၇. ကုက္ကုရဝတိကသုတ္တဝဏ္ဏနာ

၇၈. ဧဝံ မေ သုတန္တိ ကုက္ကုရဝတိကသုတ္တံ. တတ္ထ ကောလိယေသူတိ ဧဝံနာမကေ ဇနပဒေ. သော ဟိ ဧကောပိ ကောလနဂရေ ပတိဋ္ဌိတာနံ ကောလိယာနံ ရာဇကုမာရာနံ နိဝါသဋ္ဌာနတ္တာ ဧဝံ ဝုစ္စတိ. တသ္မိံ ကောလိယေသု ဇနပဒေ. ဟလိဒ္ဒဝသနန္တိ တဿ ကိရ နိဂမဿ မာပိတကာလေ ပီတကဝတ္ထနိဝတ္ထာ မနုဿာ နက္ခတ္တံ ကီဠိံသု. တေ နက္ခတ္တကီဠာဝသာနေ နိဂမဿ နာမံ အာရောပေန္တာ ဟလိဒ္ဒဝသနန္တိ နာမံ အကံသု. တံ ဂေါစရဂါမံ ကတွာ ဝိဟရတီတိ အတ္ထော. ဝိဟာရော ပနေတ္ထ ကိဉ္စာပိ န နိယာမိတော၊ တထာပိ ဗုဒ္ဓါနံ အနုစ္ဆဝိကေ သေနာသနေယေဝ ဝိဟာသီတိ ဝေဒိတဗ္ဗော. ဂေါဝတိကောတိ သမာဒိန္နဂေါဝတော၊ သီသေ သိင်္ဂါနိ ဌပေတွာ နင်္ဂုဋ္ဌံ ဗန္ဓိတွာ ဂါဝီဟိ သဒ္ဓိံ တိဏာနိ ခါဒန္တော ဝိယ စရတိ. အစေလောတိ နဂ္ဂေါ နိစ္စေလော. သေနိယောတိ တဿ နာမံ.

ကုက္ကုရဝတိကောတိ သမာဒိန္နကုက္ကုရဝတော၊ သဗ္ဗံ သုနခကိရိယံ ကရောတိ. ဥဘောပေတေ သဟပံသုကီဠိကာ သဟာယကာ. ကုက္ကုရောဝ ပလိကုဇ္ဇိတွာတိ သုနခေါ နာမ သာမိကဿ သန္တိကေ နိသီဒန္တော ဒွီဟိ ပါဒေဟိ ဘူမိယံ ဝိလေခိတွာ ကုက္ကုရကူဇိတံ ကူဇန္တော နိသီဒတိ၊ အယမ္ပိ ‘‘ကုက္ကုရကိရိယံ ကရိဿာမီ’’တိ ဘဂဝတာ သဒ္ဓိံ သမ္မောဒိတွာ ဒွီဟိ ဟတ္ထေဟိ ဘူမိယံ ဝိလေခိတွာ သီသံ ဝိဓုနန္တော ‘ဘူ ဘူ’တိ ကတွာ ဟတ္ထပါဒေ သမိဉ္ဇိတွာ သုနခေါ ဝိယ နိသီဒိ. ဆမာနိက္ခိတ္တန္တိ ဘူမိယံ ဌပိတံ. သမတ္တံ သမာဒိန္နန္တိ ပရိပုဏ္ဏံ ကတွာ ဂဟိတံ. ကာ ဂတီတိ ကာ နိပ္ဖတ္တိ. ကော အဘိသမ္ပရာယောတိ အဘိသမ္ပရာယမှိ ကတ္ထ နိဗ္ဗတ္တိ. အလန္တိ တဿ အပ္ပိယံ ဘဝိဿတီတိ ယာဝတတိယံ ပဋိဗာဟတိ. ကုက္ကုရဝတန္တိ ကုက္ကုရဝတသမာဒါနံ.

၇၉. ဘာဝေတီတိ ဝဍ္ဎေတိ. ပရိပုဏ္ဏန္တိ အနူနံ. အဗ္ဗောကိဏ္ဏန္တိ နိရန္တရံ. ကုက္ကုရသီလန္တိ ကုက္ကုရာစာရံ. ကုက္ကုရစိတ္တန္တိ ‘‘အဇ္ဇ ပဋ္ဌာယ ကုက္ကုရေဟိ ကာတဗ္ဗံ ကရိဿာမီ’’တိ ဧဝံ ဥပ္ပန္နစိတ္တံ. ကုက္ကုရာကပ္ပန္တိ ကုက္ကုရာနံ ဂမနာကာရော အတ္ထိ၊ တိဋ္ဌနာကာရော အတ္ထိ၊ နိသီဒနာကာရော အတ္ထိ၊ သယနာကာရော အတ္ထိ၊ ဥစ္စာရပဿာဝကရဏာကာရော အတ္ထိ၊ အညေ ကုက္ကုရေ ဒိသွာ ဒန္တေ ဝိဝရိတွာ ဂမနာကာရော အတ္ထိ၊ အယံ ကုက္ကုရာကပ္ပေါ နာမ၊ တံ ဘာဝေတီတိ အတ္ထော. ဣမိနာဟံ သီလေနာတိအာဒီသု အဟံ ဣမိနာ အာစာရေန ဝါ ဝတသမာဒါနေန ဝါ ဒုက္ကရတပစရဏေန ဝါ မေထုနဝိရတိဗြဟ္မစရိယေန ဝါတိ အတ္ထော. ဒေဝေါတိ သက္ကသုယာမာဒီသု အညတရော. ဒေဝညတရောတိ တေသံ ဒုတိယတတိယဋ္ဌာနာဒီသု အညတရဒေဝေါ. မိစ္ဆာဒိဋ္ဌီတိ အဒေဝလောကဂါမိမဂ္ဂမေဝ ဒေဝလောကဂါမိမဂ္ဂေါတိ ဂဟေတွာ ဥပ္ပန္နတာယ သာ အဿ မိစ္ဆာဒိဋ္ဌိ နာမ ဟောတိ. အညတရံ ဂတိံ ဝဒါမီတိ တဿ ဟိ နိရယတော ဝါ တိရစ္ဆာနယောနိတော ဝါ အညာ ဂတိ နတ္ထိ၊ တသ္မာ ဧဝမာဟ. သမ္ပဇ္ဇမာနန္တိ ဒိဋ္ဌိယာ အသမ္မိဿံ ဟုတွာ နိပဇ္ဇမာနံ.

နာဟံ၊ ဘန္တေ၊ ဧတံ ရောဒါမိ၊ ယံ မံ ဘဂဝါ ဧဝမာဟာတိ ယံ မံ၊ ဘန္တေ၊ ဘဂဝါ ဧဝမာဟ၊ အဟမေတံ ဘဂဝတော ဗျာကရဏံ န ရောဒါမိ န ပရိဒေဝါမိ၊ န အနုတ္ထုနာမီတိ အတ္ထော. ဧဝံ သကမ္မကဝသေနေတ္ထ အတ္ထော ဝေဒိတဗ္ဗော၊ န အဿုမုဉ္စနမတ္တေန.

‘‘မတံ ဝါ အမ္မ ရောဒန္တိ၊ ယော ဝါ ဇီဝံ န ဒိဿတိ၊

ဇီဝန္တံ အမ္မ ပဿန္တီ၊ ကသ္မာ မံ အမ္မ ရောဒသီ’’တိ. (သံ. နိ. ၁.၂၃၉) –

အယဉ္စေတ္ထ ပယောဂေါ. အပိစ မေ ဣဒံ၊ ဘန္တေတိ အပိစ ခေါ မေ ဣဒံ၊ ဘန္တေ၊ ကုက္ကုရဝတံ ဒီဃရတ္တံ သမာဒိန္နံ၊ တသ္မိံ သမ္ပဇ္ဇန္တေပိ ဝုဒ္ဓိ နတ္ထိ၊ ဝိပဇ္ဇန္တေပိ. ဣတိ ‘‘ဧတ္တကံ ကာလံ မယာ ကတကမ္မံ မောဃံ ဇာတ’’န္တိ အတ္တနော ဝိပတ္တိံ ပစ္စဝေက္ခမာနော ရောဒါမိ၊ ဘန္တေတိ.

၈၀. ဂေါဝတန္တိအာဒီနိ ကုက္ကုရဝတာဒီသု ဝုတ္တနယေနေဝ ဝေဒိတဗ္ဗာနိ. ဂဝါကပ္ပန္တိ ဂေါအာကပ္ပံ. သေသံ ကုက္ကုရာကပ္ပေ ဝုတ္တသဒိသမေဝ. ယထာ ပန တတ္ထ အညေ ကုက္ကုရေ ဒိသွာ ဒန္တေ ဝိဝရိတွာ ဂမနာကာရော၊ ဧဝမိဓ အညေ ဂါဝေါ ဒိသွာ ကဏ္ဏေ ဥက္ခိပိတွာ ဂမနာကာရော ဝေဒိတဗ္ဗော. သေသံ တာဒိသမေဝ.

၈၁. စတ္တာရိမာနိ ပုဏ္ဏ ကမ္မာနီတိ ကသ္မာ ဣမံ ဒေသနံ အာရဘိ? အယဉှိ ဒေသနာ ဧကစ္စကမ္မကိရိယဝသေန အာဂတာ၊ ဣမသ္မိဉ္စ ကမ္မစတုက္ကေ ကထိတေ ဣမေသံ ကိရိယာ ပါကဋာ ဘဝိဿတီတိ ဣမံ ဒေသနံ အာရဘိ. အပိစ ဣမံ ကမ္မစတုက္ကမေဝ ဒေသိယမာနံ ဣမေ သဉ္ဇာနိဿန္တိ၊ တတော ဧကော သရဏံ ဂမိဿတိ၊ ဧကော ပဗ္ဗဇိတွာ အရဟတ္တံ ပါပုဏိဿတီတိ အယမေဝ ဧတေသံ သပ္ပါယာတိ ဉတွာပိ ဣမံ ဒေသနံ အာရဘိ.

တတ္ထ ကဏှန္တိ ကာဠကံ ဒသအကုသလကမ္မပထကမ္မံ. ကဏှဝိပါကန္တိ အပါယေ နိဗ္ဗတ္တနတော ကာဠကဝိပါကံ. သုက္ကန္တိ ပဏ္ဍရံ ဒသကုသလကမ္မပထကမ္မံ. သုက္ကဝိပါကန္တိ သဂ္ဂေ နိဗ္ဗတ္တနတော ပဏ္ဍရဝိပါကံ. ကဏှသုက္ကန္တိ ဝေါမိဿကကမ္မံ. ကဏှသုက္ကဝိပါကန္တိ သုခဒုက္ခဝိပါကံ. မိဿကကမ္မဉှိ ကတွာ အကုသလေန တိရစ္ဆာနယောနိယံ မင်္ဂလဟတ္ထိဋ္ဌာနာဒီသု ဥပ္ပန္နော ကုသလေန ပဝတ္တေ သုခံ ဝေဒိယတိ. ကုသလေန ရာဇကုလေပိ နိဗ္ဗတ္တော အကုသလေန ပဝတ္တေ ဒုက္ခံ ဝေဒိယတိ. အကဏှံ အသုက္ကန္တိ ကမ္မက္ခယကရံ စတုမဂ္ဂစေတနာကမ္မံ အဓိပ္ပေတံ. တဉှိ ယဒိ ကဏှံ ဘဝေယျ၊ ကဏှဝိပါကံ ဒဒေယျ. ယဒိ သုက္ကံ ဘဝေယျ၊ သုက္ကဝိပါကံ ဒဒေယျ. ဥဘယဝိပါကဿ ပန အဒါနတော အကဏှာသုက္ကဝိပါကတ္တာ ‘‘အကဏှံ အသုက္က’’န္တိ ဝုတ္တံ. အယံ တာဝ ဥဒ္ဒေသေ အတ္ထော.

နိဒ္ဒေသေ ပန သဗျာဗဇ္ဈန္တိ သဒုက္ခံ. ကာယသင်္ခါရာဒီသု ကာယဒွါရေ ဂဟဏာဒိဝသေန စောပနပ္ပတ္တာ ဒွါဒသ အကုသလစေတနာ သဗျာဗဇ္ဈကာယသင်္ခါရော နာမ. ဝစီဒွါရေ ဟနုသဉ္စောပနဝသေန ဝစီဘေဒပဝတ္တိကာ တာယေဝ ဒွါဒသ ဝစီသင်္ခါရော နာမ. ဥဘယစောပနံ အပ္ပတ္တာ ရဟော စိန္တယန္တဿ မနောဒွါရေ ပဝတ္တာ မနောသင်္ခါရော နာမ. ဣတိ တီသုပိ ဒွါရေသု ကာယဒုစ္စရိတာဒိဘေဒါ အကုသလစေတနာဝ သင်္ခါရာတိ ဝေဒိတဗ္ဗာ. ဣမသ္မိဉှိ သုတ္တေ စေတနာ ဓုရံ၊ ဥပါလိသုတ္တေ ကမ္မံ. အဘိသင်္ခရိတွာတိ သင်္ကဍ္ဎိတွာ၊ ပိဏ္ဍံ ကတွာတိ အတ္ထော. သဗျာဗဇ္ဈံ လောကန္တိ သဒုက္ခံ လောကံ ဥပပဇ္ဇန္တိ. သဗျာဗဇ္ဈာ ဖဿာ ဖုသန္တီတိ သဒုက္ခာ ဝိပါကဖဿာ ဖုသန္တိ. ဧကန္တဒုက္ခန္တိ နိရန္တရဒုက္ခံ. ဘူတာတိ ဟေတွတ္ထေ နိဿက္ကဝစနံ၊ ဘူတကမ္မတော ဘူတဿ သတ္တဿ ဥပ္ပတ္တိ ဟောတိ. ဣဒံ ဝုတ္တံ ဟောတိ – ယထာဘူတံ ကမ္မံ သတ္တာ ကရောန္တိ၊ တထာဘူတေန ကမ္မေန ကမ္မသဘာဂဝသေန တေသံ ဥပပတ္တိ ဟောတိ. တေနေဝါဟ ‘‘ယံ ကရောတိ တေန ဥပပဇ္ဇတီ’’တိ. ဧတ္ထ စ တေနာတိ ကမ္မေန ဝိယ ဝုတ္တာ၊ ဥပပတ္တိ စ နာမ ဝိပါကေန ဟောတိ. ယသ္မာ ပန ဝိပါကဿ ကမ္မံ ဟေတု၊ တသ္မာ တေန မူလဟေတုဘူတေန ကမ္မေန နိဗ္ဗတ္တတီတိ အယမေတ္ထ အတ္ထော. ဖဿာ ဖုသန္တီတိ ယေန ကမ္မဝိပါကေန နိဗ္ဗတ္တော၊ တံကမ္မဝိပါကဖဿာ ဖုသန္တိ. ကမ္မဒါယာဒါတိ ကမ္မဒါယဇ္ဇာ ကမ္မမေဝ နေသံ ဒါယဇ္ဇံ သန္တကန္တိ ဝဒါမိ.

အဗျာဗဇ္ဈန္တိ နိဒ္ဒုက္ခံ. ဣမသ္မိံ ဝါရေ ကာယဒွါရေ ပဝတ္တာ အဋ္ဌ ကာမာဝစရကုသလစေတနာ ကာယသင်္ခါရော နာမ. တာယေဝ ဝစီဒွါရေ ပဝတ္တာ ဝစီသင်္ခါရော နာမ. မနောဒွါရေ ပဝတ္တာ တာယေဝ အဋ္ဌ၊ တိဿော စ ဟေဋ္ဌိမဈာနစေတနာ အဗျာဗဇ္ဈမနောသင်္ခါရော နာမ. ဈာနစေတနာ တာဝ ဟောတု၊ ကာမာဝစရာ ကိန္တိ အဗျာဗဇ္ဈမနောသင်္ခါရော နာမ ဇာတာတိ. ကသိဏသဇ္ဇနကာလေ စ ကသိဏာသေဝနကာလေ စ လဗ္ဘန္တိ. ကာမာဝစရစေတနာ ပဌမဇ္ဈာနစေတနာယ ဃဋိတာ၊ စတုတ္ထဇ္ဈာနစေတနာ တတိယဇ္ဈာနစေတနာယ ဃဋိတာ. ဣတိ တီသုပိ ဒွါရေသု ကာယသုစရိတာဒိဘေဒါ ကုသလစေတနာဝ သင်္ခါရာတိ ဝေဒိတဗ္ဗော. တတိယဝါရော ဥဘယမိဿကဝသေန ဝေဒိတဗ္ဗာ.

သေယျထာပိ မနုဿာတိအာဒီသု မနုဿာနံ တာဝ ကာလေန သုခံ ကာလေန ဒုက္ခံ ပါကဋမေဝ၊ ဒေဝေသု ပန ဘုမ္မဒေဝတာနံ၊ ဝိနိပါတိကေသု ဝေမာနိကပေတာနံ ကာလေန သုခံ ကာလေန ဒုက္ခံ ဟောတီတိ ဝေဒိတဗ္ဗံ. ဟတ္ထိအာဒီသု တိရစ္ဆာနေသုပိ လဗ္ဘတိယေဝ.

တတြာတိ တေသု တီသု ကမ္မေသု. တဿ ပဟာနာယ ယာ စေတနာတိ တဿ ပဟာနတ္ထာယ မဂ္ဂစေတနာ. ကမ္မံ ပတွာဝ မဂ္ဂစေတနာယ အညော ပဏ္ဍရတရော ဓမ္မော နာမ နတ္ထိ. ဣဒံ ပန ကမ္မစတုက္ကံ ပတွာ ဒွါဒသ အကုသလစေတနာ ကဏှာ နာမ၊ တေဘူမကကုသလစေတနာ သုက္ကာ နာမ၊ မဂ္ဂစေတနာ အကဏှာ အသုက္ကာတိ အာဂတာ.

၈၂. ‘‘လဘေယျာဟံ၊ ဘန္တေ’’တိ ဣဒံ သော ‘‘စိရံ ဝတ မေ အနိယျာနိကပက္ခေ ယောဇေတွာ အတ္တာ ကိလမိတော၊ ‘သုက္ခနဒီတီရေ နှာယိဿာမီ’တိ သမ္ပရိဝတ္တေန္တေန ဝိယ ထုသေ ကောဋ္ဋေန္တေန ဝိယ စ န ကောစိ အတ္ထော နိပ္ဖါဒိတော၊ ဟန္ဒာဟံ အတ္တာနံ ယောဂေ ယောဇေမီ’’တိ စိန္တေတွာ အာဟ. အထ ဘဂဝါ ယောနေန ခန္ဓကေ တိတ္ထိယပရိဝါသော ပညတ္တော၊ ယံ အညတိတ္ထိယပုဗ္ဗော သာမဏေရဘူမိယံ ဌိတော – ‘‘အဟံ၊ ဘန္တေ၊ ဣတ္ထန္နာမော အညတိတ္ထိယပုဗ္ဗော ဣမသ္မိံ ဓမ္မဝိနယေ အာကင်္ခါမိ ဥပသမ္ပဒံ၊ သွာဟံ၊ ဘန္တေ၊ သံဃံ စတ္တာရော မာသေ ပရိဝါသံ ယာစာမီ’’တိအာဒိနာ (မဟာဝ. ၈၆) နယေန သမာဒိယိတွာ ပရိဝသတိ၊ တံ သန္ဓာယ ‘‘ယော ခေါ၊ သေနိယ၊ အညတိတ္ထိယပုဗ္ဗော’’တိအာဒိမာဟ.

တတ္ထ ပဗ္ဗဇ္ဇန္တိ ဝစနသိလိဋ္ဌတာဝသေနေဝ ဝုတ္တံ. အပရိဝသိတွာယေဝ ဟိ ပဗ္ဗဇ္ဇံ လဘတိ. ဥပသမ္ပဒတ္ထိကေန ပန နာတိကာလေန ဂါမပ္ပဝေသနာဒီနိ အဋ္ဌ ဝတ္တာနိ ပူရေန္တေန ပရိဝသိတဗ္ဗံ. အာရဒ္ဓစိတ္တာတိ အဋ္ဌဝတ္တပူရဏေန တုဋ္ဌစိတ္တာ. အယမေတ္ထ သင်္ခေပေါ. ဝိတ္ထာရတော ပနေသ တိတ္ထိယပရိဝါသော သမန္တပါသာဒိကာယ ဝိနယဋ္ဌကထာယ ပဗ္ဗဇ္ဇခန္ဓကဝဏ္ဏနာယံ (မဟာဝ. အဋ္ဌ. ၈၆) ဝုတ္တနယေနေဝ ဝေဒိတဗ္ဗော. အပိစ မေတ္ထာတိ အပိစ မေ ဧတ္ထ. ပုဂ္ဂလဝေမတ္တတာ ဝိဒိတာတိ ပုဂ္ဂလနာနတ္တံ ဝိဒိတံ. အယံ ပုဂ္ဂလော ပရိဝါသာရဟော၊ အယံ န ပရိဝါသာရဟောတိ ဣဒံ မယှံ ပါကဋန္တိ ဒဿေတိ.

တတော သေနိယော စိန္တေသိ – ‘‘အဟော အစ္ဆရိယံ ဗုဒ္ဓသာသနံ၊ ယတ္ထ ဧဝံ ဃံသိတွာ ကောဋ္ဋေတွာ ယုတ္တမေဝ ဂဏှန္တိ၊ အယုတ္တံ ဆဍ္ဍေန္တီ’’တိ. တတော သုဋ္ဌုတရံ ပဗ္ဗဇ္ဇာယ သဉ္ဇာတုဿာဟော သစေ၊ ဘန္တေတိအာဒိမာဟ. အထ ဘဂဝါ တဿ တိဗ္ဗစ္ဆန္ဒတံ ဝိဒိတွာ န သေနိယော ပရိဝါသံ အရဟတီတိ အညတရံ ဘိက္ခုံ အာမန္တေသိ – ‘‘ဂစ္ဆ တွံ၊ ဘိက္ခု၊ သေနိယံ နှာပေတွာ ပဗ္ဗာဇေတွာ အာနေဟီ’’တိ. သော တထာ ကတွာ တံ ပဗ္ဗာဇေတွာ ဘဂဝတော သန္တိကံ အာနယိ. ဘဂဝါ ဂဏေ နိသီဒိတွာ ဥပသမ္ပာဒေသိ. တေန ဝုတ္တံ – ‘‘အလတ္ထ ခေါ အစေလော သေနိယော ဘဂဝတော သန္တိကေ ပဗ္ဗဇ္ဇံ အလတ္ထ ဥပသမ္ပဒ’’န္တိ.

အစိရူပသမ္ပန္နောတိ ဥပသမ္ပန္နော ဟုတွာ နစိရမေဝ. ဝူပကဋ္ဌောတိ ဝတ္ထုကာမကိလေသကာမေဟိ ကာယေန စ စိတ္တေန စ ဝူပကဋ္ဌော. အပ္ပမတ္တောတိ ကမ္မဋ္ဌာနေ သတိံ အဝိဇဟန္တော. အာတာပီတိ ကာယိကစေတသိကသင်္ခါတေန ဝီရိယာတာပေန အာတာပီ. ပဟိတတ္တောတိ ကာယေ စ ဇီဝိတေ စ အနပေက္ခတာယ ပေသိတတ္တော ဝိဿဋ္ဌအတ္တဘာဝေါ. ယဿတ္ထာယာတိ ယဿ အတ္ထာယ. ကုလပုတ္တာတိ အာစာရကုလပုတ္တာ. သမ္မဒေဝါတိ ဟေတုနာဝ ကာရဏေနေဝ. တဒနုတ္တရန္တိ တံ အနုတ္တရံ. ဗြဟ္မစရိယပရိယောသာနန္တိ မဂ္ဂဗြဟ္မစရိယပရိယောသာနဘူတံ အရဟတ္တဖလံ. တဿ ဟိ အတ္ထာယ ကုလပုတ္တာ ပဗ္ဗဇန္တိ. ဒိဋ္ဌေဝ ဓမ္မေတိ ဣမသ္မိံယေဝ အတ္တဘာဝေ. သယံ အဘိညာ သစ္ဆိကတွာတိ အတ္တနာယေဝ ပညာယ ပစ္စက္ခံ ကတွာ၊ အပရပ္ပစ္စယံ ဉတွာတိ အတ္ထော. ဥပသမ္ပဇ္ဇ ဝိဟာသီတိ ပါပုဏိတွာ သမ္ပာဒေတွာ ဝိဟာသိ. ဧဝံ ဝိဟရန္တောဝ ခီဏာ ဇာတိ။ပေ။ အဗ္ဘညာသိ.

ဧဝမဿ ပစ္စဝေက္ခဏဘူမိံ ဒဿေတွာ အရဟတ္တနိကူဋေနေဝ ဒေသနံ နိဋ္ဌာပေတုံ ‘‘အညတရော ခေါ ပနာယသ္မာ သေနိယော အရဟတံ အဟောသီ’’တိ ဝုတ္တံ. တတ္ထ အညတရောတိ ဧကော. အရဟတန္တိ အရဟန္တာနံ၊ ဘဂဝတော သာဝကာနံ အရဟန္တာနံ အဗ္ဘန္တရော အဟောသီတိ အယမေဝတ္ထ အဓိပ္ပါယော. သေသံ သဗ္ဗတ္ထ ဥတ္တာနမေဝါတိ.

ပပဉ္စသူဒနိယာ မဇ္ဈိမနိကာယဋ္ဌကထာယ

ကုက္ကုရဝတိကသုတ္တဝဏ္ဏနာ နိဋ္ဌိတာ.