၆. ဝိဟာရဝိမာနဝဏ္ဏနာ

အဘိက္ကန္တေန ဝဏ္ဏေနာတိ ဝိဟာရဝိမာနံ. တဿ ကာ ဥပ္ပတ္တိ? ဘဂဝါ သာဝတ္ထိယံ ဝိဟရတိ ဇေတဝနေ. တေန သမယေန ဝိသာခါ မဟာဥပါသိကာ အညတရသ္မိံ ဥဿဝဒိဝသေ ဥယျာနေ ဝိစရဏတ္ထံ သဟာယိကာဟိ ပရိဇနေန စ ဥဿာဟိတာ သုနှာတာနုလိတ္တာ သုဘောဇနံ ဘုဉ္ဇိတွာ မဟာလတာပသာဓနံ ပိဠန္ဓိတွာ ပဉ္စမတ္တေဟိ သဟာယိကာသတေဟိ ပရိဝါရိတာ မဟန္တေန ဣဿရိယေန မဟတာ ပရိစ္ဆေဒေန ဂေဟတော နိက္ခမ္မ ဥယျာနံ ဥဒ္ဒိဿ ဂစ္ဆန္တီ စိန္တေသိ ‘‘ဗာလဒါရိကာယ ဝိယ ကိံ မေ မောဃကီဠိတေန၊ ဟန္ဒာဟံ ဝိဟာရံ ဂန္တွာ ဘဂဝန္တံ မနောဘာဝနီယေ စ အယျေ ဝန္ဒိဿာမိ၊ ဓမ္မဉ္စ သောဿာမီ’’တိ ဝိဟာရံ ဂန္တွာ ဧကမန္တေ ဌတွာ မဟာလတာပိဠန္ဓနံ ဩမုဉ္စိတွာ တံ ဒါသိယာ ဟတ္ထေ ဒတွာ ဘဂဝန္တံ ဝန္ဒိတွာ ဧကမန္တံ နိသီဒိ. တဿာ ဘဂဝါ ဓမ္မံ ဒေသေသိ.

သာ ဓမ္မံ သုတွာ ဘဂဝန္တံ ဝန္ဒိတွာ ပဒက္ခိဏံ ကတွာ မနောဘာဝနီယေ စ ဘိက္ခူ ဝန္ဒိတွာ ဝိဟာရတော နိက္ခမိတွာ ထောကံ ဂန္တွာ ဒါသိံ အာဟ ‘‘ဟန္ဒ ဇေ အာဘရဏံ ပိဠန္ဓိဿာမီ’’တိ. သာ တံ ဘဏ္ဍိကံ ကတွာ ဗန္ဓိတွာ ဝိဟာရေ ဌပေတွာ တဟံ တဟံ ဝိစရိတွာ ဂမနကာလေ ဝိဿရိတွာ ဂတတ္တာ ‘‘ဝိဿရိတံ မယာ၊ တိဋ္ဌ အယျေ အာဟရိဿာမီ’’တိ နိဝတ္တိတုကာမာ အဟောသိ. ဝိသာခါ ‘‘သစေ ဇေ ဝိဟာရေ ဌပေတွာ ဝိဿရိတံ၊ တဿ ဝိဟာရဿေဝ အတ္ထာယ တံ ပရိစ္စဇိဿာမီ’’တိ ဝိဟာရံ ဂန္တွာ ဘဂဝန္တံ ဥပသင်္ကမိတွာ ဝန္ဒိတွာ အတ္တနော အဓိပ္ပါယံ ပဝေဒေန္တီ ‘‘ဝိဟာရံ၊ ဘန္တေ၊ ကာရေဿာမိ၊ အဓိဝါသေတု မေ ဘဂဝါ အနုကမ္ပံ ဥပါဒါယာ’’တိ အာဟ. အဓိဝါသေသိ ဘဂဝါ တုဏှီဘာဝေန.

သာ တံ ပိဠန္ဓနံ သတသဟဿာဓိကနဝကောဋိအဂ္ဃနကံ ဝိဿဇ္ဇေတွာ အာယသ္မတာ မဟာမောဂ္ဂလ္လာနေန နဝကမ္မာဓိဋ္ဌာယကေန သုဝိဘတ္တဘိတ္တိထမ္ဘတုလာဂေါပါနသိကဏ္ဏိကဒွါရဗာဟဝါတပါန သောပါနာဒိဂေဟာဝယဝံ မနောဟရံ သုဝိကပ္ပိတကဋ္ဌကမ္မရမဏီယံ သုပရိကမ္မကတသုဓာကမ္မံ မနုညံ သုဝိရစိတမာလာကမ္မလတာကမ္မာဒိစိတ္တကမ္မဝိစိတ္တံ သုပရိနိဋ္ဌိတမဏိကုဋ္ဋိမ သဒိသဘူမိတလံ ဒေဝဝိမာနသဒိသံ ဟေဋ္ဌာဘူမိယံ ပဉ္စ ဂဗ္ဘသတာနိ၊ ဥပရိဘူမိယံ ပဉ္စ ဂဗ္ဘသတာနီတိ ဂဗ္ဘသဟဿပဋိမဏ္ဍိတံ ဗုဒ္ဓဿ ဘဂဝတော ဘိက္ခုသံဃဿ စ ဝသနာနုစ္ဆဝိကံ မဟန္တံ ပါသာဒံ တဿ ပရိဝါရပါသာဒသဟဿဉ္စ တေသံ ပရိဝါရဘာဝေန ကုဋိမဏ္ဍပစင်္ကမနာဒီနိ စ ကာရေန္တီ နဝဟိ မာသေဟိ ဝိဟာရံ နိဋ္ဌာပေသိ. ပရိနိဋ္ဌိတေ စ ဝိဟာရေ နဝဟေဝ ဟိရညကောဋီဟိ ဝိဟာရမဟံ ကာရေန္တီ ပဉ္စမတ္တေဟိ သဟာယိကာသတေဟိ သဒ္ဓိံ ပါသာဒံ အဘိရုဟိတွာ တဿ သမ္ပတ္တိံ ဒိသွာ သောမနဿဇာတာ သဟာယိကာ အာဟ ‘‘ဣမံ ဧဝရူပံ ပါသာဒံ ကာရေန္တိယာ ယံ မယာ ပုညံ ပသုတံ၊ တံ အနုမောဒထ၊ ပတ္တိဒါနံ ဝေါ ဒမ္မီ’’တိ. ‘‘အဟော သာဓု အဟော သာဓူ’’တိ ပသန္နစိတ္တာ သဗ္ဗာပိ အနုမောဒိံသု.

တတ္ထ အညတရာ ဥပါသိကာ ဝိသေသတော တံ ပတ္တိဒါနံ မနသာကာသိ. သာ န စိရဿေဝ ကာလံ ကတွာ တာဝတိံသေသု နိဗ္ဗတ္တိ. တဿာ ပုညာနုဘာဝေန အနေကကူဋာဂါရပါကာရဥယျာနပေါက္ခရဏိအာဒိပဋိမဏ္ဍိတံ သောဠသယောဇနာယာမဝိတ္ထာရဗ္ဗေဓံ အတ္တနော ပဘာယ ယောဇနသတံ ဖရန္တံ အာကာသစာရိံ မဟန္တံ ဝိမာနံ ပါတုရဟောသိ. သာ ဂစ္ဆန္တီပိ အစ္ဆရာသဟဿပရိဝါရာ သဟ ဝိမာနေန ဂစ္ဆတိ. ဝိသာခါ ပန မဟာဥပါသိကာ ဝိပုလပရိစ္စာဂတာယ သဒ္ဓါသမ္ပတ္တိယာ စ နိမ္မာနရတီသု နိဗ္ဗတ္တိတွာ သုနိမ္မိတဒေဝရာဇဿ အဂ္ဂမဟေသိဘာဝံ သမ္ပာပုဏိ. အထာယသ္မာ အနုရုဒ္ဓေါ ဒေဝစာရိကံ စရန္တော တံ ဝိသာခါယ သဟာယိကံ တာဝတိံသဘဝနေ ဥပ္ပန္နံ ဒိသွာ –

၇၂၉. ‘‘အဘိက္ကန္တေန ဝဏ္ဏေန၊ ယာ တွံ တိဋ္ဌသိ ဒေဝတေ၊

ဩဘာသေန္တီ ဒိသာ သဗ္ဗာ၊ ဩသဓီ ဝိယ တာရကာ.

၇၃၀. ‘‘တဿာ တေ နစ္စမာနာယ၊ အင်္ဂမင်္ဂေဟိ သဗ္ဗသော၊

ဒိဗ္ဗာ သဒ္ဒါ နိစ္ဆရန္တိ၊ သဝနီယာ မနောရမာ.

၇၃၁. ‘‘တဿာ တေ နစ္စမာနာယ၊ အင်္ဂမင်္ဂေဟိ သဗ္ဗသော၊

ဒိဗ္ဗာ ဂန္ဓာ ပဝါယန္တိ၊ သုစိဂန္ဓာ မနောရမာ.

၇၃၂. ‘‘ဝိဝတ္တမာနာ ကာယေန၊ ယာ ဝေဏီသု ပိဠန္ဓနာ၊

တေသံ သုယျတိ နိဂ္ဃေါသော၊ တူရိယေ ပဉ္စင်္ဂိကေ ယထာ.

၇၃၃. ‘‘ဝဋံသကာ ဝါတဓုတာ၊ ဝါတေန သမ္ပကမ္ပိတာ၊

တေသံ သုယျတိ နိဂ္ဃေါသော၊ တူရိယေ ပဉ္စင်္ဂိကေ ယထာ.

၇၃၄. ‘‘ယာပိ တေ သိရသ္မိံ မာလာ၊ သုစိဂန္ဓာ မနောရမာ၊

ဝါတိ ဂန္ဓော ဒိသာ သဗ္ဗာ၊ ရုက္ခော မဉ္ဇူသကော ယထာ.

၇၃၅. ‘‘ဃာယသေ တံ သုစိဂန္ဓံ၊ ရူပံ ပဿသိ အမာနုသံ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ. –

ဣမာဟိ ဂါထာဟိ ပုစ္ဆိ. သာပိ တဿ ဧဝံ ဗျာကာသိ –

၇၃၆. ‘‘သာဝတ္ထိယံ မယှံ သခီ ဘဒန္တေ၊ သံဃဿ ကာရေသိ မဟာဝိဟာရံ၊

တတ္ထပ္ပသန္နာ အဟမာနုမောဒိံ၊ ဒိသွာ အဂါရဉ္စ ပိယဉ္စ မေတံ.

၇၃၇. ‘‘တာယေဝ မေ သုဒ္ဓနုမောဒနာယ၊ လဒ္ဓံ ဝိမာနဗ္ဘုတဒဿနေယျံ၊

သမန္တတော သောဠသယောဇနာနိ၊ ဝေဟာယသံ ဂစ္ဆတိ ဣဒ္ဓိယာ မမ.

၇၃၈. ‘‘ကူဋာဂါရာ နိဝေသာ မေ၊ ဝိဘတ္တာ ဘာဂသော မိတာ၊

ဒဒ္ဒလ္လမာနာ အာဘန္တိ၊ သမန္တာ သတယောဇနံ.

၇၃၉. ‘‘ပေါက္ခရညော စ မေ ဧတ္ထ၊ ပုထုလောမနိသေဝိတာ၊

အစ္ဆောဒကာ ဝိပ္ပသန္နာ၊ သောဏ္ဏဝါလုကသန္ထတာ.

၇၄၀. ‘‘နာနာပဒုမသဉ္ဆန္နာ၊ ပုဏ္ဍရီကသမောတတာ၊

သုရဘီ သမ္ပဝါယန္တိ၊ မနုညာ မာလုတေရိတာ.

၇၄၁. ‘‘ဇမ္ဗုယော ပနသာ တာလာ၊ နာဠိကေရဝနာနိ စ၊

အန္တောနိဝေသနေ ဇာတာ၊ နာနာရုက္ခာ အရောပိမာ.

၇၄၂. ‘‘နာနာတူရိယသင်္ဃုဋ္ဌံ၊ အစ္ဆရာဂဏဃောသိတံ၊

ယောပိ မံ သုပိနေ ပဿေ၊ သောပိ ဝိတ္တော သိယာ နရော.

၇၄၃. ‘‘ဧတာဒိသံ အဗ္ဘုတဒဿနေယျံ၊ ဝိမာနံ သဗ္ဗသော ပဘံ၊

မမ ကမ္မေ ဟိ နိဗ္ဗတ္တံ၊ အလံ ပုညာနိ ကာတဝေ’’တိ.

၇၃၆. တတ္ထ သာဝတ္ထိယံ မယှံ သခီ ဘဒန္တေ၊ သံဃဿ ကာရေသိ မဟာဝိဟာရန္တိ ဘန္တေ အနုရုဒ္ဓ၊ သာဝတ္ထိယာ သမီပေ ပါစီနပဿေ မယှံ မမ သက္ခီ သဟာယိကာ ဝိသာခါ မဟာဥပါသိကာ အာဂတာဂတံ စာတုဒ္ဒိသံ ဘိက္ခုသံဃံ ဥဒ္ဒိဿ နဝဟိရညကောဋိပရိစ္စာဂေန ပုဗ္ဗာရာမံ နာမ မဟန္တံ ဝိဟာရံ ကာရေသိ. တတ္ထပ္ပသန္နာ အဟမာနုမောဒိန္တိ တသ္မိံ ဝိဟာရေ ကတပရိယောသိတေ သံဃဿ နိယျာဒိယမာနေ တာယ ကတေ ပတ္တိဒါနေ ‘‘အဟော ဌာနေ ဝတ ပရိစ္စာဂေါ ကတော’’တိ ပသန္နာ ရတနတ္တယေ ကမ္မဖလေ စ သဉ္ဇာတပသာဒါ အဟံ အနုမောဒိံ. ဝတ္ထုဝသေန တဿာ အနုမောဒနာယ ဥဠာရဘာဝံ ဒဿေတုံ ‘‘ဒိသွာ အဂါရဉ္စ ပိယဉ္စ မေတ’’န္တိ အာဟ. သဟဿဂဗ္ဘံ အတိဝိယ ရမဏီယံ ဒေဝဝိမာနသဒိသံ တဉ္စ အဂါရံ မဟန္တံ ပါသာဒံ ပိယဉ္စ မေ ဗုဒ္ဓပ္ပမုခံ သံဃံ ဥဒ္ဒိဿ တာဒိသံ မဟန္တံ ဓနပရိစ္စာဂံ ဒိသွာ အနုမောဒိန္တိ ယောဇနာ.

၇၃၇. တာယေဝ မေ သုဒ္ဓနုမောဒနာယာတိ ယထာဝုတ္တာယ ဒေယျဓမ္မပရိစ္စာဂါဘာဝေန သုဒ္ဓါယ ကေဝလာယ အနုမောဒနာယေဝ. လဒ္ဓံ ဝိမာနဗ္ဘုတဒဿနေယျန္တိ မယှံ ပုဗ္ဗေ ဤဒိသဿ အဘူတပုဗ္ဗတာယ အဗ္ဘုတံ သမန္တဘဒ္ဒကဘာဝေန အတိဝိယ သုရူပတာယ စ ဒဿနေယျံ ဣမံ ဝိမာနံ လဒ္ဓံ အဓိဂတံ. ဧဝံ တဿ ဝိမာနဿ အဘိရူပတံ ဒဿေတွာ ဣဒါနိ ပမာဏမဟတ္တံ ပဘာဝမဟတ္တံ ဥပဘောဂဝတ္ထုမဟတ္တဉ္စ ဒဿေတုံ ‘‘သမန္တတော သောဠသယောဇနာနီ’’တိအာဒိ ဝုတ္တံ. တတ္ထ ဣဒ္ဓိယာ မမာတိ မမ ပုညိဒ္ဓိယာ.

၇၃၉. ပေါက္ခရညောတိ ပေါက္ခရဏိယော. ပုထုလောမနိသေဝိတာတိ ဒိဗ္ဗမစ္ဆေဟိ ဥပသေဝိတာ.

၇၄၀. နာနာပဒုမသဉ္ဆန္နာတိ သတပတ္တသဟဿပတ္တာဒိဘေဒေဟိ နာနာဝိဓေဟိ ရတ္တပဒုမေဟိ ရတ္တကမလေဟိ စ သဉ္ဆာဒိတာ. ပုဏ္ဍရီကသမောတတာတိ နာနာဝိဓေဟိ သေတကမလေဟိ သမန္တတော အဝတတာ၊ နာနာရုက္ခာ အရောပိမာ သုရဘီ သမ္ပဝါယန္တီတိ ယောဇနာ.

၇၄၂. သောပီတိ သော သုပိနဒဿာဝီပိ. ဝိတ္တောတိ တုဋ္ဌော.

၇၄၃. သဗ္ဗသော ပဘန္တိ သမန္တတော ဩဘာသမာနံ. ကမ္မေ ဟီတိ ကမ္မနိမိတ္တံ. ဟီတိ နိပါတမတ္တံ. စေတနာနံ ဝါ အပရာပရုပ္ပတ္တိယာ ဗဟုဘာဝတော ‘‘ကမ္မေဟီ’’တိ ဝုတ္တံ. အလန္တိ ယုတ္တံ. ကာတဝေတိ ကာတုံ.

ဣဒါနိ ထေရော ဝိသာခါယ နိဗ္ဗတ္တဋ္ဌာနံ ကထာပေတုကာမော ဣမံ ဂါထမာဟ –

၇၄၄. ‘‘တာယေဝ တေ သုဒ္ဓနုမောဒနာယ၊

လဒ္ဓံ ဝိမာနဗ္ဘုတဒဿနေယျံ၊

ယာ စေဝ သာ ဒါနမဒါသိ နာရီ၊

တဿာ ဂတိံ ဗြူဟိ ကုဟိံ ဥပ္ပန္နာ သာ’’တိ.

၇၄၄. တတ္ထ ယာ စေဝ သာ ဒါနမဒါသိ နာရီတိ ယဿ ဒါနဿ အနုမောဒနာယ တွံ ဤဒိသံ သမ္ပတ္တိံ ပဋိလဘိ၊ တံ ဒါနံ ယာ စေဝ သာ နာရီ အဒါသီတိ ဝိသာခံ မဟာဥပါသိကံ သန္ဓာယ ဝဒတိ. တာယ ဧဝ ဒေဝတာယ တဿာ သမ္ပတ္တိံ ကထာပေတုကာမော အာဟ ‘‘တဿာ ဂတိံ ဗြူဟိ ကုဟိံ ဥပ္ပန္နာ သာ’’တိ. တဿာ ဂတိန္တိ တာယ နိဗ္ဗတ္တဒေဝဂတိံ.

ဣဒါနိ ထေရေန ပုစ္ဆိတမတ္ထံ ဒဿေန္တီ အာဟ –

၇၄၅. ‘‘ယာ သာ အဟု မယှံ သခီ ဘဒန္တေ၊ သံဃဿ ကာရေသိ မဟာဝိဟာရံ၊

ဝိညာတဓမ္မာ သာ အဒါသိ ဒါနံ၊ ဥပ္ပန္နာ နိမ္မာနရတီသု ဒေဝေသု.

၇၄၆. ‘‘ပဇာပတီ တဿ သုနိမ္မိတဿ၊

အစိန္တိယော ကမ္မဝိပါက တဿာ၊

ယမေတံ ပုစ္ဆသိ ‘ကုဟိံ ဥပ္ပန္နာ သာ’တိ၊

တံ တေ ဝိယာကာသိံ အနညထာ အဟ’’န္တိ.

၇၄၅. တတ္ထ ဝိညာတဓမ္မာတိ ဝိညာတသာသနဓမ္မာ၊ ပဋိဝိဒ္ဓစတုသစ္စဓမ္မာတိ အတ္ထော.

၇၄၆. သုနိမ္မိတဿာတိ သုနိမ္မိတဿ ဒေဝရာဇဿ. အစိန္တိယော ကမ္မဝိပါက တဿာတိ ဝိဘတ္တိလောပံ ကတွာ နိဒ္ဒေသော၊ တဿာ မမ သခိယာ နိဗ္ဗာနရတီသု နိဗ္ဗတ္တာယ ကမ္မဝိပါကော ပုညကမ္မဿ ဝိပါကဘူတာ ဒိဗ္ဗသမ္ပတ္တိ အစိန္တိယာ အပ္ပမေယျာတိ အတ္ထော. အနညထာတိ အဝိပရီတံ ယထာသဘာဝတော. ကထံ ပနာယံ တဿာ သမ္ပတ္တိံ အညာသီတိ? သုဘဒ္ဒါ ဝိယ ဘဒ္ဒါယ၊ ဝိသာခါပိ ဒေဝဓီတာ ဣမိဿာ သန္တိကံ အဂမာသိ.

ဣဒါနိ ဒေဝဓီတာ ထေရံ အညေသမ္ပိ ဒါနသမာဒပနေ နိယောဇေန္တီ ဣမာဟိ ဂါထာဟိ ဓမ္မံ ဒေသေသိ –

၇၄၇. ‘‘တေနဟညေပိ သမာဒပေထ၊ သံဃဿ ဒါနာနိ ဒဒါထ ဝိတ္တာ၊

ဓမ္မဉ္စ သုဏာထ ပသန္နမာနသာ၊ သုဒုလ္လဘော လဒ္ဓေါ မနုဿလာဘော.

၇၄၈. ‘‘ယံ မဂ္ဂံ မဂ္ဂါဓိပတီ အဒေသယိ၊ ဗြဟ္မဿရော ကဉ္စနသန္နိဘတ္တစော၊

သံဃဿ ဒါနာနိ ဒဒါထ ဝိတ္တာ၊ မဟပ္ဖလာ ယတ္ထ ဘဝန္တိ ဒက္ခိဏာ.

၇၄၉. ‘‘ယေ ပုဂ္ဂလာ အဋ္ဌ သတံ ပသတ္ထာ၊ စတ္တာရိ ဧတာနိ ယုဂါနိ ဟောန္တိ၊

တေ ဒက္ခိဏေယျာ သုဂတဿ သာဝကာ၊ ဧတေသု ဒိန္နာနိ မဟပ္ဖလာနိ.

၇၅၀. ‘‘စတ္တာရော စ ပဋိပန္နာ၊ စတ္တာရော စ ဖလေ ဌိတာ၊

ဧသ သံဃော ဥဇုဘူတော၊ ပညာသီလသမာဟိတော.

၇၅၁. ‘‘ယဇမာနာနံ မနုဿာနံ၊ ပုညပေက္ခာန ပါဏိနံ၊

ကရောတံ ဩပဓိကံ ပုညံ၊ သံဃေ ဒိန္နံ မဟပ္ဖလံ.

၇၅၂. ‘‘ဧသော ဟိ သံဃော ဝိပုလော မဟဂ္ဂတော၊ ဧသပ္ပမေယျော ဥဒဓီဝ သာဂရော၊

ဧတေ ဟိ သေဋ္ဌာ နရဝီရသာဝကာ၊ ပဘင်္ကရာ ဓမ္မမုဒီရယန္တိ.

၇၅၃. ‘‘တေသံ သုဒိန္နံ သုဟုတံ သုယိဋ္ဌံ၊ ယေ သံဃမုဒ္ဒိဿ ဒဒန္တိ ဒါနံ၊

သာ ဒက္ခိဏာ သံဃဂတာ ပတိဋ္ဌိတာ၊ မဟပ္ဖလာ လောကဝိဒူန ဝဏ္ဏိတာ.

၇၅၄. ‘‘ဧတာဒိသံ ယညမနုဿရန္တာ၊ ယေ ဝေဒဇာတာ ဝိစရန္တိ လောကေ၊

ဝိနေယျ မစ္ဆေရမလံ သမူလံ၊ အနိန္ဒိတာ သဂ္ဂမုပေန္တိ ဌာန’’န္တိ.

၇၄၇. တတ္ထ တေနဟညေပီတိ တေနဟိ အညေပိ. တေနာတိ စ တေန ကာရဏေန၊ ဟီတိ နိပါတမတ္တံ. ‘‘သမာဒပေထာ’’တိ ဝတွာ သမာဒပနာကာရံ ဒဿေတုံ ‘‘သံဃဿ ဒါနာနိ ဒဒါထာ’’တိအာဒိ ဝုတ္တံ. အဋ္ဌဟိ အက္ခဏေဟိ ဝဇ္ဇိတံ မနုဿဘာဝံ သန္ဓာယာဟ ‘‘သုဒုလ္လဘော လဒ္ဓေါ မနုဿလာဘော’’တိ. တတ္ထ အဋ္ဌ အက္ခဏာ နာမ တယော အပါယာ အရူပါ အသညသတ္တာ ပစ္စန္တဒေသော ဣန္ဒြိယာနံ ဝေကလ္လံ နိယတမိစ္ဆာဒိဋ္ဌိကတာ အပါတုဘာဝေါ ဗုဒ္ဓဿာတိ.

၇၄၈. ယံ မဂ္ဂန္တိ ယံ ခေတ္တဝိသေသေ ကတံ ဒါနံ၊ တံ ဧကန္တေန သုဂတိသမ္ပာပနတော သုဂတိဂါမိမဂ္ဂံ အပါယမဂ္ဂတော ဇဂ္ဃမဂ္ဂါဒိတော စ အတိဝိယ သေဋ္ဌဘာဝေန မဂ္ဂါဓိပန္တိ ကတွာ. ဒါနမ္ပိ ဟိ သဒ္ဓါဟိရိယော ဝိယ ‘‘ဒေဝလောကဂါမိမဂ္ဂေါ’’တိ ဝုစ္စတိ. ယထာဟ –

‘‘သဒ္ဓါ ဟိရိယံ ကုသလဉ္စ ဒါနံ၊ ဓမ္မာ ဧတေ သပ္ပုရိသာနုယာတာ၊

ဧတဉှိ မဂ္ဂံ ဒိဝိယံ ဝဒန္တိ၊ ဧတေန ဟိ ဂစ္ဆတိ ဒေဝလောက’’န္တိ.(အ. နိ. ၈.၃၂၊ ကထာ. ၄၈၀)၊

‘‘မဂ္ဂါဓိပတီ’’တိ ဝါ ပါဌော၊ တဿ အရိယမဂ္ဂေန သဒေဝကဿ လောကဿ အဓိပတိဘူတော သတ္ထာတိ အတ္ထော ဒဋ္ဌဗ္ဗော. သံဃဿ ဒါနာနိ ဒဒါထာတိအာဒိနာ ပုနပိ ဒက္ခိဏေယျေသု ဒါနသံဝိဘာဂေ နိယောဇေန္တီ အာဟ.

၇၄၉. ဣဒါနိ တံ ဒက္ခိဏေယျံ အရိယသံဃံ သရူပတော ဒဿေန္တီ ‘‘ယေ ပုဂ္ဂလာ အဋ္ဌ သတံ ပသတ္ထာ’’တိ ဂါထမာဟ. တတ္ထ ယေတိ အနိယမိတနိဒ္ဒေသော. ပုဂ္ဂလာတိ သတ္တာ. အဋ္ဌာတိ တေသံ ဂဏနပရိစ္ဆေဒေါ. တေ ဟိ စတ္တာရော စ ပဋိပန္နာ စတ္တာရော စ ဖလေ ဌိတာတိ အဋ္ဌ ဟောန္တိ. သတံ ပသတ္ထာတိ သပ္ပုရိသေဟိ ဗုဒ္ဓပစ္စေကဗုဒ္ဓသာဝကေဟိ အညေဟိ စ ဒေဝမနုဿေဟိ ပဿတ္ထာ. ကသ္မာ? သဟဇာတသီလာဒိဂုဏယောဂတော. တေသဉှိ စမ္ပကဗကုလကုသုမာဒီနံ ဝိယ သဟဇာတဝဏ္ဏဂန္ဓာဒယော သဟဇာတသီလသမာဓိအာဒယော ဂုဏာ၊ တေန တေ ဝဏ္ဏဂန္ဓာဒိသမ္ပန္နာနိ ဝိယ ပုပ္ဖါနိ ဒေဝမနုဿာနံ သတံ ပိယာ မနာပါ ပါသံသိယာ စ ဟောန္တိ. တေန ဝုတ္တံ ‘‘ယေ ပုဂ္ဂလာ အဋ္ဌ သတံ ပသတ္ထာ’’တိ. တေ ပန သင်္ခေပတော သောတာပတ္တိမဂ္ဂဋ္ဌော ဖလဋ္ဌောတိ ဧကံ ယုဂံ၊ ဧဝံ ယာဝ အရဟတ္တမဂ္ဂဋ္ဌော ဖလဋ္ဌောတိ ဧကံ ယုဂန္တိ စတ္တာရိ ယုဂါနိ ဟောန္တိ. တေနာဟ ‘‘စတ္တာရိ ဧတာနိ ယုဂါနိ ဟောန္တိ တေ ဒက္ခိဏေယျာ’’တိ. တေတိ ပုဗ္ဗေ အနိယမတော ဥဒ္ဒိဋ္ဌာနံ နိယမေတွာ ဒဿနံ. တေ ဟိ သဗ္ဗေပိ ကမ္မံ ကမ္မဖလဉ္စ သဒ္ဒဟိတွာ ဒါတဗ္ဗဒေယျဓမ္မသင်္ခါတံ ဒက္ခိဏံ အရဟန္တီတိ ဒက္ခိဏေယျာ ဂုဏဝိသေသယောဂေန ဒါနဿ မဟပ္ဖလဘာဝသာဓနတော. သုဂတဿ သာဝကာတိ သမ္မာသမ္ဗုဒ္ဓဿ ဓမ္မသဝနန္တေ အရိယာယ ဇာတိယာ ဇာတတာယ တံ ဓမ္မံ သုဏန္တီတိ သာဝကာ. ဧတေသု ဒိန္နာနိ မဟပ္ဖလာနီတိ ဧတေသု သုဂတဿ သာဝကေသု အပ္ပကာနိပိ ဒါနာနိ ဒိန္နာနိ ပဋိဂ္ဂါဟကတော ဒက္ခိဏာဝိသုဒ္ဓိယာ မဟပ္ဖလာနိ ဟောန္တိ. တေနာဟ ဘဂဝါ ‘‘ယာဝတာ၊ ဘိက္ခဝေ၊ သံဃာ ဝါ ဂဏာ ဝါ၊ တထာဂတသာဝကသံဃော တေသံ အဂ္ဂမက္ခာယတီ’’တိအာဒိ (အ. နိ. ၄.၃၄၊ ၅.၃၂၊ ဣတိဝု. ၉၀).

၇၅၀. စတ္တာရော စ ပဋိပန္နာတိအာဒိ ဟေဋ္ဌာ ဝုတ္တတ္ထမေဝ.

ဣဓ ပန အာယသ္မာ အနုရုဒ္ဓေါ အတ္တနာ ဒေဝတာယ စ ဝုတ္တမတ္ထံ မနုဿလောကံ အာဂန္တွာ ဘဂဝတော အာရောစေသိ. ဘဂဝါ တမတ္ထံ အဋ္ဌုပ္ပတ္တိံ ကတွာ သမ္ပတ္တပရိသာယ ဓမ္မံ ဒေသေသိ. သာ ဒေသနာ မဟာဇနဿ သာတ္ထိကာ အဟောသီတိ.

ဝိဟာရဝိမာနဝဏ္ဏနာ နိဋ္ဌိတာ.