၂. ဖုသတိသုတ္တဝဏ္ဏနာ

၂၂. ဒုတိယေ နာဖုသန္တံ ဖုသတီတိ ကမ္မံ အဖုသန္တံ ဝိပါကော န ဖုသတိ၊ ကမ္မမေဝ ဝါ အဖုသန္တံ ကမ္မံ န ဖုသတိ. ကမ္မဉှိ နာကရောတော ကရိယတိ. ဖုသန္တဉ္စ တတော ဖုသေတိ ကမ္မံ ဖုသန္တံ ဝိပါကော ဖုသတိ၊ ကမ္မမေဝ ဝါ ဖုသတိ. ကမ္မဉှိ ကရောတော ကရိယတိ. တသ္မာ ဖုသန္တံ ဖုသတိ၊ အပ္ပဒုဋ္ဌပဒေါသိနန္တိ ယသ္မာ န အဖုသန္တံ ဖုသတိ၊ ဖုသန္တဉ္စ ဖုသတိ၊ အယံ ကမ္မဝိပါကာနံ ဓမ္မတာ၊ တသ္မာ ယော ‘‘အပ္ပဒုဋ္ဌဿ နရဿ ဒုဿတိ၊ သုဒ္ဓဿ ပေါသဿ အနင်္ဂဏဿာ’’တိ ဧဝံ ဝုတ္တော အပ္ပဒုဋ္ဌပဒေါသီ ပုဂ္ဂလော၊ တံ ပုဂ္ဂလံ ကမ္မံ ဖုသန္တမေဝ ကမ္မံ ဖုသတိ၊ ဝိပါကော ဝါ ဖုသတိ. သော ဟိ ပရဿ ဥပဃာတံ ကာတုံ သက္ကောတိ ဝါ မာ ဝါ၊ အတ္တာ ပနာနေန စတူသု အပါယေသု ဌပိတော နာမ ဟောတိ. တေနာဟ ဘဂဝါ – ‘‘တမေဝ ဗာလံ ပစ္စေတိ ပါပံ၊ သုခုမော ရဇော ပဋိဝါတံဝ ခိတ္တော’’တိ. ဒုတိယံ.