၄. မဏိဘဒ္ဒသုတ္တဝဏ္ဏနာ

၂၃၈. စတုတ္ထေ သုခမေဓတီတိ၊ သုခံ ပဋိလဘတိ. သုဝေ သေယျောတိ သုဝေ သုဝေ သေယျော၊ နိစ္စမေဝ သေယျောတိ အတ္ထော. ဝေရာ န ပရိမုစ္စတီတိ အဟံ သတိမာတိ ဧတ္တကေန ဝေရတော န မုစ္စတိ. ယဿာတိ ယဿ အရဟတော. အဟိံသာယာတိ ကရုဏာယ စေဝ ကရုဏာပုဗ္ဗဘာဂေ စ. မေတ္တံသောတိ သော မေတ္တဉ္စေဝ မေတ္တာပုဗ္ဗဘာဂဉ္စ ဘာဝေတိ. အထ ဝါ အံသောတိ ကောဋ္ဌာသော ဝုစ္စတိ. မေတ္တာ အံသော ဧတဿာတိ မေတ္တံသော. ဣဒံ ဝုတ္တံ ဟောတိ – ယဿ အရဟတော သဗ္ဗကာလံ အဟိံသာယ ရတော မနော၊ ယဿ စ သဗ္ဗဘူတေသု မေတ္တာကောဋ္ဌာသော အတ္ထိ၊ တဿ ကေနစိ ပုဂ္ဂလေန သဒ္ဓိံ ဝေရံ နာမ နတ္ထိ ယက္ခာတိ. စတုတ္ထံ.