၅. ကဉ္ဇိကဒါယိကာဝိမာနဝဏ္ဏနာ

အဘိက္ကန္တေန ဝဏ္ဏေနာတိ ကဉ္ဇိကဒါယိကာဝိမာနံ. တဿ ကာ ဥပ္ပတ္တိ? ဘဂဝါ အန္ဓကဝိန္ဒေ ဝိဟရတိ. တေန စ သမယေန ဘဂဝတော ကုစ္ဆိယံ ဝါတရောဂေါ ဥပ္ပဇ္ဇိ. ဘဂဝါ အာယသ္မန္တံ အာနန္ဒံ အာမန္တေသိ ‘‘ဂစ္ဆ တွံ အာနန္ဒ၊ ပိဏ္ဍာယ စရိတွာ မယှံ ဘေသဇ္ဇတ္ထံ ကဉ္ဇိကံ အာဟရာ’’တိ. ‘‘ဧဝံ ဘန္တေ’’တိ ခေါ အာယသ္မာ အာနန္ဒော ဘဂဝတော ပဋိဿုဏိတွာ မဟာရာဇဒတ္တိယံ ပတ္တံ ဂဟေတွာ အတ္တနော ဥပဋ္ဌာကဝေဇ္ဇဿ နိဝေသနဒွါရေ အဋ္ဌာသိ. တံ ဒိသွာ ဝေဇ္ဇဿ ဘရိယာ ပစ္စုဂ္ဂန္တွာ ဝန္ဒိတွာ ပတ္တံ ဂဟေတွာ ထေရံ ပုစ္ဆိ ‘‘ကီဒိသေန ဝေါ၊ ဘန္တေ၊ ဘေသဇ္ဇေန အတ္ထော’’တိ. သာ ကိရ ဗုဒ္ဓိသမ္ပန္နာ ‘‘ဘေသဇ္ဇေန ပယောဇနေ သတိ ထေရော ဣဓာဂစ္ဆတိ၊ န ဘိက္ခတ္ထ’’န္တိ သလ္လက္ခေသိ. ‘‘ကဉ္ဇိကေနာ’’တိ စ ဝုတ္တေ ‘‘န ယိဒံ ဘေသဇ္ဇံ မယှံ အယျဿ၊ တထာ ဟေသ ဘဂဝတော ပတ္တော၊ ဟန္ဒာဟံ လောကနာထဿ အနုစ္ဆဝိကံ ကဉ္ဇိကံ သမ္ပာဒေမီ’’တိ သောမနဿဇာတာ သဉ္ဇာတဗဟုမာနာ ဗဒရယူသေန ယာဂုံ သမ္ပာဒေတွာ ပတ္တံ ပူရေတွာ တဿ ပရိဝါရဘာဝေန အညဉ္စ ဘောဇနံ ပဋိယာဒေတွာ ပေသေသိ. တံ ပရိဘုတ္တမတ္တဿေဝ ဘဂဝတော သော အာဗာဓော ဝူပသမိ. သာ အပရေန သမယေန ကာလံ ကတွာ တာဝတိံသေသု ဥပ္ပဇ္ဇိတွာ မဟတိံ ဒိဗ္ဗသမ္ပတ္တိံ အနုဘဝန္တီ မောဒတိ. အထာယသ္မာ မဟာမောဂ္ဂလ္လာနော ဒေဝစာရိကံ စရန္တော တံ အစ္ဆရာသဟဿပရိဝါရေန ဝိစရန္တိံ ဒိသွာ တာယ ကတကမ္မံ ဣမာဟိ ဂါထာဟိ ပုစ္ဆိ –

၇၁၉. ‘‘အဘိက္ကန္တေန ဝဏ္ဏေန ။ပေ။ ဝဏ္ဏော စ တေ သဗ္ဗဒိသာ ပဘာသတီ’’တိ. –

သာပိ ဗျာကာသိ.

၇၂၁. ‘‘သာ ဒေဝတာ အတ္တမနာ။ပေ။ ယဿ ကမ္မဿိဒံ ဖလံ’’.

၇၂၃. ‘‘အဟံ အန္ဓကဝိန္ဒမှိ၊ ဗုဒ္ဓဿာဒိစ္စဗန္ဓုနော၊

အဒါသိံ ကောလသမ္ပာကံ၊ ကဉ္ဇိကံ တေလဓူပိတံ.

၇၂၄. ‘‘ပိပ္ဖလျာ လသုဏေန စ၊ မိဿံ လာမဉ္ဇကေန စ၊

အဒါသိံ ဥဇုဘူတသ္မိံ၊ ဝိပ္ပသန္နေန စေတသာ.

၇၂၅. ‘‘ယာ မဟေသိတ္တံ ကာရေယျ၊ စက္ကဝတ္တိဿ ရာဇိနော၊

နာရီ သဗ္ဗင်္ဂကလျာဏီ၊ ဘတ္တု စာနောမဒဿိကာ၊

ဧကဿ ကဉ္ဇိကဒါနဿ၊ ကလံ နာဂ္ဃတိ သောဠသိံ.

၇၂၆. ‘‘သတံ နိက္ခာ သတံ အဿာ၊ သတံ အဿတရီရထာ၊

သတံ ကညာသဟဿာနိ၊ အာမုတ္တမဏိကုဏ္ဍလာ၊

ဧကဿ ကဉ္ဇိကဒါနဿ၊ ကလံ နာဂ္ဃန္တိ သောဠသိံ.

၇၂၇. ‘‘သတံ ဟေမဝတာ နာဂါ၊ ဤသာဒန္တာ ဥရူဠှဝါ၊

သုဝဏ္ဏကစ္ဆာ မာတင်္ဂါ၊ ဟေမကပ္ပနဝါသသာ၊

ဧကဿ ကဉ္ဇိကဒါနဿ၊ ကလံ နာဂ္ဃန္တိ သောဠသိံ.

၇၂၈. ‘‘စတုန္နမပိ ဒီပါနံ၊ ဣဿရံ ယောဓ ကာရယေ၊

ဧကဿ ကဉ္ဇိကဒါနဿ၊ ကလံ နာဂ္ဃတိ သောဠသိ’’န္တိ.

၇၂၃-၄. တတ္ထ အဒါသိံ ကောလသမ္ပာပကံ၊ ကဉ္ဇိကံ တေလဓူပိတန္တိ ဗဒရမောဒကကသာဝေ စတုဂုဏောဒကသမောဒိတေ ပါကေန စတုတ္ထဘာဂါဝသိဋ္ဌံ ယာဂုံ ပစိတွာ တံ တိကဋုကအဇမောဒဟိင်္ဂုဇီရကလသုဏာဒီဟိ ကဋုကဘဏ္ဍေဟိ အဘိသင်္ခရိတွာ သုဓူပိတံ ကတွာ လာမဉ္ဇဂန္ဓံ ဂါဟာပေတွာ ပသန္နစိတ္တေန ဘဂဝတော ပတ္တေ အာကိရိတွာ သတ္ထာရံ ဥဒ္ဒိသိတွာ အဒါသိံ၊ ထေရဿ ဟတ္ထေ ပတိဋ္ဌပေသိန္တိ ဒဿေတိ. တေနာဟ –

‘‘ပိပ္ဖလျာ လသုဏေန စ၊ မိဿံ လာမဉ္ဇကေန စ၊

အဒါသိံ ဥဇုဘူတသ္မိံ၊ ဝိပ္ပသန္နေန စေတသာ’’တိ.

သေသံ ဝုတ္တနယမေဝ.

ဧဝံ အာယသ္မာ မဟာမောဂ္ဂလ္လာနော တာယ ဒေဝတာယ အတ္တနာ သမုပစိတသုစရိတကမ္မေ အာဝိကတေ သပရိဝါရာယ တဿာ ဓမ္မံ ဒေသေတွာ မနုဿလောကံ အာဂန္တွာ တံ ပဝတ္တိံ ဘဂဝတော အာရောစေသိ. ဘဂဝါ တမတ္ထံ အဋ္ဌုပ္ပတ္တိံ ကတွာ စတုပရိသမဇ္ဈေ ဓမ္မံ ဒေသေသိ. သာ ဒေသနာ မဟာဇနဿ သာတ္ထိကာ အဟောသီတိ.

ကဉ္ဇိကဒါယိကာဝိမာနဝဏ္ဏနာ နိဋ္ဌိတာ.