၈. နဠကပါနသုတ္တဝဏ္ဏနာ

၁၆၆. ဧဝံ မေ သုတန္တိ နဠကပါနသုတ္တံ. တတ္ထ နဠကပါနေတိ ဧဝံနာမကေ ဂါမေ. ပုဗ္ဗေ ကိရ အမှာကံ ဗောဓိသတ္တော ဝါနရယောနိယံ နိဗ္ဗတ္တော၊ မဟာကာယော ကပိရာဇာ အနေကဝါနရသဟဿပရိဝုတော ပဗ္ဗတပါဒေ ဝိစရတိ. ပညဝါ ခေါ ပန ဟောတိ မဟာပုညော. သော ပရိသံ ဧဝံ ဩဝဒတိ – ‘‘ဣမသ္မိံ ပဗ္ဗတပါဒေ တာတာ၊ ဝိသဖလာနိ နာမ ဟောန္တိ၊ အမနုဿပရိဂ္ဂဟိတာ ပေါက္ခရဏိယော နာမ ဟောန္တိ၊ တုမှေ ပုဗ္ဗေ ခါဒိတပုဗ္ဗာနေဝ ဖလာနိ ခါဒထ၊ ပီတပုဗ္ဗာနေဝ ပါနီယာနိ စ ပိဝထ၊ ဧတ္ထ ဝေါ မံ ပဋိပုစ္ဆိတဗ္ဗကိစ္စံ နတ္ထိ၊ အခါဒိတပုဗ္ဗာနိ ပန ဖလာနိ အပီတပုဗ္ဗာနိ စ ပါနီယာနိ မံ အပုစ္ဆိတွာ မာ ခါဒိတ္ထ မာ ပိဝိတ္ထာ’’တိ.

တေ ဧကဒိဝသံ စရမာနာ အညံ ပဗ္ဗတပါဒံ ဂန္တွာ ဂေါစရံ ဂဟေတွာ ပါနီယံ ဩလောကေန္တာ ဧကံ အမနုဿပရိဂ္ဂဟိတံ ပေါက္ခရဏိံ ဒိသွာ သဟသာ အပိဝိတွာ သမန္တာ ပရိဝါရေတွာ မဟာသတ္တဿ အာဂမနံ ဩလောကယမာနာ နိသီဒိံသု. မဟာသတ္တော အာဂန္တွာ ‘‘ကိံ တာတာ ပါနီယံ န ပိဝထာ’’တိ အာဟ. တုမှာကံ အာဂမနံ ဩလောကေမာတိ. သာဓု တာတာတိ သမန္တာ ပဒံ ပရိယေသမာနော ဩတိဏ္ဏပဒံယေဝ အဒ္ဒသ၊ န ဥတ္တိဏ္ဏပဒံ၊ ဒိသွာ သပရိဿယာတိ အညာသိ. တာဝဒေဝ စ တတ္ထ အဘိနိဗ္ဗတ္တအမနုဿော ဥဒကံ ဒွေဓာ ကတွာ ဥဋ္ဌာသိ သေတမုခေါ နီလကုစ္ဆိ ရတ္တဟတ္ထပါဒေါ မဟာဒါဌိကော ဝင်္ကဒါဌော ဝိရူပေါ ဗီဘစ္ဆော ဥဒကရက္ခသော. သော ဧဝမာဟ – ‘‘ကသ္မာ ပါနီယံ န ပိဝထ၊ မဓုရံ ဥဒကံ ပိဝထ၊ ကိံ တုမှေ ဧတဿ ဝစနံ သုဏာထာ’’တိ? မဟာသတ္တော အာဟ – ‘‘တွံ ဣဓ အဓိဝတ္ထော အမနုဿော’’တိ? အာမာဟန္တိ. တွံ ဣဓ ဩတိဏ္ဏေ လဘသီတိ? အာမ လဘာမိ၊ တုမှေ ပန သဗ္ဗေ ခါဒိဿာမီတိ. န သက္ခိဿသိ၊ ယက္ခာတိ. ပါနီယံ ပန ပိဝိဿထာတိ? အာမ ပိဝိဿာမာတိ. ဧဝံ သန္တေ ဧကောပိ ဝေါ န မုစ္စိဿတီတိ. ပါနီယဉ္စ ပိဝိဿာမ၊ န စ တေ ဝသံ ဂမိဿာမာတိ ဧကနဠံ အာဟရာပေတွာ ကောဋိယံ ဂဟေတွာ ဓမိ၊ သဗ္ဗော ဧကစ္ဆိဒ္ဒေါ အဟောသိ၊ တီရေ နိသီဒိတွာဝ ပါနီယံ ပိဝိ၊ သေသဝါနရာနံ ပါဋိယေက္ကေ နဠေ အာဟရာပေတွာ ဓမိတွာ အဒါသိ. သဗ္ဗေ ယက္ခဿ ပဿန္တဿေဝ ပါနီယံ ပိဝိံသု. ဝုတ္တမ္ပိ စေတံ –

‘‘ဒိသွာ ပဒမနုတ္တိဏ္ဏံ၊ ဒိသွာနော’ တရိတံ ပဒံ၊

နဠေန ဝါရိံ ပိဿာမ၊ နေဝ မံ တွံ ဝဓိဿသီ’’တိ. (ဇာ. ၁.၁.၂၀)၊

တတော ပဋ္ဌာယ ယာဝ အဇ္ဇဒိဝသာ တသ္မိံ ဌာနေ နဠာ ဧကစ္ဆိဒ္ဒါဝ ဟောန္တိ. ဣမိနာ ဟိ သဒ္ဓိံ ဣမသ္မိံ ကပ္ပေ စတ္တာရိ ကပ္ပဋ္ဌိယပါဋိဟာရိယာနိ နာမ – စန္ဒေ သသဗိမ္ဗံ၊ ဝဋ္ဋကဇာတကမှိ သစ္စကိရိယဋ္ဌာနေ အဂ္ဂိဿ ဂမနုပစ္ဆေဒေါ၊ ဃဋိကာရကုမ္ဘကာရဿ မာတာပိတူနံ ဝသနဋ္ဌာနေ ဒေဝဿ အဝဿနံ၊ တဿာ ပေါက္ခရဏိယာ တီရေ နဠာနံ ဧကစ္ဆိဒ္ဒဘာဝေါတိ. ဣတိ သာ ပေါက္ခရဏီ နဠေန ပါနီယဿ ပီတတ္တာ နဠကပါနာတိ နာမံ လဘိ. အပရဘာဂေ တံ ပေါက္ခရဏိံ နိဿာယ ဂါမော ပတိဋ္ဌာသိ၊ တဿာပိ နဠကပါနန္တေဝ နာမံ ဇာတံ. တံ သန္ဓာယ ဝုတ္တံ ‘‘နဠကပါနေ’’တိ. ပလာသဝနေတိ ကိံသုကဝနေ.

၁၆၇. တဂ္ဃ မယံ၊ ဘန္တေတိ ဧကံသေနေဝ မယံ၊ ဘန္တေ၊ အဘိရတာ. အညေပိ ယေ တုမှာကံ သာသနေ အဘိရမန္တိ၊ တေ အမှေဟိ သဒိသာဝ ဟုတွာ အဘိရမန္တီတိ ဒီပေန္တိ.

နေဝ ရာဇာဘိနီတာတိအာဒီသု ဧကော ရညော အပရာဓံ ကတွာ ပလာယတိ. ရာဇာ ကုဟိံ၊ ဘော၊ အသုကောတိ? ပလာတော ဒေဝါတိ. ပလာတဋ္ဌာနေပိ မေ န မုစ္စိဿတိ၊ သစေ ပန ပဗ္ဗဇေယျ၊ မုစ္စေယျာတိ ဝဒတိ. တဿ ကောစိဒေဝ သုဟဒေါ ဂန္တွာ တံ ပဝတ္တိံ အာရောစေတွာ တွံ သစေ ဇီဝိတုမိစ္ဆသိ၊ ပဗ္ဗဇာဟီတိ. သော ပဗ္ဗဇိတွာ ဇီဝိတံ ရက္ခမာနော စရတိ. အယံ ရာဇာဘိနီတော နာမ.

ဧကော ပန စောရာနံ မူလံ ဆိန္ဒန္တော စရတိ. စောရာ သုတွာ ‘‘ပုရိသာနံ အတ္ထိကဘာဝံ န ဇာနာတိ၊ ဇာနာပေဿာမ န’’န္တိ ဝဒန္တိ. သော တံ ပဝတ္တိံ သုတွာ ပလာယတိ. စောရာ ပလာတောတိ သုတွာ ‘‘ပလာတဋ္ဌာနေပိ နော န မုစ္စိဿတိ၊ သစေ ပန ပဗ္ဗဇေယျ၊ မုစ္စေယျာ’’တိ ဝဒန္တိ. သော တံ ပဝတ္တိံ သုတွာ ပဗ္ဗဇတိ. အယံ စောရာဘိနီတော နာမ.

ဧကော ပန ဗဟုံ ဣဏံ ခါဒိတွာ တေန ဣဏေန အဋ္ဋော ပီဠိတော တမှာ ဂါမာ ပလာယတိ. ဣဏသာမိကာ သုတွာ ‘‘ပလာတဋ္ဌာနေပိ နော န မုစ္စိဿတိ၊ သစေ ပန ပဗ္ဗဇေယျ၊ မုစ္စေယျာ’’တိ ဝဒန္တိ. သော တံ ပဝတ္တိံ သုတွာ ပဗ္ဗဇတိ. အယံ ဣဏဋ္ဋော နာမ.

ရာဇဘယာဒီနံ ပန အညတရေန ဘယေန ဘီတော အဋ္ဋော အာတုရော ဟုတွာ နိက္ခမ္မ ပဗ္ဗဇိတော ဘယဋ္ဋော နာမ. ဒုဗ္ဘိက္ခာဒီသု ဇီဝိတုံ အသက္ကောန္တော ပဗ္ဗဇိတော အာဇီဝိကာပကတော နာမ၊ အာဇီဝိကာယ ပကတော အဘိဘူတောတိ အတ္ထော. ဣမေသု ပန ဧကောပိ ဣမေဟိ ကာရဏေဟိ ပဗ္ဗဇိတော နာမ နတ္ထိ၊ တသ္မာ ‘‘နေဝ ရာဇာဘိနီတော’’တိအာဒိမာဟ.

ဝိဝေကန္တိ ဝိဝိစ္စ ဝိဝိတ္တော ဟုတွာ. ဣဒံ ဝုတ္တံ ဟောတိ – ယံ ကာမေဟိ စ အကုသလဓမ္မေဟိ စ ဝိဝိတ္တေန ပဌမဒုတိယဇ္ဈာနသင်္ခါတံ ပီတိသုခံ အဓိဂန္တဗ္ဗံ၊ သစေ တံ ဝိဝိစ္စ ကာမေဟိ ဝိဝိစ္စ အကုသလေဟိ ဓမ္မေဟိ ပီတိသုခံ နာဓိဂစ္ဆတိ၊ အညံ ဝါ ဥပရိ ဒွိန္နံ ဈာနာနံ စတုန္နဉ္စ မဂ္ဂါနံ ဝသေန သန္တတရံ သုခံ နာဓိဂစ္ဆတိ၊ တဿ ဣမေ အဘိဇ္ဈာဒယော စိတ္တံ ပရိယာဒါယ တိဋ္ဌန္တီတိ. တတ္ထ အရတီတိ အဓိကုသလေသု ဓမ္မေသု ဥက္ကဏ္ဌိတတာ. တန္ဒီတိ အာလသိယဘာဝေါ. ဧဝံ ယော ပဗ္ဗဇိတွာ ပဗ္ဗဇိတကိစ္စံ ကာတုံ န သက္ကောတိ၊ တဿ ဣမေ သတ္တ ပါပဓမ္မာ ဥပ္ပဇ္ဇိတွာ စိတ္တံ ပရိယာဒိယန္တီတိ ဒဿေတွာ ဣဒါနိ ယဿ တေ ဓမ္မာ စိတ္တံ ပရိယာဒါယ တိဋ္ဌန္တိ၊ သောယေဝ သမဏကိစ္စမ္ပိ ကာတုံ န သက္ကောတီတိ ပုန ဝိဝေကံ အနုရုဒ္ဓါ။ပေ။ အညံ ဝါ တတော သန္တတရန္တိ အာဟ.

ဧဝံ ကဏှပက္ခံ ဒဿေတွာ ဣဒါနိ တေနေဝ နယေန သုက္ကပက္ခံ ဒဿေတုံ ပုန ဝိဝေကန္တိအာဒိမာဟ. တဿတ္ထော ဝုတ္တနယေနေဝ ဝေဒိတဗ္ဗော.

၁၆၈. သင်္ခါယာတိ ဇာနိတွာ. ဧကန္တိ ဧကစ္စံ. ပဋိသေဝတီတိ သေဝိတဗ္ဗယုတ္တကံ သေဝတိ. သေသပဒေသုပိ ဧသေဝ နယော. ဥပပတ္တီသု ဗျာကရောတီတိ သပ္ပဋိသန္ဓိကေ တာဝ ဗျာကရောတု၊ အပ္ပဋိသန္ဓိကေ ကထံ ဗျာကရောတီတိ. အပ္ပဋိသန္ဓိကဿ ပုန ဘဝေ ပဋိသန္ဓိ နတ္ထီတိ ဝဒန္တော ဥပပတ္တီသု ဗျာကရောတိ နာမ.

ဇနကုဟနတ္ထန္တိ ဇနဝိမှာပနတ္ထံ. ဇနလပနတ္ထန္တိ မဟာဇနဿ ဥပလာပနတ္ထံ. န ဣတိ မံ ဇနော ဇာနာတူတိ ဧဝံ မံ မဟာဇနော ဇာနိဿတိ၊ ဧဝံ မေ မဟာဇနဿ အန္တရေ ကိတ္တိသဒ္ဒေါ ဥဂ္ဂစ္ဆိဿတီတိ ဣမိနာပိ ကာရဏေန န ဗျာကရောတီတိ အတ္ထော. ဥဠာရဝေဒါတိ မဟန္တတုဋ္ဌိနော.

၁၆၉. သော ခေါ ပနဿ အာယသ္မာတိ သော ပရိနိဗ္ဗုတော အာယသ္မာ ဣမဿ ဌိတဿ အာယသ္မတော. ဧဝံသီလောတိအာဒီသု လောကိယလောကုတ္တရမိဿကာဝ သီလာဒယော ဝေဒိတဗ္ဗော. ဧဝံဓမ္မောတိ ဧတ္ထ ပန သမာဓိပက္ခိကာ ဓမ္မာ ဓမ္မာတိ အဓိပ္ပေတာ. ဖာသုဝိဟာရော ဟောတီတိ တေန ဘိက္ခုနာ ပူရိတပဋိပတ္တိံ ပူရေန္တဿ အရဟတ္တဖလံ သစ္ဆိကတွာ ဖလသမာပတ္တိဝိဟာရေန ဖာသုဝိဟာရော ဟောတိ၊ အရဟတ္တံ ပတ္တုမသက္ကောန္တဿ ပဋိပတ္တိံ ပူရယမာနဿ စရတောပိ ဖာသုဝိဟာရောယေဝ နာမ ဟောတိ. ဣမိနာ နယေန သဗ္ဗဝါရေသု အတ္ထော ဝေဒိတဗ္ဗောတိ.

ပပဉ္စသူဒနိယာ မဇ္ဈိမနိကာယဋ္ဌကထာယ

နဠကပါနသုတ္တဝဏ္ဏနာ နိဋ္ဌိတာ.