၁၀. ဃဋီကာရသုတ္တဝဏ္ဏနာ

၅၀. ဒသမေ ဥပပန္နာသေတိ နိဗ္ဗတ္တိဝသေန ဥပဂတာ. ဝိမုတ္တာတိ အဝိဟာဗြဟ္မလောကသ္မိံ ဥပပတ္တိသမနန္တရမေဝ အရဟတ္တဖလဝိမုတ္တိယာ ဝိမုတ္တာ. မာနုသံ ဒေဟန္တိ ဣဓ ပဉ္စောရမ္ဘာဂိယသံယောဇနာနိ ဧဝ ဝုတ္တာနိ. ဒိဗ္ဗယောဂန္တိ ပဉ္စ ဥဒ္ဓမ္ဘာဂိယသံယောဇနာနိ. ဥပစ္စဂုန္တိ အတိက္ကမိံသု. ဥပကောတိအာဒီနိ တေသံ ထေရာနံ နာမာနိ. ကုသလီ ဘာသသီ တေသန္တိ၊ ‘‘ကုသလ’’န္တိ ဣဒံ ဝစနံ ဣမဿ အတ္ထီတိ ကုသလီ၊ တေသံ ထေရာနံ တွံ ကုသလံ အနဝဇ္ဇံ ဘာသသိ၊ ထောမေသိ ပသံသသိ၊ ပဏ္ဍိတောသိ ဒေဝပုတ္တာတိ ဝဒတိ. တံ တေ ဓမ္မံ ဣဓညာယာတိ တေ ထေရာ တံ ဓမ္မံ ဣဓ တုမှာကံ သာသနေ ဇာနိတွာ. ဂမ္ဘီရန္တိ ဂမ္ဘီရတ္ထံ. ဗြဟ္မစာရီ နိရာမိသောတိ နိရာမိသဗြဟ္မစာရီ နာမ အနာဂါမီ၊ အနာဂါမီ အဟောသိန္တိ အတ္ထော. အဟုဝါတိ အဟောသိ. သဂါမေယျောတိ ဧကဂါမဝါသီ. ပရိယောသာနဂါထာ သင်္ဂီတိကာရေဟိ ဌပိတာတိ. ဒသမံ.

အာဒိတ္တဝဂ္ဂေါ ပဉ္စမော.