၁၀. ဝေခနသသုတ္တဝဏ္ဏနာ

၂၇၈. ဧဝံ မေ သုတန္တိ ဝေခနသသုတ္တံ. တတ္ထ ဝေခနသောတိ အယံ ကိရ သကုလုဒါယိဿ အာစရိယော၊ သော ‘‘သကုလုဒါယီ ပရိဗ္ဗာဇကော ပရမဝဏ္ဏပဉှေ ပရာဇိတော’’တိ သုတွာ ‘‘မယာ သော သာဓုကံ ဥဂ္ဂဟာပိတော၊ တေနာပိ သာဓုကံ ဥဂ္ဂဟိတံ၊ ကထံ နု ခေါ ပရာဇိတော၊ ဟန္ဒာဟံ သယံ ဂန္တွာ သမဏံ ဂေါတမံ ပရမဝဏ္ဏပဉှံ ပုစ္ဆိတွာ ဇာနိဿာမီ’’တိ ရာဇဂဟတော ပဉ္စစတ္တာလီသယောဇနံ သာဝတ္ထိံ ဂန္တွာ ယေန ဘဂဝါ၊ တေနုပသင်္ကမိ၊ ဥပသင်္ကမိတွာ ပန ဌိတကောဝ ဘဂဝတော သန္တိကေ ဥဒါနံ ဥဒါနေသိ. တတ္ထ ပုရိမသဒိသံ ဝုတ္တနယေနေဝ ဝေဒိတဗ္ဗံ.

၂၈၀. ပဉ္စ ခေါ ဣမေတိ ကသ္မာ အာရဘိ? အဂါရိယောပိ ဧကစ္စော ကာမဂရုကော ကာမာဓိမုတ္တော ဟောတိ၊ ဧကစ္စော နေက္ခမ္မဂရုကော နေက္ခမ္မာဓိမုတ္တော ဟောတိ. ပဗ္ဗဇိတောပိ စ ဧကစ္စော ကာမဂရုကော ကာမာဓိမုတ္တော ဟောတိ၊ ဧကစ္စော နေက္ခမ္မဂရုကော နေက္ခမ္မာဓိမုတ္တော ဟောတိ. အယံ ပန ကာမဂရုကော ကာမာဓိမုတ္တော ဟောတိ. သော ဣမာယ ကထာယ ကထိယမာနာယ အတ္တနော ကာမာဓိမုတ္တတ္တံ သလ္လက္ခေဿတိ၊ ဧဝမဿာယံ ဒေသနာ သပ္ပါယာ ဘဝိဿတီတိ ဣမံ ဒေသနံ အာရဘိ. ကာမဂ္ဂသုခန္တိ နိဗ္ဗာနံ အဓိပ္ပေတံ.

၂၈၁. ပါပိတော ဘဝိဿတီတိ အဇာနနဘာဝံ ပါပိတော ဘဝိဿတိ. နာမကံယေဝ သမ္ပဇ္ဇတီတိ နိရတ္ထကဝစနမတ္တမေဝ သမ္ပဇ္ဇတိ. တိဋ္ဌတု ပုဗ္ဗန္တော တိဋ္ဌတု အပရန္တောတိ ယသ္မာ တုယှံ အတီတကထာယ အနုစ္ဆဝိကံ ပုဗ္ဗေနိဝါသဉာဏံ နတ္ထိ၊ အနာဂတကထာယ အနုစ္ဆဝိကံ ဒိဗ္ဗစက္ခုဉာဏံ နတ္ထိ၊ တသ္မာ ဥဘယမ္ပေတံ တိဋ္ဌတူတိ အာဟ. သုတ္တဗန္ဓနေဟီတိ သုတ္တမယဗန္ဓနေဟိ. တဿ ဟိ အာရက္ခတ္ထာယ ဟတ္ထပါဒေသု စေဝ ဂီဝါယ စ သုတ္တကာနိ ဗန္ဓန္တိ. တာနိ သန္ဓာယေတံ ဝုတ္တံ. မဟလ္လကကာလေ ပနဿ တာနိ သယံ ဝါ ပူတီနိ ဟုတွာ မုဉ္စန္တိ၊ ဆိန္ဒိတွာ ဝါ ဟရန္တိ.

ဧဝမေဝ ခေါတိ ဣမိနာ ဣဒံ ဒဿေတိ – ဒဟရဿ ကုမာရဿ သုတ္တဗန္ဓနာနံ အဇာနနကာလော ဝိယ အဝိဇ္ဇာယ ပုရိမာယ ကောဋိယာ အဇာနနံ၊ န ဟိ သက္ကာ အဝိဇ္ဇာယ ပုရိမကောဋိ ဉာတုံ၊ မောစနကာလေ ဇာနနသဒိသံ ပန အရဟတ္တမဂ္ဂေန အဝိဇ္ဇာဗန္ဓနဿ ပမောက္ခော ဇာတောတိ ဇာနနံ. သေသံ သဗ္ဗတ္ထ ဥတ္တာနမေဝါတိ.

ပပဉ္စသူဒနိယာ မဇ္ဈိမနိကာယဋ္ဌကထာယ

ဝေခနသသုတ္တဝဏ္ဏနာ နိဋ္ဌိတာ.

တတိယဝဂ္ဂဝဏ္ဏနာ နိဋ္ဌိတာ.