၆. ပိလိန္ဒဝစ္ဆသုတ္တဝဏ္ဏနာ

၂၆. ဆဋ္ဌေ ပိလိန္ဒဝစ္ဆောတိ ပိလိန္ဒာတိဿ နာမံ၊ ဝစ္ဆောတိ ဂေါတ္တဝသေန ထေရံ သဉ္ဇာနန္တိ. ဝသလဝါဒေန သမုဒါစရတီတိ ‘‘ဧဟိ၊ ဝသလ၊ အပေဟိ၊ ဝသလာ’’တိအာဒိနာ ဘိက္ခူ ဝသလဝါဒေန ဝေါဟရတိ အာလပတိ. သမ္ဗဟုလာ ဘိက္ခူတိ ဗဟူ ဘိက္ခူ. တေ ထေရံ တထာ သမုဒါစရန္တံ ဒိသွာ ‘‘အရဟာဝ သမာနော အပ္ပဟီနဝါသနတ္တာ ဧဝံ ဘဏတီ’’တိ အဇာနန္တာ ‘‘ဒေါသန္တရော မညေ အယံ ထေရော ဧဝံ သမုဒါစရတီ’’တိ စိန္တေတွာ ဥလ္လပနာဓိပ္ပါယာ တံ တတော ဝုဋ္ဌာပေတုံ ဘဂဝတော အာရောစေသုံ. တေန ဝုတ္တံ – ‘‘အာယသ္မာ၊ ဘန္တေ၊ ပိလိန္ဒဝစ္ဆော ဘိက္ခူ ဝသလဝါဒေန သမုဒါစရတီ’’တိ. ကေစိ ပနာဟု – ‘‘ဣမံ ထေရံ ဘိက္ခူ ‘အရဟာ’တိ သဉ္ဇာနန္တိ၊ အယဉ္စ ဘိက္ခူ ဖရုသဝစနေန ဧဝံ သမုဒါစရတိ၊ ‘အဘူတော ဧဝ နု ခေါ ဣမသ္မိံ ဥတ္တရိမနုဿဓမ္မော’တိ ဝါသနာဝသေန တဿ တထာ သမုဒါစာရံ အဇာနန္တာ အရိယဘာဝဉ္စဿ အသဒ္ဒဟန္တာ ဥဇ္ဈာနသညိနော ဘဂဝတော တမတ္ထံ အာရောစေသု’’န္တိ. ဘဂဝါ ထေရဿ ဒေါသန္တရာဘာဝံ ပကာသေတုကာမော ဧကေန ဘိက္ခုနာ တံ ပက္ကောသာပေတွာ သမ္မုခါ တဿ ‘‘ပုဗ္ဗာစိဏ္ဏဝသေနာယံ တထာ သမုဒါစရတိ၊ န ဖရုသဝစနာဓိပ္ပါယော’’တိ အာဟ. တေန ဝုတ္တံ – ‘‘အထ ခေါ ဘဂဝါ အညတရံ ဘိက္ခုံ အာမန္တေသီ’’တိအာဒိ.

တတ္ထ ပုဗ္ဗေနိဝါသံ မနသိ ကရိတွာတိ သတ္ထာ ‘‘သစ္စံ ကိရ တွံ၊ ဝစ္ဆ၊ ဘိက္ခူ ဝသလဝါဒေန သမုဒါစရသီ’’တိ ထေရံ ပုစ္ဆိတွာ တေန ‘‘ဧဝံ၊ ဘန္တေ’’တိ ဝုတ္တေ ‘‘အယံ ဝစ္ဆော ကိလေသဝါသနာယ ဝသလဝါဒံ န ပရိစ္စဇတိ၊ ကိံ နု ခေါ အတီတေသုပိ အတ္တဘာဝေသု ဗြာဟ္မဏဇာတိကော အဟောသီ’’တိ အာဝဇ္ဇေန္တော ပုဗ္ဗေနိဝါသဉာဏေန သဗ္ဗညုတညာဏေန ဝါ တဿ ပုဗ္ဗေနိဝါသံ အတီတာသု ဇာတီသု နိဝုတ္ထက္ခန္ဓသန္တာနံ မနသိ ကရိတွာ ဟတ္ထတလေ ဌပိတံ အာမလကံ ဝိယ ပစ္စက္ခကရဏဝသေန အတ္တနော မနသိ ကတွာ. ဘိက္ခူ အာမန္တေသီတိ တေ ဘိက္ခူ သညာပေတုံ အာလပိ၊ အဘာသိ. တေန ဝုတ္တံ ‘‘မာ ခေါ တုမှေ၊ ဘိက္ခဝေ’’တိအာဒိ.

တတ္ထ မာတိ ပဋိသေဓေ နိပါတော၊ တဿ ‘‘ဥဇ္ဈာယိတ္ထာ’’တိ ဣမိနာ သမ္ဗန္ဓော. မာ ဥဇ္ဈာယိတ္ထာတိ မာ ဟေဋ္ဌာ ကတွာ စိန္တယိတ္ထ၊ ဩလောကယိတ္ထာတိ အတ္ထော. ဝစ္ဆဿ ဘိက္ခုနောတိ စ ဥဇ္ဈာယနဿ ဥသူယနတ္ထတ္တာ သမ္ပဒါနဝစနံ. ဣဒါနိဿ အနုဇ္ဈာယိတဗ္ဗေ ကာရဏံ ဒဿေန္တော ‘‘န၊ ဘိက္ခဝေ၊ ဝစ္ဆော ဒေါသန္တရော ဘိက္ခူ ဝသလဝါဒေန သမုဒါစရတီ’’တိ အာဟ. တဿတ္ထော – ဘိက္ခဝေ၊ အယံ ဝစ္ဆော ဒေါသန္တရော ဒေါသစိတ္တော ဒေါသေန ဗျာပါဒေန ဒူသိတစိတ္တော ဟုတွာ ဘိက္ခူ ဝသလဝါဒေန န သမုဒါစရတိ၊ မဂ္ဂေနေဝ စဿ ဗျာပါဒေါ သမုဂ္ဃါတိတော. ဧဝံ အဒေါသန္တရတ္တေပိ တဿ တထာ သမုဒါစာရဿ ပုရိမဇာတိသိဒ္ဓံ ကာရဏံ ဒဿေန္တော ‘‘ဝစ္ဆဿ၊ ဘိက္ခဝေ’’တိအာဒိမာဟ.

တတ္ထ အဗ္ဗောကိဏ္ဏာနီတိ ခတ္တိယာဒိဇာတိအန္တရေဟိ အဝေါမိဿာနိ အနန္တရိတာနိ. ပဉ္စ ဇာတိသတာနိ ဗြာဟ္မဏကုလေ ပစ္စာဇာတာနီတိ သဗ္ဗာနိ တာနိ ဝစ္ဆဿ ပဉ္စ ဇာတိသတာနိ ပဋိပါဋိယာ ဗြာဟ္မဏကုလေ ဧဝ ဇာတာနိ၊ အဟေသုန္တိ အတ္ထော. သော တဿ ဝသလဝါဒေါ ဒီဃရတ္တံ သမုဒါစိဏ္ဏောတိ ယော ဧတရဟိ ခီဏာသဝေနပိ သတာ ပဝတ္တိယတိ၊ သော တဿ ဝစ္ဆဿ ဘိက္ခုနော ဝသလဝါဒေါ ဒီဃရတ္တံ ဣတော ဇာတိတော ပဋ္ဌာယ ဥဒ္ဓံ အာရောဟနဝသေန ပဉ္စဇာတိသတမတ္တံ ကာလံ ဗြာဟ္မဏဇာတိကတ္တာ သမုဒါစိဏ္ဏော သမုဒါစရိတော အဟောသိ. ဗြာဟ္မဏာ ဟိ ဇာတိသိဒ္ဓေန မာနေန ထဒ္ဓါ အညံ ဝသလဝါဒေန သမုဒါစရန္တိ. ‘‘အဇ္ဈာစိဏ္ဏော’’တိပိ ပဌန္တိ၊ သော ဧဝ အတ္ထော. တေနာတိ တေန ဒီဃရတ္တံ တထာ သမုဒါစိဏ္ဏဘာဝေန၊ ဧတေနဿ တထာ သမုဒါစာရဿ ကာရဏံ ဝါသနာတိ ဒဿေတိ. ကာ ပနာယံ ဝါသနာ နာမ? ယံ ကိလေသရဟိတဿာပိ သန္တာနေ အပ္ပဟီနကိလေသာနံ သမာစာရသဒိသသမာစာရဟေတုဘူတံ၊ အနာဒိကာလဘာဝိတေဟိ ကိလေသေဟိ အာဟိတံ သာမတ္ထိယမတ္တံ၊ တထာရူပါ အဓိမုတ္တီတိ ဝဒန္တိ. တံ ပနေတံ အဘိနီဟာရသမ္ပတ္တိယာ ဉေယျာဝရဏပ္ပဟာနဝသေန ယတ္ထ ကိလေသာ ပဟီနာ၊ တတ္ထ ဘဂဝတော သန္တာနေ နတ္ထိ. ယတ္ထ ပန တထာ ကိလေသာ န ပဟီနာ၊ တတ္ထ သာဝကာနံ ပစ္စေကဗုဒ္ဓါနဉ္စ သန္တာနေ အတ္ထိ၊ တတော တထာဂတောဝ အနာဝရဏဉာဏဒဿနော.

ဧတမတ္ထံ ဝိဒိတွာတိ ဧတံ အာယသ္မတော ပိလိန္ဒဝစ္ဆဿ သတိပိ ဝသလသမုဒါစာရေ ဒေါသန္တရာဘာဝသင်္ခါတံ အတ္ထံ ဝိဒိတွာ. ဣမံ ဥဒါနန္တိ တဿ အဂ္ဂဖလာဓိဂမဝိဘာဝနံ ဣမံ ဥဒါနံ ဥဒါနေသိ.

တတ္ထ ယမှိ န မာယာ ဝသတိ န မာနောတိ ယသ္မိံ အရိယပုဂ္ဂလေ သန္တဒေါသပ္ပဋိစ္ဆာဒနလက္ခဏာ မာယာ၊ ‘‘သေယျောဟမသ္မီ’’တိအာဒိနာ သမ္ပဂ္ဂဟဝသေန ပဝတ္တော ဥဏ္ဏတိလက္ခဏော မာနော စ န ဝသတိ၊ မဂ္ဂေန သမုဂ္ဃါတိတတ္တာ န ပဝတ္တတိ န ဥပ္ပဇ္ဇတိ. ယော ဝီတလောဘော အမမော နိရာသောတိ ယော စ ရာဂါဒိပရိယာယဝသေန ပဝတ္တဿ အာရမ္မဏဂ္ဂဟဏလက္ခဏဿ လောဘဿ သဗ္ဗထာ ဝိဂတတ္တာ ဝီတလောဘော၊ တတော ဧဝ ရူပါဒီသု ကတ္ထစိ မမာယနာဘာဝတော အမမော အပရိဂ္ဂဟော၊ အနာဂတာနမ္ပိ ဘဝါဒီနံ အနာသီသနတော နိရာသော. ပနုဏ္ဏကောဓောတိ ကုဇ္ဈနလက္ခဏဿ ကောဓဿ အနာဂါမိမဂ္ဂေန သဗ္ဗသော ပဟီနတ္တာ ပနုဏ္ဏကောဓော သမုစ္ဆိန္နာဃာတော. အဘိနိဗ္ဗုတတ္တောတိ ယော ဧဝံ မာယာမာနလောဘကောဓာနံ သမုဂ္ဃါတေန တဒေကဋ္ဌတာယ သဗ္ဗဿ သံကိလေသပက္ခဿ သုပ္ပဟီနတ္တာ သဗ္ဗသော ကိလေသပရိနိဗ္ဗာနေန အဘိနိဗ္ဗုတစိတ္တော သီတိဘူတော. သော ဗြာဟ္မဏော သော သမဏော သ ဘိက္ခူတိ သော ဧဝရူပေါ ခီဏာသဝေါ သဗ္ဗသော ဗာဟိတပါပတ္တာ ဗြာဟ္မဏော၊ သော ဧဝ သမိတပါပတ္တာ သမစရိယာယ စ သမဏော၊ သော ဧဝ စ သဗ္ဗသော ဘိန္နကိလေသတ္တာ ဘိက္ခု နာမ. ဧဝံဘူတော စ၊ ဘိက္ခဝေ၊ ဝစ္ဆော သော ကထံ ဒေါသန္တရော ကိဉ္စိ ကာယကမ္မာဒိံ ပဝတ္တေယျ၊ ကေဝလံ ပန ဝါသနာယ အပ္ပဟီနတ္တာ ဝသလဝါဒေန သမုဒါစရတီတိ.

ဆဋ္ဌသုတ္တဝဏ္ဏနာ နိဋ္ဌိတာ.