၁၄. မဟာရထဝိမာနဝဏ္ဏနာ

သဟဿယုတ္တံ ဟယဝါဟနံ သုဘန္တိ မဟာရထဝိမာနံ. တဿ ကာ ဥပ္ပတ္တိ? ဘဂဝါ သာဝတ္ထိယံ ဝိဟရတိ ဇေတဝနေ. တေန စ သမယေန အာယသ္မာ မဟာမောဂ္ဂလ္လာနော ဟေဋ္ဌာ ဝုတ္တနယေန ဒေဝစာရိကံ စရန္တော တာဝတိံသဘဝနေ ဂေါပါလဿ နာမ ဒေဝပုတ္တဿ အတ္တနော ဝိမာနတော နိက္ခမိတွာ သဟဿယုတ္တံ မဟန္တံ ဒိဗ္ဗရထံ အဘိရုယှ မဟန္တေန ပရိဝါရေန မဟတိယာ ဒေဝိဒ္ဓိယာ ဥယျာနကီဠနတ္ထံ ဂစ္ဆန္တဿ အဝိဒူရေ ပါတုရဟောသိ. တံ ဒိသွာ ဒေဝပုတ္တော သဉ္ဇာတဂါရဝဗဟုမာနော သဟသာ ရထတော ဩရုယှ ဥပသင်္ကမိတွာ ပဉ္စပတိဋ္ဌိတေန ဝန္ဒိတွာ အဉ္ဇလိံ သိရသိ ပဂ္ဂယှ အဋ္ဌာသိ.

တဿိဒံ ပုဗ္ဗကမ္မံ – သော ကိရ ဝိပဿိံ ဘဂဝန္တံ သုဝဏ္ဏမာလာယ ပူဇေတွာ ‘‘ဣမဿ ပုညဿ အာနုဘာဝေန မယှံ ဘဝေ ဘဝေ သောဝဏ္ဏမယာ ဥရစ္ဆဒမာလာ နိဗ္ဗတ္တတူ’’တိ ကတပဏိဓာနာယ အနေကကပ္ပေသု သုဂတီသုယေဝ သံသရန္တိယာ ကဿပဿ ဘဂဝတော ကာလေ ကိကိဿ ကာသိရညော အဂ္ဂမဟေသိယာ ကုစ္ဆိမှိ နိဗ္ဗတ္တာယ ယထာပဏိဓာနံ သုဝဏ္ဏမာလာလာဘေန ‘‘ဥရစ္ဆဒမာလာ’’တိ လဒ္ဓနာမာယ ဒေဝကညာသဒိသာယ ရာဇဓီတာယ အာစရိယော ဂေါပါလော နာမ ဗြာဟ္မဏော ဟုတွာ သသာဝကသံဃဿ ကဿပဿ ဘဂဝတော အသဒိသဒါနာဒီနိ မဟာဒါနာနိ ပဝတ္တေတွာ ဣန္ဒြိယာနံ အပရိပက္ကဘာဝေန အတ္တာနံ ရာဇဓီတရဉ္စ ဥဒ္ဒိဿ သတ္ထာရာ ဒေသိတံ ဓမ္မံ သုတွာပိ ဝိသေသံ နိဗ္ဗတ္တေတုံ အသက္ကောန္တော ပုထုဇ္ဇနကာလကိရိယမေဝ ကတွာ ယထူပစိတပုညာနုဘာဝေန တာဝတိံသေသု ယောဇနသတိကေ ကနကဝိမာနေ နိဗ္ဗတ္တိ၊ အနေကကောဋိအစ္ဆရာပရိဝါရော အဟောသိ၊ သတ္တရတနမယော စဿ သဟဿယုတ္တော သုဝိဘတ္တဘိတ္တိဝိစိတ္တော သိနိဒ္ဓမဓုရနိဂ္ဃေါသော အတ္တနော ပဘာသမုဒယေန အဝဟသန္တော ဝိယ ဒိဝင်္ကရမဏ္ဍလံ ဒိဗ္ဗော အာဇညရထော နိဗ္ဗတ္တိ.

သော တတ္ထ ယာဝတာယုကံ ဒိဗ္ဗသမ္ပတ္တိံ အနုဘဝိတွာ အပရာပရံ ဒေဝေသုယေဝ သံသရန္တော ဣမသ္မိံ ဗုဒ္ဓုပ္ပါဒေ တဿေဝ ကမ္မဿ ဝိပါကာဝသေသေန ယထာဝုတ္တသမ္ပတ္တိဝိဘဝေါ ဂေါပါလော ဧဝ နာမ ဒေဝပုတ္တော ဟုတွာ တာဝတိံသေသုယေဝ နိဗ္ဗတ္တိ. တံ သန္ဓာယ ဝုတ္တံ ‘‘တေန စ သမယေန အာယသ္မာ မဟာမောဂ္ဂလ္လာနော။ပေ။ အဉ္ဇလိံ သိရသိ ပဂ္ဂယှ အဋ္ဌာသီ’’တိ.

ဧဝံ ပန ဥပသင်္ကမိတွာ ဌိတံ တံ ဒေဝပုတ္တံ အာယသ္မာ မဟာမောဂ္ဂလ္လာနော ဣမာဟိ ဂါထာဟိ ပုစ္ဆိ –

၁၀၁၅. ‘‘သဟဿယုတ္တံ ဟယဝါဟနံ သုဘံ၊ အာရုယှိမံ သန္ဒနံ နေကစိတ္တံ၊

ဥယျာနဘူမိံ အဘိတော အနုက္ကမံ၊ ပုရိန္ဒဒေါ ဘူတပတီဝ ဝါသဝေါ.

၁၀၁၆. ‘‘သောဝဏ္ဏမယာ တေ ရထကုဗ္ဗရာ ဥဘော၊ ဖလေဟိ အံသေဟိ အတီဝ သင်္ဂတာ၊

သုဇာတဂုမ္ဗာ နရဝီရနိဋ္ဌိတာ၊ ဝိရောစတိ ပန္နရသေဝ စန္ဒော.

၁၀၁၇. ‘‘သုဝဏ္ဏဇာလာဝတတော ရထော အယံ၊ ဗဟူဟိ နာနာရတနေဟိ စိတ္တိတော၊

သုနန္ဒိဃောသော စ သုဘဿရော စ၊ ဝိရောစတီ စာမရဟတ္ထဗာဟုဘိ.

၁၀၁၈. ‘‘ဣမာ စ နာဘျော မနသာဘိနိမ္မိတာ၊ ရထဿ ပါဒန္တရမဇ္ဈဘူသိတာ၊

ဣမာ စ နာဘျော သတရာဇိစိတ္တိတာ၊ သတေရတာ ဝိဇ္ဇုရိဝပ္ပဘာသရေ.

၁၀၁၉. ‘‘အနေကစိတ္တာဝတတော ရထော အယံ၊ ပုထူ စ နေမီ စ သဟဿရံသိကော၊

တေသံ သရော သုယျတိ ဝဂ္ဂုရူပေါ၊ ပဉ္စင်္ဂိကံ တူရိယမိဝပ္ပဝါဒိတံ.

၁၀၂၀. ‘‘သိရသ္မိံ စိတ္တံ မဏိစန္ဒကပ္ပိတံ၊ သဒါ ဝိသုဒ္ဓံ ရုစိရံ ပဘဿရံ၊

သုဝဏ္ဏရာဇီဟိ အတီဝ သင်္ဂတံ၊ ဝေဠုရိယရာဇီဝ အတီဝ သောဘတိ.

၁၀၂၁. ‘‘ဣမေ စ ဝါဠီ မဏိစန္ဒကပ္ပိတာ၊ အာရောဟကမ္ဗူ သုဇဝါ ဗြဟူပမာ၊

ဗြဟာ မဟန္တာ ဗလိနော မဟာဇဝါ၊ မနော တဝညာယ တထေဝ သိံသရေ.

၁၀၂၂. ‘‘ဣမေ စ သဗ္ဗေ သဟိတာ စတုက္ကမာ၊ မနော တဝညာယ တထေဝ သိံသရေ၊

သမံ ဝဟန္တီ မုဒုကာ အနုဒ္ဓတာ၊ အာမောဒမာနာ တုရဂါနမုတ္တမာ.

၁၀၂၃. ‘‘ဓုနန္တိ ဝဂ္ဂန္တိ ပတန္တိ စမ္ဗရေ၊ အဗ္ဘုဒ္ဓုနန္တာ သုကတေ ပိဠန္ဓနေ၊

တေသံ သရော သုယျတိ ဝဂ္ဂုရူပေါ၊ ပဉ္စင်္ဂိကံ တူရိယမိဝပ္ပဝါဒိတံ.

၁၀၂၄. ‘‘ရထဿ ဃောသော အပိဠန္ဓနာန စ၊ ခုရဿ နာဒေါ အဘိဟိံသနာယ စ၊

ဃောသော သုဝဂ္ဂူ သမိတဿ သုယျတိ၊ ဂန္ဓဗ္ဗတူရိယာနိ ဝိစိတြသံဝနေ.

၁၀၂၅. ‘‘ရထေ ဌိတာတာ မိဂမန္ဒလောစနာ၊ အာဠာရပမှာ ဟသိတာ ပိယံဝဒါ၊

ဝေဠုရိယဇာလာဝတတာ တနုစ္ဆဝါ၊ သဒေဝ ဂန္ဓဗ္ဗသူရဂ္ဂပူဇိတာ.

၁၀၂၆. ‘‘တာ ရတ္တရတ္တမ္ဗရပီတဝါသသာ၊ ဝိသာလနေတ္တာ အဘိရတ္တလောစနာ၊

ကုလေ သုဇာတာ သုတနူ သုစိမှိတာ၊ ရထေ ဌိတာ ပဉ္ဇလိကာ ဥပဋ္ဌိတာ.

၁၀၂၇. ‘‘တာ ကမ္ဗုကေယူရဓရာ သုဝါသသာ၊ သုမဇ္ဈိမာ ဦရုထနူပပန္နာ၊

ဝဋ္ဋင်္ဂုလိယော သုမုခါ သုဒဿနာ၊ ရထေ ဌိတာ ပဉ္ဇလိကာ ဥပဋ္ဌိတာ.

၁၀၂၈. ‘‘အညာ သုဝေဏီ သုသု မိဿကေသိယော၊ သမံ ဝိဘတ္တာဟိ ပဘဿရာဟိ စ၊

အနုဗ္ဗတာ တာ တဝ မာနသေ ရတာ၊ ရထေ ဌိတာ ပဉ္ဇလိကာ ဥပဋ္ဌိတာ.

၁၀၂၉. ‘‘အာဝေဠိနိယော ပဒုမုပ္ပလစ္ဆဒါ၊ အလင်္ကတာ စန္ဒနသာရဝါသိတာ၊

အနုဗ္ဗတာ တာ တဝ မာနသေ ရတာ၊ ရထေ ဌိတာ ပဉ္ဇလိကာ ဥပဋ္ဌိတာ.

၁၀၃၀. ‘‘တာ မာလိနိယော ပဒုမုပ္ပလစ္ဆဒါ၊ အလင်္ကတာ စန္ဒနသာရဝါသိတာ၊

အနုဗ္ဗတာ တာ တဝ မာနသေ ရတာ၊ ရထေ ဌိတာ ပဉ္ဇလိကာ ဥပဋ္ဌိတာ.

၁၀၃၁. ‘‘ကဏ္ဌေသု တေ ယာနိ ပိဠန္ဓနာနိ၊ ဟတ္ထေသု ပါဒေသု တထေဝ သီသေ၊

ဩဘာသယန္တီ ဒသ သဗ္ဗသော ဒိသာ၊ အဗ္ဘုဒ္ဒယံ သာရဒိကောဝ ဘာဏုမာ.

၁၀၃၂. ‘‘ဝါတဿ ဝေဂေန စ သမ္ပကမ္ပိတာ၊ ဘုဇေသု မာလာ အပိဠန္ဓနာနိ စ၊

မုဉ္စန္တိ ဃောသံ ရုစိရံ သုစိံ သုဘံ၊ သဗ္ဗေဟိ ဝိညူဟိ သုတဗ္ဗရူပံ.

၁၀၃၃. ‘‘ဥယျာနဘူမျာ စ ဒုဝဒ္ဓတော ဌိတာ၊ ရထာ စ နာဂါ တူရိယာနိ စ သရော၊

တမေဝ ဒေဝိန္ဒ ပမောဒယန္တိ၊ ဝီဏာ ယထာ ပေါက္ခရပတ္တဗာဟုဘိ.

၁၀၃၄. ‘‘ဣမာသု ဝီဏာသု ဗဟူသု ဝဂ္ဂူသု၊ မနုညရူပါသု ဟဒယေရိတံ ပီတိံ၊

ပဝဇ္ဇမာနာသု အတီဝ အစ္ဆရာ၊ ဘမန္တိ ကညာ ပဒုမေသု သိက္ခိတာ.

၁၀၃၅. ‘‘ယဒါ စ ဂီတာနိ စ ဝါဒိတာနိ စ၊ နစ္စာနိ စိမာနိ သမေန္တိ ဧကတော၊

အထေတ္ထ နစ္စန္တိ အထေတ္ထ အစ္ဆရာ၊ ဩဘာသယန္တီ ဥဘတော ဝရိတ္ထိယော.

၁၀၃၆. ‘‘သော မောဒသိ တူရိယဂဏပ္ပဗောဓနော၊ မဟီယမာနော ဝဇိရာဝုဓောရိဝ၊

ဣမာသု ဝီဏာသု ဗဟူသု ဝဂ္ဂူသု၊ မနုညရူပါသု ဟဒယေရိတံ ပီတိံ.

၁၀၃၇. ‘‘ကိံ တွံ ပုရေ ကမ္မမကာသိ အတ္တနာ၊ မနုဿဘူတော ပုရိမာယ ဇာတိယာ၊

ဥပေါသထံ ကံ ဝါ တုဝံ ဥပါဝသိ၊ ကံ ဓမ္မစရိယံ ဝတမာဘိရောစယိ.

၁၀၃၈. ‘‘နယီဒမပ္ပဿ ကတဿ ကမ္မုနော၊ ပုဗ္ဗေ သုစိဏ္ဏဿ ဥပေါသထဿ ဝါ၊

ဣဒ္ဓါနုဘာဝေါ ဝိပုလော အယံ တဝ၊ ယံ ဒေဝသံဃံ အဘိရောစသေ ဘုသံ.

၁၀၃၉. ‘‘ဒါနဿ တေ ဣဒံ ဖလံ၊ အထော သီလဿ ဝါ ပန၊

အထော အဉ္ဇလိကမ္မဿ၊ တံ မေ အက္ခာဟိ ပုစ္ဆိတော’’တိ.

၁၀၁၅. တတ္ထ သဟဿယုတ္တန္တိ သဟဿေန ယုတ္တံ၊ သဟဿံ ဝါ ယုတ္တံ ယောဇိတံ ဧတသ္မိန္တိ သဟဿယုတ္တံ. ကဿ ပနေတံ သဟဿန္တိ? ‘‘ဟယဝါဟန’’န္တိ အနန္တရံ ဝုစ္စမာနတ္တာ ဟယာနန္တိ အယမတ္ထော ဝိညာယတေဝ. ဟယာ ဝါဟနံ ဧတဿာတိ ဟယဝါဟနံ. ကေစိ ပန ‘‘သဟဿယုတ္တဟယဝါဟန’’န္တိ အနုနာသိကလောပံ ဧကမေဝ သမာသပဒံ ကတွာ ဝဏ္ဏေန္တိ၊ ဧတသ္မိံ ပက္ခေ ဟယဝါဟနံ ဝိယ ဝါဟနန္တိ အတ္ထော ယုဇ္ဇတိ. ဟယဝါဟနသဟဿယုတ္တံ ယုတ္တဟယဝါဟနသဟဿန္တိ ဟိ အတ္ထော. အပရေ ပန ‘‘သဟဿယုတ္တန္တိ သဟဿဒိဗ္ဗာဇညယုတ္တ’’န္တိ ဝဒန္တိ. သန္ဒနန္တိ ရထံ. နေကစိတ္တန္တိ အနေကစိတ္တံ နာနာဝိဓဝိစိတ္တဝန္တံ. ဥယျာနဘူမိံ အဘိတောတိ ဥယျာနဘူမိယာ သမီပေ. ‘‘အဘိတော’’တိ ဟိ ပဒံ အပေက္ခိတွာ သာမိအတ္ထေ ဧတံ ဥပယောဂဝစနံ. ကေစိ ပန ‘‘ဥယျာနဘူမျာ’’တိပိ ပဌန္တိ၊ တေ သဒ္ဒနယမ္ပိ အနုပဓာရေန္တာ ပဌန္တိ. အနုက္ကမန္တိ ဂစ္ဆန္တော ပုရိန္ဒဒေါ ဘူတပတီဝ ဝါသဝေါ ဝိရောစသီတိ သမ္ဗန္ဓော.

၁၀၁၆. သောဝဏ္ဏမယာတိ သုဝဏ္ဏမယာ. တေတိ တဝ. ရထကုဗ္ဗရာ ဥဘောတိ ရထဿ ဥဘောသု ပဿေသု ဝေဒိကာ. ယော ဟိ ရထဿ သောဘနတ္ထဉ္စေဝ ဥပရိ ဌိတာနံ ဂုတ္တတ္ထဉ္စ ဥဘောသု ပဿေသု ဝေဒိကာကာရေန ပရိက္ခေပေါ ကရီယတိ၊ တဿ ပုရိမဘာဂေ ဥဘောသု ပဿေသု ယာဝ ရထီသာ၊ တာဝ ဟတ္ထေဟိ ဂဟဏယောဂ္ဂေါ ရထဿ အဝယဝဝိသေသော၊ ဣဓ သော ဧဝ ကုဗ္ဗရောတိ အဓိပ္ပေတော. တေနေဝါဟ ‘‘ဥဘော’’တိ. အညတ္ထ ပန ရထီသာ ကုဗ္ဗရောတိ ဝုစ္စတိ. ဖလေဟီတိ ရထူပတ္ထမ္ဘဿ ဒက္ခိဏဝါမဘေဒေဟိ ဒွီဟိ ဖလေဟိ၊ ပရိယန္တာဝေတ္ထ ဖလာတိ ဝုတ္တာ. အံသေဟီတိ ကုဗ္ဗရဖလေ ပတိဋ္ဌိတေဟိ ဟေဋ္ဌိမအံသေဟိ. အတီဝ သင်္ဂတာတိ အတိဝိယ သုဋ္ဌု သင်္ဂတာ သုဖဿိတာ နိဗ္ဗိဝရာ. ဣဒဉ္စ သိပ္ပိဝိရစိတေ ကိတ္တိမရထေ လဗ္ဘမာနဝိသေသံ တတ္ထ အာရောပေတွာ ဝုတ္တံ. သော ပန အပေါရိသတာယ အကိတ္တိမော သယံဇာတော ကေနစိ အဃဋိတောယေဝ. သုဇာတဂုမ္ဗာတိ သုသဏ္ဌိတထမ္ဘကသမုဒါယာ. ယေ ဟိ ဝေဒိကာယ နိရန္တရံ ဌိတာ သုသဏ္ဌိတဃဋကာဒိအဝယဝဝိသေသဝန္တော ထမ္ဘကသမုဒါယာ၊ တေသံ ဝသေနေဝံ ဝုတ္တံ ‘‘သုဇာတဂုမ္ဗာ’’တိ. နရဝီရနိဋ္ဌိတာတိ သိပ္ပါစရိယေဟိ နိဋ္ဌာပိတသဒိသာ. သိပ္ပါစရိယာ ဟိ အတ္တနော သရီရခေဒံ အစိန္တေတွာ ဝီရိယဗလေန သိပ္ပဿ သုဋ္ဌု ဝိစာရဏတော နရေသု ဝီရိယဝန္တောတိ ဣဓ ‘‘နရဝီရာ’’တိ ဝုတ္တာ. နရဝီရာတိ ဝါ ဒေဝပုတ္တဿ အာလပနံ. နိဋ္ဌိတာတိ ပရိယောသိတာ ပရိပုဏ္ဏသောဘာတိသယာ. ‘‘နရဝီရနိမ္မိတာ’’တိ ဝါ ပါဌော၊ နရေသု ဓိတိသမ္ပန္နေဟိ နိမ္မိတသဒိသာတိ အတ္ထော. ဧဝံဝိဓကုဗ္ဗရတာယ အယံ တဝ ရထော ဝိရောစတိ. ကိံ ဝိယ? ပန္နရသေဝ စန္ဒော၊ သုက္ကပက္ခေ ပန္နရသိယံ ပရိပုဏ္ဏကာလေ စန္ဒိမာ ဝိယ.

၁၀၁၇. သုဝဏ္ဏဇာလာဝတတောတိ သုဝဏ္ဏဇာလကေဟိ အဝတတော ဆာဒိတော. ‘‘သုဝဏ္ဏဇာလာဝိတတော’’တိပိ ပါဌော၊ ဂဝစ္ဆိတောတိ အတ္ထော. ဗဟူဟီတိ အနေကေဟိ. နာနာရတနေဟီတိ ပဒုမရာဂဖုဿရာဂါဒိနာနာဝိဓရတနေဟိ. သုနန္ဒိဃောသောတိ သုဋ္ဌု နန္ဒိတဗ္ဗဃောသော၊ သဝနီယမဓုရနိန္နာဒေါတိ အတ္ထော. သုနန္ဒိဃောသောတိ ဝါ သုဋ္ဌု ကတနန္ဒိဃောသော၊ နစ္စနာဒီနံ ဒဿနာဒီသု ပဝတ္တိတသာဓုကာရသဒ္ဒါဒိဝသေန ကတပမောဒနိန္နာဒေါတိ အတ္ထော၊ ‘‘ကာလေန ကာလံ အာသီဝါဒနဝသေန သုဋ္ဌု ပယုတ္တနန္ဒိဃောသော’’တိ စ ဝဒန္တိ. သုဘဿရောတိ သုဋ္ဌု အတိဝိယ ဩဘာသနသဘာဝေါ၊ တတ္ထ ဝါ ပဝတ္တမာနာနံ ဒေဝတာနံ သောဘနေန ဂီတဝါဒိတဿရေန သုဘဿရော. စာမရဟတ္ထဗာဟုဘီတိ စာမရဟတ္ထယုတ္တဗာဟူဟိ ဣတော စိတော စ ဗီဇယမာန စာမရကလာပေဟိ ဒေဝတာနံ ဘုဇေဟိ၊ တထာဘူတာဟိ ဒေဝတာဟိ ဝါ ဝိရောစတိ.

၁၀၁၈. နာဘျောတိ ရထစက္ကာနံ နာဘိယော. မနသာဘိနိမ္မိတာတိ ‘‘ဣမေ ဤဒိသာ ဟောန္တူ’’တိ စိတ္တေန နိမ္မိတသဒိသာ. ရထဿ ပါဒန္တရမဇ္ဈဘူသိတာတိ ရထဿ ပါဒါနံ ရထစက္ကာနံ အန္တေန နေမိနာ နာနာရတနသမုဇ္ဇလေန အရာနံ ဝေမဇ္ဈေန စ မဏ္ဍိတာ. သတရာဇိစိတ္တိတာတိ အနေကဝဏ္ဏာဟိ အနေကသတာဟိ ရာဇီဟိ လေခါဟိ စိတ္တိတာ ဝိစိတ္တဘာဝံ ဂတာ. သတေရတာ ဝိဇ္ဇုရိဝါတိ သတေရတသင်္ခါတဝိဇ္ဇုလတာ ဝိယ ပဘာသရေ ဝိဇ္ဇောတန္တိ.

၁၀၁၉. အနေကစိတ္တာဝတတောတိ အနေကေဟိ မာလာကမ္မာဒိစိတ္တေဟိ အဝတတော သမောကိဏ္ဏော. ‘‘အနေကစိတ္တာဝိတတော’’တိပိ ပဌန္တိ၊ သောယေဝ အတ္ထော၊ ဂါထာသုခတ္ထံ ပန ဒီဃကရဏံ. ပုထူ စ နေမီ စာတိ ပုထုလနေမိ စ၊ ဧကော စ-ကာရော နိပါတမတ္တံ. သဟဿရံသိကောတိ အနေကသဟဿရံသိကော. ‘‘သဟဿရံသိယော’’တိပိ ပါဠိ. အပရေ ပန ‘‘နတာ ရံသိယော’’တိ စ ပဌန္တိ၊ တတ္ထ နတာတိ အဇိယဓနုဒဏ္ဍကော ဝိယ ဩဏတာ နေမိပ္ပဒေသာ. သဟဿရံသိယောတိ သူရိယမဏ္ဍလံ ဝိယ ဝိပ္ဖုရန္တကိရဏဇာလာ. တေသန္တိ ဩလမ္ဗမာနကိင်္ကိဏိကဇာလာနံ နေမိပ္ပဒေသာနံ.

၁၀၂၀. သိရသ္မိန္တိ သီသေ၊ ရထဿ သီသေတိ အတ္ထော. သိရော ဝါ အသ္မိံ ရထေ. စိတ္တန္တိ ဝိစိတ္တံ. မဏိစန္ဒကပ္ပိတန္တိ မဏိမယမဏ္ဍလာနုဝိဒ္ဓံ စန္ဒမဏ္ဍလသဒိသေန မဏိနာ အနုဝိဒ္ဓံ. ရုစိရံ ပဘဿရန္တိ ဣမိနာ တဿ စန္ဒမဏ္ဍလသဒိသတံယေဝ ဝိဘာဝေတိ၊ သဒါ ဝိသုဒ္ဓန္တိ ဣမိနာ ပနဿ စန္ဒမဏ္ဍလတောပိ ဝိသေသံ ဒဿေတိ. သုဝဏ္ဏရာဇီဟီတိ အန္တရန္တရာ ဝဋ္ဋာကာရေန သဏ္ဌိတာဟိ သုဝဏ္ဏလေခါဟိ. သင်္ဂတန္တိ သဟိတံ. ဝေဠုရိယရာဇီဝါတိ အန္တရန္တရာ သုဝဏ္ဏရာဇီဟိ ခစိတမဏိမဏ္ဍလတ္တာ ဝေဠုရိယရာဇီဟိ ဝိယ သောဘတိ. ‘‘ဝေဠုရိယရာဇီဟီ’’တိ စ ပဌန္တိ.

၁၀၂၁. ဝါဠီတိ ဝါဠဝန္တော သမ္ပန္နဝါဠဓိနော၊ အဿေ သန္ဓာယ ဝဒတိ. ‘‘ဝါဇီ’’တိ ဝါ ပါဌော. မဏိစန္ဒကပ္ပိတာတိ စာမရောလမ္ဗနဋ္ဌာနေသု မဏိမယစန္ဒကာနုဝိဒ္ဓါ. အာရောဟကမ္ဗူတိ ဥစ္စာ စေဝ တဒနုရူပပရိဏာဟာ စ၊ အာရောဟပရိဏာဟသမ္ပန္နာတိ အတ္ထော. သုဇဝါတိ သုန္ဒရဇဝါ ဇဝဝန္တော မဟာဇဝါ၊ သောဘနဂတိကာတိ အတ္ထော. ဗြဟူပမာတိ ဗြဟာ ဝိယ ပမိနိတဗ္ဗာ၊ အတ္တနော ပမာဏတော အဓိကာ ဝိယ ပညာယန္တာတိ အတ္ထော. ဗြဟာတိ ဝုဍ္ဎာ ပဝဍ္ဎသဗ္ဗင်္ဂပစ္စင်္ဂါ. မဟန္တာတိ မဟာနုဘာဝါ မဟိဒ္ဓိကာ. ဗလိနောတိ သရီရဗလေန စ ဥဿာဟဗလေန စ ဗလဝန္တော. မဟာဇဝါတိ သီဃဝေဂါ. မနော တဝညာယာတိ တဝ စိတ္တံ ဉတွာ. တထေဝါတိ စိတ္တာနုရူပမေဝ. သိံသရေတိ သံသပ္ပရေ၊ ပဝတ္တရေတိ အတ္ထော.

၁၀၂၂. ဣမေတိ ယထာဝုတ္တအဿေ သန္ဓာယာဟ. သဗ္ဗေတိ သဟဿမတ္တာပိ. သဟိတာတိ သမာနဇဝတာယ သမာနဂမနတာယ စ ဂတိယံ သဟိတာ၊ အညမညံ အနူနာဓိကဂမနာတိ အတ္ထော. စတူဟိ ပါဒေဟိ ကမန္တိ ဂစ္ဆန္တီတိ စတုက္ကမာ. သမံ ဝဟန္တီတိ ‘‘သဟိတာ’’တိ ပဒေန ဝုတ္တမေဝတ္ထံ ပါကဋတရံ ကရောတိ. မုဒုကာတိ မုဒုသဘာဝါ၊ ဘဒြာ အာဇာနီယာတိ အတ္ထော. တေနာဟ ‘‘အနုဒ္ဓတာ’’တိ၊ ဥဒ္ဓတရဟိတာ ခေါဘံ အကရောန္တာတိ အတ္ထော. အာမောဒမာနာတိ ပမောဒမာနာ၊ အခဠုင်္ကတာယ အညမညံ ရထိကာဒီနဉ္စ တုဋ္ဌိံ ပဝေဒယန္တာတိ အတ္ထော.

၁၀၂၃. ဓုနန္တီတိ စာမရဘာရံ ကေသရဘာရံ ဝါလဓိဉ္စ ဝိဓုနန္တိ. ဝဂ္ဂန္တီတိ ကဒါစိ ပဒေ ပဒံ နိက္ခိပန္တာ ဝဂ္ဂနေန ဂမနေန ဂစ္ဆန္တိ. ပတန္တီတိ ကဒါစိ ပဝတ္တန္တိ၊ လင်္ဃန္တီတိ အတ္ထော. ‘‘ပ္လဝန္တီ’’တိ စ ကေစိ ပဌန္တိ၊ သောယေဝတ္ထော. အဗ္ဘုဒ္ဓုနန္တာတိ ကမ္မသိပ္ပိနာ သုကတေ သုဋ္ဌု နိမ္မိတေ ခုဒ္ဒကဃဏ္ဋာဒိအဿာလင်္ကာရေ အဘိဥဒ္ဓုနန္တာ အဓိကံ ဥဒ္ဓုနန္တာ. တေသန္တိ တေသံ ပိဠန္ဓနာနံ.

၁၀၂၄. ရထဿ ဃောသောတိ ယထာဝုတ္တော ရထနိဂ္ဃေါသော. အပိဠန္ဓနာန စာတိ အ-ကာရော နိပါတမတ္တံ. ပိဠန္ဓနာနံ အာဘရဏာနံ. အပိဠန္ဓနန္တိ စ အာဘရဏပရိယာယောတိ ဝါ ဝဒန္တိ၊ ရထဿာနံ အာဘရဏာနဉ္စဃောသောတိ အတ္ထော. ခုရဿနာဒေါတိ တုရင်္ဂါနံ ခုရနိပါတသဒ္ဒေါ. ကိဉ္စာပိ အဿာ အာကာသေန ဂစ္ဆန္တိ၊ မဓုရဿ ပန ခုရနိပါတသဒ္ဒဿ ဥပလဒ္ဓိဟေတုဘူတေန ကမ္မုနာ တေသံ ခုရနိက္ခေပေ ခုရနိက္ခေပေ ပဋိဃာတော လဗ္ဘတီတိ ဝဒန္တိ. အဘိဟိံသနာယ စာတိ အဿာနံ အဓိကဟိံသနေန စ၊ အန္တရန္တရာ အဿေဟိ ပဝတ္တိတဟေသနေန စာတိ အတ္ထော. ‘‘အဘိဟေသနာယ စာ’’တိ ကေစိ ပဌန္တိ. သမိတဿာတိ သမုဒိတဿ ဒိဗ္ဗဇနဿ ဃောသော စ သုဝဂ္ဂု သုမဓုရံ သုယျတိ. ကိံ ဝိယာတိ အာဟ ‘‘ဂန္ဓဗ္ဗတူရိယာနိ ဝိစိတြသံဝနေ’’တိ၊ စိတြလတာဝနေ ဂန္ဓဗ္ဗဒေဝပုတ္တာနံ ပဉ္စင်္ဂိကတူရိယာနိ ဝိယ. တူရိယသန္နိဿိတော ဟိ သဒ္ဒေါ ‘‘တူရိယာနီ’’တိ ဝုတ္တော နိဿယဝေါဟာရေန. ‘‘ဂန္ဓဗ္ဗတူရိယာန စ ဝိစိတြသံဝနေ’’တိ စ ပါဌော၊ ‘‘တူရိယာနဉ္စ’’ဣတိ အနုနာသိကံ အာနေတွာ ယောဇေတဗ္ဗံ. အပရေ ‘‘ဂန္ဓဗ္ဗတူရိယာနိ ဝိစိတြပဝနေ’’တိ ပဌန္တိ.

၁၀၂၅. ရထေ ဌိတာတာတိ ရထေ ဌိတာ ဧတာ. မိဂမန္ဒလောစနာတိ မိဂစ္ဆာပိကာနံ ဝိယ မုဒုသိနိဒ္ဓဒိဋ္ဌိနိပါတာ. အာဠာရပမှာတိ ဗဟလသင်္ဂတပခုမာ၊ ဂေါပခုမာတိ အတ္ထော. ဟသိတာတိ ပဟသိတာ၊ ပဟံသိတမုခါတိ အတ္ထော. ပိယံဝဒါတိ ပိယဝါဒိနိယော. ဝေဠုရိယဇာလာဝတတာတိ ဝေဠုရိယမဏိမယေန ဇာလေန ဆာဒိတသရီရာ. တနုစ္ဆဝါတိ သုခုမစ္ဆဝိယော. သဒေဝါတိ သဒါ ဧဝ သဗ္ဗကာလမေဝ. ဂန္ဓဗ္ဗသူရဂ္ဂပူဇိတာတိ ဂန္ဓဗ္ဗဒေဝတာဟိ စေဝ အပရာဟိ စ အဂ္ဂဒေဝတာဟိ လဒ္ဓပူဇာ.

၁၀၂၆. တာ ရတ္တရတ္တမ္ဗရပီတဝါသသာတိ ရဇနီယရူပါ စ ရတ္တပီတဝတ္ထာ စ. အဘိရတ္တလောစနာတိ ဝိသေသတော ရတ္တရာဇီဟိ ဥပသောဘိတနယနာ. ကုလေ သုဇာတာတိ သိန္ဓဝကုလေ သုဇာတာ ဝိသိဋ္ဌဒေဝနိကာယေ သမ္ဘဝါ. သုတနူတိ သုန္ဒရသရီရာ. သုစိမှိတာတိ သုဒ္ဓသိတကရဏာ.

၁၀၂၇. တာ ကမ္ဗုကေယူရဓရာတိ သုဝဏ္ဏမယကေယူရဓရာ. သုမဇ္ဈိမာတိ ဝိလဂ္ဂမဇ္ဈာ. ဦရုထနူပပန္နာတိ သမ္ပန္နဦရုထနာ၊ ကဒလိက္ခန္ဓသဒိသဦရု စေဝ သမုဂ္ဂသဒိသထနာ စ. ဝဋ္ဋင်္ဂုလိယောတိ အနုပုဗ္ဗတော ဝဋ္ဋင်္ဂုလိယော. သုမုခါတိ သုန္ဒရမုခါ၊ ပမုဒိတမုခါ ဝါ. သုဒဿနာတိ ဒဿနီယာ.

၁၀၂၈. အညာတိ ဧကစ္စာ. သုဝေဏီတိ သုန္ဒရကေသဝေဏိယော. သုသူတိ ဒဟရာ. မိဿကေသိယောတိ ရတ္တမာလာဒီဟိ မိဿိတကေသဝဋ္ဋိယော. ကထံ? သမံ ဝိဘတ္တာဟိ ပဘဿရာဟိ စာတိ၊ သမံ အညမညသဒိသံ နာနာဝိဘတ္တိဝသေန ဝိဘတ္တာဟိ သုဝဏ္ဏစီရာဒိခစိတာဟိ ဣန္ဒနီလမဏိအာဒယော ဝိယ ပဘဿရာဟိ ကေသဝဋ္ဋီဟိ မိဿိတကေသိယောတိ ယောဇနာ. အနုဗ္ဗတာတိ အနုကူလကိရိယာ. တာတိ အစ္ဆရာယော.

၁၀၂၉. စန္ဒနသာရဝေါသိတာတိ သာရဘူတေန ဒိဗ္ဗစန္ဒနေန ဥလ္လိတ္တာ ဝိစ္ဆုရိတာ.

၁၀၃၁. ကဏ္ဌေသူတိအာဒိနာ ဂီဝူပဂဟတ္ထူပဂပါဒူပဂသီသူပဂါဒိအာဘရဏာနိ ဒဿေတိ. ဩဘာသယန္တီတိ ကဏ္ဌေသု ယာနိ ပိဠန္ဓနာနိ၊ တေဟိ ဩဘာသယန္တီတိ ယောဇနာ. ဧဝံ သေသေသုပိ. အဗ္ဘုဒ္ဒယန္တိ အဘိဥဂ္ဂစ္ဆန္တော၊ ‘‘အဗ္ဘုဒ္ဒသ’’န္တိပိ ပါဌော၊ သောယေဝတ္ထော. သာရဒိကောတိ သရဒကာလိကော. ဘာဏုမာတိ သူရိယော. သော ဟိ အဗ္ဘာဒိဒေါသဝိရဟေန ဒသပိ ဒိသာ သုဋ္ဌု ဩဘာသေတိ.

၁၀၃၂. ဝါတဿ ဝေဂေန စာတိ မနုညဂန္ဓူပဟာရံ သဒ္ဒူပဟာရဉ္စ ကရောန္တေန ဥပဟရန္တေန ဝိယ ဝါယန္တေန ဝါတဿ ဝေဂေန ရထတုရင်္ဂဝေဂေန စ. မုဉ္စန္တီတိ ဝိဿဇ္ဇေန္တိ. ရုစိရန္တိ ပဉ္စင်္ဂိကတူရိယာနိ ဝိယ ဥပရူပရိ ရုစိဒါယကံ. သုစိန္တိ သုဒ္ဓံ အသံသဋ္ဌံ. သုဘန္တိ မနုညံ. သဗ္ဗေဟိ ဝိညူဟိ သုတဗ္ဗရူပန္တိ သဗ္ဗေဟိပိ ဝိညုဇာတိကေဟိ ဂန္ဓဗ္ဗသမယညူဟိ သောတဗ္ဗံ သဝနီယံ ဥတ္တမသဘာဝံ ဃောသံ မုဉ္စန္တီတိ ယောဇနာ.

၁၀၃၃. ဥယျာနဘူမျာတိ ဥယျာနဘူမိယံ. ဒုဝဒ္ဓတောတိ ဒွီဟိ အဒ္ဓပဿေဟိ. ‘‘ဒုဘတော စ ဌိတာ’’တိပိ ပဌန္တိ၊ သောယေဝတ္ထော. ရထာတိ ရထေ. နာဂါတိ နာဂေ. ဥပယောဂတ္ထေ ဟိ ဧတံ ပစ္စတ္တဝစနံ. သရောတိ ရထနာဂတူရိယာနိ ပဋိစ္စ နိဗ္ဗတ္တော သရော. ဒေဝိန္ဒာတိ ဒေဝပုတ္တံ အာလပတိ. ဝီဏာ ယထာ ပေါက္ခရပတ္တဗာဟုဘီတိ ယထာ ဝီဏာ သမ္မဒေဝ ယောဇိတေဟိ ဒေါဏိပတ္တဗာဟုဒဏ္ဍေဟိ တံတံမုစ္ဆနာနုရူပံ အဝဋ္ဌိတေဟိ ဝါဒိယမာနာ သုဏန္တံ ဇနံ ပမောဒေတိ၊ ဧဝံ တံ ရထာဒယော အတ္တနော သရေန ပမောဒယန္တိ. သုသိက္ခိတဘာဝေန ပေါက္ခရဘာဝံ သုန္ဒရဘာဝံ ပတ္တေဟိ ဝီဏာဝါဒကဿ ဟတ္ထေဟိ ပဝါဒိတာ ဝီဏာ ယထာ မဟာဇနံ ပမောဒေတိ၊ ဧဝံ တံ ရထာဒယော အတ္တနော သရေန ပမောဒယန္တီတိ.

၁၀၃၄. ဣမာသု ဝီဏာသူတိ ဂါထာယ အယံ သင်္ခေပတ္ထော – ဣမာသု ဥဇုကောဋိဝင်္ကဗြဟတီနန္ဒိနီတိသရအာဒိဘေဒါသု ဗဟူသု ဝီဏာသု သိနိဒ္ဓမဓုရဿရတာယ ဝဂ္ဂူသု တတော ဧဝ မနုညရူပါသု ဟဒယေရိတံ ဟဒယင်္ဂမံ ဟဒယဟာရိနိံ ပီတိံ ပီတိနိမိတ္တံ ပဝဇ္ဇမာနာသု ပဝါဒိယမာနာသု အစ္ဆရာ ဒေဝကညာ ပီတိဝေဂုက္ခိတ္တတာယ အတ္တနော သုသိက္ခိတတာယ စ ဒိဗ္ဗပဒုမေသု ဘမန္တိ နစ္စံ ဒဿေန္တိယော သဉ္စရန္တိ.

၁၀၃၅. ဣမာနီတိ ဣဒံ ပစ္စေကံ ယောဇေတဗ္ဗံ ‘‘ဣမာနိ ဂီတာနိ၊ ဣမာနိ ဝါဒိတာနိ၊ ဣမာနိ နစ္စာနိ စာ’’တိ. သမေန္တိ ဧကတောတိ ဧကဇ္ဈံ သမရသာနိ ဟောန္တိ. အထ ဝါ သမေန္တိ ဧကတောတိ ဧကတော ဧကဇ္ဈံ သမာနိ သမရသာနိ ကရောန္တိ၊ တန္တိဿရံ ဂီတဿရေန၊ ဂီတဿရဉ္စ တန္တိဿရေန သံသန္ဒန္တိယော နစ္စနေန ယထာဓိဂတေ ဟဿာဒိရသေ အပရိဟာပေန္တိယော သမေန္တိ သမာနေန္တီတိ အတ္ထော. အတ္ထေတ္ထ နစ္စန္တိ အထေတ္ထ အစ္ဆရာ ဩဘာသယန္တီတိ ဧဝံ ဂီတာဒီနိ သမရသေ ကရောန္တိယော အထ အညာ ဧကစ္စာ အစ္ဆရာ ဧတ္ထ ဧတသ္မိံ တဝ ရထေ နစ္စန္တိ၊ အထ အညာ ဝရိတ္ထိယော ဥတ္တမိတ္ထိယော နစ္စံ ပဿန္တိယော အတ္တနော သရီရောဘာသေန စေဝ ဝတ္ထာဘရဏဩဘာသေန စ ဧတ္ထ ဧတသ္မိံ ပဒေသေ ဥဘတော ဒွီသု ပဿေသု ဒသပိ ဒိသာ ကေဝလံ ဩဘာသယန္တိ ဝိဇ္ဇောတယန္တီတိ အတ္ထော.

၁၀၃၆. သောတိ သော တွံ ဧဝံဘူတော. တူရိယဂဏပ္ပဗောဓနောတိ ဒိဗ္ဗတူရိယသမူဟေန ကတပီတိပဗောဓနော. မဟီယမာနောတိ ပူဇီယမာနော. ဝဇိရာဝုဓောရိဝါတိ ဣန္ဒော ဝိယ.

၁၀၃၇. ဥပေါသထံ ကံ ဝါ တုဝံ ဥပါဝသီတိ အညေဟိပိ ဥပေါသထော ဥပဝသီယတိ၊ တွံ ကံ ဝါ ကီဒိသံ နာမ ဥပေါသထံ ဥပဝသီတိ ပုစ္ဆတိ. ဓမ္မစရိယန္တိ ဒါနာဒိပုညပဋိပတ္တိံ. ဝတန္တိ ဝတသမာဒါနံ. အဘိရောစယီတိ အဘိရောစေသိ၊ ရုစ္စိတွာ ပူရေသီတိ အတ္ထော. ‘‘အဘိရာဓယီ’’တိပိ ပါဌော၊ သာဓေသိ နိပ္ဖါဒေသီတိ အတ္ထော.

၁၀၃၈. ဣဒန္တိ နိပါတမတ္တံ၊ ဣဒံ ဝါ ဖလန္တိ အဓိပ္ပါယော. အဘိရောစသေတိ အဘိဘဝိတွာ ဝိဇ္ဇောတသိ.

ဧဝံ မဟာထေရေန ပုဋ္ဌော ဒေဝပုတ္တော တမတ္ထံ အာစိက္ခိ. တေန ဝုတ္တံ –

၁၀၄၀. ‘‘သော ဒေဝပုတ္တော အတ္တမနော၊ မောဂ္ဂလ္လာနေန ပုစ္ဆိတော၊

ပဉှံ ပုဋ္ဌော ဝိယာကာသိ၊ ယဿ ကမ္မဿိဒံ ဖလ’’န္တိ.

၁၀၄၁. ‘‘ဇိတိန္ဒြိယံ ဗုဒ္ဓမနောမနိက္ကမံ၊ နရုတ္တမံ ကဿပမဂ္ဂပုဂ္ဂလံ၊

အဝါပုရန္တံ အမတဿ ဒွါရံ၊ ဒေဝါတိဒေဝံ သတပုညလက္ခဏံ.

၁၀၄၂. ‘‘တမဒ္ဒသံ ကုဉ္ဇရမောဃတိဏ္ဏံ၊ သုဝဏ္ဏသိင်္ဂီနဒဗိမ္ဗသာဒိသံ၊

ဒိသွာန တံ ခိပ္ပမဟုံ သုစီမနော၊ တမေဝ ဒိသွာန သုဘာသိတဒ္ဓဇံ.

၁၀၄၃. ‘‘တမန္နပါနံ အထဝါပိ စီဝရံ၊ သုစိံ ပဏီတံ ရသသာ ဥပေတံ၊

ပုပ္ဖါဘိကိဏ္ဏမှိ သကေ နိဝေသနေ၊ ပတိဋ္ဌပေသိံ သ အသင်္ဂမာနသော.

၁၀၄၄. ‘‘တမန္နပါနေန စ စီဝရေန စ၊ ခဇ္ဇေန ဘောဇ္ဇေန စ သာယနေန စ၊

သန္တပ္ပယိတွာ ဒွိပဒါနမုတ္တမံ၊ သော သဂ္ဂသော ဒေဝပုရေ ရမာမဟံ.

၁၀၄၅. ‘‘ဧတေနုပါယေန ဣမံ နိရဂ္ဂဠံ၊ ယညံ ယဇိတွာ တိဝိဓံ ဝိသုဒ္ဓံ၊

ပဟာယဟံ မာနုသကံ သမုဿယံ၊ ဣန္ဒူပမော ဒေဝပုရေ ရမာမဟံ.

၁၀၄၆. ‘‘အာယုဉ္စ ဝဏ္ဏဉ္စ သုခံ ဗလဉ္စ၊ ပဏီတရူပံ အတိကင်္ခတာ မုနိ၊

အန္နဉ္စ ပါနဉ္စ ဗဟုံ သုသင်္ခတံ၊ ပတိဋ္ဌပေတဗ္ဗမသင်္ဂမာနသေ.

၁၀၄၇. ‘‘နယိမသ္မိံ လောကေ ပရသ္မိံ ဝါ ပန၊ ဗုဒ္ဓေန သေဋ္ဌော ဝ သမော ဝ ဝိဇ္ဇတိ၊

အာဟုနေယျာနံ ပရမာဟုတိံ ဂတော၊ ပုညတ္ထိကာနံ ဝိပုလပ္ဖလေသိန’’န္တိ.

၁၀၄၁. တတ္ထ ဇိတိန္ဒြိယန္တိ မနစ္ဆဋ္ဌာနံ ဣန္ဒြိယာနံ ဗောဓိမူလေယေဝ အဂ္ဂမဂ္ဂေန ဇိတတ္တာ နိဗ္ဗိသေဝနဘာဝဿ ကတတ္တာ ဇိတိန္ဒြိယံ. အဘိညေယျာဒီနံ အဘိညေယျာဒိဘာဝတော အနဝသေသတော အဘိသမ္ဗုဒ္ဓတ္တာ ဗုဒ္ဓံ. ပုရိပုဏ္ဏဝီရိယတာယ အနောမနိက္ကမံ စတုရင်္ဂသမန္နာဂတဿ ဝီရိယဿ စတုဗ္ဗိဓသမ္မပ္ပဓာနဿ စ ပါရိပူရိယာတိ အတ္ထော. နရုတ္တမန္တိ နရာနံ ဥတ္တမံ ဒွိပဒုတ္တမံ. ကဿပန္တိ ဘဂဝန္တံ ဂေါတ္တေန ဝဒတိ. အဝါပုရန္တံ အမတဿ ဒွါရန္တိ ကောဏာဂမနဿ ဘဂဝတော သာသနန္တရဓာနတော ပဘုတိ ပိဟိတံ နိဗ္ဗာနမဟာနဂရဿ ဒွါရံ အရိယမဂ္ဂံ ဝိဝရန္တံ. ဒေဝါတိဒေဝန္တိ သဗ္ဗေသမ္ပိ ဒေဝါနံ အတိဒေဝံ. သတပုညလက္ခဏန္တိ အနေကသတပုညဝသေန နိဗ္ဗတ္တမဟာပုရိသလက္ခဏံ.

၁၀၄၂. ကုဉ္ဇရန္တိ ကိလေသပဋိသတ္တုနိမ္မဒ္ဒနေန ကုဉ္ဇရသဒိသံ၊ မဟာနာဂန္တိ အတ္ထော. စတုန္နံ ဩဃာနံ သံသာရမဟောဃဿ တရိတတ္တာ ဩဃတိဏ္ဏံ. သုဝဏ္ဏသိင်္ဂီနဒဗိမ္ဗသာဒိသန္တိ သိင်္ဂီသုဝဏ္ဏဇမ္ဗုနဒသုဝဏ္ဏရူပသဒိသံ၊ ကဉ္စနသန္နိဘတ္တစန္တိ အတ္ထော. ဒိသွာန တံ ခိပ္ပမဟုံ သုစီမနောတိ တံ ကဿပသမ္မာသမ္ဗုဒ္ဓံ ဒိသွာ ခိပ္ပံ တာဝဒေဝ ‘‘သမ္မာသမ္ဗုဒ္ဓေါ ဘဂဝါ’’တိ ပသာဒဝသေန ကိလေသမလာပဂမနေန သုစိမနော ဝိသုဒ္ဓမနော အဟောသိံ၊ တဉ္စ ခေါ တမေဝ ဒိသွာန တံ ဒိသွာ ဧဝ. သုဘာသိတဒ္ဓဇန္တိ ဓမ္မဒ္ဓဇံ.

၁၀၄၃. တမန္နပါနန္တိ တမှိ ဘဂဝတိ အန္နဉ္စ ပါနဉ္စ. အထဝါပိ စီဝရန္တိ အထ စီဝရမ္ပိ. ရသသာ ဥပေတန္တိ ရသေန ဥပေတံ သာဒုရသံ၊ ဥဠာရန္တိ အတ္ထော. ပုပ္ဖါဘိကိဏ္ဏမှီတိ ဂန္ထိတေဟိ စ အဂန္ထိကေဟိ စ ပုပ္ဖေဟိ ဩလမ္ဗနဝသေန သန္ထရဏဝသေန စ အဘိကိဏ္ဏေ. ပတိဋ္ဌပေသိန္တိ ပဋိပါဒေသိံ အဒါသိံ. အသင်္ဂမာနသောတိ ကတ္ထစိ အလဂ္ဂစိတ္တော သော အဟန္တိ ယောဇနာ.

၁၀၄၄. သဂ္ဂသောတိ အပရာပရူပပတ္တိဝသေန သဂ္ဂေ သဂ္ဂေ၊ တတ္ထာပိ စ ဒေဝပုရေ သုဒဿနမဟာနဂရေ. ရမာမီတိ ကီဠာမိ မောဒါမိ.

၁၀၄၅. ဧတေနုပါယေနာတိ ဂေါပါလဗြာဟ္မဏကာလေ သသာဝကသံဃဿ ကဿပဘဂဝတော ယထာ အသဒိသဒါနံ အဒါသိံ၊ ဧတေန ဥပါယေန. ဣမံ နိရဂ္ဂဠံ ယညံ ယဇိတွာ တိဝိဓံ ဝိသုဒ္ဓန္တိ အနာဝဋဒွါရတာယ မုတ္တစာဂတာယ စ နိရဂ္ဂဠံ၊ တီသုပိ ကာလေသု တီဟိ ဒွါရေဟိ ကရဏကာရာပနာနုဿရဏဝိဓီဟိ သမ္ပန္နတာယ တိဝိဓံ၊ တတ္ထ သံကိလေသာဘာဝေန ဝိသုဒ္ဓံ အပရိမိတဓနပရိစ္စာဂဘာဝေန မဟာစာဂတာယ ယညံ ယဇိတွာ၊ မဟာဒါနံ ဒတွာတိ အတ္ထော. တံ ပန ဒါနံ စိရကတမ္ပိ ခေတ္တဝတ္ထုစိတ္တာနံ ဥဠာရတာယ အန္တရန္တရာ အနုဿရဏေန အတ္တနော ပါကဋံ အာသန္နံ ပစ္စက္ခံ ဝိယ ဥပဋ္ဌိတံ ဂဟေတွာ အာဟ ‘‘ဣမ’’န္တိ.

၁၀၄၆. ဧဝံ ဒေဝပုတ္တော အတ္တနာ ကတကမ္မံ ထေရဿ ကထေတွာ ဣဒါနိ တာဒိသာယ သမ္ပတ္တိယာ ပရေပိ ပတိဋ္ဌာပေတုကာမတံ တထာဂတေ စ ဥတ္တမံ အတ္တနော ပသာဒဗဟုမာနံ ပဝေဒေန္တော ‘‘အာယုဉ္စ ဝဏ္ဏဉ္စာ’’တိအာဒိနာ ဂါထာဒွယမာဟ. တတ္ထ အဘိကင်္ခတာတိ ဣစ္ဆန္တေန. မုနီတိ ထေရံ အာလပတိ.

၁၀၄၇. နယိမသ္မိံ လောကေတိ ဒေဝပုတ္တော အတ္တနော ပစ္စက္ခဘူတံ လောကံ ဝဒတိ. ပရသ္မိန္တိ တတော အညသ္မိံ. ဧတေန သဗ္ဗေပိ သဒေဝကေ လောကေ ဒဿေတိ. သမော စ ဝိဇ္ဇတီတိ သေဋ္ဌော တာဝ တိဋ္ဌတု၊ သမော ဧဝ န ဝိဇ္ဇတီတိ အတ္ထော. အာဟုနေယျာနံ ပရမာဟုတိံ ဂတောတိ ဣမသ္မိံ လောကေ ယတ္တကာ အာဟုနေယျာ နာမ၊ တေသု သဗ္ဗေသု ပရမာဟုတိံ ပရမံ အာဟုနေယျဘာဝံ ဂတော. ‘‘ဒက္ခိဏေယျာနံ ပရမဂ္ဂတံ ဂတော’’တိ ဝါ ပါဌော၊ တတ္ထ ပရမဂ္ဂတန္တိ ပရမံ အဂ္ဂဘာဝံ၊ အဂ္ဂဒက္ခိဏေယျဘာဝန္တိ အတ္ထော. ကေသန္တိ အာဟ ‘‘ပုညတ္ထိကာနံ ဝိပုလပ္ဖလေသိန’’န္တိ၊ ပုညေန အတ္ထိကာနံ ဝိပုလံ မဟန္တံ ပုညဖလံ ဣစ္ဆန္တာနံ၊ တထာဂတော ဧဝ လောကဿ ပုညက္ခေတ္တန္တိ ဒဿေတိ. ကေစိ ပန ‘‘အာဟုနေယျာနံ ပရမဂ္ဂတံ ဂတော’’တိ ပဌန္တိ၊ သောယေဝတ္ထော.

ဧဝံ ကထေန္တမေဝ တံ ထေရော ကလ္လစိတ္တံ မုဒုစိတ္တံ ဝိနီဝရဏစိတ္တံ ဥဒဂ္ဂစိတ္တံ ပသန္နစိတ္တဉ္စ ဉတွာ သစ္စာနိ ပကာသေသိ. သော သစ္စပရိယောသာနေ သောတာပတ္တိဖလေ ပတိဋ္ဌဟိ. အထ ထေရော မနုဿလောကံ အာဂန္တွာ ဘဂဝတော တမတ္ထံ အတ္တနာ စ ဒေဝပုတ္တေန စ ကထိတနိယာမေနေဝ အာရောစေသိ. သတ္ထာ တမတ္ထံ အဋ္ဌုပ္ပတ္တိံ ကတွာ သမ္ပတ္တပရိယာယ ဓမ္မံ ဒေသေသိ. သာ ဒေသနာ မဟာဇနဿ သာတ္ထိကာ အဟောသီတိ.

မဟာရထဝိမာနဝဏ္ဏနာ နိဋ္ဌိတာ.

ဣတိ ပရမတ္ထဒီပနိယာ ခုဒ္ဒကဋ္ဌကထာယ ဝိမာနဝတ္ထုသ္မိံ

စုဒ္ဒသဝတ္ထုပဋိမဏ္ဍိတဿ ပဉ္စမဿ မဟာရထဝဂ္ဂဿ

အတ္ထဝဏ္ဏနာ နိဋ္ဌိတာ.