၁၈. သံဃာထေရီဂါထာဝဏ္ဏနာ

ဟိတွာ ဃရေ ပဗ္ဗဇိတွာတိ သံဃာယ ထေရိယာ ဂါထာ. တဿာ ဝတ္ထု ဓီရာထေရိယာ ဝတ္ထုသဒိသံ. ဂါထာ ပန –

၁၈. ‘‘ဟိတွာ ဃရေ ပဗ္ဗဇိတွာ၊ ဟိတွာ ပုတ္တံ ပသုံ ပိယံ၊

ဟိတွာ ရာဂဉ္စ ဒေါသဉ္စ၊ အဝိဇ္ဇဉ္စ ဝိရာဇိယ၊

သမူလံ တဏှမဗ္ဗုယှ၊ ဥပသန္တာမှိ နိဗ္ဗုတာ’’တိ. – ဂါထံ အဘာသိ၊

တတ္ထ ဟိတွာတိ ဆဍ္ဍေတွာ. ဃရေတိ ဂေဟံ. ဃရသဒ္ဒေါ ဟိ ဧကသ္မိမ္ပိ အဘိဓေယျေ ကဒါစိ ဗဟူသု ဗီဇံ ဝိယ ရူဠှိဝသေန ဝေါဟရီယတိ. ဟိတွာ ပုတ္တံ ပသုံ ပိယန္တိ ပိယာယိတဗ္ဗေ ပုတ္တေ စေဝ ဂေါမဟိံသာဒိကေ ပသူ စ တပ္ပဋိဗဒ္ဓဆန္ဒရာဂပ္ပဟာနေန ပဟာယ. ဟိတွာ ရာဂဉ္စ ဒေါသဉ္စာတိ ရဇ္ဇနသဘာဝံ ရာဂံ၊ ဒုဿနသဘာဝံ ဒေါသဉ္စ အရိယမဂ္ဂေန သမုစ္ဆိန္ဒိတွာ. အဝိဇ္ဇဉ္စ ဝိရာဇိယာတိ သဗ္ဗာကုသလေသု ပုဗ္ဗင်္ဂမံ မောဟဉ္စ ဝိရာဇေတွာ မဂ္ဂေန သမုဂ္ဃါဋေတွာ ဣစ္စေဝ အတ္ထော. သေသံ ဝုတ္တနယမေဝ.

သံဃာထေရီဂါထာဝဏ္ဏနာ နိဋ္ဌိတာ.

ဧကကနိပါတဝဏ္ဏနာ နိဋ္ဌိတာ.