၆. လဋုကိကောပမသုတ္တဝဏ္ဏနာ

၁၄၈. ဧဝံ မေ သုတန္တိ လဋုကိကောပမသုတ္တံ. တတ္ထ ယေန သော ဝနသဏ္ဍောတိ အယမ္ပိ မဟာဥဒါယိတ္ထေရော ဘဂဝတာ သဒ္ဓိံယေဝ ပိဏ္ဍာယ ပဝိသိတွာ သဒ္ဓိံ ပဋိက္ကမိ. တသ္မာ ယေန သော ဘဂဝတာ ဥပသင်္ကမန္တော ဝနသဏ္ဍော တေနုပသင်္ကမီတိ ဝေဒိတဗ္ဗော. အပဟတ္တာတိ အပဟာရကော. ဥပဟတ္တာတိ ဥပဟာရကော. ပဋိသလ္လာနာ ဝုဋ္ဌိတောတိ ဖလသမာပတ္တိတော ဝုဋ္ဌိတော.

၁၄၉. ယံ ဘဂဝါတိ ယသ္မိံ သမယေ ဘဂဝါ. ဣင်္ဃာတိ အာဏတ္တိယံ နိပါတော. အညထတ္တန္တိ စိတ္တဿ အညထတ္တံ. တဉ္စ ခေါ န ဘဂဝန္တံ ပဋိစ္စ၊ ဧဝရူပံ ပန ပဏီတဘောဇနံ အလဘန္တာ ကထံ ယာပေဿာမာတိ ဧဝံ ပဏီတဘောဇနံ ပဋိစ္စ အဟောသီတိ ဝေဒိတဗ္ဗံ. ဘူတပုဗ္ဗန္တိ ဣမိနာ ရတ္တိဘောဇနဿ ပဏီတဘာဝံ ဒဿေတိ. သူပေယျန္တိ သူပေန ဥပနေတဗ္ဗံ မစ္ဆမံသကဠီရာဒိ. သမဂ္ဂါ ဘုဉ္ဇိဿာမာတိ ဧကတော ဘုဉ္ဇိဿာမ. သင်္ခတိယောတိ အဘိသင်္ခါရိကခါဒနီယာနိ. သဗ္ဗာ တာ ရတ္တိန္တိ သဗ္ဗာ တာ သင်္ခတိယော ရတ္တိံယေဝ ဟောန္တိ၊ ဒိဝါ ပန အပ္ပါ ပရိတ္တာ ထောကိကာ ဟောန္တီတိ. မနုဿာ ဟိ ဒိဝါ ယာဂုကဉ္ဇိယာဒီဟိ ယာပေတွာပိ ရတ္တိံ ယထာသတ္တိ ယထာပဏီတမေဝ ဘုဉ္ဇန္တိ.

ပုန ဘူတပုဗ္ဗန္တိ ဣမိနာ ရတ္တိ ဝိကာလဘောဇနေ အာဒီနဝံ ဒဿေတိ. တတ္ထ အန္ဓကာရတိမိသာယန္တိ ဗဟလန္ဓကာရေ. မာဏဝေဟီတိ စောရေဟိ. ကတကမ္မေဟီတိ ကတစောရကမ္မေဟိ. စောရာ ကိရ ကတကမ္မာ ယံ နေသံ ဒေဝတံ အာယာစိတွာ ကမ္မံ နိပ္ဖန္နံ၊ တဿ ဥပဟာရတ္ထာယ မနုဿေ မာရေတွာ ဂလလောဟိတာဒီနိ ဂဏှန္တိ. တေ အညေသု မနုဿေသု မာရိယမာနေသု ကောလာဟလာ ဥပ္ပဇ္ဇိဿန္တိ၊ ပဗ္ဗဇိတံ ပရိယေသန္တော နာမ နတ္ထီတိ မညမာနာ ဘိက္ခူ ဂဟေတွာ မာရေန္တိ. တံ သန္ဓာယေတံ ဝုတ္တံ. အကတကမ္မေဟီတိ အဋဝိတော ဂါမံ အာဂမနကာလေ ကမ္မနိပ္ဖန္နတ္ထံ ပုရေတရံ ဗလိကမ္မံ ကာတုကာမေဟိ. အသဒ္ဓမ္မေန နိမန္တေတီတိ ‘‘ဧဟိ ဘိက္ခု အဇ္ဇေကရတ္တိံ ဣဓေဝ ဘုဉ္ဇိတွာ ဣဓ ဝသိတွာ သမ္ပတ္တိံ အနုဘဝိတွာ သွေ ဂမိဿသီ’’တိ မေထုနဓမ္မေန နိမန္တေတိ.

ပုန ဘူတပုဗ္ဗန္တိ ဣမိနာ အတ္တနာ ဒိဋ္ဌကာရဏံ ကထေတိ. ဝိဇ္ဇန္တရိကာယာတိ ဝိဇ္ဇုဝိဇ္ဇောတနက္ခဏေ. ဝိဿရမကာသီတိ မဟာသဒ္ဒမကာသိ. အဘုမ္မေတိ ဘူ’တိ ဝဍ္ဎိ၊ အဘူ’တိ အဝဍ္ဎိ၊ ဝိနာသော မယှန္တိ အတ္ထော. ပိသာစော ဝတ မန္တိ ပိသာစော မံ ခါဒိတုံ အာဂတော ဝတ. အာတုမာရီ မာတုမာရီတိ ဧတ္ထ အာတူတိ ပိတာ၊ မာတူတိ မာတာ. ဣဒံ ဝုတ္တံ ဟောတိ – ယဿ ပိတာ ဝါ မာတာ ဝါ အတ္ထိ၊ တံ မာတာပိတရော အမှာကံ ပုတ္တကောတိ ယထာ တထာ ဝါ ဥပ္ပါဒေတွာ ယံကိဉ္စိ ခါဒနီယဘောဇနီယံ ဒတွာ ဧကသ္မိံ ဌာနေ သယာပေန္တိ. သော ဧဝံ ရတ္တိံ ပိဏ္ဍာယ န စရတိ. တုယှံ ပန မာတာပိတရော မတာ မညေ၊ တေန ဧဝံ စရသီတိ.

၁၅၀. ဧဝမေဝါတိ ဧဝမေဝ ကိဉ္စိ အာနိသံသံ အပဿန္တာ နိက္ကာရဏေနေဝ. ဧဝမာဟံသူတိ ဂရဟန္တော အာဟ. တတ္ထ အာဟံသူတိ ဝဒန္တိ. ကိံ ပနိမဿာတိ ဣမဿ အပ္ပမတ္တကဿ ဟေတု ကိံ ဝတ္တဗ္ဗံ နာမ၊ နနု အပဿန္တေန ဝိယ အသုဏန္တေန ဝိယ ဘဝိတဗ္ဗန္တိ. ဩရမတ္တကဿာတိ ပရိတ္တမတ္တကဿ. အဓိသလ္လိခတေဝါယန္တိ အယံ သမဏော နဝနီတံ ပိသန္တော ဝိယ ပဒုမနာဠသုတ္တံ ကကစေန ဩက္ကန္တန္တော ဝိယ အတိသလ္လေခတိ၊ အတိဝါယာမံ ကရောတိ. သိက္ခာကာမာတိ သာရိပုတ္တမောဂ္ဂလ္လာနာဒယော ဝိယ သိက္ခာကာမာ၊ တေသု စ အပ္ပစ္စယံ ဥပဋ္ဌပေန္တိ. တေသဉှိ ဧဝံ ဟောတိ ‘‘သစေ ဧတေ ‘အပ္ပမတ္တကမေတံ၊ ဟရထ ဘဂဝါ’တိ ဝဒေယျုံ၊ ကိံ သတ္ထာ န ဟရေယျ. ဧဝံ ပန အဝတွာ ဘဂဝန္တံ ပရိဝါရေတွာ နိသိန္နာ ‘ဧဝံ ဘဂဝါ၊ သာဓု ဘဂဝါ၊ ပညပေထ ဘဂဝါ’တိ အတိရေကတရံ ဥဿာဟံ ပဋိလဘန္တီ’’တိ. တသ္မာ တေသု အပ္ပစ္စယံ ဥပဋ္ဌပေန္တိ.

တေသန္တိ တေသံ ဧကစ္စာနံ မောဃပုရိသာနံ. တန္တိ တံ အပ္ပမတ္တကံ ပဟာတဗ္ဗံ. ထူလော ကလိင်္ဂရောတိ ဂလေ ဗဒ္ဓံ မဟာကဋ္ဌံ ဝိယ ဟောတိ. လဋုကိကာ သကုဏိကာတိ စာတကသကုဏိကာ. သာ ကိရ ရဝသတံ ရဝိတွာ နစ္စသတံ နစ္စိတွာ သကိံ ဂေါစရံ ဂဏှာတိ. အာကာသတော ဘူမိယံ ပတိဋ္ဌိတံ ပန နံ ဒိသွာ ဝစ္ဆပါလကာဒယော ကီဠနတ္ထံ ပူတိလတာယ ဗန္ဓန္တိ. တံ သန္ဓာယေတံ ဝုတ္တံ. အာဂမေတီတိ ဥပေတိ. တဉှိ တဿာတိ တံ ပူတိလတာဗန္ဓနံ တဿာ အပ္ပသရီရတာယ စေဝ အပ္ပထာမတာယ စ ဗလဝဗန္ဓနံ နာမ၊ မဟန္တံ နာဠိကေရရဇ္ဇု ဝိယ ဒုစ္ဆိဇ္ဇံ ဟောတိ. တေသန္တိ တေသံ မောဃပုရိသာနံ သဒ္ဓါမန္ဒတာယ စ ပညာမန္ဒတာယ စ ဗလဝံ ဗန္ဓနံ နာမ၊ ဒုက္ကဋဝတ္ထုမတ္တကမ္ပိ မဟန္တံ ပါရာဇိကဝတ္ထု ဝိယ ဒုပ္ပဇဟံ ဟောတိ.

၁၅၁. သုက္ကပက္ခေ ပဟာတဗ္ဗဿာတိ ကိံ ဣမဿ အပ္ပမတ္တကဿ ပဟာတဗ္ဗဿ ဟေတု ဘဂဝတာ ဝတ္တဗ္ဗံ အတ္ထိ၊ ယဿ နော ဘဂဝါ ပဟာနမာဟ. နနု ဧဝံ ဘဂဝတော အဓိပ္ပါယံ ဉတွာပိ ပဟာတဗ္ဗမေဝါတိ အတ္ထော. အပ္ပေါဿုက္ကာတိ အနုဿုက္ကာ. ပန္နလောမာတိ ပတိတလောမာ၊ န တဿ ပဟာတဗ္ဗဘယေန ဥဒ္ဓဂ္ဂလောမာ. ပရဒတ္တဝုတ္တာတိ ပရေဟိ ဒိန္နဝုတ္တိနော၊ ပရတော လဒ္ဓေန ယာပေန္တာတိ အတ္ထော. မိဂဘူတေန စေတသာ ဝိဟရန္တီတိ အပစ္စာသီသနပက္ခေ ဌိတာ ဟုတွာ ဝိဟရန္တိ. မိဂေါ ဟိ ပဟာရံ လဘိတွာ မနုဿာဝါသံ ဂန္တွာ ဘေသဇ္ဇံ ဝါ ဝဏတေလံ ဝါ လဘိဿာမီတိ အဇ္ဈာသယံ အကတွာ ပဟာရံ လဘိတွာဝ အဂါမကံ အရညံ ပဝိသိတွာ ပဟဋဋ္ဌာနံ ဟေဋ္ဌာ ကတွာ နိပတိတွာ ဖာသုဘူတကာလေ ဥဋ္ဌာယ ဂစ္ဆတိ. ဧဝံ မိဂါ အပစ္စာသီသနပက္ခေ ဌိတာ. ဣဒံ သန္ဓာယ ဝုတ္တံ ‘‘မိဂဘူတေန စေတသာ ဝိဟရန္တီ’’တိ. တဉှိ တဿာတိ တံ ဝရတ္တဗန္ဓနံ တဿ ဟတ္ထိနာဂဿ မဟာသရီရတာယ စေဝ မဟာထာမတာယ စ ဒုဗ္ဗလဗန္ဓနံ နာမ. ပူတိလတာ ဝိယ သုဆိဇ္ဇံ ဟောတိ. တေသံ တန္တိ တေသံ တံ ကုလပုတ္တာနံ သဒ္ဓါမဟန္တတာယ စ ပညာမဟန္တတာယ စ မဟန္တံ ပါရာဇိကဝတ္ထုပိ ဒုက္ကဋဝတ္ထုမတ္တကံ ဝိယ သုပ္ပဇဟံ ဟောတိ.

၁၅၂. ဒလိဒ္ဒေါတိ ဒါလိဒ္ဒိယေန သမန္နာဂတော. အဿကောတိ နိဿကော. အနာဠှိယောတိ အနဍ္ဎော. အဂါရကန္တိ ခုဒ္ဒကဂေဟံ. ဩလုဂ္ဂဝိလုဂ္ဂန္တိ ယဿ ဂေဟယဋ္ဌိယော ပိဋ္ဌိဝံသတော မုစ္စိတွာ မဏ္ဍလေ လဂ္ဂါ၊ မဏ္ဍလတော မုစ္စိတွာ ဘူမိယံ လဂ္ဂါ. ကာကာတိဒါယိန္တိ ယတ္ထ ကိဉ္စိဒေဝ ဘုဉ္ဇိဿာမာတိ အန္တော နိသိန္နကာလေ ဝိသုံ ဒွါရကိစ္စံ နာမ နတ္ထိ၊ တတော တတော ကာကာ ပဝိသိတွာ ပရိဝါရေန္တိ. သူရကာကာ ဟိ ပလာယနကာလေ စ ယထာသမ္မုခဋ္ဌာနေနေဝ နိက္ခမိတွာ ပလာယန္တိ. နပရမရူပန္တိ န ပုညဝန္တာနံ ဂေဟံ ဝိယ ဥတ္တမရူပံ. ခဋောပိကာတိ ဝိလီဝမဉ္စကော. ဩလုဂ္ဂဝိလုဂ္ဂါတိ ဩဏတုဏ္ဏတာ. ဓညသမဝါပကန္တိ ဓညဉ္စ သမဝါပကဉ္စ. တတ္ထ ဓညံ နာမ ကုဒြူသကော. သမဝါပကန္တိ လာဗုဗီဇကုမ္ဘဏ္ဍဗီဇကာဒိ ဗီဇဇာတံ. နပရမရူပန္တိ ယထာ ပုညဝန္တာနံ ဂန္ဓသာလိဗီဇာဒိ ပရိသုဒ္ဓံ ဗီဇံ၊ န ဧဝရူပံ. ဇာယိကာတိ ကပဏဇာယာ. နပရမရူပါတိ ပစ္ဆိသီသာ လမ္ဗတ္ထနီ မဟောဒရာ ပိသာစာ ဝိယ ဗီဘစ္ဆာ. သာမညန္တိ သမဏဘာဝေါ. သော ဝတဿံ၊ ယောဟန္တိ သော ဝတာဟံ ပုရိသော နာမ အဿံ၊ ယော ကေသမဿုံ ဩဟာရေတွာ ပဗ္ဗဇေယျန္တိ.

သော န သက္ကုဏေယျာတိ သော ဧဝံ စိန္တေတွာပိ ဂေဟံ ဂန္တွာ – ‘‘ပဗ္ဗဇ္ဇာ နာမ လာဘဂရုကာ ဒုက္ကရာ ဒုရာသဒါ၊ သတ္တပိ အဋ္ဌပိ ဂါမေ ပိဏ္ဍာယ စရိတွာ ယထာဓောတေနေဝ ပတ္တေန အာဂန္တဗ္ဗမ္ပိ ဟောတိ၊ ဧဝံ ယာပေတုံ အသက္ကောန္တဿ မေ ပုန အာဂတဿ ဝသနဋ္ဌာနံ ဣစ္ဆိတဗ္ဗံ၊ တိဏဝလ္လိဒဗ္ဗသမ္ဘာရာ နာမ ဒုဿမောဓာနိယာ၊ ကိန္တိ ကရောမီ’’တိ ဝီမံသတိ. အထဿ တံ အဂါရကံ ဝေဇယန္တပါသာဒေါ ဝိယ ဥပဋ္ဌာတိ. အထဿ ခဋောပိကံ ဩလောကေတွာ – ‘‘မယိ ဂတေ ဣမံ ဝိသင်္ခရိတွာ ဥဒ္ဓနာလာတံ ကရိဿန္တိ၊ ပုန အဋ္ဋနိပါဒဝိလီဝါဒီနိ လဒ္ဓဗ္ဗာနိ ဟောန္တိ၊ ကိန္တိ ကရိဿာမီ’’တိ စိန္တေတိ. အထဿ သာ သိရိသယနံ ဝိယ ဥပဋ္ဌာတိ. တတော ဓညကုမ္ဘိံ ဩလောကေတွာ – ‘‘မယိ ဂတေ အယံ ဃရဏီ ဣမံ ဓညံ တေန တေန သဒ္ဓိံ ဘုဉ္ဇိဿတိ. ပုန အာဂတေန ဇီဝိတဝုတ္တိ နာမ လဒ္ဓဗ္ဗာ ဟောတိ၊ ကိန္တိ ကရိဿာမီ’’တိ စိန္တေတိ. အထဿ သာ အဍ္ဎတေဠသာနိ ကောဋ္ဌာဂါရသတာနိ ဝိယ ဥပဋ္ဌာတိ. တတော မာတုဂါမံ ဩလောကေတွာ – ‘‘မယိ ဂတေ ဣမံ ဟတ္ထိဂေါပကော ဝါ အဿဂေါပကော ဝါ ယော ကောစိ ပလောဘေဿတိ၊ ပုန အာဂတေန ဘတ္တပါစိကာ နာမ လဒ္ဓဗ္ဗာ ဟောတိ၊ ကိန္တိ ကရိဿာမီ’’တိ စိန္တေတိ. အထဿ သာ ရူပိနီ ဒေဝီ ဝိယ ဥပဋ္ဌာတိ. ဣဒံ သန္ဓာယ ‘‘သော န သက္ကုဏေယျာ’’တိအာဒိ ဝုတ္တံ.

၁၅၃. နိက္ခဂဏာနန္တိ သုဝဏ္ဏနိက္ခသတာနံ. စယောတိ သန္တာနတော ကတသန္နိစယော. ဓညဂဏာနန္တိ ဓညသကဋသတာနံ.

၁၅၄. စတ္တာရောမေ၊ ဥဒါယိ၊ ပုဂ္ဂလာတိ ဣဓ ကိံ ဒဿေတိ? ဟေဋ္ဌာ ‘‘တေ တဉ္စေဝ ပဇဟန္တိ၊ တေ တဉ္စေဝ နပ္ပဇဟန္တီ’’တိ ပဇဟနကာ စ အပ္ပဇဟနကာ စ ရာသိဝသေန ဒဿိတာ၊ န ပါဋိယေက္ကံ ဝိဘတ္တာ. ဣဒါနိ ယထာ နာမ ဒဗ္ဗသမ္ဘာရတ္ထံ ဂတော ပုရိသော ပဋိပါဋိယာ ရုက္ခေ ဆိန္ဒိတွာ ပုန နိဝတ္တိတွာ ဝင်္ကဉ္စ ပဟာယ ကမ္မေ ဥပနေတဗ္ဗယုတ္တကမေဝ ဂဏှာတိ၊ ဧဝမေဝ အပ္ပဇဟနကေ ဆဍ္ဍေတွာ အဗ္ဗောဟာရိကေ ကတွာ ပဇဟနကပုဂ္ဂလာ စတ္တာရော ဟောန္တီတိ ဒဿေတုံ ဣမံ ဒေသနံ အာရဘိ.

ဥပဓိပဟာနာယာတိ ခန္ဓုပဓိကိလေသုပဓိအဘိသင်္ခါရုပဓိကာမဂုဏူပဓီတိ ဣမေသံ ဥပဓီနံ ပဟာနာယ. ဥပဓိပဋိသံယုတ္တာတိ ဥပဓိအနုဓာဝနကာ. သရသင်္ကပ္ပါတိ ဧတ္ထ သရန္တိ ဓာဝန္တီတိ သရာ. သင်္ကပ္ပေန္တီတိ သင်္ကပ္ပါ. ပဒဒွယေနပိ ဝိတက္ကာယေဝ ဝုတ္တာ. သမုဒါစရန္တီတိ အဘိဘဝန္တိ အဇ္ဈောတ္ထရိတွာ ဝတ္တန္တိ. သံယုတ္တောတိ ကိလေသေဟိ သံယုတ္တော. ဣန္ဒြိယဝေမတ္တတာတိ ဣန္ဒြိယနာနတ္တတာ. ကဒါစိ ကရဟစီတိ ဗဟုကာလံ ဝီတိဝတ္တေတွာ. သတိသမ္မောသာတိ သတိသမ္မောသေန. နိပါတောတိ အယောကဋာဟမှိ ပတနံ. ဧတ္တာဝတာ ‘‘နပ္ပဇဟတိ၊ ပဇဟတိ၊ ခိပ္ပံ ပဇဟတီ’’တိ တယော ရာသယော ဒဿိတာ. တေသု စတ္တာရော ဇနာ နပ္ပဇဟန္တိ နာမ၊ စတ္တာရော ပဇဟန္တိ နာမ၊ စတ္တာရော ခိပ္ပံ ပဇဟန္တိ နာမ.

တတ္ထ ပုထုဇ္ဇနော သောတာပန္နော သကဒါဂါမီ အနာဂါမီတိ ဣမေ စတ္တာရော ဇနာ နပ္ပဇဟန္တိ နာမ. ပုထုဇ္ဇနာဒယော တာဝ မာ ပဇဟန္တု၊ အနာဂါမီ ကထံ န ပဇဟတီတိ? သောပိ ဟိ ယာဝဒေဝဿ ဘဝလောဘော အတ္ထိ၊ တာဝ အဟောသုခံ အဟောသုခန္တိ အဘိနန္ဒတိ. တသ္မာ နပ္ပဇဟတိ နာမ. ဧတေယေဝ ပန စတ္တာရော ဇနာ ပဇဟန္တိ နာမ. သောတာပန္နာဒယော တာဝ ပဇဟန္တု၊ ပုထုဇ္ဇနော ကထံ ပဇဟတီတိ? အာရဒ္ဓဝိပဿကော ဟိ သတိသမ္မောသေန သဟသာ ကိလေသေ ဥပ္ပန္နေ ‘‘မာဒိသဿ နာမ ဘိက္ခုနော ကိလေသော ဥပ္ပန္နော’’တိ သံဝေဂံ ကတွာ ဝီရိယံ ပဂ္ဂယှ ဝိပဿနံ ဝဍ္ဎေတွာ မဂ္ဂေန ကိလေသေ သမုဂ္ဃါတေတိ. ဣတိ သော ပဇဟတိ နာမ. တေယေဝ စတ္တာရော ခိပ္ပံ ပဇဟန္တိ နာမ. တတ္ထ ဣမသ္မိံ သုတ္တေ၊ မဟာဟတ္ထိပဒေါပမေ (မ. နိ. ၁.၂၈၈ အာဒယော)၊ ဣန္ဒြိယဘာဝနေတိ (မ. နိ. ၃.၄၅၃ အာဒယော) ဣမေသု သုတ္တေသု ကိဉ္စာပိ တတိယဝါရော ဂဟိတော၊ ပဉှော ပန ဒုတိယဝါရေနေဝ ကထိတောတိ ဝေဒိတဗ္ဗော.

ဥပဓိ ဒုက္ခဿ မူလန္တိ ဧတ္ထ ပဉ္စ ခန္ဓာ ဥပဓိ နာမ. တံ ဒုက္ခဿ မူလန္တိ ဣတိ ဝိဒိတွာ ကိလေသုပဓိနာ နိရုပဓိ ဟောတိ၊ နိဂ္ဂဟဏော နိတဏှောတိ အတ္ထော. ဥပဓိသင်္ခယေ ဝိမုတ္တောတိ တဏှက္ခယေ နိဗ္ဗာနေ အာရမ္မဏတော ဝိမုတ္တော.

၁၅၅. ဧဝံ စတ္တာရော ပုဂ္ဂလေ ဝိတ္ထာရေတွာ ဣဒါနိ ယေ ပဇဟန္တိ၊ တေ ‘‘ဣမေ နာမ ဧတ္တကေ ကိလေသေ ပဇဟန္တိ’’. ယေ နပ္ပဇဟန္တိ၊ တေပိ ‘‘ဣမေ နာမ ဧတ္တကေ ကိလေသေ နပ္ပဇဟန္တီ’’တိ ဒဿေတုံ ပဉ္စ ခေါ ဣမေ ဥဒါယိ ကာမဂုဏာတိအာဒိမာဟ. တတ္ထ မိဠှသုခန္တိ အသုစိသုခံ. အနရိယသုခန္တိ အနရိယေဟိ သေဝိတသုခံ. ဘာယိတဗ္ဗန္တိ ဧတဿ သုခဿ ပဋိလာဘတောပိ ဝိပါကတောပိ ဘာယိတဗ္ဗံ. နေက္ခမ္မသုခန္တိ ကာမတော နိက္ခန္တသုခံ. ပဝိဝေကသုခန္တိ ဂဏတောပိ ကိလေသတောပိ ပဝိဝိတ္တသုခံ. ဥပသမသုခန္တိ ရာဂါဒိဝူပသမတ္ထာယ သုခံ. သမ္ဗောဓသုခန္တိ မဂ္ဂသင်္ခါတဿ သမ္ဗောဓဿ နိဗ္ဗတ္တနတ္ထာယ သုခံ. န ဘာယိတဗ္ဗန္တိ ဧတဿ သုခဿ ပဋိလာဘတောပိ ဝိပါကတောပိ န ဘာယိတဗ္ဗံ၊ ဘာဝေတဗ္ဗမေဝေတံ.

၁၅၆. ဣဉ္ဇိတသ္မိံ ဝဒါမီတိ ဣဉ္ဇနံ စလနံ ဖန္ဒနန္တိ ဝဒါမိ. ကိဉ္စ တတ္ထ ဣဉ္ဇိတသ္မိန္တိ ကိဉ္စ တတ္ထ ဣဉ္ဇိတံ. ဣဒံ တတ္ထ ဣဉ္ဇိတသ္မိန္တိ ယေ ဧတေ အနိရုဒ္ဓါ ဝိတက္ကဝိစာရာ၊ ဣဒံ တတ္ထ ဣဉ္ဇိတံ. ဒုတိယတတိယဇ္ဈာနေသုပိ ဧသေဝ နယော. အနိဉ္ဇိတသ္မိံ ဝဒါမီတိ ဣဒံ စတုတ္ထဇ္ဈာနံ အနိဉ္ဇနံ အစလနံ နိပ္ဖန္ဒနန္တိ ဝဒါမိ.

အနလန္တိ ဝဒါမီတိ အကတ္တဗ္ဗအာလယန္တိ ဝဒါမိ၊ တဏှာလယော ဧတ္ထ န ဥပ္ပါဒေတဗ္ဗောတိ ဒဿေတိ. အထ ဝါ အနလံ အပရိယတ္တံ၊ န ဧတ္တာဝတာ အလမေတန္တိ သန္နိဋ္ဌာနံ ကာတဗ္ဗန္တိ ဝဒါမိ. နေဝသညာနာသညာယတနဿာပီတိ ဧဝရူပါယပိ သန္တာယ သမာပတ္တိယာ ပဟာနမေဝ ဝဒါမိ. အဏုံ ဝါ ထူလံ ဝါတိ ခုဒ္ဒကံ ဝါ မဟန္တံ ဝါ အပ္ပသာဝဇ္ဇံ ဝါ မဟာသာဝဇ္ဇံ ဝါ. သေသံ သဗ္ဗတ္ထ ဥတ္တာနမေဝ. ဒေသနာ ပန နေယျပုဂ္ဂလဿ ဝသေန အရဟတ္တနိကူဋေနေဝ နိဋ္ဌာပိတာတိ.

ပပဉ္စသူဒနိယာ မဇ္ဈိမနိကာယဋ္ဌကထာယ

လဋုကိကောပမသုတ္တဝဏ္ဏနာ နိဋ္ဌိတာ.