၈. သမဏမုဏ္ဍိကသုတ္တဝဏ္ဏနာ

၂၆၀. ဧဝံ မေ သုတန္တိ သမဏမုဏ္ဍိကသုတ္တံ. တတ္ထ ဥဂ္ဂါဟမာနောတိ တဿ ပရိဗ္ဗာဇကဿ နာမံ. သုမနောတိ ပကတိနာမံ. ကိဉ္စိ ကိဉ္စိ ပန ဥဂ္ဂဟိတုံ ဥဂ္ဂါဟေတုံ သမတ္ထတာယ ဥဂ္ဂါဟမာနောတိ နံ သဉ္ဇာနန္တိ. သမယံ ပဝဒန္တိ ဧတ္ထာတိ သမယပ္ပဝါဒကံ. တသ္မိံ ကိရ ဌာနေ စင်္ကီတာရုက္ခပေါက္ခရသာတိပ္ပဘုတယော ဗြာဟ္မဏာ နိဂဏ္ဌာစေလကပရိဗ္ဗာဇကာဒယော စ ပဗ္ဗဇိတာ သန္နိပတိတွာ အတ္တနော အတ္တနော သမယံ ပဝဒန္တိ ကထေန္တိ ဒီပေန္တိ၊ တသ္မာ သော အာရာမော သမယပ္ပဝါဒကောတိ ဝုစ္စတိ. သွေဝ တိန္ဒုကာစီရသင်္ခါတာယ တိမ္ဗရူသကရုက္ခပန္တိယာ ပရိက္ခိတ္တတ္တာ တိန္ဒုကာစီရံ. ယသ္မာ ပနေတ္ထ ပဌမံ ဧကာ သာလာ အဟောသိ၊ ပစ္ဆာ မဟာပုညံ ပေါဋ္ဌပါဒပရိဗ္ဗာဇကံ နိဿာယ ဗဟူ သာလာ ကတာ၊ တသ္မာ တမေဝ ဧကံ သာလံ ဥပါဒါယ လဒ္ဓနာမဝသေန ဧကသာလကောတိ ဝုစ္စတိ. မလ္လိကာယ ပန ပသေနဒိရညော ဒေဝိယာ ဥယျာနဘူတော သော ပုပ္ဖဖလသဉ္ဆန္နော အာရာမောတိ ကတွာ မလ္လိကာယ အာရာမောတိ သင်္ခံ ဂတော. တသ္မိံ သမယပ္ပဝါဒကေ တိန္ဒုကာစီရေ ဧကသာလကေ မလ္လိကာယ အာရာမေ. ပဋိဝသတီတိ ဝါသဖာသုတာယ ဝသတိ. ဒိဝါ ဒိဝဿာတိ ဒိဝသဿ ဒိဝါ နာမ မဇ္ဈနှာတိက္ကမော၊ တသ္မိံ ဒိဝသဿပိ ဒိဝါဘူတေ အတိက္ကန္တမတ္တေ မဇ္ဈနှိကေ နိက္ခမီတိ အတ္ထော. ပဋိသလ္လီနောတိ တတော တတော ရူပါဒိဂေါစရတော စိတ္တံ ပဋိသံဟရိတွာ လီနော၊ ဈာနရတိသေဝနဝသေန ဧကီဘာဝံ ဂတော. မနောဘာဝနီယာနန္တိ မနဝဍ္ဎနကာနံ၊ ယေ အာဝဇ္ဇတော မနသိကရောတော စိတ္တံ ဝိနီဝရဏံ ဟောတိ ဥန္နမတိ ဝဍ္ဎတိ. ယာဝတာတိ ယတ္တကာ. အယံ တေသံ အညတရောတိ အယံ တေသံ အဗ္ဘန္တရော ဧကော သာဝကော. အပ္ပေဝ နာမာတိ တဿ ဥပသင်္ကမနံ ပတ္ထယမာနော အာဟ. ပတ္ထနာကာရဏံ ပန သန္ဒကသုတ္တေ ဝုတ္တမေဝ.

၂၆၁. ဧတဒဝေါစာတိ ဒန္ဒပညော အယံ ဂဟပတိ၊ ဓမ္မကထာယ နံ သင်္ဂဏှိတွာ အတ္တနော သာဝကံ ကရိဿာမီတိ မညမာနော ဧတံ ‘‘စတူဟိ ခေါ’’တိအာဒိဝစနံ အဝေါစ. တတ္ထ ပညပေမီတိ ဒဿေမိ ဌပေမိ. သမ္ပန္နကုသလန္တိ ပရိပုဏ္ဏကုသလံ. ပရမကုသလန္တိ ဥတ္တမကုသလံ. အယောဇ္ဈန္တိ ဝါဒယုဒ္ဓေန ယုဇ္ဈိတွာ စာလေတုံ အသက္ကုဏေယျံ အစလံ နိက္ကမ္ပံ ထိရံ. န ကရောတီတိ အကရဏမတ္တမေဝ ဝဒတိ၊ ဧတ္ထ ပန သံဝရပ္ပဟာနံ ဝါ ပဋိသေဝနပ္ပဟာနံ ဝါ န ဝဒတိ. သေသပဒေသုပိ ဧသေဝ နယော.

နေဝ အဘိနန္ဒီတိ တိတ္ထိယာ နာမ ဇာနိတွာပိ အဇာနိတွာပိ ယံ ဝါ တံ ဝါ ဝဒန္တီတိ မညမာနော နာဘိနန္ဒိ. န ပဋိက္ကောသီတိ သာသနဿ အနုလောမံ ဝိယ ပသန္နာကာရံ ဝိယ ဝဒတီတိ မညမာနော န ပဋိသေဓေတိ.

၂၆၂. ယထာ ဥဂ္ဂါဟမာနဿာတိ ယထာ တဿ ဝစနံ၊ ဧဝံ သန္တေ ဥတ္တာနသေယျကော ကုမာရော အယောဇ္ဈသမဏော ထိရသမဏော ဘဝိဿတိ၊ မယံ ပန ဧဝံ န ဝဒါမာတိ ဒီပေတိ. ကာယောတိပိ န ဟောတီတိ သကကာယော ပရကာယောတိပိ ဝိသေသဉာဏံ န ဟောတိ. အညတြ ဖန္ဒိတမတ္တာတိ ပစ္စတ္ထရဏေ ဝလိသမ္ဖဿေန ဝါ မင်္ဂုလဒဋ္ဌေန ဝါ ကာယဖန္ဒနမတ္တံ နာမ ဟောတိ. တံ ဌပေတွာ အညံ ကာယေန ကရဏကမ္မံ နာမ နတ္ထိ. တမ္ပိ စ ကိလေသသဟဂတစိတ္တေနေဝ ဟောတိ. ဝါစာတိပိ န ဟောတီတိ မိစ္ဆာဝါစာ သမ္မာဝါစာတိပိ နာနတ္တံ န ဟောတိ. ရောဒိတမတ္တာတိ ဇိဃစ္ဆာပိပါသာပရေတဿ ပန ရောဒိတမတ္တံ ဟောတိ. တမ္ပိ ကိလေသသဟဂတစိတ္တေနေဝ. သင်္ကပ္ပေါတိ မိစ္ဆာသင်္ကပ္ပေါ သမ္မာသင်္ကပ္ပေါတိပိ နာနတ္တံ န ဟောတိ. ဝိကူဇိတမတ္တာတိ ဝိကူဇိတမတ္တံ ရောဒနဟသိတမတ္တံ ဟောတိ. ဒဟရကုမာရကာနဉှိ စိတ္တံ အတီတာရမ္မဏံ ပဝတ္တတိ၊ နိရယတော အာဂတာ နိရယဒုက္ခံ သရိတွာ ရောဒန္တိ၊ ဒေဝလောကတော အာဂတာ ဟသန္တိ၊ တမ္ပိ ကိလေသသဟဂတစိတ္တေနေဝ ဟောတိ. အာဇီဝေါတိ မိစ္ဆာဇီဝေါ သမ္မာဇီဝေါတိပိ နာနတ္တံ န ဟောတိ. အညတြ မာတုထညာတိ ထညစောရဒါရကာ နာမ ဟောန္တိ၊ မာတရိ ခီရံ ပါယန္တိယာ အပိဝိတွာ အညဝိဟိတကာလေ ပိဋ္ဌိပဿေန အာဂန္တွာ ထညံ ပိဝန္တိ. ဧတ္တကံ မုဉ္စိတွာ အညော မိစ္ဆာဇီဝေါ နတ္ထိ. အယမ္ပိ ကိလေသသဟဂတစိတ္တေနေဝ ဟောတီတိ ဒဿေတိ.

၂၆၃. ဧဝံ ပရိဗ္ဗာဇကဝါဒံ ပဋိက္ခိပိတွာ ဣဒါနိ သယံ သေက္ခဘူမိယံ မာတိကံ ဌပေန္တော စတူဟိ ခေါ အဟန္တိအာဒိမာဟ. တတ္ထ သမဓိဂယှ တိဋ္ဌတီတိ ဝိသေသေတွာ တိဋ္ဌတိ. န ကာယေန ပါပ ကမ္မန္တိအာဒီသု န ကေဝလံ အကရဏမတ္တမေဝ၊ ဘဂဝါ ပန ဧတ္ထ သံဝရပ္ပဟာနပဋိသင်္ခါ ပညပေတိ. တံ သန္ဓာယေဝမာဟ. န စေဝ သမ္ပန္နကုသလန္တိအာဒိ ပန ခီဏာသဝံ သန္ဓာယ ဝုတ္တံ.

ဣဒါနိ အသေက္ခဘူမိယံ မာတိကံ ဌပေန္တော ဒသဟိ ခေါ အဟန္တိအာဒိမာဟ. တတ္ထ တီဏိ ပဒါနိ နိဿာယ ဒွေ ပဌမစတုက္ကာ ဌပိတာ၊ ဧကံ ပဒံ နိဿာယ ဒွေ ပစ္ဆိမစတုက္ကာ. အယံ သေက္ခဘူမိယံ မာတိကာ.

၂၆၄. ဣဒါနိ တံ ဝိဘဇန္တော ကတမေ စ ထပတိ အကုသလသီလာတိအာဒိမာဟ. တတ္ထ သရာဂန္တိ အဋ္ဌဝိဓံ လောဘသဟဂတစိတ္တံ. သဒေါသန္တိ ပဋိဃသမ္ပယုတ္တစိတ္တဒွယံ. သမောဟန္တိ ဝိစိကိစ္ဆုဒ္ဓစ္စသဟဂတစိတ္တဒွယမ္ပိ ဝဋ္ဋတိ၊ သဗ္ဗာကုသလစိတ္တာနိပိ. မောဟော သဗ္ဗာကုသလေ ဥပ္ပဇ္ဇတီတိ ဟိ ဝုတ္တံ. ဣတောသမုဋ္ဌာနာတိ ဣတော သရာဂါဒိစိတ္တတော သမုဋ္ဌာနံ ဥပ္ပတ္တိ ဧတေသန္တိ ဣတောသမုဋ္ဌာနာ.

ကုဟိန္တိ ကတရံ ဌာနံ ပါပုဏိတွာ အပရိသေသာ နိရုဇ္ဈန္တိ. ဧတ္ထေတေတိ သောတာပတ္တိဖလေ ဘုမ္မံ. ပါတိမောက္ခသံဝရသီလဉှိ သောတာပတ္တိဖလေ ပရိပုဏ္ဏံ ဟောတိ၊ တံ ဌာနံ ပတွာ အကုသလသီလံ အသေသံ နိရုဇ္ဈတိ. အကုသလသီလန္တိ စ ဒုဿီလဿေတံ အဓိဝစနန္တိ ဝေဒိတဗ္ဗံ.

အကုသလာနံ သီလာနံ နိရောဓာယ ပဋိပန္နောတိ ဧတ္ထ ယာဝ သောတာပတ္တိမဂ္ဂါ နိရောဓာယ ပဋိပန္နော နာမ ဟောတိ၊ ဖလပတ္တေ ပန တေ နိရောဓိတာ နာမ ဟောန္တိ.

၂၆၅. ဝီတရာဂန္တိအာဒီဟိ အဋ္ဌဝိဓံ ကာမာဝစရကုသလစိတ္တမေဝ ဝုတ္တံ. ဧတေန ဟိ ကုသလသီလံ သမုဋ္ဌာတိ.

သီလဝါ ဟောတီတိ သီလသမ္ပန္နော ဟောတိ ဂုဏသမ္ပန္နော စ. နော စ သီလမယောတိ အလမေတ္တာဝတာ၊ နတ္ထိ ဣတော ကိဉ္စိ ဥတ္တရိ ကရဏီယန္တိ ဧဝံ သီလမယော န ဟောတိ. ယတ္ထဿ တေတိ အရဟတ္တဖလေ ဘုမ္မံ. အရဟတ္တဖလဉှိ ပတွာ အကုသလသီလံ အသေသံ နိရုဇ္ဈတိ.

နိရောဓာယ ပဋိပန္နောတိ ဧတ္ထ ယာဝ အရဟတ္တမဂ္ဂါ နိရောဓာယ ပဋိပန္နော နာမ ဟောတိ၊ ဖလပတ္တေ ပန တေ နိရောဓိတာ နာမ ဟောန္တိ.

၂၆၆. ကာမသညာဒီသု ကာမသညာ အဋ္ဌလောဘသဟဂတစိတ္တသဟဇာတာ၊ ဣတရာ ဒွေ ဒေါမနဿသဟဂတစိတ္တဒွယေန သဟဇာတာ.

ပဌမံ ဈာနန္တိ အနာဂါမိဖလပဌမဇ္ဈာနံ. ဧတ္ထေတေတိ အနာဂါမိဖလေ ဘုမ္မံ. အနာဂါမိဖလဉှိ ပတွာ အကုသလသင်္ကပ္ပါ အပရိသေသာ နိရုဇ္ဈန္တိ.

နိရောဓာယ ပဋိပန္နောတိ ဧတ္ထ ယာဝ အနာဂါမိမဂ္ဂါ နိရောဓာယ ပဋိပန္နော နာမ ဟောတိ၊ ဖလပတ္တေ ပန တေ နိရောဓိတာ နာမ ဟောန္တိ. နေက္ခမ္မသညာဒယော ဟိ တိဿောပိ အဋ္ဌကာမာဝစရကုသလသဟဇာတသညာဝ.

၂၆၇. ဧတ္ထေတေတိ အရဟတ္တဖလေ ဘုမ္မံ. ဒုတိယဇ္ဈာနိကံ အရဟတ္တဖလဉှိ ပါပုဏိတွာ ကုသလသင်္ကပ္ပါ အပရိသေသာ နိရုဇ္ဈန္တိ. နိရောဓာယ ပဋိပန္နောတိ ဧတ္ထ ယာဝ အရဟတ္တမဂ္ဂါ နိရောဓာယ ပဋိပန္နော နာမ ဟောတိ၊ ဖလပတ္တေ ပန တေ နိရောဓိတာ နာမ ဟောန္တိ. သေသံ သဗ္ဗတ္ထ ဥတ္တာနမေဝါတိ.

ပပဉ္စသူဒနိယာ မဇ္ဈိမနိကာယဋ္ဌကထာယ

သမဏမုဏ္ဍိကသုတ္တဝဏ္ဏနာ နိဋ္ဌိတာ.