၆. စူဠကတ္ထေရဂါထာဝဏ္ဏနာ

နဒန္တိ မောရာ သုသိခါ သုပေခုဏာတိ အာယသ္မတော စူဠကတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိဿယံ ကုသလံ ဥပစိနန္တော ဣတော ဧကတိံသေ ကပ္ပေ သိခိဿ ဘဂဝတော ကာလေ ကုလဂေဟေ နိဗ္ဗတ္တိတွာ ဝိညုတံ ပတ္တော ဧကဒိဝသံ သတ္ထာရံ ဒိသွာ ပသန္နမာနသော ဆတ္တပဏ္ဏိဖလံ အဒါသိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ ရာဇဂဟေ ဗြာဟ္မဏကုလေ နိဗ္ဗတ္တိတွာ စူဠကောတိ လဒ္ဓနာမော ဝယပ္ပတ္တော ဓနပါလဒမနေ သတ္ထရိ လဒ္ဓပ္ပသာဒေါ ပဗ္ဗဇိတွာ သမဏဓမ္မံ ကရောန္တော ဣန္ဒသာလဂုဟာယံ ဝသတိ၊ သော ဧကဒိဝသံ ဂုဟာဒွါရေ နိသိန္နော မဂဓက္ခေတ္တံ ဩလောကေသိ. တသ္မိံ ခဏေ ပါဝုသကာလမေဃော ဂမ္ဘီရမဓုရနိဂ္ဃေါသော သတပဋလသဟဿပဋလော အဉ္ဇန သိခရသန္နိကာသော နဘံ ပူရေတွာ ပဝဿတိ၊ မယူရသံဃာ စ မေဃဂဇ္ဇိတံ သုတွာ ဟဋ္ဌတုဋ္ဌာ ကေကာသဒ္ဒံ မုဉ္စိတွာ တတ္ထ တတ္ထ ပဒေသေ နစ္စန္တာ ဝိစရန္တိ. ထေရဿပိ အာဝါသဂဗ္ဘေ မေဃဝါတဖဿေဟိ အပဂတဓမ္မတ္တာ ပဿဒ္ဓကရဇကာယေ ကလ္လတံ ပတ္တေ ဥတုသပ္ပါယလာဘေန စိတ္တံ ဧကဂ္ဂံ အဟောသိ၊ ကမ္မဋ္ဌာနဝီထိံ ဩတရိ၊ သော တံ ဉတွာ ကာလသမ္ပဒါဒိကိတ္တနမုခေန အတ္တာနံ ဘာဝနာယ ဥဿာဟေန္တော –

၂၁၁. ‘‘နဒန္တိ မောရာ သုသိခါ သုပေခုဏာ၊ သုနီလဂီဝါ သုမုခါ သုဂဇ္ဇိနော၊

သုသဒ္ဒလာ စာပိ မဟာမဟီ အယံ၊ သုဗျာပိတမ္ဗု သုဝလာဟကံ နဘံ.

၂၁၂. ‘‘သုကလ္လရူပေါ သုမနဿ ဈာယတံ၊ သုနိက္ကမော သာဓု သုဗုဒ္ဓသာသနေ၊

သုသုက္ကသုက္ကံ နိပုဏံ သုဒုဒ္ဒသံ၊ ဖုသာဟိ တံ ဥတ္တမမစ္စုတံ ပဒ’’န္တိ. –

ဒွေ ဂါထာ အဘာသိ.

တတ္ထ နဒန္တိ မောရာ သုသိခါ သုပေခုဏာ၊ သုနီလဂီဝါ သုမုခါ သုဂဇ္ဇိနောတိ ဧတေ မတ္ထကေ ဥဋ္ဌိတာဟိ သုန္ဒရာဟိ သိခါဟိ သမန္နာဂတတ္တာ သုသိခါ၊ နာနာဝဏ္ဏေဟိ အနေကေဟိ သောဘနေဟိ ဘဒ္ဒကပိဉ္ဆေဟိ သမန္နာဂတတ္တာ သုပေခုဏာ၊ ရာဇီဝဝဏ္ဏသင်္ကာသာယ သုန္ဒရာယ နီလဝဏ္ဏာယ ဂီဝါယ သမန္နာဂတတ္တာ သုနီလဂီဝါ၊ သုန္ဒရမုခတာယ သုမုခါ၊ မနုညဝါဒိတာယ သုဂဇ္ဇိနော၊ မောရာ သိခဏ္ဍိနော ဆဇ္ဇသံဝါဒီ ကေကာသဒ္ဒံ မုဉ္စန္တာ နဒန္တိ ရဝန္တိ. သုသဒ္ဒလာ စာပိ မဟာမဟီ အယန္တိ အယဉ္စ မဟာပထဝီ သုသဒ္ဒလာ သုန္ဒရဟရိတတိဏာ. သုဗျာပိတမ္ဗူတိ အဘိနဝဝုဋ္ဌိယာ တဟံ တဟံ ဝိဿန္ဒမာနသလိလတာယ သုဋ္ဌု ဗျာပိတဇလာ ဝိတတဇလာ. ‘‘သုသုက္ကတမ္ဗူ’’တိပိ ပါဌော၊ သုဝိသုဒ္ဓဇလာတိ အတ္ထော. သုဝလာဟကံ နဘန္တိ ဣဒဉ္စ နဘံ အာကာသံ နီလုပ္ပလဒလသန္နိဘေဟိ သမန္တတော ပူရေတွာ ဌိတေဟိ သုန္ဒရေဟိ ဝလာဟကေဟိ မေဃေဟိ သုဝလာဟကံ.

သုကလ္လရူပေါ သုမနဿ ဈာယတန္တိ ဣဒါနိ ဥတုသပ္ပါယလာဘေန သုဋ္ဌု ကလ္လရူပေါ ကမ္မနိယသဘာဝေါ တွံ၊ နီဝရဏေဟိ အနဇ္ဈာရူဠှစိတ္တတာယ သုန္ဒရမနဿ ယောဂါဝစရဿ ယံ အာရမ္မဏူပနိဇ္ဈာနဝသေန လက္ခဏူပနိဇ္ဈာနဝသေန စ ဈာယတံ. သုနိက္ကမော။ပေ။ အစ္စုတံ ပဒန္တိ ဧဝံ ဈာယန္တော စ သာဓု သုဗုဒ္ဓဿ သမ္မာသမ္ဗုဒ္ဓဿ သာသနေ သုန္ဒရနိက္ကမော ဟုတွာ သုပရိသုဒ္ဓသီလတာယ သုသုက္ကံ၊ ဝိသုဒ္ဓသဘာဝတာယ သဗ္ဗဿပိ သံကိလေသဿ ဂေါစရဘာဝါနုပဂမနတော သုက္ကံ၊ နိပုဏဉာဏဂေါစရတာယ နိပုဏံ၊ ပရမဂမ္ဘီရတာယ သုဒုဒ္ဒသံ၊ ပဏီတဘာဝေန သေဋ္ဌဘာဝေန စ ဥတ္တမံ၊ နိစ္စသဘာဝတာယ အစ္စုတံ ပဒံ တံ နိဗ္ဗာနံ ဖုသာဟိ အတ္တပစ္စက္ခကရဏေန သမ္မာပဋိပတ္တိယာ သစ္ဆိကရောဟီတိ.

ဧဝံ ထေရော အတ္တာနံ ဩဝဒန္တောဝ ဥတုသပ္ပါယလာဘေန သမာဟိတစိတ္တော ဝိပဿနံ ဥဿုက္ကာပေတွာ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၁.၃၉.၃၇-၄၂) –

‘‘ကဏိကာရံဝ ဇလိတံ၊ ပုဏ္ဏမာယေဝ စန္ဒိမံ၊

ဇလန္တံ ဒီပရုက္ခံဝ၊ အဒ္ဒသံ လောကနာယကံ.

‘‘ကဒလိဖလံ ပဂ္ဂယှ၊ အဒါသိံ သတ္ထုနော အဟံ၊

ပသန္နစိတ္တော သုမနော၊ ဝန္ဒိတွာန အပက္ကမိံ.

‘‘ဧကတိံသေ ဣတော ကပ္ပေ၊ ယံ ဖလမဒဒိံ တဒါ၊

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ ထေရော အတ္တနော ပဋိပတ္တိံ ပစ္စဝေက္ခိတွာ ပီတိသောမနဿဇာတော ‘‘နဒန္တိ မောရာ’’တိအာဒိနာ တာယေဝ ဂါထာ ပစ္စုဒါဟာသိ. တေနဿ ဣဒမေဝ အညာဗျာကရဏံ အဟောသီတိ.

စူဠကတ္ထေရဂါထာဝဏ္ဏနာ နိဋ္ဌိတာ.