၁၀. ကီဋာဂိရိသုတ္တဝဏ္ဏနာ

၁၇၄. ဧဝံ မေ သုတန္တိ ကီဋာဂိရိသုတ္တံ. တတ္ထ ကာသီသူတိ ဧဝံနာမကေ ဇနပဒေ. ဧထ တုမှေပိ၊ ဘိက္ခဝေတိ ဧထ တုမှေပိ၊ ဘိက္ခဝေ၊ ဣမေ ပဉ္စ အာနိသံသေ သမ္ပဿမာနာ အညတြေဝ ရတ္တိဘောဇနာ ဘုဉ္ဇထ. ဣတိ ဘဂဝါ ရတ္တိံ ဝိကာလဘောဇနံ၊ ဒိဝါ ဝိကာလဘောဇနန္တိ ဣမာနိ ဒွေ ဘောဇနာနိ ဧကပ္ပဟာရေန အဇဟာပေတွာ ဧကသ္မိံ သမယေ ဒိဝါ ဝိကာလဘောဇနမေဝ ဇဟာပေသိ၊ ပုန ကာလံ အတိနာမေတွာ ရတ္တိံ ဝိကာလဘောဇနံ ဇဟာပေန္တော ဧဝမာဟ. ကသ္မာ? ဣမာနိ ဟိ ဒွေ ဘောဇနာနိ ဝတ္တမာနာနိ ဝဋ္ဋေ အာစိဏ္ဏာနိ သမာစိဏ္ဏာနိ နဒိံ ဩတိဏ္ဏဥဒကံ ဝိယ အနုပက္ခန္ဒာနိ၊ နိဝါတေသု စ ဃရေသု သုဘောဇနာနိ ဘုဉ္ဇိတွာ ဝဍ္ဎိတာ သုခုမာလာ ကုလပုတ္တာ ဒွေ ဘောဇနာနိ ဧကပ္ပဟာရေန ပဇဟန္တာ ကိလမန္တိ. တသ္မာ ဧကပ္ပဟာရေန အဇဟာပေတွာ ဘဒ္ဒါလိသုတ္တေ ဒိဝါ ဝိကာလဘောဇနံ ဇဟာပေသိ၊ ဣဓ ရတ္တိံ ဝိကာလဘောဇနံ. ဇဟာပေန္တော ပန န တဇ္ဇိတွာ ဝါ နိဂ္ဂဏှိတွာ ဝါ၊ တေသံ ပဟာနပစ္စယာ ပန အပ္ပါဗာဓတဉ္စ သဉ္ဇာနိဿထာတိ ဧဝံ အာနိသံသံ ဒဿေတွာဝ ဇဟာပေသိ. ကီဋာဂိရီတိ တဿ နိဂမဿ နာမံ.

၁၇၅. အဿဇိပုနဗ္ဗသုကာတိ အဿဇိ စ ပုနဗ္ဗသုကော စ ဆသု ဆဗ္ဗဂ္ဂိယေသု ဒွေ ဂဏာစရိယာ. ပဏ္ဍုကော လောဟိတကော မေတ္တိယော ဘုမ္မဇကော အဿဇိ ပုနဗ္ဗသုကောတိ ဣမေ ဆ ဇနာ ဆဗ္ဗဂ္ဂိယာ နာမ. တေသု ပဏ္ဍုကလောဟိတကာ အတ္တနော ပရိသံ ဂဟေတွာ သာဝတ္ထိယံ ဝသန္တိ၊ မေတ္တိယဘုမ္မဇကာ ရာဇဂဟေ၊ ဣမေ ဒွေ ဇနာ ကီဋာဂိရိသ္မိံ အာဝါသိကာ ဟောန္တိ. အာဝါသိကာတိ နိဗဒ္ဓဝါသိနော၊ တံနိဗန္ဓာ အကတံ သေနာသနံ ကရောန္တိ၊ ဇိဏ္ဏံ ပဋိသင်္ခရောန္တိ၊ ကတေ ဣဿရာ ဟောန္တိ. ကာလိကန္တိ အနာဂတေ ကာလေ ပတ္တဗ္ဗံ အာနိသံသံ.

၁၇၈. မယာ စေတံ၊ ဘိက္ခဝေတိ ဣဓ ကိံ ဒဿေတိ? ဘိက္ခဝေ၊ ဒိဝသဿ တယော ဝါရေ ဘုဉ္ဇိတွာ သုခဝေဒနံယေဝ ဥပ္ပါဒေန္တော န ဣမသ္မိံ သာသနေ ကိစ္စကာရီ နာမ ဟောတိ၊ ဧတ္တကာ ပန ဝေဒနာ သေဝိတဗ္ဗာ၊ ဧတ္တကာ န သေဝိတဗ္ဗာတိ ဧတမတ္ထံ ဒဿေတုံ ဣမံ ဒေသနံ အာရဘိ. ဧဝရူပံ သုခဝေဒနံ ပဇဟထာတိ ဣဒဉ္စ ဂေဟဿိတသောမနဿဝသေန ဝုတ္တံ၊ ဥပသမ္ပဇ္ဇ ဝိဟရထာတိ ဣဒဉ္စ နေက္ခမ္မသိတသောမနဿဝသေန. ဣတော ပရေသုပိ ဒွီသု ဝါရေသု ဂေဟဿိတနေက္ခမ္မသိတာနံယေဝ ဒေါမနဿာနဉ္စ ဥပေက္ခာနဉ္စ ဝသေန အတ္ထော ဝေဒိတဗ္ဗော.

၁၈၁. ဧဝံ သေဝိတဗ္ဗာသေဝိတဗ္ဗဝေဒနံ ဒဿေတွာ ဣဒါနိ ယေသံ အပ္ပမာဒေန ကိစ္စံ ကတ္တဗ္ဗံ၊ ယေသဉ္စ န ကတ္တဗ္ဗံ၊ တေ ဒဿေတုံ နာဟံ၊ ဘိက္ခဝေ၊ သဗ္ဗေသံယေဝါတိအာဒိမာဟ. တတ္ထ ကတံ တေသံ အပ္ပမာဒေနာတိ တေသံ ယံ အပ္ပမာဒေန ကတ္တဗ္ဗံ၊ တံ ကတံ. အနုလောမိကာနီတိ ပဋိပတ္တိအနုလောမာနိ ကမ္မဋ္ဌာနသပ္ပါယာနိ၊ ယတ္ထ ဝသန္တေန သက္ကာ ဟောန္တိ မဂ္ဂဖလာနိ ပါပုဏိတုံ. ဣန္ဒြိယာနိ သမန္နာနယမာနာတိ သဒ္ဓါဒီနိ ဣန္ဒြိယာနိ သမာနံ ကုရုမာနာ.

၁၈၂. သတ္တိမေ၊ ဘိက္ခဝေ၊ ပုဂ္ဂလာတိ ဣဓ ကိံ ဒဿေတိ? ယေသံ အပ္ပမာဒေန ကရဏီယံ နတ္ထိ၊ တေ ဒွေ ဟောန္တိ. ယေသံ အတ္ထိ၊ တေ ပဉ္စာတိ ဧဝံ သဗ္ဗေပိ ဣမေ သတ္တ ပုဂ္ဂလာ ဟောန္တီတိ ဣမမတ္ထံ ဒဿေတိ.

တတ္ထ ဥဘတောဘာဂဝိမုတ္တောတိ ဒွီဟိ ဘာဂေဟိ ဝိမုတ္တော. အရူပသမာပတ္တိယာ ရူပကာယတော ဝိမုတ္တော၊ မဂ္ဂေန နာမကာယတော. သော စတုန္နံ အရူပသမာပတ္တီနံ ဧကေကတော ဝုဋ္ဌာယ သင်္ခါရေ သမ္မသိတွာ အရဟတ္တံ ပတ္တာနံ စတုန္နံ၊ နိရောဓာ ဝုဋ္ဌာယ အရဟတ္တံ ပတ္တအနာဂါမိနော စ ဝသေန ပဉ္စဝိဓော ဟောတိ. ပါဠိ ပနေတ္ထ – ‘‘ကတမော စ ပုဂ္ဂလော ဥဘတောဘာဂဝိမုတ္တော၊ ဣဓေကစ္စော ပုဂ္ဂလော အဋ္ဌ ဝိမောက္ခေ ကာယေန ဖုသိတွာ ဝိဟရတိ၊ ပညာယ စဿ ဒိသွာ အာသဝါ ပရိက္ခီဏာ ဟောန္တီ’’တိ (ပု. ပ. ၂၀၈) ဧဝံ အဘိဓမ္မေ အဋ္ဌဝိမောက္ခလာဘိနော ဝသေန အာဂတာ.

ပညာဝိမုတ္တောတိ ပညာယ ဝိမုတ္တော. သော သုက္ခဝိပဿကော၊ စတူဟိ ဈာနေဟိ ဝုဋ္ဌာယ အရဟတ္တံ ပတ္တာ စတ္တာရော စာတိ ဣမေသံ ဝသေန ပဉ္စဝိဓောဝ ဟောတိ. ပါဠိ ပနေတ္ထ အဋ္ဌဝိမောက္ခပဋိက္ခေပဝသေနေဝ အာဂတာ. ယထာဟ – ‘‘န ဟေဝ ခေါ အဋ္ဌ ဝိမောက္ခေ ကာယေန ဖုသိတွာ ဝိဟရတိ၊ ပညာယ စဿ ဒိသွာ အာသဝါ ပရိက္ခီဏာ ဟောန္တိ. အယံ ဝုစ္စတိ ပုဂ္ဂလော ပညာဝိမုတ္တော’’တိ.

ဖုဋ္ဌန္တံ သစ္ဆိကရောတီတိ ကာယသက္ခီ. ယော ဈာနဖဿံ ပဌမံ ဖုသတိ၊ ပစ္ဆာ နိရောဓံ နိဗ္ဗာနံ သစ္ဆိကရောတိ၊ သော သောတာပတ္တိဖလဋ္ဌံ အာဒိံ ကတွာ ယာဝ အရဟတ္တမဂ္ဂဋ္ဌာ ဆဗ္ဗိဓော ဟောန္တီတိ ဝေဒိတဗ္ဗော. တေနေဝါဟ – ‘‘ဣဓေကစ္စော ပုဂ္ဂလော အဋ္ဌ ဝိမောက္ခေ ကာယေန ဖုသိတွာ ဝိဟရတိ၊ ပညာယ စဿ ဒိသွာ ဧကစ္စေ အာသဝါ ပရိက္ခီဏာ ဟောန္တိ. အယံ ဝုစ္စတိ ပုဂ္ဂလော ကာယသက္ခီ’’တိ.

ဒိဋ္ဌန္တံ ပတ္တောတိ ဒိဋ္ဌိပ္ပတ္တော. တတြိဒံ သင်္ခေပလက္ခဏံ – ဒုက္ခာ သင်္ခါရာ၊ သုခေါ နိရောဓောတိ ဉာတံ ဟောတိ ဒိဋ္ဌံ ဝိဒိတံ သစ္ဆိကတံ ဖုသိတံ ပညာယာတိ ဒိဋ္ဌိပ္ပတ္တော. ဝိတ္ထာရတော ပနေသောပိ ကာယသက္ခိ ဝိယ ဆဗ္ဗိဓော ဟောတိ. တေနေဝါဟ – ‘‘ဣဓေကစ္စော ပုဂ္ဂလော ဣဒံ ဒုက္ခန္တိ ယထာဘူတံ ပဇာနာတိ။ပေ။ အယံ ဒုက္ခနိရောဓဂါမိနီ ပဋိပဒါတိ ယထာဘူတံ ပဇာနာတိ၊ တထာဂတပ္ပဝေဒိတာ စဿ ဓမ္မာ ပညာယ ဝေါဒိဋ္ဌာ ဟောန္တိ ဝေါစရိတာ။ပေ။ အယံ ဝုစ္စတိ ပုဂ္ဂလော ဒိဋ္ဌိပ္ပတ္တော’’တိ (ပု. ပ. ၂၀၈).

သဒ္ဓါဝိမုတ္တောတိ သဒ္ဓါယ ဝိမုတ္တော. သောပိ ဝုတ္တနယေနေဝ ဆဗ္ဗိဓော ဟောတိ. တေနေဝါဟ – ‘‘ဣဓေကစ္စော ပုဂ္ဂလော ဣဒံ ဒုက္ခန္တိ – ယထာဘူတံ ပဇာနာတိ။ပေ။ အယံ ဒုက္ခနိရောဓဂါမိနီ ပဋိပဒါတိ ယထာဘူတံ ပဇာနာတိ. တထာဂတပ္ပဝေဒိတာ စဿ ဓမ္မာ ပညာယ ဝေါဒိဋ္ဌာ ဟောန္တိ ဝေါစရိတာ။ပေ။ နော စ ခေါ ယထာ ဒိဋ္ဌိပ္ပတ္တဿ. အယံ ဝုစ္စတိ ပုဂ္ဂလော သဒ္ဓါဝိမုတ္တော’’တိ (ပု. ပ. ၂၀၈). ဧတေသု ဟိ သဒ္ဓါဝိမုတ္တဿ ပုဗ္ဗဘာဂမဂ္ဂက္ခဏေ သဒ္ဒဟန္တဿ ဝိယ ဩကပ္ပေန္တဿ ဝိယ အဓိမုစ္စန္တဿ ဝိယ စ ကိလေသက္ခယော ဟောတိ၊ ဒိဋ္ဌိပ္ပတ္တဿ ပုဗ္ဗဘာဂမဂ္ဂက္ခဏေ ကိလေသစ္ဆေဒကဉာဏံ အဒန္ဓံ တိခိဏံ သူရံ ဟုတွာ ဝဟတိ. တသ္မာ ယထာ နာမ နာတိတိခိဏေန အသိနာ ကဒလိံ ဆိန္ဒန္တဿ ဆိန္နဋ္ဌာနံ န မဋ္ဌံ ဟောတိ၊ အသိ န သီဃံ ဝဟတိ၊ သဒ္ဒေါ သုယျတိ၊ ဗလဝတရော ဝါယာမော ကာတဗ္ဗော ဟောတိ၊ ဧဝရူပါ သဒ္ဓါဝိမုတ္တဿ ပုဗ္ဗဘာဂမဂ္ဂဘာဝနာ. ယထာ ပန နိသိတအသိနာ ကဒလိံ ဆိန္ဒန္တဿ ဆိန္နဋ္ဌာနံ မဋ္ဌံ ဟောတိ၊ အသိ သီဃံ ဝဟတိ၊ သဒ္ဒေါ န သုယျတိ၊ ဗလဝဝါယာမကိစ္စံ န ဟောတိ၊ ဧဝရူပါ ပညာဝိမုတ္တဿ ပုဗ္ဗဘာဂမဂ္ဂဘာဝနာ ဝေဒိတဗ္ဗာ.

ဓမ္မံ အနုဿရတီတိ ဓမ္မာနုသာရီ. ဓမ္မောတိ ပညာ၊ ပညာပုဗ္ဗင်္ဂမံ မဂ္ဂံ ဘာဝေတီတိ အတ္ထော. သဒ္ဓါနုသာရိမှိ စ ဧသေဝ နယော. ဥဘော ပနေတေ သောတာပတ္တိမဂ္ဂဋ္ဌာယေဝ. ဝုတ္တမ္ပိ စေတံ – ‘‘ယဿ ပုဂ္ဂလဿ သောတာပတ္တိဖလသစ္ဆိကိရိယာယ ပဋိပန္နဿ ပညိန္ဒြိယံ အဓိမတ္တံ ဟောတိ၊ ပညာဝါဟိံ ပညာပုဗ္ဗင်္ဂမံ အရိယမဂ္ဂံ ဘာဝေတိ. အယံ ဝုစ္စတိ ပုဂ္ဂလော ဓမ္မာနုသာရီ’’တိ (ပု. ပ. ၂၀၈). တထာ – ‘‘ယဿ ပုဂ္ဂလဿ သောတာပတ္တိဖလသစ္ဆိကိရိယာယ ပဋိပန္နဿ သဒ္ဓိန္ဒြိယံ အဓိမတ္တံ ဟောတိ၊ သဒ္ဓါဝါဟိံ သဒ္ဓါပုဗ္ဗင်္ဂမံ အရိယမဂ္ဂံ ဘာဝေတိ. အယံ ဝုစ္စတိ ပုဂ္ဂလော သဒ္ဓါနုသာရီ’’တိ. အယမေတ္ထ သင်္ခေပေါ. ဝိတ္ထာရတော ပနေသာ ဥဘတောဘာဂဝိမုတ္တာဒိကထာ ဝိသုဒ္ဓိမဂ္ဂေ ပညာဘာဝနာဓိကာရေ ဝုတ္တာ. တသ္မာ တတ္ထ ဝုတ္တနယေနေဝ ဝေဒိတဗ္ဗာ. ယာ ပနေသာ ဧတေသံ ဝိဘာဂဒဿနတ္ထံ ဣဓ ပါဠိ အာဂတာ၊ တတ္ထ ယသ္မာ ရူပသမာပတ္တိယာ ဝိနာ အရူပသမာပတ္တိယော နာမ နတ္ထိ၊ တသ္မာ အာရုပ္ပါတိ ဝုတ္တေပိ အဋ္ဌ ဝိမောက္ခာ ဝုတ္တာဝ ဟောန္တီတိ ဝေဒိတဗ္ဗာ.

ကာယေန ဖုသိတွာတိ သဟဇာတနာမကာယေန ဖုသိတွာ. ပညာယ စဿ ဒိသွာတိ ပညာယ စ ဧတဿ အရိယသစ္စဓမ္မေ ဒိသွာ. ဧကစ္စေ အာသဝါတိ ပဌမမဂ္ဂါဒီဟိ ပဟာတဗ္ဗာ ဧကဒေသအာသဝါ. တထာဂတပ္ပဝေဒိတာတိ တထာဂတေန ပဝေဒိတာ စတုသစ္စဓမ္မာ. ပညာယ ဝေါဒိဋ္ဌာ ဟောန္တီတိ ဣမသ္မိံ ဌာနေ သီလံ ကထိတံ၊ ဣမသ္မိံ သမာဓိ၊ ဣမသ္မိံ ဝိပဿနာ၊ ဣမသ္မိံ မဂ္ဂေါ၊ ဣမသ္မိံ ဖလန္တိ ဧဝံ အတ္ထေန အတ္ထေ ကာရဏေန ကာရဏေ စိဏ္ဏစရိတတ္တာ မဂ္ဂပညာယ သုဒိဋ္ဌာ ဟောန္တိ. ဝေါစရိတာတိ ဝိစရိတာ. သဒ္ဓါ နိဝိဋ္ဌာ ဟောတီတိ ဩကပ္ပနသဒ္ဓါ ပတိဋ္ဌိတာ ဟောတိ. မတ္တသော နိဇ္ဈာနံ ခမန္တီတိ မတ္တာယ ဩလောကနံ ခမန္တိ. သဒ္ဓါမတ္တန္တိ သဒ္ဓါယေဝ၊ ဣတရံ တဿေဝ ဝေဝစနံ

ဣတိ ဣမေသု အပ္ပမာဒေန ကရဏီယေသု ပုဂ္ဂလေသု တယော ပဋိဝိဒ္ဓမဂ္ဂဖလာ သေခါ. တေသု အနုလောမသေနာသနံ သေဝမာနာ ကလျာဏမိတ္တေ ဘဇမာနာ ဣန္ဒြိယာနိ သမန္နာနယမာနာ အနုပုဗ္ဗေန အရဟတ္တံ ဂဏှန္တိ. တသ္မာ တေသံ ယထာဌိတောဝ ပါဠိအတ္ထော. အဝသာနေ ပန ဒွေ သောတာပတ္တိမဂ္ဂသမင်္ဂိနော. တေဟိ တဿ မဂ္ဂဿ အနုလောမသေနာသနံ သေဝိတံ၊ ကလျာဏမိတ္တာ ဘဇိတာ၊ ဣန္ဒြိယာနိ သမန္နာနီတာနိ. ဥပရိ ပန တိဏ္ဏံ မဂ္ဂါနံ အတ္ထာယ သေဝမာနာ ဘဇမာနာ သမန္နာနယမာနာ အနုပုဗ္ဗေန အရဟတ္တံ ပါပုဏိဿန္တီတိ အယမေတ္ထ ပါဠိအတ္ထော.

ဝိတဏ္ဍဝါဒီ ပန ဣမမေဝ ပါဠိံ ဂဟေတွာ – ‘‘လောကုတ္တရမဂ္ဂေါ န ဧကစိတ္တက္ခဏိကော၊ ဗဟုစိတ္တက္ခဏိကော’’တိ ဝဒတိ. သော ဝတ္တဗ္ဗော – ‘‘ယဒိ အညေန စိတ္တေန သေနာသနံ ပဋိသေဝတိ၊ အညေန ကလျာဏမိတ္တေ ဘဇတိ၊ အညေန ဣန္ဒြိယာနိ သမန္နာနေတိ၊ အညံ မဂ္ဂစိတ္တန္တိ သန္ဓာယ တွံ ‘န ဧကစိတ္တက္ခဏိကော မဂ္ဂေါ၊ ဗဟုစိတ္တက္ခဏိကော’တိ ဝဒသိ၊ ဧဝံ သန္တေ သေနာသနံ သေဝမာနော နီလောဘာသံ ပဗ္ဗတံ ပဿတိ၊ ဝနံ ပဿတိ၊ မိဂပက္ခီနံ သဒ္ဒံ သုဏာတိ၊ ပုပ္ဖဖလာနံ ဂန္ဓံ ဃာယတိ၊ ပါနီယံ ပိဝန္တော ရသံ သာယတိ၊ နိသီဒန္တော နိပဇ္ဇန္တော ဖဿံ ဖုသတိ. ဧဝံ တေ ပဉ္စဝိညာဏသမင်္ဂီပိ လောကုတ္တရဓမ္မသမင်္ဂီယေဝ ဘဝိဿတိ. သစေ ပနေတံ သမ္ပဋိစ္ဆသိ၊ သတ္ထာရာ သဒ္ဓိံ ပဋိဝိရုဇ္ဈသိ. သတ္ထာရာ ဟိ ပဉ္စဝိညာဏကာယာ ဧကန္တံ အဗျာကတာဝ ဝုတ္တာ၊ တံသမင်္ဂိဿ ကုသလာကုသလံ ပဋိက္ခိတ္တံ၊ လောကုတ္တရမဂ္ဂေါ စ ဧကန္တကုသလော. တသ္မာ ပဇဟေတံ ဝါဒ’’န္တိ ပညပေတဗ္ဗော. သစေ ပညတ္တိံ န ဥပဂစ္ဆတိ၊ ‘‘ဂစ္ဆ ပါတောဝ ဝိဟာရံ ပဝိသိတွာ ယာဂုံ ပိဝါဟီ’’တိ ဥယျောဇေတဗ္ဗော.

၁၈၃. နာဟံ၊ ဘိက္ခဝေ၊ အာဒိကေနေဝါတိ အဟံ၊ ဘိက္ခဝေ၊ ပဌမမေဝ မဏ္ဍူကဿ ဥပ္ပတိတွာ ဂမနံ ဝိယ အညာရာဓနံ အရဟတ္တေ ပတိဋ္ဌာနံ န ဝဒါမိ. အနုပုဗ္ဗသိက္ခာတိ ကရဏတ္ထေ ပစ္စတ္တဝစနံ. ပရတော ပဒဒွယေပိ ဧသေဝ နယော. သဒ္ဓါဇာတောတိ ဩကပ္ပနိယသဒ္ဓါယ ဇာတသဒ္ဓေါ. ဥပသင်္ကမတီတိ ဂရူနံ သမီပံ ဂစ္ဆတိ. ပယိရုပါသတီတိ သန္တိကေ နိသီဒတိ. ဓာရေတီတိ သာဓုကံ ကတွာ ဓာရေတိ. ဆန္ဒော ဇာယတီတိ ကတ္တုကမျတာကုသလစ္ဆန္ဒော ဇာယတိ. ဥဿဟတီတိ ဝီရိယံ ကရောတိ. တုလေတီတိ အနိစ္စံ ဒုက္ခံ အနတ္တာတိ တုလယတိ. တုလယိတွာ ပဒဟတီတိ ဧဝံ တီရဏဝိပဿနာယ တုလယန္တော မဂ္ဂပဓာနံ ပဒဟတိ. ပဟိတတ္တောတိ ပေသိတစိတ္တော. ကာယေန စေဝ ပရမသစ္စန္တိ နာမကာယေန နိဗ္ဗာနသစ္စံ သစ္ဆိကရောတိ. ပညာယ စာတိ နာမကာယသမ္ပယုတ္တာယ မဂ္ဂပညာယ ပဋိဝိဇ္ဈတိ ပဿတိ.

ဣဒါနိ ယသ္မာ တေ သတ္ထု အာဂမနံ သုတွာ ပစ္စုဂ္ဂမနမတ္တမ္ပိ န အကံသု၊ တသ္မာ တေသံ စရိယံ ဂရဟန္တော သာပိ နာမ၊ ဘိက္ခဝေ၊ သဒ္ဓါ နာဟောသီတိအာဒိမာဟ. တတ္ထ ကီဝဒူရေဝိမေတိ ကိတ္တကံ ဒူရေ ဌာနေ. ယောဇနသတမ္ပိ ယောဇနသဟဿမ္ပိ အပက္ကန္တာတိ ဝတ္တုံ ဝဋ္ဋတိ၊ န ပန ကိဉ္စိ အာဟ. စတုပ္ပဒံ ဝေယျာကရဏန္တိ စတုသစ္စဗျာကရဏံ သန္ဓာယ ဝုတ္တံ.

၁၈၄. ယဿုဒ္ဒိဋ္ဌဿာတိ ယဿ ဥဒ္ဒိဋ္ဌဿ. ယောပိ သော၊ ဘိက္ခဝေ၊ သတ္ထာတိ ဗာဟိရကသတ္ထာရံ ဒဿေတိ. ဧဝရူပီတိ ဧဝံဇာတိကာ. ပဏောပဏဝိယာတိ ပဏဝိယာ စ ဩပဏဝိယာ စ. န ဥပေတီတိ န ဟောတိ. ကယဝိက္ကယကာလေ ဝိယ အဂ္ဃဝဍ္ဎနဟာပနံ န ဟောတီတိ အတ္ထော. အယံ ဂေါဏော ကိံ အဂ္ဃတိ၊ ဝီသတိ အဂ္ဃတီတိ ဘဏန္တော ပဏတိ နာမ. န ဝီသတိ အဂ္ဃတိ၊ ဒသ အဂ္ဃတီတိ ဘဏန္တော ဩပဏတိ နာမ. ဣဒံ ပဋိသေဓေန္တော အာဟ ‘‘ပဏောပဏဝိယာ န ဥပေတီ’’တိ. ဣဒါနိ တံ ပဏောပဏဝိယံ ဒဿေတုံ ဧဝဉ္စ နော အဿ၊ အထ နံ ကရေယျာမ၊ န စ နော ဧဝမဿ၊ န နံ ကရေယျာမာတိ အာဟ.

ကိံ ပန၊ ဘိက္ခဝေတိ၊ ဘိက္ခဝေ၊ ယံ တထာဂတော သဗ္ဗသော အာမိသေဟိ ဝိသံသဋ္ဌော ဝိဟရတိ၊ ဧဝံ ဝိသံသဋ္ဌဿ သတ္ထုနော ဧဝရူပါ ပဏောပဏဝိယာ ကိံ ယုဇ္ဇိဿတိ? ပရိယောဂါဟိယ ဝတ္တတောတိ ပရိယောဂါဟိတွာ ဥက္ခိပိတွာ ဂဟေတွာ ဝတ္တန္တဿ. အယမနုဓမ္မောတိ အယံ သဘာဝေါ. ဇာနာတိ ဘဂဝါ၊ နာဟံ ဇာနာမီတိ ဘဂဝါ ဧကာသနဘောဇနေ အာနိသံသံ ဇာနာတိ၊ အဟံ န ဇာနာမီတိ မယိ သဒ္ဓါယ ဒိဝသဿ တယော ဝါရေ ဘောဇနံ ပဟာယ ဧကာသနဘောဇနံ ဘုဉ္ဇတိ. ရုဠဟနီယန္တိ ရောဟနီယံ. ဩဇဝန္တန္တိ သိနေဟဝန္တံ. ကာမံ တစော စာတိ ဣမိနာ စတုရင်္ဂဝီရိယံ ဒဿေတိ. ဧတ္ထ ဟိ တစော ဧကံ အင်္ဂံ၊ နှာရု ဧကံ၊ အဋ္ဌိ ဧကံ၊ မံသလောဟိတံ ဧကန္တိ ဧဝံ စတုရင်္ဂသမန္နာဂတံ ဝီရိယံ အဓိဋ္ဌဟိတွာ အရဟတ္တံ အပ္ပတွာ န ဝုဋ္ဌဟိဿာမီတိ ဧဝံ ပဋိပဇ္ဇတီတိ ဒဿေတိ. သေသံ သဗ္ဗတ္ထ ဥတ္တာနမေဝ. ဒေသနံ ပန ဘဂဝါ နေယျပုဂ္ဂလဿ ဝသေန အရဟတ္တနိကူဋေန နိဋ္ဌာပေသီတိ.

ပပဉ္စသူဒနိယာ မဇ္ဈိမနိကာယဋ္ဌကထာယ

ကီဋာဂိရိသုတ္တဝဏ္ဏနာ နိဋ္ဌိတာ.

ဒုတိယဝဂ္ဂဝဏ္ဏနာ နိဋ္ဌိတာ.