘူ. တတိယံ.

၈၅. စတုတ္ထံ ဝုတ္တတ္ထမေဝ. စတုတ္ထံ.

၅. ဒါမလိသုတ္တဝဏ္ဏနာ

၈၆. ပဉ္စမေ န တေနာသီသတေ ဘဝန္တိ တေန ကာရဏေန ယံ ကိဉ္စိ ဘဝံ န ပတ္ထေတိ. အာယတပဂ္ဂဟော နာမေသ ဒေဝပုတ္တော၊ ခီဏာသဝဿ ကိစ္စဝေါသာနံ နတ္ထိ. ခီဏာသဝေန ဟိ အာဒိတော အရဟတ္တပ္ပတ္တိယာ ဝီရိယံ ကတံ၊ အပရဘာဂေ မယာ အရဟတ္တံ ပတ္တန္တိ မာ တုဏှီ ဘဝတု၊ တထေဝ ဝီရိယံ ဒဠှံ ကရောတု ပရက္ကမတူတိ စိန္တေတွာ ဧဝမာဟ.

အထ ဘဂဝါ ‘‘အယံ ဒေဝပုတ္တော ခီဏာသဝဿ ကိစ္စဝေါသာနံ အကထေန္တော မမ သာသနံ အနိယျာနိကံ ကထေတိ၊ ကိစ္စဝေါသာနမဿ ကထေဿာမီ’’တိ စိန္တေတွာ နတ္ထိ ကိစ္စန္တိအာဒိမာဟ. တီသု ကိရ ပိဋကေသု အယံ ဂါထာ အသံကိဏ္ဏာ. ဘဂဝတာ ဟိ အညတ္ထ ဝီရိယဿ ဒေါသော နာမ ဒဿိတော နတ္ထိ. ဣဓ ပန ဣမံ ဒေဝပုတ္တံ ပဋိဗာဟိတွာ ‘‘ခီဏာသဝေန ပုဗ္ဗဘာဂေ အာသဝက္ခယတ္ထာယ အရညေ ဝသန္တေန ကမ္မဋ္ဌာနံ အာဒါယ ဝီရိယံ ကတံ၊ အပရဘာဂေ သစေ ဣစ္ဆတိ၊ ကရောတု၊ နော စေ ဣစ္ဆတိ၊ ယထာသုခံ ဝိဟရတူ’’တိ ခီဏာသဝဿ ကိစ္စဝေါသာနဒဿနတ္ထံ ဧဝမာဟ. တတ္ထ ဂါဓန္တိ ပတိဋ္ဌံ. ပဉ္စမံ.

၆. ကာမဒသုတ္တဝဏ္ဏနာ

၈၇. ဆဋ္ဌေ ဒုက္ကရန္တိ အယံ ကိရ ဒေဝပုတ္တော ပုဗ္ဗယောဂါဝစရော ဗဟလကိလေသတာယ သပ္ပယောဂေန ကိလေသေ ဝိက္ခမ္ဘေန္တော သမဏဓမ္မံ ကတွာ ပုဗ္ဗူပနိဿယမန္ဒတာယ အရိယဘူမိံ အပ္ပတွာဝ ကာလံ ကတွာ ဒေဝလောကေ နိဗ္ဗတ္တော. သော ‘‘တထာဂတဿ သန္တိကံ ဂန္တွာ ဒုက္ကရဘာဝံ အာရောစေဿာမီ’’တိ အာဂန္တွာ ဧဝမာဟ. တတ္ထ ဒုက္ကရန္တိ ဒသပိ ဝဿာနိ။ပေ။ သဋ္ဌိပိ ယဒေတံ ဧကန္တပရိသုဒ္ဓဿ သမဏဓမ္မဿ ကရဏံ နာမ၊ တံ ဒုက္ကရံ. သေခါတိ သတ္တ သေခါ. သီလသမာဟိတာတိ သီလေန သမာဟိတာ သမုပေတာ. ဌိတတ္တာတိ ပတိဋ္ဌိတသဘာဝါ. ဧဝံ ပုစ္ဆိတပဉှံ ဝိဿဇ္ဇေတွာ ဣဒါနိ ဥပရိပဉှသမုဋ္ဌာပနတ္ထံ အနဂါရိယုပေတဿာတိအာဒိမာဟ. တတ္ထ အနဂါရိယုပေတဿာတိ အနဂါရိယံ နိဂ္ဂေဟဘာဝံ ဥပေတဿ. သတ္တဘူမိကေပိ ဟိ ပါသာဒေ ဝသန္တော ဘိက္ခု ဝုဍ္ဎတရေန အာဂန္တွာ ‘‘မယှံ ဣဒံ ပါပုဏာတီ’’တိ ဝုတ္တေ ပတ္တစီဝရံ အာဒါယ နိက္ခမတေဝ. တသ္မာ ‘‘အနဂါရိယုပေတော’’တိ ဝုစ္စတိ. တုဋ္ဌီတိ စတုပစ္စယသန္တောသော. ဘာဝနာယာတိ စိတ္တဝူပသမဘာဝနာယ.

တေ ဆေတွာ မစ္စုနော ဇာလန္တိ ယေ ရတ္တိန္ဒိဝံ ဣန္ဒြိယူပသမေ ရတာ၊ တေ ဒုဿမာဒဟံ စိတ္တံ သမာဒဟန္တိ. ယေ စ သမာဟိတစိတ္တာ၊ တေ စတုပစ္စယသန္တောသံ ပူရေန္တာ န ကိလမန္တိ. ယေ သန္တုဋ္ဌာ၊ တေ သီလံ ပူရေန္တာ န ကိလမန္တိ. ယေ သီလေ ပတိဋ္ဌိတာ သတ္တ သေခါ၊ တေ အရိယာ မစ္စုနော ဇာလသင်္ခါတံ ကိလေသဇာလံ ဆိန္ဒိတွာ ဂစ္ဆန္တိ. ဒုဂ္ဂမောတိ ‘‘သစ္စမေတံ၊ ဘန္တေ၊ ယေ ဣန္ဒြိယူပသမေ ရတာ၊ တေ ဒုဿမာဒဟံ သမာဒဟန္တိ။ပေ။ ယေ သီလေ ပတိဋ္ဌိတာ၊ တေ မစ္စုနော ဇာလံ ဆိန္ဒိတွာ ဂစ္ဆန္တိ’’. ကိံ န ဂစ္ဆိဿန္တိ? အယံ ပန ဒုဂ္ဂမော ဘဂဝါ ဝိသမော မဂ္ဂေါတိ အာဟ. တတ္ထ ကိဉ္စာပိ အရိယမဂ္ဂေါ နေဝ ဒုဂ္ဂမော န ဝိသမော၊ ပုဗ္ဗဘာဂပဋိပဒါယ ပနဿ ဗဟူ ပရိဿယာ ဟောန္တိ. တသ္မာ ဧဝံ ဝုတ္တော. အဝံသိရာတိ ဉာဏသိရေန အဓောသိရာ ဟုတွာ ပပတန္တိ. အရိယမဂ္ဂံ အာရောဟိတုံ အသမတ္ထတာယေဝ စ တေ အနရိယမဂ္ဂေ ပပတန္တီတိ စ ဝုစ္စန္တိ. အရိယာနံ သမော မဂ္ဂေါတိ သွေဝ မဂ္ဂေါ အရိယာနံ သမော ဟောတိ. ဝိသမေ သမာတိ ဝိသမေပိ သတ္တကာယေ သမာယေဝ. ဆဋ္ဌံ.

၇. ပဉ္စာလစဏ္ဍသုတ္တဝဏ္ဏနာ

၈၈. သတ္တမေ သမ္ဗာဓေတိ နီဝရဏသမ္ဗာဓံ ကာမဂုဏသမ္ဗာဓန္တိ ဒွေ သမ္ဗာဓာ. တေသု ဣဓ နီဝရဏသမ္ဗာဓံ အဓိပ္ပေတံ. ဩကာသန္တိ ဈာနဿေတံ နာမံ. ပဋိလီနနိသဘောတိ ပဋိလီနသေဋ္ဌော. ပဋိလီနော နာမ ပဟီနမာနော ဝုစ္စတိ. ယထာဟ – ‘‘ကထဉ္စ၊ ဘိက္ခဝေ၊ ဘိက္ခု ပဋိလီနော ဟောတိ. ဣဓ၊ ဘိက္ခဝေ၊ ဘိက္ခုနော အသ္မိမာနော ပဟီနော ဟောတိ ဥစ္ဆိန္နမူလော တာလာဝတ္ထုကတော အနဘာဝံကတော အာယတိံ အနုပ္ပါဒဓမ္မော’’တိ (အ. နိ. ၄.၃၈၊ မဟာနိ. ၈၇). ပစ္စလတ္ထံသူတိ ပဋိလဘိံသု. သမ္မာ တေတိ ယေ နိဗ္ဗာနပတ္တိယာ သတိံ ပဋိလဘိံသု၊ တေ လောကုတ္တရသမာဓိနာပိ သုသမာဟိတာတိ မိဿကဇ္ဈာနံ ကထိတံ. သတ္တမံ.

၈. တာယနသုတ္တဝဏ္ဏနာ

၈၉. အဋ္ဌမေ ပုရာဏတိတ္ထကရောတိ ပုဗ္ဗေ တိတ္ထကရော. ဧတ္ထ စ တိတ္ထံ နာမ ဒွါသဋ္ဌိ ဒိဋ္ဌိယော၊ တိတ္ထကရော နာမ တာသံ ဥပ္ပါဒကော သတ္ထာ. သေယျထိဒံ နန္ဒော၊ ဝစ္ဆော၊ ကိသော၊ သံကိစ္စော. ပုရာဏာဒယော ပန တိတ္ထိယာ နာမ. အယံ ပန ဒိဋ္ဌိံ ဥပ္ပါဒေတွာ ကထံ သဂ္ဂေ နိဗ္ဗတ္တောတိ? ကမ္မဝါဒိတာယ. ဧသ ကိရ ဥပေါသထဘတ္တာဒီနိ အဒါသိ၊ အနာထာနံ ဝတ္တံ ပဋ္ဌပေသိ၊ ပတိဿယေ အကာသိ၊ ပေါက္ခရဏိယော ခဏာပေသိ၊ အညမ္ပိ ဗဟုံ ကလျာဏံ အကာသိ. သော တဿ နိဿန္ဒေန သဂ္ဂေ နိဗ္ဗတ္တော၊ သာသနဿ ပန နိယျာနိကဘာဝံ ဇာနာတိ. သော တထာဂတဿ သန္တိကံ ဂန္တွာ သာသနာနုစ္ဆဝိကာ ဝီရိယပ္ပဋိသံယုတ္တာ ဂါထာ ဝက္ခာမီတိ အာဂန္တွာ ဆိန္ဒ သောတန္တိအာဒိမာဟ.

တတ္ထ ဆိန္ဒာတိ အနိယမိတအာဏတ္တိ. သောတန္တိ တဏှာသောတံ. ပရက္ကမ္မာတိ ပရက္ကမိတွာ ဝီရိယံ ကတွာ. ကာမေတိ ကိလေသကာမေပိ ဝတ္ထုကာမေပိ. ပနုဒါတိ နီဟရ. ဧကတ္တန္တိ ဈာနံ. ဣဒံ ဝုတ္တံ ဟောတိ – ကာမေ အဇဟိတွာ မုနိ ဈာနံ န ဥပပဇ္ဇတိ၊ န ပဋိလဘတီတိ အတ္ထော. ကယိရာ စေ ကယိရာထေနန္တိ ယဒိ ဝီရိယံ ကရေယျ၊ ကရေယျာထ၊ တံ ဝီရိယံ န ဩသက္ကေယျ. ဒဠှမေနံ ပရက္ကမေတိ ဒဠှံ ဧနံ ကရေယျ. သိထိလော ဟိ ပရိဗ္ဗာဇောတိ သိထိလဂဟိတာ ပဗ္ဗဇ္ဇာ. ဘိယျော အာကိရတေ ရဇန္တိ အတိရေကံ ဥပရိ ကိလေသရဇံ အာကိရတိ. အကတံ ဒုက္ကဋံ သေယျောတိ ဒုက္ကဋံ အကတမေဝ သေယျော. ယံ ကိဉ္စီတိ န ကေဝလံ ဒုက္ကဋံ ကတွာ ကတသာမညမေဝ၊ အညမ္ပိ ယံ ကိဉ္စိ သိထိလံ ကတံ ဧဝရူပမေဝ ဟောတိ. သံကိလိဋ္ဌန္တိ ဒုက္ကရကာရိကဝတံ. ဣမသ္မိံ ဟိ သာသနေ ပစ္စယဟေတု သမာဒိန္နဓုတင်္ဂဝတံ သံကိလိဋ္ဌမေဝ. သင်္ကဿရန္တိ သင်္ကာယ သရိတံ၊ ‘‘ဣဒမ္ပိ ဣမိနာ ကတံ ဘဝိဿတိ၊ ဣဒမ္ပိ ဣမိနာ’’တိ ဧဝံ အာသင်္ကိတပရိသင်္ကိတံ. အာဒိဗြဟ္မစရိယိကာတိ မဂ္ဂဗြဟ္မစရိယဿ အာဒိဘူတာ ပုဗ္ဗပဓာနဘူတာ. အဋ္ဌမံ.

၉. စန္ဒိမသုတ္တဝဏ္ဏနာ

၉၀. နဝမေ စန္ဒိမာတိ စန္ဒဝိမာနဝါသီ ဒေဝပုတ္တော. သဗ္ဗဓီတိ သဗ္ဗေသု ခန္ဓအာယတနာဒီသု. လောကာနုကမ္ပကာတိ တုယှမ္ပိ ဧတဿပိ တာဒိသာ ဧဝ. သန္တရမာနောဝါတိ တုရိတော ဝိယ. ပမုဉ္စသီတိ အတီတတ္ထေ ဝတ္တမာနဝစနံ. နဝမံ.

၁၀. သူရိယသုတ္တဝဏ္ဏနာ

၉၁. ဒသမေ သူရိယောတိ သူရိယဝိမာနဝါသီ ဒေဝပုတ္တော. အန္ဓကာရေတိ စက္ခုဝိညာဏုပ္ပတ္တိနိဝါရဏေန အန္ဓဘာဝကရဏေ. ဝိရောစတီတိ ဝေရောစနော. မဏ္ဍလီတိ မဏ္ဍလသဏ္ဌာနော. မာ၊ ရာဟု၊ ဂိလီ စရမန္တလိက္ခေတိ အန္တလိက္ခေ စရံ သူရိယံ၊ ရာဟု၊ မာ ဂိလီတိ ဝဒတိ. ကိံ ပနေသ တံ ဂိလတီတိ? အာမ၊ ဂိလတိ. ရာဟုဿ ဟိ အတ္တဘာဝေါ မဟာ၊ ဥစ္စတ္တနေန အဋ္ဌယောဇနသတာဓိကာနိ စတ္တာရိ ယောဇနသဟဿာနိ၊ ဗာဟန္တရမဿ ဒွါဒသယောဇနသတာနိ၊ ဗဟလတ္တေန ဆ ယောဇနသတာနိ၊ သီသံ နဝ ယောဇနသတံ၊ နလာဋံ တိယောဇနသတံ၊ ဘမုကန္တရံ ပဏ္ဏာသယောဇနံ၊ မုခံ ဒွိယောဇနသတံ၊ ဃာနံ တိယောဇနသတံ၊ မုခါဓာနံ တိယောဇနသတဂမ္ဘီရံ ဟတ္ထတလပါဒတလာနိ ပုထုလတော ဒွိယောဇနသတာနိ. အင်္ဂုလိပဗ္ဗာနိ ပဏ္ဏာသ ယောဇနာနိ. သော စန္ဒိမသူရိယေ ဝိရောစမာနေ ဒိသွာ ဣဿာပကတော တေသံ ဂမနဝီထိံ ဩတရိတွာ မုခံ ဝိဝရိတွာ တိဋ္ဌတိ. စန္ဒဝိမာနံ သူရိယဝိမာနံ ဝါ တိယောဇနသတိကေ မဟာနရကေ ပက္ခိတ္တံ ဝိယ ဟောတိ. ဝိမာနေ အဓိဝတ္ထာ ဒေဝတာ မရဏဘယတဇ္ဇိတာ ဧကပ္ပဟာရေနေဝ ဝိရဝန္တိ. သော ပန ဝိမာနံ ကဒါစိ ဟတ္ထေန ဆာဒေတိ၊ ကဒါစိ ဟနုကဿ ဟေဋ္ဌာ ပက္ခိပတိ၊ ကဒါစိ ဇိဝှါယ ပရိမဇ္ဇတိ၊ ကဒါစိ အဝဂဏ္ဍကာရကံ ဘုဉ္ဇန္တော ဝိယ ကပေါလန္တရေ ဌပေတိ. ဝေဂံ ပန ဝါရေတုံ န သက္ကောတိ. သစေ ဝါရေဿာမီတိ ဂဏ္ဍကံ ကတွာ တိဋ္ဌေယျ၊ မတ္ထကံ တဿ ဘိန္ဒိတွာ နိက္ခမေယျ၊ အာကဍ္ဎိတွာ ဝါ နံ ဩနမေယျ. တသ္မာ ဝိမာနေန သဟေဝ ဂစ္ဆတိ. ပဇံ မမန္တိ စန္ဒိမသူရိယာ ကိရ ဒွေပိ ဒေဝပုတ္တာ မဟာသမယသုတ္တကထနဒိဝသေ သောတာပတ္တိဖလံ ပတ္တာ. တေန ဘဂဝါ ‘‘ပဇံ မမ’’န္တိ အာဟ၊ ပုတ္တော မမ ဧသောတိ အတ္ထော. ဒသမံ.

ပဌမော ဝဂ္ဂေါ.