၉. စူဠသကုလုဒါယိသုတ္တဝဏ္ဏနာ

၂၇၀. ဧဝံ မေ သုတန္တိ စူဠသကုလုဒါယိသုတ္တံ. တတ္ထ ယဒါ ပန၊ ဘန္တေ၊ ဘဂဝါတိ ဣဒံ ပရိဗ္ဗာဇကော ဓမ္မကထံ သောတုကာမော ဘဂဝတော ဓမ္မဒေသနာယ သာလယဘာဝံ ဒဿေန္တော အာဟ.

၂၇၁. တံယေဝေတ္ထ ပဋိဘာတူတိ သစေ ဓမ္မံ သောတုကာမော၊ တုယှေဝေတ္ထ ဧကော ပဉှော ဧကံ ကာရဏံ ဥပဋ္ဌာတု. ယထာ မံ ပဋိဘာသေယျာတိ ယေန ကာရဏေန မမ ဓမ္မဒေသနာ ဥပဋ္ဌဟေယျ၊ ဧတေန ဟိ ကာရဏေန ကထာယ သမုဋ္ဌိတာယ သုခံ ဓမ္မံ ဒေသေတုန္တိ ဒီပေတိ. တဿ မယှံ၊ ဘန္တေတိ သော ကိရ တံ ဒိသွာ – ‘‘သစေ ဘဂဝါ ဣဓ အဘဝိဿာ၊ အယမေတဿ ဘာသိတဿ အတ္ထောတိ ဒီပသဟဿံ ဝိယ ဥဇ္ဇလာပေတွာ အဇ္ဇ မေ ပါကဋံ အကရိဿာ’’တိ ဒသဗလံယေဝ အနုဿရိ. တသ္မာ တဿ မယှံ၊ ဘန္တေတိအာဒိမာဟ. တတ္ထ အဟော နူနာတိ အနုဿရဏတ္ထေ နိပါတဒွယံ. တေန တဿ ဘဂဝန္တံ အနုဿရန္တဿ ဧတဒဟောသိ ‘‘အဟော နူန ဘဂဝါ အဟော နူန သုဂတော’’တိ. ယော ဣမေသန္တိ ယော ဣမေသံ ဓမ္မာနံ. သုကုသလောတိ သုဋ္ဌု ကုသလော နိပုဏော ဆေကော. သော ဘဂဝါ အဟော နူန ကထေယျ၊ သော သုဂတော အဟော နူန ကထေယျ၊ တဿ ဟိ ဘဂဝတော ပုဗ္ဗေနိဝါသဉာဏဿ အနေကာနိ ကပ္ပကောဋိသဟဿာနိ ဧကင်္ဂဏာနိ ပါကဋာနီတိ၊ အယမေတ္ထ အဓိပ္ပါယော.

တဿ ဝါဟံ ပုဗ္ဗန္တံ အာရဗ္ဘာတိ ယော ဟိ လာဘီ ဟောတိ၊ သော ‘‘ပုဗ္ဗေ တွံ ခတ္တိယော အဟောသိ၊ ဗြာဟ္မဏော အဟောသီ’’တိ ဝုတ္တေ ဇာနန္တော သက္ကစ္စံ သုဿူသတိ. အလာဘီ ပန – ‘‘ဧဝံ ဘဝိဿတိ ဧဝံ ဘဝိဿတီ’’တိ သီသကမ္ပမေတ္တမေဝ ဒဿေတိ. တသ္မာ ဧဝမာဟ – ‘‘တဿ ဝါဟံ ပုဗ္ဗန္တံ အာရဗ္ဘ ပဉှဿ ဝေယျာကရဏေန စိတ္တံ အာရာဓေယျ’’န္တိ.

သော ဝါ မံ အပရန္တန္တိ ဒိဗ္ဗစက္ခုလာဘိနော ဟိ အနာဂတံသဉာဏံ ဣဇ္ဈတိ၊ တသ္မာ ဧဝမာဟ. ဣတရံ ပုဗ္ဗေ ဝုတ္တနယမေဝ.

ဓမ္မံ တေ ဒေသေဿာမီတိ အယံ ကိရ အတီတေ ဒေသိယမာနေပိ န ဗုဇ္ဈိဿတိ၊ အနာဂတေ ဒေသိယမာနေပိ န ဗုဇ္ဈိဿတိ. အထဿ ဘဂဝါ သဏှသုခုမံ ပစ္စယာကာရံ ဒေသေတုကာမော ဧဝမာဟ. ကိံ ပန တံ ဗုဇ္ဈိဿတီတိ? ဧတံ ပဂေဝ န ဗုဇ္ဈိဿတိ၊ အနာဂတေ ပနဿ ဝါသနာယ ပစ္စယော ဘဝိဿတီတိ ဒိသွာ ဘဂဝါ ဧဝမာဟ.

ပံသုပိသာစကန္တိ အသုစိဋ္ဌာနေ နိဗ္ဗတ္တပိသာစံ. သော ဟိ ဧကံ မူလံ ဂဟေတွာ အဒိဿမာနကာယော ဟောတိ. တတြိဒံ ဝတ္ထု – ဧကာ ကိရ ယက္ခိနီ ဒွေ ဒါရကေ ထူပါရာမဒွါရေ နိသီဒါပေတွာ အာဟာရပရိယေသနတ္ထံ နဂရံ ဂတာ. ဒါရကာ ဧကံ ပိဏ္ဍပါတိကတ္ထေရံ ဒိသွာ အာဟံသု၊ – ‘‘ဘန္တေ၊ အမှာကံ မာတာ အန္တော နဂရံ ပဝိဋ္ဌာ၊ တဿာ ဝဒေယျာထ ‘ယံ ဝါ တံ ဝါ လဒ္ဓကံ၊ ဂဟေတွာ သီဃံ ဂစ္ဆ၊ ဒါရကာ တေ ဇိဃစ္ဆိတံ သန္ဓာရေတုံ န သက္ကောန္တီ’’’တိ. တမဟံ ကထံ ပဿိဿာမီတိ? ဣဒံ၊ ဘန္တေ၊ ဂဏှထာတိ ဧကံ မူလခဏ္ဍံ အဒံသု. ထေရဿ အနေကာနိ ယက္ခသဟဿာနိ ပညာယိံသု၊ သော ဒါရကေဟိ ဒိန္နသညာဏေန တံ ယက္ခိနိံ အဒ္ဒသ ဝိရူပံ ဗီဘစ္ဆံ ကေဝလံ ဝီထိယံ ဂဗ္ဘမလံ ပစ္စာသီသမာနံ. ဒိသွာ တမတ္ထံ ကထေသိ. ကထံ မံ တွံ ပဿသီတိ ဝုတ္တေ မူလခဏ္ဍံ ဒဿေသိ၊ သာ အစ္ဆိန္ဒိတွာ ဂဏှိ. ဧဝံ ပံသုပိသာစကာ ဧကံ မူလံ ဂဟေတွာ အဒိဿမာနကာယာ ဟောန္တိ. တံ သန္ဓာယေသ ‘‘ပံသုပိသာစကမ္ပိ န ပဿာမီ’’တိ အာဟ. န ပက္ခာယတီတိ န ဒိဿတိ န ဥပဋ္ဌာတိ.

၂၇၂. ဒီဃာပိ ခေါ တေ ဧသာတိ ဥဒါယိ ဧသာ တဝ ဝါစာ ဒီဃာပိ ဘဝေယျ၊ ဧဝံ ဝဒန္တဿ ဝဿသတမ္ပိ ဝဿသဟဿမ္ပိ ပဝတ္တေယျ၊ န စ အတ္ထံ ဒီပေယျာတိ အဓိပ္ပါယော. အပ္ပါဋိဟီရကတန္တိ အနိယျာနိကံ အမူလကံ နိရတ္ထကံ သမ္ပဇ္ဇတီတိ အတ္ထော.

ဣဒါနိ တံ ဝဏ္ဏံ ဒဿေန္တော သေယျထာပိ၊ ဘန္တေတိအာဒိမာဟ. တတ္ထ ပဏ္ဍုကမ္ဗလေ နိက္ခိတ္တောတိ ဝိသဘာဂဝဏ္ဏေ ရတ္တကမ္ဗလေ ဌပိတော. ဧဝံဝဏ္ဏော အတ္တာ ဟောတီတိ ဣဒံ သော သုဘကိဏှဒေဝလောကေ နိဗ္ဗတ္တက္ခန္ဓေ သန္ဓာယ – ‘‘အမှာကံ မတကာလေ အတ္တာ သုဘကိဏှဒေဝလောကေ ခန္ဓာ ဝိယ ဇောတေတီ’’တိ ဝဒတိ.

၂၇၃. အယံ ဣမေသံ ဥဘိန္နန္တိ သော ကိရ ယသ္မာ မဏိဿ ဗဟိ အာဘာ န နိစ္ဆရတိ၊ ခဇ္ဇောပနကဿ အင်္ဂုလဒွင်္ဂုလစတုရင်္ဂုလမတ္တံ နိစ္ဆရတိ၊ မဟာခဇ္ဇောပနကဿ ပန ခဠမဏ္ဍလမတ္တမ္ပိ နိစ္ဆရတိယေဝ၊ တသ္မာ ဧဝမာဟ.

ဝိဒ္ဓေတိ ဥဗ္ဗိဒ္ဓေ၊ မေဃဝိဂမေန ဒူရီဘူတေတိ အတ္ထော. ဝိဂတဝလာဟကေတိ အပဂတမေဃေ. ဒေဝေတိ အာကာသေ. ဩသဓိတာရကာတိ သုက္ကတာရကာ. သာ ဟိ ယသ္မာ တဿာ ဥဒယတော ပဋ္ဌာယ တေန သညာဏေန ဩသဓာနိ ဂဏှန္တိပိ ပိဝန္တိပိ၊ တသ္မာ ‘‘ဩသဓိတာရကာ’’တိ ဝုစ္စတိ. အဘိဒေါ အဍ္ဎရတ္တသမယန္တိ အဘိန္နေ အဍ္ဎရတ္တသမယေ. ဣမိနာ ဂဂနမဇ္ဈေ ဌိတစန္ဒံ ဒဿေတိ. အဘိဒေါ မဇ္ဈနှိကေပိ ဧသေဝ နယော.

အတော ခေါတိ ယေ အနုဘောန္တိ၊ တေဟိ ဗဟုတရာ၊ ဗဟူ စေဝ ဗဟုတရာ စာတိ အတ္ထော. အာဘာ နာနုဘောန္တီတိ ဩဘာသံ န ဝဠဉ္ဇန္တိ၊ အတ္တနော သရီရောဘာသေနေဝ အာလောကံ ဖရိတွာ ဝိဟရန္တိ.

၂၇၄. ဣဒါနိ ယသ္မာ သော ‘‘ဧကန္တသုခံ လောကံ ပုစ္ဆိဿာမီ’’တိ နိသိန္နော၊ ပုစ္ဆာမူဠှော ပန ဇာတော၊ တသ္မာ နံ ဘဂဝါ တံ ပုစ္ဆံ သရာပေန္တော ကိံ ပန၊ ဥဒါယိ၊ အတ္ထိ ဧကန္တသုခေါ လောကောတိအာဒိမာဟ. တတ္ထ အာကာရဝတီတိ ကာရဏဝတီ. အညတရံ ဝါ ပန တပေါဂုဏန္တိ အစေလကပါဠိံ သန္ဓာယာဟ၊ သုရာပါနဝိရတီတိ အတ္ထော.

၂၇၅. ကတမာ ပန သာ၊ ဘန္တေ၊ အာကာရဝတီ ပဋိပဒါ ဧကန္တသုခဿာတိ ကသ္မာ ပုစ္ဆတိ? ဧဝံ ကိရဿ အဟောသိ – ‘‘မယံ သတ္တာနံ ဧကန္တသုခံ ဝဒါမ၊ ပဋိပဒံ ပန ကာလေန သုခံ ကာလေန ဒုက္ခံ ဝဒါမ. ဧကန္တသုခဿ ခေါ ပန အတ္တနော ပဋိပဒါယပိ ဧကန္တသုခါယ ဘဝိတဗ္ဗံ. အမှာကံ ကထာ အနိယျာနိကာ၊ သတ္ထု ကထာဝ နိယျာနိကာ’’တိ. ဣဒါနိ သတ္ထာရံယေဝ ပုစ္ဆိတွာ ဇာနိဿာမီတိ တသ္မာ ပုစ္ဆတိ.

ဧတ္ထ မယံ အနဿာမာတိ ဧတသ္မိံ ကာရဏေ မယံ အနဿာမ. ကသ္မာ ပန ဧဝမာဟံသု? တေ ကိရ ပုဗ္ဗေ ပဉ္စသု ဓမ္မေသု ပတိဋ္ဌာယ ကသိဏပရိကမ္မံ ကတွာ တတိယဇ္ဈာနံ နိဗ္ဗတ္တေတွာ အပရိဟီနဇ္ဈာနာ ကာလံ ကတွာ သုဘကိဏှေသု နိဗ္ဗတ္တန္တီတိ ဇာနန္တိ၊ ဂစ္ဆန္တေ ဂစ္ဆန္တေ ပန ကာလေ ကသိဏပရိကမ္မမ္ပိ န ဇာနိံသု၊ တတိယဇ္ဈာနမ္ပိ နိဗ္ဗတ္တေတုံ နာသက္ခိံသု. ပဉ္စ ပုဗ္ဗဘာဂဓမ္မေ ပန ‘‘အာကာရဝတီ ပဋိပဒါ’’တိ ဥဂ္ဂဟေတွာ တတိယဇ္ဈာနံ ‘‘ဧကန္တသုခေါ လောကော’’တိ ဥဂ္ဂဏှိံသု. တသ္မာ ဧဝမာဟံသု. ဥတ္တရိတရန္တိ ဣတော ပဉ္စဟိ ဓမ္မေဟိ ဥတ္တရိတရံ ပဋိပဒံ ဝါ တတိယဇ္ဈာနတော ဥတ္တရိတရံ ဧကန္တသုခံ လောကံ ဝါ န ဇာနာမာတိ ဝုတ္တံ ဟောတိ. အပ္ပသဒ္ဒေ ကတွာတိ ဧကပ္ပဟာရေနေဝ မဟာသဒ္ဒံ ကာတုံ အာရဒ္ဓေ နိဿဒ္ဒေ ကတွာ.

၂၇၆. သစ္ဆိကိရိယာဟေတူတိ ဧတ္ထ ဒွေ သစ္ဆိကိရိယာ ပဋိလာဘသစ္ဆိကိရိယာ စ ပစ္စက္ခသစ္ဆိကိရိယာ စ. တတ္ထ တတိယဇ္ဈာနံ နိဗ္ဗတ္တေတွာ အပရိဟီနဇ္ဈာနော ကာလံ ကတွာ သုဘကိဏှလောကေ တေသံ ဒေဝါနံ သမာနာယုဝဏ္ဏော ဟုတွာ နိဗ္ဗတ္တတိ၊ အယံ ပဋိလာဘသစ္ဆိကိရိယာ နာမ. စတုတ္ထဇ္ဈာနံ နိဗ္ဗတ္တေတွာ ဣဒ္ဓိဝိကုဗ္ဗနေန သုဘကိဏှလောကံ ဂန္တွာ တေဟိ ဒေဝေဟိ သဒ္ဓိံ သန္တိဋ္ဌတိ သလ္လပတိ သာကစ္ဆံ အာပဇ္ဇတိ၊ အယံ ပစ္စက္ခသစ္ဆိကိရိယာ နာမ. တာသံ ဒွိန္နမ္ပိ တတိယဇ္ဈာနံ အာကာရဝတီ ပဋိပဒါ နာမ. တဉှိ အနုပ္ပါဒေတွာ နေဝ သက္ကာ သုဘကိဏှလောကေ နိဗ္ဗတ္တိတုံ၊ န စတုတ္ထဇ္ဈာနံ ဥပ္ပါဒေတုံ. ဣတိ ဒုဝိဓမ္ပေတံ သစ္ဆိကိရိယံ သန္ဓာယ – ‘‘ဧတဿ နူန၊ ဘန္တေ၊ ဧကန္တသုခဿ လောကဿ သစ္ဆိကိရိယာဟေတူ’’တိ အာဟ.

၂၇၇. ဥဒဉ္စနိကောတိ ဥဒကဝါရကော. အန္တရာယမကာသီတိ ယထာ ပဗ္ဗဇ္ဇံ န လဘတိ၊ ဧဝံ ဥပဒ္ဒုတမကာသိ ယထာ တံ ဥပနိဿယဝိပန္နံ. အယံ ကိရ ကဿပဗုဒ္ဓကာလေ ပဗ္ဗဇိတွာ သမဏဓမ္မမကာသိ. အထဿ ဧကော သဟာယကော ဘိက္ခု သာသနေ အနဘိရတော၊ ‘‘အာဝုသော၊ ဝိဗ္ဘမိဿာမီ’’တိ အာရောစေသိ. သော တဿ ပတ္တစီဝရေ လောဘံ ဥပ္ပါဒေတွာ ဂိဟိဘာဝါယ ဝဏ္ဏံ အဘာသိ. ဣတရော တဿ ပတ္တစီဝရံ ဒတွာ ဝိဗ္ဘမိ. တေနဿ ကမ္မုနာ ဣဒါနိ ဘဂဝတော သမ္မုခါ ပဗ္ဗဇ္ဇာယ အန္တရာယော ဇာတော. ဘဂဝတာ ပနဿ ပုရိမသုတ္တံ အတိရေကဘာဏဝါရမတ္တံ၊ ဣဒံ ဘာဏဝါရမတ္တန္တိ ဧတ္တကာယ တန္တိယာ ဓမ္မော ကထိတော၊ ဧကဒေသနာယပိ မဂ္ဂဖလပဋိဝေဓော န ဇာတော၊ အနာဂတေ ပနဿ ပစ္စယော ဘဝိဿတီတိ ဘဂဝါ ဓမ္မံ ဒေသေတိ. အနာဂတေ ပစ္စယဘာဝဉ္စဿ ဒိသွာ ဘဂဝါ ဓရမာနော ဧကံ ဘိက္ခုမ္ပိ မေတ္တာဝိဟာရိမှိ ဧတဒဂ္ဂေ န ဌပေသိ. ပဿတိ ဟိ ဘဂဝါ – ‘‘အနာဂတေ အယံ မမ သာသနေ ပဗ္ဗဇိတွာ မေတ္တာဝိဟာရီနံ အဂ္ဂေါ ဘဝိဿတီ’’တိ.

သော ဘဂဝတိ ပရိနိဗ္ဗုတေ ဓမ္မာသောကရာဇကာလေ ပါဋလိပုတ္တေ နိဗ္ဗတ္တိတွာ ပဗ္ဗဇိတွာ အရဟတ္တပ္ပတ္တော အဿဂုတ္တတ္ထေရော နာမ ဟုတွာ မေတ္တာဝိဟာရီနံ အဂ္ဂေါ အဟောသိ. ထေရဿ မေတ္တာနုဘာဝေန တိရစ္ဆာနဂတာပိ မေတ္တစိတ္တံ ပဋိလဘိံသု၊ ထေရော သကလဇမ္ဗုဒီပေ ဘိက္ခုသံဃဿ ဩဝါဒါစရိယော ဟုတွာ ဝတ္တနိသေနာသနေ အာဝသိ၊ တိံသယောဇနမတ္တာ အဋဝီ ဧကံ ပဓာနဃရံ အဟောသိ. ထေရော အာကာသေ စမ္မခဏ္ဍံ ပတ္ထရိတွာ တတ္ထ နိသိန္နော ကမ္မဋ္ဌာနံ ကထေသိ. ဂစ္ဆန္တေ ဂစ္ဆန္တေ ကာလေ ဘိက္ခာစာရမ္ပိ အဂန္တွာ ဝိဟာရေ နိသိန္နော ကမ္မဋ္ဌာနံ ကထေသိ၊ မနုဿာ ဝိဟာရမေဝ ဂန္တွာ ဒါနမဒံသု. ဓမ္မာသောကရာဇာ ထေရဿ ဂုဏံ သုတွာ ဒဋ္ဌုကာမော တိက္ခတ္တုံ ပဟိဏိ. ထေရော ဘိက္ခုသံဃဿ ဩဝါဒံ ဒမ္မီတိ ဧကဝါရမ္ပိ န ဂတောတိ.

ပပဉ္စသူဒနိယာ မဇ္ဈိမနိကာယဋ္ဌကထာယ

စူဠသကုလုဒါယိသုတ္တဝဏ္ဏနာ နိဋ္ဌိတာ.