၃. ဖလဒါယကဝိမာနဝဏ္ဏနာ

ဥစ္စမိဒံ မဏိထူဏန္တိ ဖလဒါယကဝိမာနံ. တဿ ကာ ဥပ္ပတ္တိ? ဘဂဝါ ရာဇဂဟေ ဝိဟရတိ ဝေဠုဝနေ. တေန သမယေန ရညော ဗိမ္ဗိသာရဿ အကာလေ အမ္ဗဖလာနိ ပရိဘုဉ္ဇိတုံ ဣစ္ဆာ ဥပ္ပဇ္ဇိ. သော အာရာမပါလံ အာဟ – ‘‘မယှံ ခေါ၊ ဘဏေ၊ အမ္ဗဖလေသု ဣစ္ဆာ ဥပ္ပန္နာ၊ တသ္မာ အမ္ဗာနိ မေ အာနေတွာ ဒေဟီ’’တိ. ‘‘ဒေဝ၊ နတ္ထိ အမ္ဗေသု အမ္ဗဖလံ၊ အပိစာဟံ တထာ ကရောမိ၊ သစေ ဒေဝေါ ကိဉ္စိ ကာလံ အာဂမေတိ၊ ယထာ အမ္ဗာ န စိရဿေဝ ဖလံ ဂဏှန္တီ’’တိ. ‘‘သာဓု၊ ဘဏေ၊ တထာ ကရောဟီ’’တိ. အာရာမပါလော အာရာမံ ဂန္တွာ အမ္ဗရုက္ခမူလေသု ပံသုံ အပနေတွာ တာဒိသံ ပံသုံ အာကိရိ၊ တာဒိသဉ္စ ဥဒကံ အာသိဉ္စိ၊ ယထာ န စိရဿေဝ အမ္ဗရုက္ခာ သစ္ဆိန္နပတ္တာ အဟေသုံ. အထ နံ ပံသုံ အပနေတွာ ဖာရုသကကသဋမိဿကံ ပါကတိကံ ပံသုံ အာကိရိတွာ သာဓုကံ ဥဒကံ အဒါသိ. တဒါ အမ္ဗရုက္ခာ န စိရေနေဝ ကောရကိတာ ပလ္လဝိတာ ကုဋမလကဇာတာ ဟုတွာ ပုပ္ဖိံသု၊ အထ သလာဋုကဇာတာ ဟုတွာ ဖလာနိ ဂဏှိံသု. တတ္ထေကသ္မိံ အမ္ဗရုက္ခေ ပဌမတရံ စတ္တာရိ ဖလာနိ မနောသိလာစုဏ္ဏပိဉ္ဇရဝဏ္ဏာနိ သမ္ပန္နဂန္ဓရသာနိ ပရိဏတာနိ အဟေသုံ.

သော တာနိ ဂဟေတွာ ‘‘ရညော ဒဿာမီ’’တိ ဂစ္ဆန္တော အန္တရာမဂ္ဂေ အာယသ္မန္တံ မဟာမောဂ္ဂလ္လာနံ ပိဏ္ဍာယ စရမာနံ ဒိသွာ စိန္တေသိ ‘‘ဣမာနိ အမ္ဗာနိ အဂ္ဂဖလဘူတာနိ ဣမဿ အယျဿ ဒဿာမိ၊ ကာမံ မံ ရာဇာ ဟနတု ဝါ ပဗ္ဗာဇေတု ဝါ၊ ရညော ဟိ ဒိန္နေ ဒိဋ္ဌဓမ္မေ ပူဇာမတ္တံ အပ္ပမတ္တကံ ဖလံ၊ အယျဿ ဒိန္နေ ပန ဒိဋ္ဌဓမ္မိကမ္ပိ သမ္ပရာယိကမ္ပိ အပရိမာဏံ ဖလံ ဘဝိဿတီ’’တိ. ဧဝံ ပန စိန္တေတွာ တာနိ ဖလာနိ ထေရဿ ဒတွာ ရာဇာနံ ဥပသင်္ကမိတွာ ရညော တမတ္ထံ အာရောစေသိ. တံ သုတွာ ရာဇာ ရာဇပုရိသေ အာဏာပေသိ ‘‘ဝီမံသထ တာဝ၊ ဘဏေ၊ ယထာယံ အာဟာ’’တိ. ထေရော ပန တာနိ ဖလာနိ ဘဂဝတော ဥပနာမေသိ. ဘဂဝါ တေသု ဧကံ သာရိပုတ္တတ္ထေရဿ၊ ဧကံ မဟာမောဂ္ဂလ္လာနတ္ထေရဿ၊ ဧကံ မဟာကဿပတ္ထေရဿ ဒတွာ ဧကံ အတ္တနာ ပရိဘုဉ္ဇိ. ပုရိသာ တံ ပဝတ္တိံ ရညော အာရောစေသုံ.

ရာဇာ တံ သုတွာ ‘‘ဓီရော ဝတာယံ ပုရိသော၊ ယော အတ္တနော ဇီဝိတမ္ပိ ပရိစ္စဇိတွာ ပုညပသုတော အဟောသိ၊ အတ္တနော ပရိဿမဉ္စ ဌာနဂတမေဝ အကာသီ’’တိ တုဋ္ဌစိတ္တော တဿ ဧကံ ဂါမဝရံ ဝတ္ထာလင်္ကာရာဒီနိ စ ဒတွာ ‘‘ယံ တယာ ဘဏေ အမ္ဗဖလဒါနေန ပုညံ ပသုတံ၊ တတော မေ ပတ္တိံ ဒေဟီ’’တိ အာဟ. သော ‘‘ဒေမိ၊ ဒေဝ၊ ယထာသုခံ ပတ္တိံ ဂဏှာဟီ’’တိ အဝေါစ. အာရာမပါလော အပရဘာဂေ ကာလံ ကတွာ တာဝတိံသေသု ဥပ္ပဇ္ဇိ၊ တဿ သောဠသယောဇနိကံ ကနကဝိမာနံ နိဗ္ဗတ္တိ သတ္တသတကူဋာဂါရပဋိမဏ္ဍိတံ. တံ ဒိသွာ အာယသ္မာ မဟာမောဂ္ဂလ္လာနော ပုစ္ဆိ –

၁၀၆၀. ‘‘ဥစ္စမိဒံ မဏိထူဏံ ဝိမာနံ၊ သမန္တတော သောဠသ ယောဇနာနိ၊

ကူဋာဂါရာ သတ္တသတာ ဥဠာရာ၊ ဝေဠုရိယထမ္ဘာ ရုစကတ္ထတာ သုဘာ.

၁၀၆၁. ‘‘တတ္ထစ္ဆသိ ပိဝသိ ခါဒသိ စ၊ ဒိဗ္ဗာ စ ဝီဏာ ပဝဒန္တိ ဝဂ္ဂုံ၊

အဋ္ဌဋ္ဌကာ သိက္ခိတာ သာဓုရူပါ၊ ဒိဗ္ဗာ စ ကညာ တိဒသစရာ ဥဠာရာ၊

နစ္စန္တိ ဂါယန္တိ ပမောဒယန္တိ.

၁၀၆၂. ‘‘ဒေဝိဒ္ဓိပတ္တောသိ မဟာနုဘာဝေါ။ပေ။

ဝဏ္ဏော စ တေ သဗ္ဗဒိသာ ပဘာသတီ’’တိ.

၁၀၆၃. ‘‘သော ဒေဝပုတ္တော အတ္တမနော။ပေ။ ယဿ ကမ္မဿိဒံ ဖလံ’’.

၁၀၆၄. ‘‘ဖလဒါယီ ဖလံ ဝိပုလံ လဘတိ၊ ဒဒမုဇုဂတေသု ပသန္နမာနသော၊

သော ဟိ ပမောဒတိ သဂ္ဂဂတော တိဒိဝေ၊ အနုဘောတိ စ ပုညဖလံ ဝိပုလံ.

၁၀၆၅. ‘‘တဝေဝါဟံ မဟာမုနိ၊ အဒါသိံ စတုရော ဖလေ.

၁၀၆၆. ‘‘တသ္မာ ဟိ ဖလံ အလမေဝ ဒါတုံ၊ နိစ္စံ မနုဿေန သုခတ္ထိကေန၊

ဒိဗ္ဗာနိ ဝါ ပတ္ထယတာ သုခါနိ၊ မနုဿသောဘဂ္ဂတမိစ္ဆတာ ဝါ.

၁၀၆၇. ‘‘တေန မေတာဒိသော ဝဏ္ဏော။ပေ။

ဝဏ္ဏော စ မေ သဗ္ဗဒိသာ ပဘာသတီ’’တိ. – သောပိဿ ဗျာကာသိ၊

၁၀၆၁. တတ္ထ အဋ္ဌဋ္ဌကာတိ ဧကေကသ္မိံ ကူဋာဂါရေ အဋ္ဌဋ္ဌကာ စတုသဋ္ဌိပရိမာဏာ. သာဓုရူပါတိ ရူပသမ္ပတ္တိယာ စ သီလာစာရသမ္ပတ္တိယာ စ သိက္ခာသမ္ပတ္တိယာ စ သုန္ဒရသဘာဝါ. ဒိဗ္ဗာ စ ကညာတိ ဒေဝစ္ဆရာယော. တိဒသစရာတိ တိဒသေသု သုခါစာရာ သုခဝိဟာရိနိယော. ဥဠာရာတိ ဥဠာရဝိဘဝါ.

၁၀၆၄. ဖလဒါယီတိ အတ္တနာ အမ္ဗဖလဿ ဒိန္နတ္တာ အတ္တာနံ သန္ဓာယ ဝဒတိ. ဖလန္တိ ပုညဖလံ. ဝိပုလန္တိ မဟန္တံ လဘတိ မနုဿလောကေ ပတိဋ္ဌိတောတိ အဓိပ္ပါယော. ဒဒန္တိ ဒဒန္တော ဒါနဟေတု. ဥဇုဂတေသူတိ ဥဇုပဋိပန္နေသု. သဂ္ဂဂတောတိ ဥပ္ပဇ္ဇနဝသေန သဂ္ဂံ ဂတော၊ တတ္ထာပိ တိဒိဝေ တာဝတိံသဘဝနေ အနုဘောတိ စ ပုညဖလံ ဝိပုလံ ယထာဟံ၊ ဧဝံ အညောပီတိ အတ္ထော.

၁၀၆၆. တသ္မာတိ ယသ္မာ စတုန္နံ ဖလာနံ ဒါနမတ္တေန ဤဒိသီ သမ္ပတ္တိ အဓိဂတာ၊ တသ္မာ. အလမေဝ ယုတ္တမေဝ. နိစ္စန္တိ သဗ္ဗကာလံ. ဒိဗ္ဗာနီတိ ဒေဝလောကပရိယာပန္နာနိ. မနုဿသောဘဂ္ဂတန္တိ မနုဿေသု သုဘဂဘာဝံ. သေသံ ဝုတ္တနယမေဝ.

ဖလဒါယကဝိမာနဝဏ္ဏနာ နိဋ္ဌိတာ.