၁၁. အရဏသုတ္တဝဏ္ဏနာ

၈၁. ဧကာဒသမေ အရဏာတိ နိက္ကိလေသာ. ဝုသိတန္တိ ဝုသိတဝါသော. ဘောဇိဿိယန္တိ အဒါသဘာဝေါ. သမဏာတိ ခီဏာသဝသမဏာ. တေ ဟိ ဧကန္တေန အရဏာ နာမ. ဝုသိတံ န နဿတီတိ တေသံ အရိယမဂ္ဂဝါသော န နဿတိ. ပရိဇာနန္တီတိ ပုထုဇ္ဇနကလျာဏကတော ပဋ္ဌာယ သေခါ လောကိယလောကုတ္တရာယ ပရိညာယ ပရိဇာနန္တိ. ဘောဇိဿိယန္တိ ခီဏာသဝသမဏာနံယေဝ နိစ္စံ ဘုဇိဿဘာဝေါ နာမ. ဝန္ဒန္တီတိ ပဗ္ဗဇိတဒိဝသတော ပဋ္ဌာယ ဝန္ဒန္တိ. ပတိဋ္ဌိတန္တိ သီလေ ပတိဋ္ဌိတံ. သမဏီဓာတိ သမဏံ ဣဓ. ဇာတိဟီနန္တိ အပိ စဏ္ဍာလကုလာ ပဗ္ဗဇိတံ. ခတ္တိယာတိ န ကေဝလံ ခတ္တိယာဝ၊ ဒေဝါပိ သီလသမ္ပန္နံ သမဏံ ဝန္ဒန္တိယေဝါတိ. ဧကာဒသမံ.

ဆေတွာဝဂ္ဂေါ အဋ္ဌမော.

ဣတိ သာရတ္ထပ္ပကာသိနိယာ

သံယုတ္တနိကာယ-အဋ္ဌကထာယ

ဒေဝတာသံယုတ္တဝဏ္ဏနာ နိဋ္ဌိတာ.