၂. ရထသုတ္တဝဏ္ဏနာ

၇၂. ဒုတိယေ ပညာယတိ ဧတေနာတိ ပညာဏံ. ဓဇော ရထဿာတိ မဟန္တသ္မိံ ဟိ သင်္ဂါမသီသေ ဒူရတောဝ ဓဇံ ဒိသွာ ‘‘အသုကရညော နာမ အယံ ရထော’’တိ ရထော ပါကဋော ဟောတိ. တေန ဝုတ္တံ ‘‘ဓဇော ရထဿ ပညာဏ’’န္တိ. အဂ္ဂိပိ ဒူရတောဝ ဓူမေန ပညာယတိ. စောဠရဋ္ဌံ ပဏ္ဍုရဋ္ဌန္တိ ဧဝံ ရဋ္ဌမ္ပိ ရညာ ပညာယတိ. စက္ကဝတ္တိရညော ဓီတာပိ ပန ဣတ္ထီ ‘‘အသုကဿ နာမ ဘရိယာ’’တိ ဘတ္တာရံ ပတွာဝ ပညာယတိ. တသ္မာ ဓူမော ပညာဏမဂ္ဂိနောတိအာဒိ ဝုတ္တံ. ဒုတိယံ.