၉. ဒီပဝိမာနဝဏ္ဏနာ

အဘိက္ကန္တေန ဝဏ္ဏေနာတိ ဒီပဝိမာနံ. တဿ ကာ ဥပ္ပတ္တိ? ဘဂဝတိ သာဝတ္ထိယံ ဝိဟရန္တေ ဥပေါသထဒိဝသေ သမ္ဗဟုလာ ဥပါသကာ ဥပေါသထိကာ ဟုတွာ ပုရေဘတ္တံ ယထာဝိဘဝံ ဒါနံ ဒတွာ ကာလဿေဝ ဘုဉ္ဇိတွာ သုဒ္ဓဝတ္ထနိဝတ္ထာ သုဒ္ဓုတ္တရာသင်္ဂါ ဂန္ဓမာလာဒိဟတ္ထာ ပစ္ဆာဘတ္တံ ဝိဟာရံ ဂန္တွာ မနောဘာဝနီယေ ဘိက္ခူ ပယိရုပါသိတွာ သာယနှေ ဓမ္မံ သုဏန္တိ. ဝိဟာရေယေဝ ဝသိတုကာမာနံ တေသံ ဓမ္မံ သုဏန္တာနံယေဝ သူရိယော အတ္ထင်္ဂတော၊ အန္ဓကာရော ဇာတော. တတ္ထေကာ အညတရာ ဣတ္ထီ ‘‘ဣဒါနိ ဒီပါလောကံ ကာတုံ ယုတ္တ’’န္တိ စိန္တေတွာ အတ္တနော ဂေဟတော ပဒီပေယျံ အာဟရာပေတွာ ပဒီပံ ဥဇ္ဇာလေတွာ ဓမ္မာသနဿ ပုရတော ဌပေတွာ ဓမ္မံ သုဏိ. သာ တေန ပဒီပဒါနေန အတ္တမနာ ပီတိသောမနဿဇာတာ ဟုတွာ ဝန္ဒိတွာ အတ္တနော ဂေဟံ ဂတာ. သာ အပရဘာဂေ ကာလံ ကတွာ တာဝတိံသဘဝနေ ဇောတိရသဝိမာနေ နိဗ္ဗတ္တိ. သရီရသောဘာ ပနဿာ အတိဝိယ ပဘဿရာ အညေ ဒေဝေ အဘိဘဝိတွာ ဒသ ဒိသာ ဩဘာသယမာနာ တိဋ္ဌတိ. အထေကဒိဝသံ အာယသ္မာ မဟာမောဂ္ဂလ္လာနော ဒေဝစာရိကံ စရန္တောတိ သဗ္ဗံ ဟေဋ္ဌာ အာဂတနယေနေဝ ဝေဒိတဗ္ဗံ. ဣဓ ပန –

၇၅. ‘‘အဘိက္ကန္တေန ဝဏ္ဏေန၊ ယာ တွံ တိဋ္ဌသိ ဒေဝတေ၊

ဩဘာသေန္တီ ဒိသာ သဗ္ဗာ၊ ဩသဓီ ဝိယ တာရကာ.

၇၆. ‘‘ကေန တေတာဒိသော ဝဏ္ဏော၊ ကေန တေ ဣဓ မိဇ္ဈတိ၊

ဥပ္ပဇ္ဇန္တိ စ တေ ဘောဂါ၊ ယေ ကေစိ မနသော ပိယာ.

၇၇. ‘‘ကေန တွံ ဝိမလောဘာသာ၊ အတိရောစသိ ဒေဝတာ၊

ကေန တေ သဗ္ဗဂတ္တေဟိ၊ သဗ္ဗာ ဩဘာသတေ ဒိသာ.

၇၈. ‘‘ပုစ္ဆာမိ တံ ဒေဝိ မဟာနုဘာဝေ၊ မနုဿဘူတာ ကိမကာသိ ပုညံ၊

ကေနာသိ ဧဝံ ဇလိတာနုဘာဝါ၊ ဝဏ္ဏော စ တေ သဗ္ဗဒိသာ ပဘာသတီ’’တိ. –

စတူဟိ ဂါထာဟိ ပုစ္ဆိ.

၇၉. ‘‘သာ ဒေဝတာ အတ္တမနာ၊ မောဂ္ဂလ္လာနေန ပုစ္ဆိတာ၊

ပဉှံ ပုဋ္ဌာ ဝိယာကာသိ၊ ယဿ ကမ္မဿိဒံ ဖလံ’’.

၈၀. ‘‘အဟံ မနုဿေသု မနုဿဘူတာ၊ ပုရိမာယ ဇာတိယာ မနုဿလောကေ၊

တမန္ဓကာရမှိ တိမီသိကာယံ၊ ပဒီပကာလမှိ အဒါသိ ဒီပံ.

၈၁. ‘‘ယော အန္ဓကာရမှိ တိမီသိကာယံ၊ ပဒီပကာလမှိ ဒဒါတိ ဒီပံ၊

ဥပ္ပဇ္ဇတိ ဇောတိရသံ ဝိမာနံ၊ ပဟူတမလျံ ဗဟုပုဏ္ဍရီကံ.

၈၂. ‘‘တေန မေတာဒိသော ဝဏ္ဏော၊ တေန မေ ဣဓ မိဇ္ဈတိ၊

ဥပ္ပဇ္ဇန္တိ စ မေ ဘောဂါ၊ ယေ ကေစိ မနသော ပိယာ.

၈၃. ‘‘တေနာဟံ ဝိမလောဘာသာ၊ အတိရောစာမိ ဒေဝတာ၊

တေန မေ သဗ္ဗဂတ္တေဟိ၊ သဗ္ဗာ ဩဘာသတေ ဒိသာ.

၈၄. ‘‘အက္ခာမိ တေ ဘိက္ခု မဟာနုဘာဝ၊ မနုဿဘူတာ ယမကာသိ ပုညံ၊

တေနမှိ ဧဝံ ဇလိတာနုဘာဝါ၊ ဝဏ္ဏော စ မေ သဗ္ဗဒိသာ ပဘာသတီ’’တိ. –

ဝိဿဇ္ဇေသိ.

၇၅. တတ္ထ အဘိက္ကန္တေန ဝဏ္ဏေနာတိ ဧတ္ထ အဘိက္ကန္တ-သဒ္ဒေါ ‘‘အဘိက္ကန္တာ၊ ဘန္တေ၊ ရတ္တိ၊ နိက္ခန္တော ပဌမော ယာမော’’တိအာဒီသု (အ. နိ. ၈.၂၀၊ ဥဒါ. ၄၅၊ စူဠဝ. ၃၈၃) ခယေ အာဂတော. ‘‘အယံ ဣမေသံ စတုန္နံ ပုဂ္ဂလာနံ အဘိက္ကန္တတရော စ ပဏီတတရော စာ’’တိအာဒီသု (အ. နိ. ၄.၁၀၀) သုန္ဒရေ. ‘‘အဘိက္ကန္တံ၊ ဘန္တေ၊ အဘိက္ကန္တံ၊ ဘန္တေ’’တိအာဒီသု (ဒီ. နိ. ၁.၂၅၀၊ ပါရာ. ၁၅) အဗ္ဘနုမောဒနေ. ‘‘အဘိက္ကန္တေန ဝဏ္ဏေန၊ သဗ္ဗာ ဩဘာသယံ ဒိသာ’’တိအာဒီသု (ဝိ. ဝ. ၈၅၇) အဘိရူပေ. ဣဓာပိ အဘိရူပေ ဧဝ ဒဋ္ဌဗ္ဗော. တသ္မာ အဘိက္ကန္တေနာတိ အတိကန္တေန အတိမနာပေန၊ အဘိရူပေနာတိ အတ္ထော. ဝဏ္ဏေနာတိ ဆဝိဝဏ္ဏေန. ဩဘာသေန္တီ ဒိသာ သဗ္ဗာတိ သဗ္ဗာပိ ဒသ ဒိသာ ဇောတေန္တီ ဧကာလောကံ ကရောန္တီ. ကိံ ဝိယာတိ အာဟ ‘‘ဩသဓီ ဝိယ တာရကာ’’တိ. ဥဿန္နာ ပဘာ ဧတာယ ဓီယတိ၊ ဩသဓီနံ ဝါ အနုဗလပ္ပဒါယိကာတိ ကတွာ ‘‘ဩသဓီ’’တိ လဒ္ဓနာမာ တာရကာ ယထာ သမန္တတော အာလောကံ ကုရုမာနာ တိဋ္ဌတိ၊ ဧဝမေဝ တွံ သဗ္ဗာ ဒိသာ ဩဘာသယန္တီ တိဋ္ဌသီတိ.

၇၇. သဗ္ဗဂတ္တေဟီတိ သဗ္ဗေဟိ သရီရာဝယဝေဟိ၊ သကလေဟိ အင်္ဂပစ္စင်္ဂေဟိ ဩဘာသတီတိ အဓိပ္ပါယော၊ ဟေတုမှိ စေတံ ကရဏဝစနံ. သဗ္ဗာ ဩဘာသတေ ဒိသာတိ သဗ္ဗာပိ ဒသဒိသာ ဝိဇ္ဇောတတိ. ‘‘ဩဘာသရေ’’တိပိ ပဌန္တိ၊ တေသံ သဗ္ဗာ ဒိသာတိ ဗဟုဝစနမေဝ ဒဋ္ဌဗ္ဗံ.

၈၁. ပဒီပကာလမှီတိ ပဒီပကရဏကာလေ၊ ပဒီပုဇ္ဇလနယောဂ္ဂေ အန္ဓကာရေတိ အတ္ထော. တေနာဟ ‘‘ယော အန္ဓကာရမှိ တိမီသိကာယ’’န္တိ၊ ဗဟလေ မဟန္ဓကာရေတိ အတ္ထော. ဒဒါတိ ဒီပန္တိ ပဒီပံ ဥဇ္ဇာလေန္တော ဝါ အနုဇ္ဇာလေန္တော ဝါ ပဒီပဒါနံ ဒဒါတိ၊ ပဒီပေါပကရဏာနိ ဒက္ခိဏေယျေ ဥဒ္ဒိဿ ပရိစ္စဇတိ. ဥပပဇ္ဇတိ ဇောတိရသံ ဝိမာနန္တိ ပဋိသန္ဓိဂ္ဂဟဏဝသေန ဇောတိရသံ ဝိမာနံ ဥပဂစ္ဆတီတိ. သေသံ ဝုတ္တနယမေဝ.

အထ ယထာပုစ္ဆိတေ အတ္ထေ ဒေဝတာယ ကထိတေ ထေရော တမေဝ ကထံ အဋ္ဌုပ္ပတ္တိံ ကတွာ ဒါနာဒိကထာယ တဿာ ကလ္လစိတ္တာဒိဘာဝံ ဉတွာ သစ္စာနိ ပကာသေသိ၊ သစ္စပရိယောသာနေ သပရိဝါရာ သာ ဒေဝတာ သောတာပတ္တိဖလေ ပတိဋ္ဌဟိ. ထေရော တတော အာဂန္တွာ တံ ပဝတ္တိံ ဘဂဝတော အာရောစေသိ၊ ဘဂဝါ တသ္မိံ ဝတ္ထုသ္မိံ သမ္ပတ္တပရိသာယ ဝိတ္ထာရေန ဓမ္မံ ဒေသေသိ. သာ ဒေသနာ မဟာဇနဿ သာတ္ထိကာ ဇာတာ၊ မဟာဇနော ဝိသေသတော ဒီပဒါနေ သက္ကစ္စကာရီ အဟောသီတိ.

ဒီပဝိမာနဝဏ္ဏနာ နိဋ္ဌိတာ.