၁၂. တတိယနာဂဝိမာနဝဏ္ဏနာ

ကော နု ဒိဗ္ဗေန ယာနေနာတိ တတိယနာဂဝိမာနံ. တဿ ကာ ဥပ္ပတ္တိ? ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ. တေန သမယေန တယော ခီဏာသဝတ္ထေရာ ဂါမကာဝါသေ ဝဿံ ဥပဂစ္ဆိံသု. တေ ဝုတ္ထဝဿာ ပဝါရေတွာ ‘‘ဘဂဝန္တံ ဝန္ဒိဿာမာ’’တိ ရာဇဂဟံ ဥဒ္ဒိဿ ဂစ္ဆန္တာ အန္တရာမဂ္ဂေ သာယံ အညတရသ္မိံ ဂါမကေ မိစ္ဆာဒိဋ္ဌိကဗြာဟ္မဏဿ ဥစ္ဆုခေတ္တသမီပံ ဂန္တွာ ဥစ္ဆုပါလံ ပုစ္ဆိံသု ‘‘အာဝုသော၊ သက္ကာ အဇ္ဇ ရာဇဂဟံ ပါပုဏိတု’’န္တိ. ‘‘န သက္ကာ၊ ဘန္တေ၊ ဣတော အဍ္ဎယောဇနေ ရာဇဂဟံ၊ ဣဓေဝ ဝသိတွာ သွေ ဂစ္ဆထာ’’တိ အာဟ. ‘‘အတ္ထေတ္ထ ကောစိ ဝသနယောဂ္ဂေါ အာဝါသော’’တိ? ‘‘နတ္ထိ၊ ဘန္တေ၊ အဟံ ပန ဝေါ ဝသနဋ္ဌာနံ ဇာနိဿာမီ’’တိ. ထေရာ အဓိဝါသေသုံ.

သော ဥစ္ဆူသုယေဝ ယထာဌိတေသု သာခါမဏ္ဍပါကာရေန ဒဏ္ဍကာနိ ဗန္ဓိတွာ ဥစ္ဆုပဏ္ဏေဟိ ဆာဒေတွာ ဟေဋ္ဌာ ပလာလံ အတ္ထရိတွာ ဧကဿ ထေရဿ အဒါသိ၊ ဒုတိယဿ ထေရဿ တီဟိ ဥစ္ဆူဟိ ဒဏ္ဍကသင်္ခေပေန ဗန္ဓိတွာ တိဏေန ဆာဒေတွာ ဟေဋ္ဌာ စ တိဏသန္ထရံ ကတွာ အဒါသိ၊ ဣတရဿ အတ္တနော ကုဋိယံ ဒွေ တယော ဒဏ္ဍကေ သာခါယော စ နီဟရိတွာ စီဝရေန ပဋိစ္ဆာဒေန္တော စီဝရကုဋိံ ကတွာ အဒါသိ. တေ တတ္ထ ဝသိံသု. အထ ဝိဘာတာယ ရတ္တိယာ ကာလဿေဝ ဘတ္တံ ပစိတွာ ဒန္တကဋ္ဌဉ္စ မုခေါဒကဉ္စ ဒတွာ သဟ ဥစ္ဆုရသေန ဘတ္တံ အဒါသိ. တေသံ ဘုဉ္ဇိတွာ အနုမောဒနံ ကတွာ ဂစ္ဆန္တာနံ ဧကေကံ ဥစ္ဆုံ အဒါသိ ‘‘မယှံ ဘာဂေါ ဘဝိဿတီ’’တိ. သော ထောကံ မဂ္ဂံ ထေရေ အနုဂန္တွာ နိဝတ္တန္တော အတ္တနော ဝေယျာဝစ္စဉ္စ ဒါနဉ္စ အာရဗ္ဘ ဥဠာရံ ပီတိသောမနဿံ ပဋိသံဝေဒေန္တော နိဝတ္တိ.

ခေတ္တသာမိကော ပန ဂစ္ဆန္တာနံ ဘိက္ခူနံ ပဋိပထေန အာဂစ္ဆန္တော ဘိက္ခူ ပုစ္ဆိ ‘‘ကုတော ဝေါ ဥစ္ဆု လဒ္ဓါ’’တိ? ‘‘ဥစ္ဆုပါလကေန ဒိန္နာ’’တိ. တံ သုတွာ ဗြာဟ္မဏော ကုပိတော အနတ္တမနော တဋတဋာယမာနော ကောဓာဘိဘူတော တဿ ပိဋ္ဌိတော ဥပဓာဝိတွာ မုဂ္ဂရေန တံ ပဟရန္တော ဧကပ္ပဟာရေနေဝ ဇီဝိတာ ဝေါရောပေသိ. သော အတ္တနာ ကတပုညကမ္မမေဝ အနုဿရန္တော ကာလံ ကတွာ သုဓမ္မာဒေဝသဘာယံ နိဗ္ဗတ္တိ. တဿ ပုညာနုဘာဝေန သဗ္ဗသေတော မဟန္တော ဒိဗ္ဗဝရဝါရဏော နိဗ္ဗတ္တိ.

ဥစ္ဆုပါလကဿ မရဏံ သုတွာ တဿ မာတာပိတရော စေဝ ဉာတိမိတ္တာ စ အဿုမုခါ ရောဒမာနာ တံ ဌာနံ အဂမံသု၊ သဗ္ဗေ စ ဂါမဝါသိနော သန္နိပတိံသု. တတြဿ မာတာပိတရော သရီရကိစ္စံ ကာတုံ အာရဘိံသု. တသ္မိံ ခဏေ သော ဒေဝပုတ္တော တံ ဒိဗ္ဗဟတ္ထိံ အဘိရုဟိတွာ သဗ္ဗတာဠာဝစရပရိဝုတော ပဉ္စင်္ဂိကေန တူရိယေန ပဝဇ္ဇမာနေန မဟန္တေန ပရိဝါရေန မဟတိယာ ဒေဝိဒ္ဓိယာ ဒေဝလောကတော အာဂန္တွာ တာယ ပရိသာယ ဒိဿမာနရူပေါ အာကာသေ အဋ္ဌာသိ. အထ နံ တတ္ထ ပဏ္ဍိတဇာတိကော ပုရိသော ဣမာဟိ ဂါထာဟိ တေန ကတပုညကမ္မံ ပုစ္ဆိ –

၉၇၆. ‘‘ကော နု ဒိဗ္ဗေန ယာနေန၊ သဗ္ဗသေတေန ဟတ္ထိနာ၊

တူရိယတာဠိတနိဂ္ဃေါသော၊ အန္တလိက္ခေ မဟီယတိ.

၉၇၇. ‘‘ဒေဝတာ နုသိ ဂန္ဓဗ္ဗော၊ အဒု သက္ကော ပုရိန္ဒဒေါ၊

အဇာနန္တာ တံ ပုစ္ဆာမ၊ ကထံ ဇာနေမု တံ မယ’’န္တိ.

သောပိဿ ဣမာဟိ ဂါထာဟိ ဧတမတ္ထံ ဗျာကာသိ –

၉၇၈. ‘‘နာမှိ ဒေဝေါ န ဂန္ဓဗ္ဗော၊ နာပိ သက္ကော ပုရိန္ဒဒေါ၊

သုဓမ္မာ နာမ ယေ ဒေဝါ၊ တေသံ အညတရော အဟ’’န္တိ.

၉၇၉. ‘‘ပုစ္ဆာမ ဒေဝံ သုဓမ္မံ၊ ပုထုံ ကတွာန အဉ္ဇလိံ၊

ကိံ ကတွာ မာနုသေ ကမ္မံ၊ သုဓမ္မံ ဥပပဇ္ဇတီ’’တိ – ပုနပိ ပုစ္ဆိ၊

၉၈၀. ‘‘ဥစ္ဆာဂါရံ တိဏာဂါရံ၊ ဝတ္ထာဂါရဉ္စ ယော ဒဒေ၊

တိဏ္ဏံ အညတရံ ဒတွာ၊ သုဓမ္မံ ဥပပဇ္ဇတီ’’တိ. – ပုနပိ ဗျာကာသိ၊

၉၇၆. တတ္ထ တူရိယတာဠိတနိဂ္ဃေါသောတိ တာဠိတပဉ္စင်္ဂိတဒိဗ္ဗတူရိယနိဂ္ဃေါသော အတ္တာနံ ဥဒ္ဒိဿ ပဝဇ္ဇမာနဒိဗ္ဗတူရိယသဒ္ဒေါ. အန္တလိက္ခေ မဟီယတီတိ အာကာသေ ဌတွာ အာကာသဋ္ဌေနေဝ မဟတာ ပရိဝါရေန ပူဇီယတိ.

၉၇၇. ဒေဝတာ နုသီတိ ဒေဝတာ နု အသိ၊ ကိံ နု တွံ ဒေဝေါသီတိ အတ္ထော. ဂန္ဓဗ္ဗောတိ ဂန္ဓဗ္ဗကာယိကဒေဝေါ အသီတိ အတ္ထော. အဒု သက္ကော ပုရိန္ဒဒေါတိ ဥဒါဟု ပုရေ ဒဒါတီတိ ‘‘ပုရိန္ဒဒေါ’’တိ ဝိဿုတော သက္ကော နုသိ၊ အထ သက္ကော ဒေဝရာဇာ အသီတိ အတ္ထော. ဧတ္ထ စ သတိပိ သက္ကဂန္ဓဗ္ဗာနံ ဒေဝဘာဝေ တေသံ ဝိသုံ ဂဟိတတ္တာ ဂေါဗလိဗဒ္ဓဉာယေန တဒညဒေဝဝါစကော ဒေဝသဒ္ဒေါ ဒဋ္ဌဗ္ဗော.

၉၇၈. အထ ဒေဝပုတ္တော ‘‘ဝိဿဇ္ဇနံ နာမ ပုစ္ဆာသဘာဂေန ဟောတီ’’တိ တေဟိ ပုစ္ဆိတံ ဒေဝဂန္ဓဗ္ဗသက္ကဘာဝံ ပဋိက္ခိပိတွာ အတ္တာနံ အာစိက္ခန္တော ‘‘နမှိ ဒေဝေါ န ဂန္ဓဗ္ဗော’’တိအာဒိမာဟ. တတ္ထ နမှိ ဒေဝေါတိ တယာ အာသင်္ကိတော ယော ကောစိ ဒေဝေါ န ဟောမိ န ဂန္ဓဗ္ဗော န သက္ကော၊ အပိစ ခေါ သုဓမ္မာ နာမ ယေ ဒေဝါ၊ တေသံ အညတရော အဟံ၊ သုဓမ္မာ ဒေဝတာ နာမ တာဝတိံသဒေဝနိကာယဿေဝ အညတရဒေဝနိကာယော. သော ကိရ ဥစ္ဆုပါလော တေသံ ဒေဝါနံ သမ္ပတ္တိံ သုတွာ ပဂေဝ တတ္ထ စိတ္တံ ပဏိဓာယ ဌိတောတိ ကေစိ ဝဒန္တိ.

၉၇၉. ပုထုန္တိ မဟန္တံ၊ ပရိပုဏ္ဏံ ကတွာတိ အတ္ထော. သက္ကစ္စကိရိယာဒီပနတ္ထဉှေတံ ဝုတ္တံ.

၉၈၀. သုဓမ္မာဒေဝယာနံ ပုဋ္ဌော ဒေဝပုတ္တော ကကဏ္ဋကနိမိတ္တံ ဝဒန္တော ဝိယ ဒိဋ္ဌမတ္တမေဝ ဂဟေတွာ အတ္တနာ ကတပုညံ အာစိက္ခန္တော ‘‘ဥစ္ဆာဂါရ’’န္တိ ဂါထမာဟ. တတ္ထ တိဏ္ဏံ အညတရံ ဒတွာတိ ယဒိပိ မယာ တီဏိ အဂါရာနိ ဒိန္နာနိ၊ တီသု ပန အညတရေနာတိ အယမတ္ထောပိ သိဇ္ဈတီတိ နယဂ္ဂါဟေန ဒေဝပုတ္တော ဧဝမာဟ. သေသံ သုဝိညေယျမေဝ.

ဧဝံ သော တေန ပုစ္ဆိ တမတ္ထံ ဝိဿဇ္ဇေတွာ ရတနတ္တယဂုဏံ ပကာသေန္တော မာတာပိတူဟိ သဒ္ဓိံ သမ္မောဒနံ ကတွာ ဒေဝလောကမေဝ ဂတော. မနုဿာ ဒေဝပုတ္တဿ ဝစနံ သုတွာ ဘဂဝတိ ဘိက္ခုသံဃေ စ သဉ္ဇာတပသာဒဗဟုမာနာ ဗဟုံ ဒါနူပကရဏံ သဇ္ဇေတွာ သကဋာနံ ပူရေတွာ ဝေဠုဝနံ ဂန္တွာ ဗုဒ္ဓပ္ပမုခဿ ဘိက္ခုသံဃဿ မဟာဒါနံ ဒတွာ သတ္ထု တံ ပဝတ္တိံ အာရောစယိံသု. သတ္ထာ တံ ပုစ္ဆာဝိဿဇ္ဇနံ တထေဝ ဝတွာ တမေဝ အတ္ထံ အဋ္ဌုပ္ပတ္တိံ ကတွာ ဝိတ္ထာရေန ဓမ္မံ ဒေသေတွာ တေ သရဏေသု စ သီလေသု စ ပတိဋ္ဌာပေသိ. တေ စ ပတိဋ္ဌိတသဒ္ဓါ ဘဂဝန္တံ ဝန္ဒိတွာ အတ္တနော ဂါမံ ဥပဂန္တွာ ဥစ္ဆုပါလဿ မတဋ္ဌာနေ ဝိဟာရံ ကာရယိံသူတိ.

တတိယနာဂဝိမာနဝဏ္ဏနာ နိဋ္ဌိတာ.