၃. ဂေါပါလကသုတ္တဝဏ္ဏနာ

၃၃. တတိယေ ကောသလေသူတိ ကောသလာ နာမ ဇာနပဒိနော ရာဇကုမာရာ၊ တေသံ နိဝါသော ဧကောပိ ဇနပဒေါ ‘‘ကောသလာ’’တွေဝ ဝုစ္စတိ၊ တေသု ကောသလေသု ဇနပဒေ. စာရိကံ စရတီတိ အတုရိတစာရိကာဝသေန ဇနပဒစာရိကံ စရတိ. မဟတာတိ ဂုဏမဟတ္တေနပိ မဟတာ၊ အပရိစ္ဆိန္နသင်္ချတ္တာ သင်္ချာမဟတ္တေနပိ မဟတာ. ဘိက္ခုသံဃေနာတိ ဒိဋ္ဌိသီလသာမညသံဟတေန သမဏဂဏေန. သဒ္ဓိန္တိ ဧကတော. မဂ္ဂါ ဩက္ကမ္မာတိ မဂ္ဂတော အပက္ကမိတွာ. အညတရံ ရုက္ခမူလန္တိ ဃနပတ္တသာခါဝိဋပသမ္ပန္နဿ သန္ဒစ္ဆာယဿ မဟတော ရုက္ခဿ သမီပသင်္ခါတံ မူလံ.

အညတရော ဂေါပါလကောတိ ဧကော ဂေါဂဏရက္ခကော၊ နာမေန ပန နန္ဒော နာမ. သော ကိရ အဍ္ဎော မဟဒ္ဓနော မဟာဘောဂေါ၊ ယထာ ကေဏိယော ဇဋိလော ပဗ္ဗဇ္ဇာဝသေန၊ ဧဝံ အနာထပိဏ္ဍိကဿ ဂေါယူထံ ရက္ခန္တော ဂေါပါလကတ္တေန ရာဇပီဠံ အပဟရန္တော အတ္တနော ကုဋုမ္ဗံ ရက္ခတိ. သော ကာလေန ကာလံ ပဉ္စ ဂေါရသေ ဂဟေတွာ၊ မဟာသေဋ္ဌိဿ သန္တိကံ အာဂန္တွာ နိယျာတေတွာ သတ္ထု သန္တိကံ ဂန္တွာ၊ သတ္ထာရံ ပဿတိ၊ ဓမ္မံ သုဏာတိ၊ အတ္တနော ဝသနဋ္ဌာနံ အာဂမနတ္ထာယ သတ္ထာရံ ယာစတိ. သတ္ထာ တဿေဝ ဉာဏပရိပါကံ အာဂမယမာနော အဂန္တွာ၊ အပရဘာဂေ မဟတာ ဘိက္ခုသံဃေန ပရိဝုတော ဇနပဒစာရိကံ စရန္တော၊ ‘‘ဣဒါနိဿ ဉာဏံ ပရိပက္က’’န္တိ ဉတွာ တဿ ဝသနဋ္ဌာနဿ အဝိဒူရေ မဂ္ဂါ ဩက္ကမ္မ အညတရသ္မိံ ရုက္ခမူလေ နိသီဒိ တဿ အာဂမနံ အာဂမယမာနော. နန္ဒောပိ ခေါ ‘‘သတ္ထာ ကိရ ဇနပဒစာရိကံ စရန္တော ဣတော အာဂစ္ဆတီ’’တိ သုတွာ၊ ဟဋ္ဌတုဋ္ဌော ဝေဂေန ဂန္တွာ၊ သတ္ထာရံ ဥပသင်္ကမိတွာ ဝန္ဒိတွာ ကတပဋိသန္ထာရော ဧကမန္တံ နိသီဒိ၊ အထဿ ဘဂဝါ ဓမ္မံ ဒေသေသိ. သော သောတာပတ္တိဖလေ ပတိဋ္ဌဟိတွာ ဘဂဝန္တံ နိမန္တေတွာ သတ္တာဟံ ပါယာသဒါနမဒါသိ၊ သတ္တမေ ဒိဝသေ ဘဂဝါ အနုမောဒနံ ကတွာ ပက္ကာမိ. တေန ဝုတ္တံ – ‘‘ဧကမန္တံ နိသိန္နံ ခေါ တံ ဂေါပါလကံ ဘဂဝါ ဓမ္မိယာ ကထာယ သန္ဒဿေသိ။ပေ။ ဥဋ္ဌာယာသနာ ပက္ကာမီ’’တိ.

တတ္ထ သန္ဒဿေသီတိ ‘‘ဣမေ ဓမ္မာ ကုသလာ၊ ဣမေ ဓမ္မာ အကုသလာ’’တိအာဒိနာ ကုသလာဒိဓမ္မေ ကမ္မဝိပါကေ ဣဓလောကပရလောကေ ပစ္စက္ခတော ဒဿေန္တော အနုပုဗ္ဗိကထာဝသာနေ စတ္တာရိ အရိယသစ္စာနိ သမ္မာ ဒဿေသိ. သမာဒပေသီတိ ‘‘သစ္စာဓိဂမာယ ဣမေ နာမ ဓမ္မာ အတ္တနိ ဥပ္ပါဒေတဗ္ဗာ’’တိ သီလာဒိဓမ္မေ သမ္မာ ဂဏှာပေတွာ တေသု တံ ပတိဋ္ဌပေသိ. သမုတ္တေဇေသီတိ တေ ဓမ္မာ သမာဒိန္နာ အနုက္ကမေန ဘာဝိယမာနာ နိဗ္ဗေဓဘာဂိယာ ဟုတွာ တိက္ခဝိသဒါ ယထာ ခိပ္ပံ အရိယမဂ္ဂံ အာဝဟန္တိ၊ တထာ သမ္မာ ဥတ္တေဇေသိ သမ္မဒေဝ တေဇေသိ. သမ္ပဟံသေသီတိ ဘာဝနာယ ပုဗ္ဗေနာပရံ ဝိသေသဘာဝဒဿနေန စိတ္တဿ ပမောဒါပနဝသေန သုဋ္ဌု ပဟံသေသိ. အပိစေတ္ထ သာဝဇ္ဇာနဝဇ္ဇဓမ္မေသု ဒုက္ခာဒီသု စ သမ္မောဟဝိနောဒနေန သန္ဒဿနံ၊ သမ္မာပဋိပတ္တိယံ ပမာဒါပနောဒနေန သမာဒပနံ၊ စိတ္တဿာလသိယာပတ္တိဝိနောဒနေန သမုတ္တေဇနံ၊ သမ္မာပဋိပတ္တိသိဒ္ဓိယာ သမ္ပဟံသနံ ဝေဒိတဗ္ဗံ. ဧဝံ သော ဘဂဝတော သာမုက္ကံသိကာယ ဓမ္မဒေသနာယ သောတာပတ္တိဖလေ ပတိဋ္ဌဟိ. အဓိဝါသေသီတိ တေန ဒိဋ္ဌသစ္စေန ‘‘အဓိဝါသေတု မေ၊ ဘန္တေ ဘဂဝါ’’တိအာဒိနာ နိမန္တိတော ကာယင်္ဂဝါစင်္ဂံ အစောပေန္တော စိတ္တေနေဝ အဓိဝါသေသိ သာဒိယိ. တေနေဝါဟ ‘‘တုဏှီဘာဝေနာ’’တိ.

အပ္ပေါဒကပါယာသန္တိ နိရုဒကပါယာသံ. ပဋိယာဒါပေတွာတိ သမ္ပာဒေတွာ သဇ္ဇေတွာ. နဝဉ္စ သပ္ပိန္တိ နဝနီတံ ဂဟေတွာ တာဝဒေဝ ဝိလီနံ မဏ္ဍသပ္ပိဉ္စ ပဋိယာဒါပေတွာ. သဟတ္ထာတိ အာဒရဇာတော သဟတ္ထေနေဝ ပရိဝိသန္တော. သန္တပ္ပေသီတိ ပဋိယတ္တံ ဘောဇနံ ဘောဇေသိ. သမ္ပဝါရေသီတိ ‘‘အလံ အလ’’န္တိ ဝါစာယ ပဋိက္ခိပါပေသိ. ဘုတ္တာဝိန္တိ ကတဘတ္တကိစ္စံ. ဩနီတပတ္တပါဏိန္တိ ပတ္တတော အပနီတပါဏိံ၊ ‘‘ဓောတပတ္တပါဏိ’’န္တိပိ ပါဌော၊ ဓောတပတ္တဟတ္ထန္တိ အတ္ထော. နီစန္တိ အနုစ္စံ အာသနံ ဂဟေတွာ အာသနေယေဝ နိသီဒနံ အရိယဒေသဝါသီနံ စာရိတ္တံ၊ သော ပန သတ္ထု သန္တိကေ ဥပစာရဝသေန ပညတ္တဿ ဒါရုဖလကာသနဿ သမီပေ နိသီဒိ. ဓမ္မိယာ ကထာယာတိအာဒိ သတ္တမေ ဒိဝသေ ကတံ အနုမောဒနံ သန္ဓာယ ဝုတ္တံ. သော ကိရ သတ္တာဟံ ဘဂဝန္တံ ဘိက္ခုသံဃဉ္စ တတ္ထ ဝသာပေတွာ မဟာဒါနံ ပဝတ္တေသိ. သတ္တမေ ပန ဒိဝသေ အပ္ပေါဒကပါယာသဒါနံ အဒါသိ. သတ္ထာ တဿ တသ္မိံ အတ္တဘာဝေ ဥပရိမဂ္ဂတ္ထာယ ဉာဏပရိပါကာဘာဝတော အနုမောဒနမေဝ ကတွာ ပက္ကာမိ.

သီမန္တရိကာယာတိ သီမန္တရေ၊ တဿ ဂါမဿ အန္တရံ. ဂါမဝါသိနော ကိရ ဧကံ တဠာကံ နိဿာယ တေန သဒ္ဓိံ ကလဟံ အကံသု. သော တေ အဘိဘဝိတွာ တံ တဠာကံ ဂဏှိ. တေန ဗဒ္ဓါဃာတော ဧကော ပုရိသော တံ သတ္ထု ပတ္တံ ဂဟေတွာ ဒူရံ အနုဂန္တွာ ‘‘နိဝတ္တာဟိ ဥပါသကာ’’တိ ဝုတ္တေ ဘဂဝန္တံ ဝန္ဒိတွာ ပဒက္ခိဏံ ကတွာ ဘိက္ခုသံဃဿ စ အဉ္ဇလိံ ကတွာ ယာဝ ဒဿနူပစာရသမတိက္ကမာ ဒသနခသမောဓာနသမုဇ္ဇလံ အဉ္ဇလိံ သိရသိ ပဂ္ဂယှ ပဋိနိဝတ္တိတွာ ဒွိန္နံ ဂါမာနံ အန္တရေ အရညပ္ပဒေသေ ဧကကံ ဂစ္ဆန္တံ သရေန ဝိဇ္ဈိတွာ မာရေသိ. တေန ဝုတ္တံ အစိရပက္ကန္တဿ။ပေ။ ဝေါရောပေသီ’’တိ. ကေနစိဒေဝ ကရဏီယေန ဩဟီယိတွာ ပစ္ဆာ ဂစ္ဆန္တာ ဘိက္ခူ တံ တထာ မတံ ဒိသွာ ဘဂဝတော တမတ္ထံ အာရောစေသုံ၊ တံ သန္ဓာယ ဝုတ္တံ ‘‘အထ ခေါ သမ္ဗဟုလာ ဘိက္ခူ’’တိအာဒိ.

ဧတမတ္ထံ ဝိဒိတွာတိ ယသ္မာ ဒိဋ္ဌိသမ္ပန္နံ အရိယသာဝကံ နန္ဒံ မာရေန္တေန ပုရိသေန အာနန္တရိယကမ္မံ ဗဟုလံ အပုညံ ပသုတံ၊ တသ္မာ ယံ စောရေဟိ စ ဝေရီဟိ စ ကတ္တဗ္ဗံ၊ တတောပိ ဃောရတရံ ဣမေသံ သတ္တာနံ မိစ္ဆာပဏိဟိတံ စိတ္တံ ကရောတီတိ ဣမမတ္ထံ ဇာနိတွာ တဒတ္ထဒီပနံ ဣမံ ဥဒါနံ ဥဒါနေသိ.

တတ္ထ ဒိသော ဒိသန္တိ ဒူသကော ဒူသနီယံ စောရော စောရံ၊ ဒိသွာတိ ဝစနသေသော. ယံ တံ ကယိရာတိ ယံ တဿ အနယဗျသနံ ကရေယျ၊ ဒုတိယပဒေပိ ဧသေဝ နယော. ဣဒံ ဝုတ္တံ ဟောတိ – ဧကော ဧကဿ မိတ္တဒုဗ္ဘီ စောရော ပုတ္တဒါရခေတ္တဝတ္ထုဂေါမဟိံသာဒီသု အပရဇ္ဈန္တော ယဿ အပရဇ္ဈတိ၊ တမ္ပိ တထေဝ အတ္တနိ အပရဇ္ဈန္တံ စောရံ ဒိသွာ၊ ဝေရီ ဝါ ပန ကေနစိဒေဝ ကာရဏေန ဗဒ္ဓဝေရံ ဝေရိံ ဒိသွာ အတ္တနော ကက္ခဠတာယ ဒါရုဏတာယ ယံ တဿ အနယဗျသနံ ကရေယျ၊ ပုတ္တဒါရံ ဝါ ပီဠေယျ၊ ခေတ္တာဒီနိ ဝါ နာသေယျ၊ ဇီဝိတာ ဝါ ဝေါရောပေယျ၊ ဒသသု အကုသလကမ္မပထေသု မိစ္ဆာဌပိတတ္တာ မိစ္ဆာပဏိဟိတံ စိတ္တံ ပါပိယော နံ တတော ကရေ၊ နံ ပုရိသံ ပါပတရံ တတော ကရေယျ. ဝုတ္တပ္ပကာရော ဟိ ဒိသော ဝါ ဝေရီ ဝါ ဒိသဿ ဝါ ဝေရိနော ဝါ ဣမသ္မိံယေဝ အတ္တဘာဝေ ဒုက္ခံ ဝါ ဥပ္ပါဒေယျ၊ ဇီဝိတက္ခယံ ဝါ ကရေယျ. ဣဒံ ပန အကုသလကမ္မပထေသု မိစ္ဆာဌပိတံ စိတ္တံ ဒိဋ္ဌေဝ ဓမ္မေ အနယဗျသနံ ပါပေတိ၊ အတ္တဘာဝသတသဟဿေသုပိ စတူသု အပါယေသု ခိပိတွာ သီသမဿ ဥက္ခိပိတုံ န ဒေတီတိ.

တတိယသုတ္တဝဏ္ဏနာ နိဋ္ဌိတာ.