၈. ပိဏ္ဍပါတိကသုတ္တဝဏ္ဏနာ

၂၈. အဋ္ဌမေ ပစ္ဆာဘတ္တန္တိ ဧကာသနိကခလုပစ္ဆာဘတ္တိကာနံ ပါတောဝ ဘုတ္တာနံ အန္တောမဇ္ဈနှိကောပိ ပစ္ဆာဘတ္တမေဝ၊ ဣဓ ပန ပကတိဘတ္တဿေဝ ပစ္ဆတော ပစ္ဆာဘတ္တန္တိ ဝေဒိတဗ္ဗံ. ပိဏ္ဍပါတပဋိက္ကန္တာနန္တိ ပိဏ္ဍပါတတော ပဋိက္ကန္တာနံ၊ ပိဏ္ဍပါတံ ပရိယေသိတွာ ဘတ္တကိစ္စဿ နိဋ္ဌာပနဝသေန တတော နိဝတ္တာနံ. ကရေရိမဏ္ဍလမာဠေတိ ဧတ္ထ ကရေရီတိ ဝရုဏရုက္ခဿ နာမံ. သော ကိရ ဂန္ဓကုဋိယာ မဏ္ဍပဿ သာလာယ စ အန္တရေ ဟောတိ၊ တေန ဂန္ဓကုဋီပိ ‘‘ကရေရိကုဋိကာ’’တိ ဝုစ္စတိ၊ မဏ္ဍပေါပိ သာလာပိ ‘‘ကရေရိမဏ္ဍလမာဠော’’တိ. တသ္မာ ကရေရိရုက္ခဿ အဝိဒူရေ ကတေ နိသီဒနသာလသင်္ခါတေ မဏ္ဍလမာဠေ. တိဏပဏ္ဏစ္ဆဒနံ အနောဝဿကံ ‘‘မဏ္ဍလမာဠော’’တိ ဝဒန္တိ၊ အတိမုတ္တကာဒိလတာမဏ္ဍပေါ ‘‘မဏ္ဍလမာဠော’’တိ အပရေ.

ကာလေန ကာလန္တိ ကာလေ ကာလေ အန္တရန္တရာ၊ တသ္မိံ တသ္မိံ သမယေတိ အတ္ထော. မနာပိကေတိ မနဝဍ္ဎကေ၊ ပိယရူပေ ဣဋ္ဌေတိ အတ္ထော. ဣဋ္ဌာနိဋ္ဌဘာဝေါ စ ပုဂ္ဂလဝသေန စ ဒွါရဝသေန စ ဂဟေတဗ္ဗော. ဧကစ္စဿ ဟိ ဣဋ္ဌာဘိမတော ဧကစ္စဿ အနိဋ္ဌော ဟောတိ၊ ဧကစ္စဿ အနိဋ္ဌာဘိမတော ဧကစ္စဿ ဣဋ္ဌော. တထာ ဧကဿ ဒွါရဿ ဣဋ္ဌော အညဿ အနိဋ္ဌော. ဝိပါကဝသေန ပနေတ္ထ ဝိနိစ္ဆယော ဝေဒိတဗ္ဗော. ကုသလဝိပါကော ဟိ ဧကန္တေန ဣဋ္ဌော၊ အကုသလဝိပါကော အနိဋ္ဌော ဧဝါတိ. စက္ခုနာ ရူပေ ပဿိတုန္တိ ဂါမံ ပိဏ္ဍာယ ပဝိဋ္ဌော ဥပါသကေဟိ ဂေဟံ ပဝေသေတွာ ပူဇာသက္ကာရကရဏတ္ထံ ဥပနီတေသု အာသနဝိတာနာဒီသု နာနာဝိရာဂသမုဇ္ဇလဝဏ္ဏသင်္ခါတေ ရဇနီယေ အညေ စ သဝိညာဏကရူပေ စက္ခုဒွါရိကဝိညာဏေဟိ ပဿိတုံ. သဒ္ဒေတိ တထေဝ ဣဿရဇနာနံ ဂေဟံ ပဝိဋ္ဌော တေသံ ပယုတ္တေ ဂီတဝါဒိတသဒ္ဒေ သောတုံ. ဂန္ဓေတိ တထာ တေဟိ ပူဇာသက္ကာရဝသေန ဥပနီတေ ပုပ္ဖဓူမာဒိဂန္ဓေ ဃာယိတုံ. ရသေတိ တေဟိ ဒိန္နာဟာရပရိဘောဂေ နာနဂ္ဂရသေ သာယိတုံ. ဖောဋ္ဌဗ္ဗေတိ မဟဂ္ဃပစ္စတ္ထရဏေသု အာသနေသု နိသိန္နကာလေ သုခသမ္ဖဿေ ဖောဋ္ဌဗ္ဗေ ဖုသိတုံ. ဧဝဉ္စ ပဉ္စဒွါရိကဣဋ္ဌာရမ္မဏပ္ပဋိလာဘံ ကိတ္တေတွာ ဣဒါနိ မနောဒွါရိကဣဋ္ဌာရမ္မဏပ္ပဋိလာဘံ ဒဿေတုံ ‘‘သက္ကတော’’တိအာဒိ ဝုတ္တံ. တံ ဟေဋ္ဌာ ဝုတ္တတ္ထမေဝ.

ကိံ ပန အပိဏ္ဍပါတိကာနံ အယံ နယော န လဗ္ဘတီတိ? လဗ္ဘတိ. တေသမ္ပိ ဟိ နိမန္တနသလာကဘတ္တာဒိအတ္ထံ ဂါမံ ဂတကာလေ ဥဠာရဝိဘဝါ ဥပါသကာ တထာ သက္ကာရသမ္မာနံ ကရောန္တိယေဝ၊ တံ ပန အနိယတံ. ပိဏ္ဍပါတိကာနံ ပန တဒါ နိစ္စမေဝ တတ္ထ ပူဇာသက္ကာရံ ကရိယမာနံ ဒိသွာ၊ သက္ကာရဂရုတာယ အနိဿရဏမဂ္ဂေ ဌတွာ၊ အယောနိသောမနသိကာရဝသေန တေ ဘိက္ခူ ဧဝမာဟံသု. တေနေဝါဟ – ‘‘ဟန္ဒာဝုသော၊ မယမ္ပိ ပိဏ္ဍပါတိကာ ဟောမာ’’တိအာဒိ.

တတ္ထ ဟန္ဒာတိ ဝေါဿဂ္ဂတ္ထေ နိပါတော. လစ္ဆာမာတိ လဘိဿာမ. တေနုပသင်္ကမီတိ တတ္ထ သုရဘိဂန္ဓကုဋိယံ နိသိန္နော တေသံ တံ ကထာသလ္လာပံ သုတွာ ‘‘ဣမေ ဘိက္ခူ မာဒိသဿ နာမ ဗုဒ္ဓဿ သာသနေ ပဗ္ဗဇိတွာ မယာ သဒ္ဓိံ ဧကဝိဟာရေ ဝသန္တာပိ ဧဝံ အယောနိသောမနသိကာရဝသေန ကထံ ပဝတ္တေန္တိ၊ သလ္လေခေ န ဝတ္တန္တိ၊ ဟန္ဒ တေ တတော နိဝါရေတွာ သလ္လေခဝိဟာရေ နိယောဇေဿာမီ’’တိ မဏ္ဍလမာဠံ ဥပသင်္ကမိ. သေသံ ဟေဋ္ဌာ ဝုတ္တနယမေဝ.

ဧတမတ္ထံ ဝိဒိတွာတိ ‘‘အပ္ပိစ္ဆတာသန္တုဋ္ဌိတာသလ္လေခါနံ ဝသေန ကိလေသေ ဓုနိတုံ တဏှံ ဝိသောသေတုံ ပဋိပန္နောတိ ပိဏ္ဍပါတိကဿ သတော ဒေဝါ ပိဟယန္တိ၊ တဿ ပဋိပတ္တိယာ အာဒရဇာတာ ပိယာယန္တိ၊ န ဣတော အညထာ’’တိ ဣမမတ္ထံ ဝိဒိတွာ တဒတ္ထဒီပနံ ဣမံ ဥဒါနံ ဥဒါနေသိ.

တတ္ထ နော စေ သဒ္ဒသိလောကနိဿိတောတိ ‘‘အဟော အယျော အပ္ပိစ္ဆော သန္တုဋ္ဌော ပရမသလ္လေခဝုတ္တီ’’တိအာဒိနာ ပရေဟိ ကိတ္တိတဗ္ဗသဒ္ဒသင်္ခါတံ သိလောကံ. တဏှာယ နိဿိတော န ဟောတိ စေတိ အတ္ထော. သဒ္ဒေါ ဝါ သမ္မုခါ ဝဏ္ဏဘဏနထုတိဃောသော၊ သိလောကော ပရမ္မုခဘူတာ ပသံသာ ပတ္ထဋယသတာ ဝါ. သေသံ အနန္တရသုတ္တေ ဝုတ္တနယမေဝ.

အဋ္ဌမသုတ္တဝဏ္ဏနာ နိဋ္ဌိတာ.