၄. ယက္ခပဟာရသုတ္တဝဏ္ဏနာ

၃၄. စတုတ္ထေ ကပေါတကန္ဒရာယန္တိ ဧဝံနာမကေ ဝိဟာရေ. တသ္မိံ ကိရ ပဗ္ဗတကန္ဒရေ ပုဗ္ဗေ ဗဟူ ကပေါတာ ဝသိံသု၊ တေန သာ ပဗ္ဗတကန္ဒရာ ‘‘ကပေါတကန္ဒရာ’’တိ ဝုစ္စတိ. အပရဘာဂေ တတ္ထ ကတဝိဟာရောပိ ‘‘ကပေါတကန္ဒရာ’’တွေဝ ပညာယိတ္ထ. တေန ဝုတ္တံ – ‘‘ကပေါတကန္ဒရာယန္တိ ဧဝံနာမကေ ဝိဟာရေ’’တိ. ဇုဏှာယ ရတ္တိယာတိ သုက္ကပက္ခရတ္တိယံ. နဝေါရောပိတေဟိ ကေသေဟီတိ အစိရဩဟာရိတေဟိ ကေသေဟိ၊ ဣတ္ထမ္ဘူတလက္ခဏေ စေတံ ကရဏဝစနံ. အဗ္ဘောကာသေတိ ယတ္ထ ဥပရိစ္ဆဒနံ ပရိက္ခေပေါ ဝါ နတ္ထိ၊ တာဒိသေ အာကာသင်္ဂဏေ.

တတ္ထ အာယသ္မာ သာရိပုတ္တော သုဝဏ္ဏဝဏ္ဏော၊ အာယသ္မာ မဟာမောဂ္ဂလ္လာနော နီလုပ္ပလဝဏ္ဏော. ဥဘောပိ ပန တေ မဟာထေရာ ဥဒိစ္စဗြာဟ္မဏဇစ္စာ ကပ္ပါနံ သတသဟဿာဓိကံ ဧကံ အသင်္ချေယျံ အဘိနီဟာရသမ္ပန္နာ ဆဠဘိညာပဋိသမ္ဘိဒါပ္ပတ္တာ မဟာခီဏာသဝါ သမာပတ္တိလာဘိနော သတ္တသဋ္ဌိယာ သာဝကပါရမိဉာဏာနံ မတ္ထကပ္ပတ္တာ ဧတံ ကပေါတကန္ဒရဝိဟာရံ ဥပသောဘယန္တာ ဧကံ ကနကဂုဟံ ပဝိဋ္ဌာ ဒွေ သီဟာ ဝိယ၊ ဧကံ ဝိဇမ္ဘနဘူမိံ ဩတိဏ္ဏာ ဒွေ ဗျဂ္ဃါ ဝိယ၊ ဧကံ သုပုပ္ဖိတသာလဝနံ ပဝိဋ္ဌာ ဒွေ ဆဒ္ဒန္တနာဂရာဇာနော ဝိယ၊ ဧကံ သိမ္ဗလိဝနံ ပဝိဋ္ဌာ ဒွေ သုပဏ္ဏရာဇာနော ဝိယ၊ ဧကံ နရဝါဟနယာနံ အဘိရုဠှာ ဒွေ ဝေဿဝဏာ ဝိယ၊ ဧကံ ပဏ္ဍုကမ္ဗလသိလာသနံ အဘိနိသိန္နာ ဒွေ သက္ကာ ဝိယ၊ ဧကဝိမာနဗ္ဘန္တရဂတာ ဒွေ မဟာဗြဟ္မာနော ဝိယ၊ ဧကသ္မိံ ဂဂနဋ္ဌာနေ ဌိတာနိ ဒွေ စန္ဒမဏ္ဍလာနိ ဝိယ၊ ဒွေ သူရိယမဏ္ဍလာနိ ဝိယ စ ဝိရောစိံသု. တေသု အာယသ္မာ မဟာမောဂ္ဂလ္လာနော တုဏှီ နိသီဒိ၊ အာယသ္မာ ပန သာရိပုတ္တော သမာပဇ္ဇိ. တေန ဝုတ္တံ – ‘‘အညတရံ သမာဓိံ သမာပဇ္ဇိတွာ’’တိ.

တတ္ထ အညတရံ သမာဓိန္တိ ဥပေက္ခာဗြဟ္မဝိဟာရသမာပတ္တိံ. ကေစိ ‘‘သညာဝေဒယိတနိရောဓသမာပတ္တိ’’န္တိ ဝဒန္တိ၊ အပရေ ပနာဟု ‘‘အာရုပ္ပပါဒကံ ဖလသမာပတ္တိ’’န္တိ. ဣမာ ဧဝ ဟိ တိဿော ကာယရက္ခဏသမတ္ထာ သမာပတ္တိယော. တတ္ထ နိရောဓသမာပတ္တိယာ သမာဓိပရိယာယသမ္ဘဝေါ ဟေဋ္ဌာ ဝုတ္တောဝ၊ ပစ္ဆိမံယေဝ ပန အာစရိယာ ဝဏ္ဏေန္တိ. ဥတ္တရာယ ဒိသာယ ဒက္ခိဏံ ဒိသံ ဂစ္ဆန္တီတိ ဥတ္တရာယ ဒိသာယ ယက္ခသမာဂမံ ဂန္တွာ အတ္တနော ဘဝနံ ဂန္တုံ ဒက္ခိဏံ ဒိသံ ဂစ္ဆန္တိ. ပဋိဘာတိ မန္တိ ဥပဋ္ဌာတိ မမ. မန္တိ ဟိ ပဋိသဒ္ဒယောဂေန သာမိအတ္ထေ ဥပယောဂဝစနံ၊ ဣမဿ သီသေ ပဟာရံ ဒါတုံ စိတ္တံ မေ ဥပ္ပဇ္ဇတီတိ အတ္ထော. သော ကိရ ပုရိမဇာတိယံ ထေရေ ဗဒ္ဓါဃာတော၊ တေနဿ ထေရံ ဒိသွာ ပဒုဋ္ဌစိတ္တဿ ဧဝံ အဟောသိ. ဣတရော ပန သပ္ပညဇာတိကော၊ တသ္မာ တံ ပဋိသေဓေန္တော ‘‘အလံ သမ္မာ’’တိအာဒိမာဟ. တတ္ထ မာ အာသာဒေသီတိ မာ ဃဋ္ဋေသိ၊ မာ ပဟာရံ ဒေဟီတိ ဝုတ္တံ ဟောတိ. ဥဠာရောတိ ဥဠာရေဟိ ဥတ္တမေဟိ သီလာဒိဂုဏေဟိ သမန္နာဂတော.

အနာဒိယိတွာတိ အာဒရံ အကတွာ၊ တဿ ဝစနံ အဂ္ဂဟေတွာ. ယသ္မာ ပန တဿ ဝစနံ အဂ္ဂဏှန္တော တံ အနာဒိယန္တော နာမ ဟောတိ၊ တသ္မာ ဝုတ္တံ – ‘‘တံ ယက္ခံ အနာဒိယိတွာ’’တိ. သီသေ ပဟာရံ အဒါသီတိ သဗ္ဗထာမေန ဥဿာဟံ ဇနေတွာ အာကာသေ ဌိတောဝ သီသေ ခဋကံ အဒါသိ၊ မုဒ္ဓနိ မုဋ္ဌိဃာတံ အကာသီတိ အတ္ထော. တာဝ မဟာတိ ထာမမဟတ္တေန တတ္တကံ မဟန္တော ပဟာရော အဟောသိ. တေန ပဟာရေနာတိ တေန ပဟာရေန ကရဏဘူတေန. သတ္တရတနန္တိ ပမာဏမဇ္ဈိမဿ ပုရိသဿ ရတနေန သတ္တရတနံ. နာဂန္တိ ဟတ္ထိနာဂံ. ဩသာဒေယျာတိ ပထဝိယံ ဩသီဒါပေယျ နိမုဇ္ဇာပေယျ. ‘‘ဩသာရေယျာ’’တိပိ ပါဌော၊ စုဏ္ဏဝိစုဏ္ဏံ ကရေယျာတိ အတ္ထော. အဍ္ဎဋ္ဌမရတနန္တိ အဍ္ဎေန အဋ္ဌန္နံ ပူရဏာနိ အဍ္ဎဋ္ဌမာနိ၊ အဍ္ဎဋ္ဌမာနိ ရတနာနိ ပမာဏံ ဧတဿာတိ အဍ္ဎဋ္ဌမရတနော၊ တံ အဍ္ဎဋ္ဌမရတနံ. မဟန္တံ ပဗ္ဗတကူဋန္တိ ကေလာသကူဋပ္ပမာဏံ ဝိပုလံ ဂိရိကူဋံ. ပဒါလေယျာတိ သကလိကာကာရေန ဘိန္ဒေယျ. အပိ ဩသာဒေယျ၊ အပိ ပဒါလေယျာတိ သမ္ဗန္ဓော.

တာဝဒေဝ စဿ သရီရေ မဟာပရိဠာဟော ဥပ္ပဇ္ဇိ၊ သော ဝေဒနာတုရော အာကာသေ ဌာတုံ အသက္ကောန္တော ဘူမိယံ ပတိ၊ တင်္ခဏညေဝ အဋ္ဌသဋ္ဌိသဟဿာဓိကယောဇနသတသဟဿုဗ္ဗေဓံ သိနေရုမ္ပိ ပဗ္ဗတရာဇာနံ သန္ဓာရေန္တီ စတုနဟုတာဓိကဒွိယောဇနသတသဟဿဗဟလာ မဟာပထဝီ တံ ပါပသတ္တံ ဓာရေတုံ အသက္ကောန္တီ ဝိယ ဝိဝရမဒါသိ. အဝီစိတော ဇာလာ ဥဋ္ဌဟိတွာ ကန္ဒန္တံယေဝ တံ ဂဏှိံသု၊ သော ကန္ဒန္တော ဝိပ္ပလပန္တော ပတိ. တေန ဝုတ္တံ – ‘‘အထ စ ပန သော ယက္ခော ‘ဍယှာမိ ဍယှာမီ’တိ ဝတွာ တတ္ထေဝ မဟာနိရယံ အပတာသီတိ. တတ္ထ အပတာသီတိ အပတိ.

ကိံ ပန သော ယက္ခတ္တဘာဝေနေဝ နိရယံ ဥပဂစ္ဆီတိ? န ဥပဂစ္ဆိ၊ ယဉှေတ္ထ ဒိဋ္ဌဓမ္မဝေဒနီယံ ပါပကမ္မံ အဟောသိ၊ တဿ ဗလေန ယက္ခတ္တဘာဝေ မဟန္တံ ဒုက္ခံ အနုဘဝိ. ယံ ပန ဥပပဇ္ဇဝေဒနီယံ အာနန္တရိယကမ္မံ၊ တေန စုတိအနန္တရံ နိရယေ ဥပ္ပဇ္ဇီတိ. ထေရဿ ပန သမာပတ္တိဗလေန ဥပတ္ထမ္ဘိတသရီရဿ န ကောစိ ဝိကာရော အဟောသိ. သမာပတ္တိတော အဝုဋ္ဌိတကာလေ ဟိ တံ ယက္ခော ပဟရိ၊ တထာ ပဟရန္တံ ဒိဗ္ဗစက္ခုနာ ဒိသွာ အာယသ္မာ မဟာမောဂ္ဂလ္လာနော ဓမ္မသေနာပတိံ ဥပသင်္ကမိ၊ ဥပသင်္ကမနသမကာလမေဝ စ ဓမ္မသေနာပတိ သမာပတ္တိတော ဥဋ္ဌာသိ. အထ နံ မဟာမောဂ္ဂလ္လာနော သရီရဝုတ္တိံ ပုစ္ဆိ၊ သောပိဿ ဗျာကာသိ၊ တေန ဝုတ္တံ – ‘‘အဒ္ဒသာ ခေါ အာယသ္မာ မဟာမောဂ္ဂလ္လာနော။ပေ။ အပိ စ မေ သီသံ ထောကံ ဒုက္ခ’’န္တိ.

တတ္ထ ထောကံ ဒုက္ခန္တိ ထောကံ အပ္ပမတ္တကံ မဓုရကဇာတံ ဝိယ မေ သီသံ ဒုက္ခိတံ၊ ဒုက္ခပ္ပတ္တန္တိ အတ္ထော. ဒုက္ခာဓိဋ္ဌာနဉှိ သီသံ ဒုက္ခန္တိ ဝုတ္တံ. ‘‘သီသေ ထောကံ ဒုက္ခ’’န္တိပိ ပါဌော. ကထံ ပန သမာပတ္တိဗလေန သရီရေ ဥပတ္ထမ္ဘိတေ ထေရဿ သီသေ ထောကမ္ပိ ဒုက္ခံ အဟောသီတိ? အစိရေနေဝ ဝုဋ္ဌိတတ္တာ. အန္တောသမာပတ္တိယံ အပညာယမာနဒုက္ခဉှိ ကာယနိဿိတတ္တာ နိဒ္ဒံ ဥပဂတဿ မကသာဒိဇနိတံ ဝိယ ပဋိဗုဒ္ဓဿ ထောကံ ပညာယိတ္ထ.

‘‘မဟာဗလေန ယက္ခေန တထာ သဗ္ဗုဿာဟေန ပဟဋေ သရီရေပိ ဝိကာရော နာမ နတ္ထီ’’တိ အစ္ဆရိယဗ္ဘုတစိတ္တဇာတေန အာယသ္မတာ မဟာမောဂ္ဂလ္လာနေန ‘‘အစ္ဆရိယံ၊ အာဝုသော သာရိပုတ္တာ’’တိအာဒိနာ ဓမ္မသေနာပတိနော မဟာနုဘာဝတာယ ဝိဘာဝိတာယ သောပိဿ ‘အစ္ဆရိယံ၊ အာဝုသော မောဂ္ဂလ္လာနာ’’တိအာဒိနာ ဣဒ္ဓါနုဘာဝမဟန္တတာပကာသနာပဒေသေန အတ္တနော ဣဿာမစ္ဆရိယာဟင်္ကာရာဒိမလာနံ သုပ္ပဟီနတံ ဒီပေတိ. ပံသုပိသာစကမ္ပိ န ပဿာမာတိ သင်္ကာရကူဋာဒီသု ဝိစရဏကခုဒ္ဒကပေတမ္ပိ န ပဿာမ. ဣတိ အဓိဂမပ္ပိစ္ဆာနံ အဂ္ဂဘူတော မဟာထေရော တသ္မိံ ကာလေ အနာဝဇ္ဇနေန တေသံ အဒဿနံ သန္ဓာယ ဝဒတိ. တေနေဝါဟ ‘‘ဧတရဟီ’’တိ.

ဘဂဝါ ပန ဝေဠုဝနေ ဌိတော ဥဘိန္နံ အဂ္ဂသာဝကာနံ ဣမံ ကထာသလ္လာပံ ဒိဗ္ဗသောတေန အဿောသိ. တေန ဝုတ္တံ – ‘‘အဿောသိ ခေါ ဘဂဝါ’’တိအာဒိ၊ တံ ဝုတ္တတ္ထမေဝ.

ဧတမတ္ထံ ဝိဒိတွာတိ ဧတံ အာယသ္မတော သာရိပုတ္တဿ သမာပတ္တိဗလူပဂတံ ဣဒ္ဓါနုဘာဝမဟန္တတံ ဝိဒိတွာ. ဣမံ ဥဒါနန္တိ တဿေဝ တာဒိဘာဝပ္ပတ္တိဒီပကံ ဣမံ ဥဒါနံ ဥဒါနေသိ.

တတ္ထ ယဿ သေလူပမံ စိတ္တံ၊ ဌိတံ နာနုပကမ္ပတီတိ ယဿ ခီဏာသဝဿ စိတ္တံ ဧကဂ္ဃနသိလာမယပဗ္ဗတူပမံ သဗ္ဗေသံ ဣဉ္ဇနာနံ အဘာဝတော ဝသီဘာဝပ္ပတ္တိယာဝ ဌိတံ သဗ္ဗေဟိပိ လောကဓမ္မေဟိ နာနုပကမ္ပတိ န ပဝေဓတိ. ဣဒါနိဿ အကမ္ပနာကာရံ သဒ္ဓိံ ကာရဏေန ဒဿေတုံ ‘‘ဝိရတ္တ’’န္တိအာဒိ ဝုတ္တံ. တတ္ထ ဝိရတ္တံ ရဇနီယေသူတိ ဝိရာဂသင်္ခါတေန အရိယမဂ္ဂေန ရဇနီယေသု ရာဂုပ္ပတ္တိဟေတုဘူတေသု သဗ္ဗေသု တေဘူမကဓမ္မေသု ဝိရတ္တံ၊ တတ္ထ သဗ္ဗသော သမုစ္ဆိန္နရာဂန္တိ အတ္ထော. ကောပနေယျေတိ ပဋိဃဋ္ဌာနီယေ သဗ္ဗသ္မိမ္ပိ အာဃာတဝတ္ထုသ္မိံ န ကုပ္ပတိ န ဒုဿတိ န ဝိကာရံ အာပဇ္ဇတိ. ယဿေဝံ ဘာဝိတံ စိတ္တန္တိ ယဿ ယထာဝုတ္တဿ အရိယပုဂ္ဂလဿ စိတ္တံ ဧဝံ ဝုတ္တနယေန တာဒိဘာဝါဝဟနဘာဝေန ဘာဝိတံ. ကုတော တံ ဒုက္ခမေဿတီတိ တံ ဥတ္တမပုဂ္ဂလံ ကုတော သတ္တတော သင်္ခါရတော ဝါ ဒုက္ခံ ဥပဂမိဿတိ၊ န တာဒိသဿ ဒုက္ခံ အတ္ထီတိ အတ္ထော.

စတုတ္ထသုတ္တဝဏ္ဏနာ နိဋ္ဌိတာ.