၄. မဟာမာလုကျသုတ္တဝဏ္ဏနာ

၁၂၉. ဧဝံ မေ သုတန္တိ မဟာမာလုကျသုတ္တံ. တတ္ထ ဩရမ္ဘာဂိယာနီတိ ဟေဋ္ဌာ ကောဋ္ဌာသိကာနိ ကာမဘဝေ နိဗ္ဗတ္တိသံဝတ္တနိကာနိ. သံယောဇနာနီတိ ဗန္ဓနာနိ. ကဿ ခေါ နာမာတိ ကဿ ဒေဝဿ ဝါ မနုဿဿ ဝါ ဒေသိတာနိ ဓာရေသိ၊ ကိံ တွမေဝေကော အဿောသိ၊ န အညော ကောစီတိ? အနုသေတီတိ အပ္ပဟီနတာယ အနုသေတိ. အနုသယမာနော သံယောဇနံ နာမ ဟောတိ.

ဧတ္ထ စ ဘဂဝတာ သံယောဇနံ ပုစ္ဆိတံ၊ ထေရေနပိ သံယောဇနမေဝ ဗျာကတံ. ဧဝံ သန္တေပိ တဿ ဝါဒေ ဘဂဝတာ ဒေါသော အာရောပိတော. သော ကသ္မာတိ စေ? ထေရဿ တထာလဒ္ဓိကတ္တာ. အယဉှိ တဿ လဒ္ဓိ ‘‘သမုဒါစာရက္ခဏေယေဝ ကိလေသေဟိ သံယုတ္တော နာမ ဟောတိ၊ ဣတရသ္မိံ ခဏေ အသံယုတ္တော’’တိ. တေနဿ ဘဂဝတာ ဒေါသော အာရောပိတော. အထာယသ္မာ အာနန္ဒော စိန္တေသိ – ‘‘ဘဂဝတာ ဘိက္ခုသံဃဿ ဓမ္မံ ဒေသေဿာမီတိ အတ္တနော ဓမ္မတာယေဝ အယံ ဓမ္မဒေသနာ အာရဒ္ဓါ၊ သာ ဣမိနာ အပဏ္ဍိတေန ဘိက္ခုနာ ဝိသံဝါဒိတာ. ဟန္ဒာဟံ ဘဂဝန္တံ ယာစိတွာ ဘိက္ခူနံ ဓမ္မံ ဒေသေဿာမီ’’တိ. သော ဧဝမကာသိ. တံ ဒဿေတုံ ‘‘ဧဝံ ဝုတ္တေ အာယသ္မာ အာနန္ဒော’’တိအာဒိ ဝုတ္တံ.

တတ္ထ သက္ကာယဒိဋ္ဌိပရိယုဋ္ဌိတေနာတိ သက္ကာယဒိဋ္ဌိယာ ဂဟိတေန အဘိဘူတေန. သက္ကာယဒိဋ္ဌိပရေတေနာတိ သက္ကာယဒိဋ္ဌိယာ အနုဂတေန. နိဿရဏန္တိ ဒိဋ္ဌိနိဿရဏံ နာမ နိဗ္ဗာနံ၊ တံ ယထာဘူတံ နပ္ပဇာနာတိ. အပ္ပဋိဝိနီတာတိ အဝိနောဒိတာ အနီဟဋာ. ဩရမ္ဘာဂိယံ သံယောဇနန္တိ ဟေဋ္ဌာဘာဂိယသံယောဇနံ နာမ ဟောတိ. သေသပဒေသုပိ ဧသေဝ နယော. သုက္ကပက္ခော ဥတ္တာနတ္ထောယေဝ. ‘‘သာနုသယာ ပဟီယတီ’’တိ ဝစနတော ပနေတ္ထ ဧကစ္စေ ‘‘အညံ သံယောဇနံ အညော အနုသယော’’တိ ဝဒန္တိ. ‘‘ယထာ ဟိ သဗျဉ္ဇနံ ဘတ္တ’’န္တိ ဝုတ္တေ ဘတ္တတော အညံ ဗျဉ္ဇနံ ဟောတိ၊ ဧဝံ ‘‘သာနုသယာ’’တိ ဝစနတော ပရိယုဋ္ဌာနသက္ကာယဒိဋ္ဌိတော အညေန အနုသယေန ဘဝိတဗ္ဗန္တိ တေသံ လဒ္ဓိ. တေ ‘‘သသီသံ ပါရုပိတွာ’’တိအာဒီဟိ ပဋိက္ခိပိတဗ္ဗာ. န ဟိ သီသတော အညော ပုရိသော အတ္ထိ. အထာပိ သိယာ – ‘‘ယဒိ တဒေဝ သံယောဇနံ သော အနုသယော၊ ဧဝံ သန္တေ ဘဂဝတာ ထေရဿ တရုဏူပမော ဥပါရမ္ဘော ဒုအာရောပိတော ဟောတီ’’တိ. န ဒုအာရောပိတော၊ ကသ္မာ? ဧဝံလဒ္ဓိကတ္တာတိ ဝိတ္ထာရိတမေတံ. တသ္မာ သောယေဝ ကိလေသော ဗန္ဓနဋ္ဌေန သံယောဇနံ၊ အပ္ပဟီနဋ္ဌေန အနုသယောတိ ဣမမတ္ထံ သန္ဓာယ ဘဂဝတာ ‘‘သာနုသယာ ပဟီယတီ’’တိ ဧဝံ ဝုတ္တန္တိ ဝေဒိတဗ္ဗံ.

၁၃၂. တစံ ဆေတွာတိအာဒီသု ဣဒံ ဩပမ္မသံသန္ဒနံ – တစစ္ဆေဒေါ ဝိယ ဟိ သမာပတ္တိ ဒဋ္ဌဗ္ဗာ၊ ဖေဂ္ဂုစ္ဆေဒေါ ဝိယ ဝိပဿနာ၊ သာရစ္ဆေဒေါ ဝိယ မဂ္ဂေါ. ပဋိပဒါ ပန လောကိယလောကုတ္တရမိဿကာဝ ဝဋ္ဋတိ. ဧဝမေတေ ဒဋ္ဌဗ္ဗာတိ ဧဝရူပါ ပုဂ္ဂလာ ဧဝံ ဒဋ္ဌဗ္ဗာ.

၁၃၃. ဥပဓိဝိဝေကာတိ ဥပဓိဝိဝေကေန. ဣမိနာ ပဉ္စကာမဂုဏဝိဝေကော ကထိတော. အကုသလာနံ ဓမ္မာနံ ပဟာနာတိ ဣမိနာ နီဝရဏပ္ပဟာနံ ကထိတံ. ကာယဒုဋ္ဌုလ္လာနံ ပဋိပ္ပဿဒ္ဓိယာတိ ဣမိနာ ကာယာလသိယပဋိပ္ပဿဒ္ဓိ ကထိတာ. ဝိဝိစ္စေဝ ကာမေဟီတိ ဥပဓိဝိဝေကေန ကာမေဟိ ဝိနာ ဟုတွာ. ဝိဝိစ္စ အကုသလေဟီတိ အကုသလာနံ ဓမ္မာနံ ပဟာနေန ကာယဒုဋ္ဌုလ္လာနံ ပဋိပ္ပဿဒ္ဓိယာ စ အကုသလေဟိ ဝိနာ ဟုတွာ. ယဒေဝ တတ္ထ ဟောတီတိ ယံ တတ္ထ အန္တောသမာပတ္တိက္ခဏေယေဝ သမာပတ္တိသမုဋ္ဌိတဉ္စ ရူပါဒိဓမ္မဇာတံ ဟောတိ. တေ ဓမ္မေတိ တေ ရူပဂတန္တိအာဒိနာ နယေန ဝုတ္တေ ရူပါဒယော ဓမ္မေ. အနိစ္စတောတိ န နိစ္စတော. ဒုက္ခတောတိ န သုခတော. ရောဂတောတိအာဒီသု အာဗာဓဋ္ဌေန ရောဂတော၊ အန္တောဒေါသဋ္ဌေန ဂဏ္ဍတော၊ အနုပဝိဒ္ဓဋ္ဌေန ဒုက္ခဇနနဋ္ဌေန စ သလ္လတော၊ ဒုက္ခဋ္ဌေန အဃတော၊ ရောဂဋ္ဌေန အာဗာဓတော၊ အသကဋ္ဌေန ပရတော၊ ပလုဇ္ဇနဋ္ဌေန ပလောကတော၊ နိဿတ္တဋ္ဌေန သုညတော၊ န အတ္တဋ္ဌေန အနတ္တတော. တတ္ထ အနိစ္စတော၊ ပလောကတောတိ ဒွီဟိ ပဒေဟိ အနိစ္စလက္ခဏံ ကထိတံ၊ ဒုက္ခတောတိအာဒီဟိ ဆဟိ ဒုက္ခလက္ခဏံ၊ ပရတော သုညတော အနတ္တတောတိ တီဟိ အနတ္တလက္ခဏံ.

သော တေဟိ ဓမ္မေဟီတိ သော တေဟိ ဧဝံ တိလက္ခဏံ အာရောပေတွာ ဒိဋ္ဌေဟိ အန္တောသမာပတ္တိယံ ပဉ္စက္ခန္ဓဓမ္မေဟိ. စိတ္တံ ပဋိဝါပေတီတိ စိတ္တံ ပဋိသံဟရတိ မောစေတိ အပနေတိ. ဥပသံဟရတီတိ ဝိပဿနာစိတ္တံ တာဝ သဝနဝသေန ထုတိဝသေန ပရိယတ္တိဝသေန ပညတ္တိဝသေန စ ဧတံ သန္တံ နိဗ္ဗာနန္တိ ဧဝံ အသင်္ခတာယ အမတာယ ဓာတုယာ ဥပသံဟရတိ. မဂ္ဂစိတ္တံ နိဗ္ဗာနံ အာရမ္မဏကရဏဝသေနေဝ ဧတံ သန္တမေတံ ပဏီတန္တိ န ဧဝံ ဝဒတိ၊ ဣမိနာ ပန အာကာရေန တံ ပဋိဝိဇ္ဈန္တော တတ္ထ စိတ္တံ ဥပသံဟရတီတိ အတ္ထော. သော တတ္ထ ဌိတောတိ တာယ တိလက္ခဏာရမ္မဏာယ ဝိပဿနာယ ဌိတော. အာသဝါနံ ခယံ ပါပုဏာတီတိ အနုက္ကမေန စတ္တာရော မဂ္ဂေ ဘာဝေတွာ ပါပုဏာတိ. တေနေဝ ဓမ္မရာဂေနာတိ သမထဝိပဿနာဓမ္မေ ဆန္ဒရာဂေန. သမထဝိပဿနာသု ဟိ သဗ္ဗသော ဆန္ဒရာဂံ ပရိယာဒါတုံ သက္ကောန္တော အရဟတ္တံ ပါပုဏာတိ၊ အသက္ကောန္တော အနာဂါမီ ဟောတိ.

ယဒေဝ တတ္ထ ဟောတိ ဝေဒနာဂတန္တိ ဣဓ ပန ရူပံ န ဂဟိတံ. ကသ္မာ? သမတိက္ကန္တတ္တာ. အယဉှိ ဟေဋ္ဌာ ရူပါဝစရဇ္ဈာနံ သမာပဇ္ဇိတွာ ရူပံ အတိက္ကမိတွာ အရူပါဝစရသမာပတ္တိံ သမာပန္နောတိ သမထဝသေနပိနေန ရူပံ အတိက္ကန္တံ၊ ဟေဋ္ဌာ ရူပံ သမ္မဒေဝ သမ္မသိတွာ တံ အတိက္ကမ္မ ဣဒါနိ အရူပံ သမ္မသတီတိ ဝိပဿနာဝသေနပိနေန ရူပံ အတိက္ကန္တံ. အရူပေ ပန သဗ္ဗသောပိ ရူပံ နတ္ထီတိ တံ သန္ဓာယပိ ဣဓ ရူပံ န ဂဟိတံ.

အထ ကိဉ္စရဟီတိ ကိံ ပုစ္ဆာမီတိ ပုစ္ဆတိ? သမထဝသေန ဂစ္ဆတော စိတ္တေကဂ္ဂတာ ဓုရံ ဟောတိ၊ သော စေတောဝိမုတ္တော နာမ. ဝိပဿနာဝသေန ဂစ္ဆတော ပညာ ဓုရံ ဟောတိ၊ သော ပညာဝိမုတ္တော နာမာတိ ဧတ္ထ ထေရဿ ကင်္ခါ နတ္ထိ. အယံ သဘာဝဓမ္မောယေဝ၊ သမထဝသေနေဝ ပန ဂစ္ဆန္တေသု ဧကော စေတောဝိမုတ္တော နာမ ဟောတိ၊ ဧကော ပညာဝိမုတ္တော. ဝိပဿနာဝသေန ဂစ္ဆန္တေသုပိ ဧကော ပညာဝိမုတ္တော နာမ ဟောတိ၊ ဧကော စေတောဝိမုတ္တောတိ ဧတ္ထ ကိံ ကာရဏန္တိ ပုစ္ဆတိ.

ဣန္ဒြိယဝေမတ္တတံ ဝဒါမီတိ ဣန္ဒြိယနာနတ္တတံ ဝဒါမိ. ဣဒံ ဝုတ္တံ ဟောတိ၊ န တွံ၊ အာနန္ဒ၊ ဒသ ပါရမိယော ပူရေတွာ သဗ္ဗညုတံ ပဋိဝိဇ္ဈိ၊ တေန တေ ဧတံ အပါကဋံ. အဟံ ပန ပဋိဝိဇ္ဈိံ၊ တေန မေ ဧတံ ပါကဋံ. ဧတ္ထ ဟိ ဣန္ဒြိယနာနတ္တတာ ကာရဏံ. သမထဝသေနေဝ ဟိ ဂစ္ဆန္တေသု ဧကဿ ဘိက္ခုနော စိတ္တေကဂ္ဂတာ ဓုရံ ဟောတိ၊ သော စေတောဝိမုတ္တော နာမ ဟောတိ. ဧကဿ ပညာ ဓုရံ ဟောတိ၊ သော ပညာဝိမုတ္တော နာမ ဟောတိ. ဝိပဿနာဝသေနေဝ စ ဂစ္ဆန္တေသု ဧကဿ ပညာ ဓုရံ ဟောတိ၊ သော ပညာဝိမုတ္တော နာမ ဟောတိ. ဧကဿ စိတ္တေကဂ္ဂတာ ဓုရံ ဟောတိ၊ သော စေတောဝိမုတ္တော နာမ ဟောတိ. ဒွေ အဂ္ဂသာဝကာ သမထဝိပဿနာဓုရေန အရဟတ္တံ ပတ္တာ. တေသု ဓမ္မသေနာပတိ ပညာဝိမုတ္တော ဇာတော၊ မဟာမောဂ္ဂလ္လာနတ္ထေရော စေတောဝိမုတ္တော. ဣတိ ဣန္ဒြိယဝေမတ္တမေတ္ထ ကာရဏန္တိ ဝေဒိတဗ္ဗံ. သေသံ သဗ္ဗတ္ထ ဥတ္တာနမေဝါတိ.

ပပဉ္စသူဒနိယာ မဇ္ဈိမနိကာယဋ္ဌကထာယ

မဟာမာလုကျသုတ္တဝဏ္ဏနာ နိဋ္ဌိတာ.