၅. ဝိသာခပဉ္စာလပုတ္တတ္ထေရဂါထာဝဏ္ဏနာ

န ဥက္ခိပေ နော စ ပရိက္ခိပေ ပရေတိ အာယသ္မတော ဝိသာခဿ ပဉ္စာလပုတ္တဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိဿယံ ပုညံ ဥပစိနန္တော ဣတော စုဒ္ဒသေ ကပ္ပေ ပစ္စန္တဂါမေ ဒလိဒ္ဒကုလေ နိဗ္ဗတ္တိတွာ ဝိညုတံ ပတ္တော ဧကဒိဝသံ ဖလပရိယေသနံ စရန္တေဟိ တသ္မိံ ဂါမေ မနုဿေဟိ သဒ္ဓိံ အရညံ ဂတော တတ္ထ ဧကံ ပစ္စေကဗုဒ္ဓံ ဒိသွာ ပသန္နမာနသော ဝလ္လိဖလံ အဒါသိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ မဂဓရဋ္ဌေ မဏ္ဍလိကရာဇကုလေ နိဗ္ဗတ္တိတွာ ဝိသာခေါတိ လဒ္ဓနာမော ပဉ္စာလရာဇဓီတုယာ ပုတ္တဘာဝတော ပစ္ဆာ ပဉ္စာလပုတ္တောတိ ပညာယိတ္ထ. သော ပိတရိ မတေ ရဇ္ဇံ ကာရေန္တော သတ္ထရိ အတ္တနော ဂါမသမီပဂတေ သတ္ထု သန္တိကံ ဂန္တွာ ဓမ္မံ သုတွာ ပဋိလဒ္ဓသဒ္ဓေါ ပဗ္ဗဇိတွာ သတ္ထာရာ သဒ္ဓိံ သာဝတ္ထိံ ဂတော ဝိပဿနံ ပဋ္ဌပေတွာ နစိရဿေဝ ဆဠဘိညော အဟောသိ. တေန ဝုတ္တံ အပဒါနေ (အပ. ထေရ ၁.၃၉.၃၁-၃၆) –

‘‘သဗ္ဗေ ဇနာ သမာဂမ္မ၊ အဂမိံသု ဝနံ တဒါ၊

ဖလမနွေသမာနာ တေ၊ အလဘိံသု ဖလံ တဒါ.

‘‘တတ္ထဒ္ဒသာသိံ သမ္ဗုဒ္ဓံ၊ သယမ္ဘုံ အပရာဇိတံ၊

ပသန္နစိတ္တော သုမနော၊ ဝလ္လိဖလမဒါသဟံ.

‘‘စတုဒ္ဒသေ ဣတော ကပ္ပေ၊ ယံ ဖလမဒဒိံ တဒါ၊

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

ဆဠဘိညော ပန ဟုတွာ ထေရော ဉာတီနံ အနုကမ္ပာယ ဇာတိဘူမိံ အဂမာသိ. တတ္ထ မနုဿာ ထေရံ ဥပသင်္ကမိတွာ ကာလေန ကာလံ ဓမ္မံ သုဏန္တာ ဧကဒိဝသံ ‘‘ကတိဟိ နု ခေါ၊ ဘန္တေ၊ အင်္ဂေဟိ သမန္နာဂတော ဓမ္မကထိကော ဟောတီ’’တိ ဓမ္မကထိကလက္ခဏံ ပုစ္ဆိံသု. ထေရော တေသံ ဓမ္မကထိကလက္ခဏံ ကထေန္တော –

၂၀၉. ‘‘န ဥက္ခိပေ နော စ ပရိက္ခိပေ ပရေ၊ န ဩက္ခိပေ ပါရဂတံ န ဧရယေ၊

န စတ္တဝဏ္ဏံ ပရိသာသု ဗျာဟရေ၊ အနုဒ္ဓတော သမ္မိတဘာဏိ သုဗ္ဗတော.

၂၁၀. ‘‘သုသုခုမနိပုဏတ္ထဒဿိနာ၊ မတိကုသလေန နိဝါတဝုတ္တိနာ၊

သံသေဝိတဗုဒ္ဓသီလိနာ၊ နိဗ္ဗာနံ န ဟိ တေန ဒုလ္လဘ’’န္တိ. –

ဂါထာဒွယံ အဘာသိ.

တတ္ထ န ဥက္ခိပေတိ အတ္တာနံ န ဥက္ခိပေယျ၊ ဇာတိအာဒီဟိ ဗာဟုသစ္စာဒီဟိ စ အတ္တုက္ကံသနံ န ကရေယျ. နော စ ပရိက္ခိပေ ပရေတိ ပရေ ပရပုဂ္ဂလေ တေဟေဝ ဇာတိအာဒီဟိ နော ပရိက္ခိပေ ပရိစ္ဆိန္ဒိတွာ န ခိပေယျ ဂုဏပရိဓံသနဝသေန ဝါ န ခိပေယျ. န ဩက္ခိပေ ပရေ ဣစ္စေဝံ သမ္ဗန္ဓော. ပရေ ဩဇ္ဈာပနဝသေန န ဩက္ခိပေ ဟေဋ္ဌတော ကတွာ ပရေ န ဩလောကာပေယျ၊ န ဩဇ္ဈာပေယျာတိ အတ္ထော. ‘‘န ဥက္ခိပေ’’တိ ကေစိ ပဌန္တိ၊ သော ဧဝတ္ထော. ပါရဂတန္တိ သံသာရပါရံ ဝိယ ဝိဇ္ဇာယ ပါရံ ဂတံ ခီဏာသဝံ တေဝိဇ္ဇံ ဆဠဘိညံ ဝါ န ဧရယေ န ဃဋ္ဋယေ န အာသာဒေယျ. န စတ္တဝဏ္ဏံ ပရိသာသု ဗျာဟရေတိ အတ္တနော ဝဏ္ဏံ ဂုဏံ လာဘသက္ကာရသိလောကံ နိကာမယမာနော ခတ္တိယပရိသာဒီသု န ဘာသေယျ. အနုဒ္ဓတောတိ ဥဒ္ဓစ္စရဟိတော. ဥဒ္ဓတဿ ဟိ ဝစနံ နာဒိယန္တိ. သမ္မိတဘာဏီတိ သမ္မဒေဝ မိတဘာဏီ၊ ကာလေန သာပဒေသံ ပရိယန္တဝတိံ အတ္ထသဉှိတမေဝ ဝါစံ ဘာသနသီလောတိ အတ္ထော. ဣတော အညထာ ဝဒန္တဿ ဝစနံ အဂဟဏီယံ ဟောတိ. သုဗ္ဗတောတိ သုန္ဒရဝတော သီလသမ္ပန္နော. ‘‘သိယာ’’တိ ကိရိယာပဒံ အာနေတွာ ယောဇေတဗ္ဗံ.

ဧဝံ ထေရော သင်္ခေပေနေဝ ဓမ္မကထိကလက္ခဏံ ဝတွာ တေသံ ဂုဏာနံ အတ္တနိ လဗ္ဘမာနတံ အဓိမုစ္စိတွာ ဘိယျောသောမတ္တာယ အဘိပ္ပသန္နံ မဟာဇနံ ဉတွာ ‘‘ဧဝံဝိဓဿ ဓမ္မကထိကဿ ဝိမုတ္တာယတနသန္နိဿိတဿ န နိဗ္ဗာနံ ဒုလ္လဘံ၊ အထ ခေါ သုလဘမေဝါ’’တိ ဒဿေန္တော ‘‘သုသုခုမနိပုဏတ္ထဒဿိနာ’’တိ ဒုတိယဂါထမာဟ. တဿတ္ထော ဟေဋ္ဌာ ဝုတ္တောယေဝ.

ဝိသာခပဉ္စာလပုတ္တတ္ထေရဂါထာဝဏ္ဏနာ နိဋ္ဌိတာ.