၇. စာတုမသုတ္တဝဏ္ဏနာ

၁၅၇. ဧဝံ မေ သုတန္တိ စာတုမသုတ္တံ. တတ္ထ စာတုမာယန္တိ ဧဝံနာမကေ ဂါမေ. ပဉ္စမတ္တာနိ ဘိက္ခုသတာနီတိ အဓုနာ ပဗ္ဗဇိတာနံ ဘိက္ခူနံ ပဉ္စ သတာနိ. ထေရာ ကိရ စိန္တေသုံ – ‘‘ဣမေ ကုလပုတ္တာ ဒသဗလံ အဒိသွာဝ ပဗ္ဗဇိတာ၊ ဧတေသံ ဘဂဝန္တံ ဒဿေဿာမ၊ ဘဂဝတော သန္တိကေ ဓမ္မံ သုတွာ အတ္တနော အတ္တနော ယထာဥပနိဿယေန ပတိဋ္ဌဟိဿန္တီ’’တိ. တသ္မာ တေ ဘိက္ခူ ဂဟေတွာ အာဂတာ. ပဋိသမ္မောဒမာနာတိ ‘‘ကစ္စာဝုသော၊ ခမနီယ’’န္တိအာဒိံ ပဋိသန္ထာရကထံ ကုရုမာနာ. သေနာသနာနိ ပညာပယမာနာတိ အတ္တနော အတ္တနော အာစရိယုပဇ္ဈာယာနံ ဝသနဋ္ဌာနာနိ ပုစ္ဆိတွာ ဒွါရဝါတပါနာနိ ဝိဝရိတွာ မဉ္စပီဌကဋသာရကာဒီနိ နီဟရိတွာ ပပ္ဖေါဋေတွာ ယထာဋ္ဌာနေ သဏ္ဌာပယမာနာ. ပတ္တစီဝရာနိ ပဋိသာမယမာနာတိ၊ ဘန္တေ၊ ဣဒံ မေ ပတ္တံ ဌပေထ၊ ဣဒံ စီဝရံ၊ ဣဒံ ထာလကံ၊ ဣဒံ ဥဒကတုမ္ဗံ၊ ဣမံ ကတ္တရယဋ္ဌိန္တိ ဧဝံ သမဏပရိက္ခာရေ သင်္ဂေါပယမာနာ.

ဥစ္စာသဒ္ဒါ မဟာသဒ္ဒါတိ ဥဒ္ဓံ ဥဂ္ဂတတ္တာ ဥစ္စံ၊ ပတ္ထဋတ္တာ မဟန္တံ အဝိနိဗ္ဘောဂသဒ္ဒံ ကရောန္တာ. ကေဝဋ္ဋာ မညေ မစ္ဆဝိလောပေတိ ကေဝဋ္ဋာနံ မစ္ဆပစ္ဆိဌပိတဋ္ဌာနေ မဟာဇနော သန္နိပတိတွာ – ‘‘ဣဓ အညံ ဧကံ မစ္ဆံ ဒေဟိ၊ ဧကံ မစ္ဆဖာလံ ဒေဟိ၊ ဧတဿ တေ မဟာ ဒိန္နော၊ မယှံ ခုဒ္ဒကော’’တိ ဧဝံ ဥစ္စာသဒ္ဒံ မဟာသဒ္ဒံ ကရောန္တိ. တံ သန္ဓာယေတံ ဝုတ္တံ. မစ္ဆဂဟဏတ္ထံ ဇာလေ ပက္ခိတ္တေပိ တသ္မိံ ဌာနေ ကေဝဋ္ဋာ စေဝ အညေ စ ‘‘ပဝိဋ္ဌော န ပဝိဋ္ဌော၊ ဂဟိတော န ဂဟိတော’’တိ မဟာသဒ္ဒံ ကရောန္တိ. တမ္ပိ သန္ဓာယေတံ ဝုတ္တံ. ပဏာမေမီတိ နီဟရာမိ. န ဝေါ မမ သန္တိကေ ဝတ္ထဗ္ဗန္တိ တုမှေ မာဒိသဿ ဗုဒ္ဓဿ ဝသနဋ္ဌာနံ အာဂန္တွာ ဧဝံ မဟာသဒ္ဒံ ကရောထ၊ အတ္တနော ဓမ္မတာယ ဝသန္တာ ကိံ နာမ သာရုပ္ပံ ကရိဿထ၊ တုမှာဒိသာနံ မမ သန္တိကေ ဝသနကိစ္စံ နတ္ထီတိ ဒီပေတိ. တေသု ဧကဘိက္ခုပိ ‘‘ဘဂဝါ တုမှေ မဟာသဒ္ဒမတ္တကေန အမှေ ပဏာမေထာ’’တိ ဝါ အညံ ဝါ ကိဉ္စိ ဝတ္တုံ နာသက္ခိ၊ သဗ္ဗေ ဘဂဝတော ဝစနံ သမ္ပဋိစ္ဆန္တာ ‘‘ဧဝံ၊ ဘန္တေ၊’’တိ ဝတွာ နိက္ခမိံသု. ဧဝံ ပန တေသံ အဟောသိ ‘‘မယံ သတ္ထာရံ ပဿိဿာမ၊ ဓမ္မကထံ သောဿာမ၊ သတ္ထု သန္တိကေ ဝသိဿာမာတိ အာဂတာ. ဧဝရူပဿ ပန ဂရုနော သတ္ထု သန္တိကံ အာဂန္တွာ မဟာသဒ္ဒံ ကရိမှာ၊ အမှာကမေဝ ဒေါသောယံ၊ ပဏာမိတမှာ၊ န နော လဒ္ဓံ ဘဂဝတော သန္တိကေ ဝတ္ထုံ၊ န သုဝဏ္ဏဝဏ္ဏသရီရံ ဩလောကေတုံ၊ န မဓုရဿရေန ဓမ္မံ သောတု’’န္တိ. တေ ဗလဝဒေါမနဿဇာတာ ဟုတွာ ပက္ကမိံသု.

၁၅၈. တေနုပသင်္ကမိံသူတိ တေ ကိရ သကျာ အာဂမနသမယေပိ တေ ဘိက္ခူ တတ္ထေဝ နိသိန္နာ ပဿိံသု. အထ နေသံ ဧတဒဟောသိ – ‘‘ကိံ နု ခေါ ဧတေ ဘိက္ခူ ပဝိသိတွာဝ ပဋိနိဝတ္တာ၊ ဇာနိဿာမ တံ ကာရဏ’’န္တိ စိန္တေတွာ ယေန တေ ဘိက္ခူ တေနုပသင်္ကမိံသု. ဟန္ဒာတိ ဝဝဿဂ္ဂတ္ထေ နိပါတော. ကဟံ ပန တုမှေတိ တုမှေ ဣဒါနေဝ အာဂန္တွာ ကဟံ ဂစ္ဆထ၊ ကိံ တုမှာကံ ကောစိ ဥပဒ္ဒဝေါ၊ ဥဒါဟု ဒသဗလဿာတိ? တေသံ ပန ဘိက္ခူနံ၊ – ‘‘အာဝုသော၊ မယံ ဘဂဝန္တံ ဒဿနာယ အာဂတာ၊ ဒိဋ္ဌော နော ဘဂဝါ၊ ဣဒါနိ အတ္တနော ဝသနဋ္ဌာနံ ဂစ္ဆာမာ’’တိ ကိဉ္စာပိ ဧဝံ ဝစနပရိဟာရော အတ္ထိ၊ ဧဝရူပံ ပန လေသကပ္ပံ အကတွာ ယထာဘူတမေဝ အာရောစေတွာ ဘဂဝတာ ခေါ၊ အာဝုသော၊ ဘိက္ခုသံဃော ပဏာမိတောတိ အာဟံသု. တေ ပန ရာဇာနော သာသနေ ဓုရဝဟာ၊ တသ္မာ စိန္တေသုံ – ‘‘ဒွီဟိ အဂ္ဂသာဝကေဟိ သဒ္ဓိံ ပဉ္စသု ဘိက္ခုသတေသု ဂစ္ဆန္တေသု ဘဂဝတော ပါဒမူလံ ဝိဂစ္ဆိဿတိ၊ ဣမေသံ နိဝတ္တနာကာရံ ကရိဿာမာ’’တိ. ဧဝံ စိန္တေတွာ တေန ဟာယသ္မန္တောတိအာဒိမာဟံသု. တေသုပိ ဘိက္ခူသု ‘‘မယံ မဟာသဒ္ဒမတ္တကေန ပဏာမိတာ၊ န မယံ ဇီဝိတုံ အသက္ကောန္တာ ပဗ္ဗဇိတာ’’တိ ဧကဘိက္ခုပိ ပဋိပ္ဖရိတော နာမ နာဟောသိ၊ သဗ္ဗေ ပန သမကံယေဝ၊ ‘‘ဧဝမာဝုသော၊’’တိ သမ္ပဋိစ္ဆိံသု.

၁၅၉. အဘိနန္ဒတူတိ ဘိက္ခုသံဃဿ အာဂမနံ ဣစ္ဆန္တော အဘိနန္ဒတု. အဘိဝဒတူတိ ဧတု ဘိက္ခုသံဃောတိ ဧဝံ စိတ္တံ ဥပ္ပါဒေန္တော အဘိဝဒတု. အနုဂ္ဂဟိတောတိ အာမိသာနုဂ္ဂဟေန စ ဓမ္မာနုဂ္ဂဟေန စ အနုဂ္ဂဟိတော. အညထတ္တန္တိ ဒသဗလဿ ဒဿနံ န လဘာမာတိ ပသာဒညထတ္တံ ဘဝေယျ. ဝိပရိဏာမောတိ ပသာဒညထတ္တေန ဝိဗ္ဘမန္တာနံ ဝိပရိဏာမညထတ္တံ ဘဝေယျ. ဗီဇာနံ တရုဏာနန္တိ တရုဏသဿာနံ. သိယာ အညထတ္တန္တိ ဥဒကဝါရကာလေ ဥဒကံ အလဘန္တာနံ မိလာတဘာဝေန အညထတ္တံ ဘဝေယျ၊ သုဿိတွာ မိလာတဘာဝံ အာပဇ္ဇနေန ဝိပရိဏာမော ဘဝေယျ. ဝစ္ဆကဿ ပန ခီရပိပါသာယ သုဿနံ အညထတ္တံ နာမ၊ သုဿိတွာ ကာလကိရိယာ ဝိပရိဏာမော နာမ.

၁၆၀. ပသာဒိတော ဘဂဝါတိ ထေရော ကိရ တတ္ထ နိသိန္နောဝ ဒိဗ္ဗစက္ခုနာ ဗြဟ္မာနံ အာဂတံ အဒ္ဒသ၊ ဒိဗ္ဗာယ သောတဓာတုယာ စ အာယာစနသဒ္ဒံ သုဏိ၊ စေတောပရိယဉာဏေန ဘဂဝတော ပသန္နဘာဝံ အညာသိ. တသ္မာ – ‘‘ကဉ္စိ ဘိက္ခုံ ပေသေတွာ ပက္ကောသိယမာနာနံ ဂမနံ နာမ န ဖာသုကံ၊ ယာဝ သတ္ထာ န ပေသေတိ၊ တာဝဒေဝ ဂမိဿာမာ’’တိ မညမာနော ဧဝမာဟ. အပ္ပေါဿုက္ကောတိ အညေသု ကိစ္စေသု အနုဿုက္ကော ဟုတွာ. ဒိဋ္ဌဓမ္မသုခဝိဟာရန္တိ ဖလသမာပတ္တိဝိဟာရံ အနုယုတ္တော မညေ ဘဂဝါ ဝိဟရိတုကာမော၊ သော ဣဒါနိ ယထာရုစိယာ ဝိဟရိဿတီတိ ဧဝံ မေ အဟောသီတိ ဝဒတိ. မယမ္ပိ ဒါနီတိ မယံ ပရံ ဩဝဒမာနာ ဝိဟာရတော နိက္ကဍ္ဎိတာ၊ ကိံ အမှာကံ ပရောဝါဒေန. ဣဒါနိ မယမ္ပိ ဒိဋ္ဌဓမ္မသုခဝိဟာရေနေဝ ဝိဟရိဿာမာတိ ဒီပေတိ. ထေရော ဣမသ္မိံ ဌာနေ ဝိရဒ္ဓေါ အတ္တနော ဘာရဘာဝံ န အညာသိ. အယဉှိ ဘိက္ခုသံဃော ဒွိန္နမ္ပိ မဟာထေရာနံ ဘာရော၊ တေန နံ ပဋိသေဓေန္တော ဘဂဝါ အာဂမေဟီတိအာဒိမာဟ. မဟာမောဂ္ဂလ္လာနတ္ထေရော ပန အတ္တနော ဘာရဘာဝံ အညာသိ. တေနဿ ဘဂဝါ သာဓုကာရံ အဒါသိ.

၁၆၁. စတ္တာရိမာနိ၊ ဘိက္ခဝေတိ ကသ္မာ အာရဘိ? ဣမသ္မိံ သာသနေ စတ္တာရိ ဘယာနိ. ယော တာနိ အဘီတော ဟောတိ၊ သော ဣမသ္မိံ သာသနေ ပတိဋ္ဌာတုံ သက္ကောတိ. ဣတရော ပန န သက္ကောတီတိ ဒဿေတုံ ဣမံ ဒေသနံ အာရဘိ. တတ္ထ ဥဒကောရောဟန္တေတိ ဥဒကံ ဩရောဟန္တေ ပုဂ္ဂလေ. ကုမ္ဘီလဘယန္တိ သုံသုမာရဘယံ. သုသုကာဘယန္တိ စဏ္ဍမစ္ဆဘယံ.

၁၆၂. ကောဓုပါယာသဿေတံ အဓိဝစနန္တိ ယထာ ဟိ ဗာဟိရံ ဥဒကံ ဩတိဏ္ဏော ဦမီသု ဩသီဒိတွာ မရတိ၊ ဧဝံ ဣမသ္မိံ သာသနေ ကောဓုပါယာသေ ဩသီဒိတွာ ဝိဗ္ဘမတိ. တသ္မာ ကောဓုပါယာသော ‘‘ဦမိဘယ’’န္တိ ဝုတ္တော.

၁၆၃. ဩဒရိကတ္တဿေတံ အဓိဝစနန္တိ ယထာ ဟိ ဗာဟိရံ ဥဒကံ ဩတိဏ္ဏော ကုမ္ဘီလေန ခါဒိတော မရတိ၊ ဧဝံ ဣမသ္မိံ သာသနေ ဩဒရိကတ္တေန ခါဒိတော ဝိဗ္ဘမတိ. တသ္မာ ဩဒရိကတ္တံ ‘‘ကုမ္ဘီလဘယ’’န္တိ ဝုတ္တံ.

၁၆၄. အရက္ခိတေနေဝ ကာယေနာတိ သီသပ္ပစာလကာဒိကရဏေန အရက္ခိတကာယော ဟုတွာ. အရက္ခိတာယ ဝါစာယာတိ ဒုဋ္ဌုလ္လဘာသနာဒိဝသေန အရက္ခိတဝါစော ဟုတွာ. အနုပဋ္ဌိတာယ သတိယာတိ ကာယဂတာသတိံ အနုပဋ္ဌာပေတွာ. အသံဝုတေဟီတိ အပိဟိတေဟိ. ပဉ္စန္နေတံကာမဂုဏာနံ အဓိဝစနန္တိ ယထာ ဟိ ဗာဟိရံ ဥဒကံ ဩတိဏ္ဏော အာဝဋ္ဋေ နိမုဇ္ဇိတွာ မရတိ၊ ဧဝံ ဣမသ္မိံ သာသနေ ပဗ္ဗဇိတော ပဉ္စကာမဂုဏာဝဋ္ဋေ နိမုဇ္ဇိတွာ ဝိဗ္ဘမတိ. တသ္မာ ပဉ္စ ကာမဂုဏာ ‘‘အာဝဋ္ဋဘယ’’န္တိ ဝုတ္တာ.

၁၆၅. အနုဒ္ဓံသေတီတိ ကိလမေတိ မိလာပေတိ. ရာဂါနုဒ္ဓံသေနာတိ ရာဂါနုဒ္ဓံသိတေန. မာတုဂါမဿေတံ အဓိဝစနန္တိ ယထာ ဟိ ဗာဟိရံ ဥဒကံ ဩတိဏ္ဏော စဏ္ဍမစ္ဆံ အာဂမ္မ လဒ္ဓပ္ပဟာရော မရတိ၊ ဧဝံ ဣမသ္မိံ သာသနေ မာတုဂါမံ အာဂမ္မ ဥပ္ပန္နကာမရာဂေါ ဝိဗ္ဘမတိ. တသ္မာ မာတုဂါမော ‘‘သုသုကာဘယ’’န္တိ ဝုတ္တော.

ဣမာနိ ပန စတ္တာရိ ဘယာနိ ဘာယိတွာ ယထာ ဥဒကံ အနောရောဟန္တဿ ဥဒကံ နိဿာယ အာနိသံသော နတ္ထိ၊ ဥဒကပိပါသာယ ပိပါသိတော စ ဟောတိ ရဇောဇလ္လေန ကိလိဋ္ဌသရီရော စ၊ ဧဝမေဝံ ဣမာနိ စတ္တာရိ ဘယာနိ ဘာယိတွာ သာသနေ အပဗ္ဗဇန္တဿာပိ ဣမံ သာသနံ နိဿာယ အာနိသံသော နတ္ထိ၊ တဏှာပိပါသာယ ပိပါသိတော စ ဟောတိ ကိလေသရဇေန သံကိလိဋ္ဌစိတ္တော စ. ယထာ ပန ဣမာနိ စတ္တာရိ ဘယာနိ အဘာယိတွာ ဥဒကံ ဩရောဟန္တဿ ဝုတ္တပ္ပကာရော အာနိသံသော ဟောတိ၊ ဧဝံ ဣမာနိ အဘာယိတွာ သာသနေ ပဗ္ဗဇိတဿာပိ ဝုတ္တပ္ပကာရော အာနိသံသော ဟောတိ. ထေရော ပနာဟ – ‘‘စတ္တာရိ ဘယာနိ ဘာယိတွာ ဥဒကံ အနောတရန္တော သောတံ ဆိန္ဒိတွာ ပရတီရံ ပါပုဏိတုံ န သက္ကောတိ၊ အဘာယိတွာ ဩတရန္တော သက္ကောတိ၊ ဧဝမေဝံ ဘာယိတွာ သာသနေ အပဗ္ဗဇန္တောပိ တဏှာသောတံ ဆိန္ဒိတွာ နိဗ္ဗာနပါရံ ဒဋ္ဌုံ န သက္ကောတိ၊ အဘာယိတွာ ပဗ္ဗဇန္တော ပန သက္ကောတီ’’တိ. သေသံ သဗ္ဗတ္ထ ဥတ္တာနမေဝ. အယံ ပန ဒေသနာ နေယျပုဂ္ဂလဿ ဝသေန နိဋ္ဌာပိတာတိ.

ပပဉ္စသူဒနိယာ မဇ္ဈိမနိကာယဋ္ဌကထာယ

စာတုမသုတ္တဝဏ္ဏနာ နိဋ္ဌိတာ.