၉. ဂေါလိယာနိသုတ္တဝဏ္ဏနာ

၁၇၃. ဧဝံ မေ သုတန္တိ ဂေါလိယာနိသုတ္တံ. တတ္ထ ပဒသမာစာရောတိ ဒုဗ္ဗလသမာစာရော ဩဠာရိကာစာရော၊ ပစ္စယေသု သာပေက္ခော မဟာရက္ခိတတ္ထေရော ဝိယ. တံ ကိရ ဥပဋ္ဌာကကုလေ နိသိန္နံ ဥပဋ္ဌာကော အာဟ ‘‘အသုကတ္ထေရဿ မေ၊ ဘန္တေ၊ စီဝရံ ဒိန္န’’န္တိ. သာဓု တေ ကတံ တံယေဝ တက္ကေတွာ ဝိဟရန္တဿ စီဝရံ ဒေန္တေနာတိ. တုမှာကမ္ပိ၊ ဘန္တေ၊ ဒဿာမီတိ. သာဓု ကရိဿသိ တံယေဝ တက္ကေန္တဿာတိ အာဟ. အယမ္ပိ ဧဝရူပေါ ဩဠာရိကာစာရော အဟောသိ. သပ္ပတိဿေနာတိ သဇေဋ္ဌကေန၊ န အတ္တာနံ ဇေဋ္ဌကံ ကတွာ ဝိဟရိတဗ္ဗံ. သေရိဝိဟာရေနာတိ သစ္ဆန္ဒဝိဟာရေန နိရင်္ကုသဝိဟာရေန.

နာနူပခဇ္ဇာတိ န အနုပခဇ္ဇ န အနုပဝိသိတွာ. တတ္ထ ယော ဒွီသု မဟာထေရေသု ဥဘတော နိသိန္နေသု တေ အနာပုစ္ဆိတွာဝ စီဝရေန ဝါ ဇာဏုနာ ဝါ ဃဋ္ဋေန္တော နိသီဒတိ၊ အယံ အနုပခဇ္ဇ နိသီဒတိ နာမ. ဧဝံ အကတွာ ပန အတ္တနော ပတ္တအာသနသန္တိကေ ဌတွာ နိသီဒါဝုသောတိ ဝုတ္တေ နိသီဒိတဗ္ဗံ. သစေ န ဝဒန္တိ၊ နိသီဒါမိ၊ ဘန္တေတိ အာပုစ္ဆိတွာ နိသီဒိတဗ္ဗံ အာပုစ္ဆိတကာလတော ပဋ္ဌာယ နိသီဒါတိ ဝုတ္တေပိ အဝုတ္တေပိ နိသီဒိတုံ ဝဋ္ဋတိယေဝ. န ပဋိဗာဟိဿာမီတိ ဧတ္ထ ယော အတ္တနော ပတ္တာသနံ အတိက္ကမိတွာ နဝကာနံ ပါပုဏနဋ္ဌာနေ နိသီဒတိ၊ အယံ နဝေ ဘိက္ခူ အာသနေန ပဋိဗာဟတိ နာမ. တသ္မိဉှိ တထာ နိသိန္နေ နဝါ ဘိက္ခူ ‘‘အမှာကံ နိသီဒိတုံ န ဒေတီ’’တိ ဥဇ္ဈာယန္တာ တိဋ္ဌန္တိ ဝါ အာသနံ ဝါ ပရိယေသန္တာ အာဟိဏ္ဍန္တိ. တသ္မာ အတ္တနော ပတ္တာသနေယေဝ နိသီဒိတဗ္ဗံ. ဧဝံ န ပဋိဗာဟတိ နာမ.

အာဘိသမာစာရိကမ္ပိ ဓမ္မန္တိ အဘိသမာစာရိကံ ဝတ္တပဋိပတ္တိမတ္တမ္ပိ. နာတိကာလေနာတိ န အတိပါတော ပဝိသိတဗ္ဗံ၊ န အတိဒိဝါ ပဋိက္ကမိတဗ္ဗံ၊ ဘိက္ခုသံဃေန သဒ္ဓိံယေဝ ပဝိသိတဗ္ဗဉ္စ နိက္ခမိတဗ္ဗဉ္စ. အတိပါတော ပဝိသိတွာ အတိဒိဝါ နိက္ခမန္တဿ ဟိ စေတိယင်္ဂဏဗောဓိယင်္ဂဏဝတ္တာဒီနိ ပရိဟာယန္တိ. ကာလဿေဝ မုခံ ဓောဝိတွာ မက္ကဋကသုတ္တာနိ ဆိန္ဒန္တေန ဥဿာဝဗိန္ဒူ နိပါတေန္တေန ဂါမံ ပဝိသိတွာ ယာဂုံ ပရိယေသိတွာ ယာဝ ဘိက္ခာကာလာ အန္တောဂါမေယေဝ နာနပ္ပကာရံ တိရစ္ဆာနကထံ ကထေန္တေန နိသီဒိတွာ ဘတ္တကိစ္စံ ကတွာ ဒိဝါ နိက္ခမ္မ ဘိက္ခူနံ ပါဒဓောဝနဝေလာယ ဝိဟာရံ ပစ္စာဂန္တဗ္ဗံ ဟောတိ. န ပုရေဘတ္တံ ပစ္ဆာဘတ္တံ ကုလေသု စာရိတ္တံ အာပဇ္ဇိတဗ္ဗန္တိ ‘‘ယော ပန ဘိက္ခု နိမန္တိတော သဘတ္တော သမာနော သန္တံ ဘိက္ခုံ အနာပုစ္ဆာ ပုရေဘတ္တံ ဝါ ပစ္ဆာဘတ္တံ ဝါ ကုလေသု စာရိတ္တံ အာပဇ္ဇေယျ၊ အညတြ သမယာ ပါစိတ္တိယ’’န္တိ (ပါစိ. ၂၉၉) ဣမံ သိက္ခာပဒံ ရက္ခန္တေန တဿ ဝိဘင်္ဂေ ဝုတ္တံ ပုရေဘတ္တဉ္စ ပစ္ဆာဘတ္တဉ္စ စာရိတ္တံ န အာပဇ္ဇိတဗ္ဗံ. ဥဒ္ဓတော ဟောတိ စပလောတိ ဥဒ္ဓစ္စပကတိကော စေဝ ဟောတိ စီဝရမဏ္ဍန-ပတ္တမဏ္ဍန-သေနာသနမဏ္ဍနာ ဣမဿ ဝါ ပူတိကာယဿ ကေလာယနာ မဏ္ဍနာတိ ဧဝံ ဝုတ္တေန စ တရုဏဒါရကာဝစာပလျေန သမန္နာဂတော.

ပညဝတာ ဘဝိတဗ္ဗန္တိ စီဝရကမ္မာဒီသု ဣတိကတ္တဗ္ဗေသု ဥပါယပညာယ သမန္နာဂတေန ဘဝိတဗ္ဗံ. အဘိဓမ္မေ အဘိဝိနယေတိ အဘိဓမ္မပိဋကေ စေဝ ဝိနယပိဋကေ စ ပါဠိဝသေန စေဝ အဋ္ဌကထာဝသေန စ ယောဂေါ ကရဏီယော. သဗ္ဗန္တိမေန ဟိ ပရိစ္ဆေဒေန အဘိဓမ္မေ ဒုကတိကမာတိကာဟိ သဒ္ဓိံ ဓမ္မဟဒယဝိဘင်္ဂံ ဝိနာ န ဝဋ္ဋတိ. ဝိနယေ ပန ကမ္မာကမ္မဝိနိစ္ဆယေန သဒ္ဓိံ သုဝိနိစ္ဆိတာနိ ဒွေ ပါတိမောက္ခာနိ ဝိနာ န ဝဋ္ဋတိ.

အာရုပ္ပါတိ ဧတ္တာဝတာ အဋ္ဌပိ သမာပတ္တိယော ဝုတ္တာ ဟောန္တိ. တာ ပန သဗ္ဗေန သဗ္ဗံ အသက္ကောန္တေန သတ္တသုပိ ယောဂေါ ကရဏီယော၊ ဆသုပိ။ပေ။ ပဉ္စသုပိ. သဗ္ဗန္တိမေန ပရိစ္ဆေဒေန ဧကံ ကသိဏေ ပရိကမ္မကမ္မဋ္ဌာနံ ပဂုဏံ ကတွာ အာဒါယ ဝိစရိတဗ္ဗံ၊ ဧတ္တကံ ဝိနာ န ဝဋ္ဋတိ. ဥတ္တရိမနုဿဓမ္မေတိ ဣမိနာ သဗ္ဗေပိ လောကုတ္တရဓမ္မေ ဒဿေတိ. တသ္မာ အရဟန္တေန ဟုတွာ ဝိဟာတဗ္ဗံ၊ အရဟတ္တံ အနဘိသမ္ဘုဏန္တေန အနာဂါမိဖလေ သကဒါဂါမိဖလေ သောတာပတ္တိဖလေ ဝါ ပတိဋ္ဌာတဗ္ဗံ. သဗ္ဗန္တိမေန ပရိယာယေန ဧကံ ဝိပဿနာမုခံ ယာဝ အရဟတ္တာ ပဂုဏံ ကတွာ အာဒါယ ဝိစရိတဗ္ဗံ. သေသံ သဗ္ဗတ္ထ ဥတ္တာနမေဝ. ဣမံ ပန ဒေသနံ အာယသ္မာ သာရိပုတ္တော နေယျပုဂ္ဂလဿ ဝသေန အာဘိသမာစာရိကဝတ္တတော ပဋ္ဌာယ အနုပုဗ္ဗေန အရဟတ္တံ ပါပေတွာ နိဋ္ဌာပေသီတိ.

ပပဉ္စသူဒနိယာ မဇ္ဈိမနိကာယဋ္ဌကထာယ

ဂေါလိယာနိသုတ္တဝဏ္ဏနာ နိဋ္ဌိတာ.