၉. ဘာရဒွါဇတ္ထေရဂါထာဝဏ္ဏနာ

နဒန္တိ ဧဝံ သပ္ပညာတိ အာယသ္မတော ဘာရဒွါဇတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ပုညာနိ ဥပစိနန္တော ဣတော ဧကတိံသေ ကပ္ပေ ကုလဂေဟေ နိဗ္ဗတ္တိတွာ ဝိညုတံ ပတ္တော ဧကဒိဝသံ သုမနံ နာမ ပစ္စေကဗုဒ္ဓံ ပိဏ္ဍာယ စရန္တံ ဒိသွာ ပသန္နမာနသော ပရိပက္ကံ ဝလ္လိကာရဖလံ အဒါသိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ ရာဇဂဟေ ဗြာဟ္မဏကုလေ နိဗ္ဗတ္တိတွာ ဂေါတ္တနာမေန ဘာရဒွါဇောတွေဝ ပညာယိတ္ထ. သော ဝယပ္ပတ္တော ဃရာဝါသံ ဝသန္တော ဧကပုတ္တံ လဘိ. တဿ ‘‘ကဏှဒိန္နော’’တိ နာမံ အကာသိ. တဿ ဝိညုတံ ပတ္တကာလေ ‘‘တာတ၊ အသုကဿ နာမ အာစရိယဿ သန္တိကေ သိပ္ပံ သိက္ခိတွာ ဧဟီ’’တိ တံ တက္ကသိလံ ပေသေသိ. သော ဂစ္ဆန္တော အန္တရာမဂ္ဂေ သတ္ထု သာဝကံ အညတရံ မဟာထေရံ ကလျာဏမိတ္တံ လဘိတွာ တဿ သန္တိကေ ဓမ္မံ သုတွာ ပဋိလဒ္ဓသဒ္ဓေါ ပဗ္ဗဇိတွာ ကတပုဗ္ဗကိစ္စော ဝိပဿနာယ ကမ္မံ ကရောန္တော နစိရဿေဝ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၂.၄၈.၆၆-၇၀) –

‘‘သုမနော နာမ သမ္ဗုဒ္ဓေါ၊ တက္ကရာယံ ဝသီ တဒါ၊

ဝလ္လိကာရဖလံ ဂယှ၊ သယမ္ဘုဿ အဒါသဟံ.

‘‘ဧကတိံသေ ဣတော ကပ္ပေ၊ ယံ ဖလံ အဒဒိံ တဒါ၊

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အထဿ ပိတာ ဘာရဒွါဇော ဝေဠုဝနေ ဝိဟရန္တံ ဘဂဝန္တံ ဥပသင်္ကမိတွာ ဓမ္မံ သုတွာ ပဗ္ဗဇိတွာ နစိရဿေဝ အရဟတ္တံ သစ္ဆာကာသိ. အထ ပုတ္တော သတ္ထာရံ ဝန္ဒိတုံ ရာဇဂဟံ အာဂတော သတ္ထု သန္တိကေ နိသိန္နံ ပိတရံ ဒိသွာ တုဋ္ဌစိတ္တော ‘‘ပိတာပိ ခေါ မေ ပဗ္ဗဇိတော၊ ကိံ နု ခေါ တေန ပဗ္ဗဇ္ဇာကိစ္စံ မတ္ထကံ ပါပိတ’’န္တိ ဝီမံသန္တော ခီဏာသဝဘာဝံ ဉတွာ တံ သီဟနာဒံ နဒါပေတုကာမော၊ ‘‘သာဓု၊ ခေါ တုမှေဟိ ကတံ ပဗ္ဗဇန္တေဟိ၊ ပဗ္ဗဇ္ဇာကိစ္စံ ပန မတ္ထကံ ပါပိတ’’န္တိ ပုစ္ဆိ. ဘာရဒွါဇော ပုတ္တဿ အဓိဂမံ ဒီပေန္တော –

၁၇၇. ‘‘နဒန္တိ ဧဝံ သပ္ပညာ၊ သီဟာဝ ဂိရိဂဗ္ဘရေ၊

ဝီရာ ဝိဇိတသင်္ဂါမာ၊ ဇေတွာ မာရံ သဝါဟနံ.

၁၇၈. ‘‘သတ္ထာ စ ပရိစိဏ္ဏော မေ၊ ဓမ္မော သံဃော စ ပူဇိတော၊

အဟဉ္စ ဝိတ္တော သုမနော၊ ပုတ္တံ ဒိသွာ အနာသဝ’’န္တိ. – ဂါထာဒွယံ အဘာသိ၊

တတ္ထ နဒန္တီတိ ယထာဘုစ္စဂုဏာဘိဗျာဟာရဝသေန အဘီတနာဒံ နဒန္တိ ဂဇ္ဇန္တိ. ဧဝန္တိ ဣဒါနိ ဝတ္တဗ္ဗာကာရဒဿနံ. သပ္ပညာတိ အဂ္ဂမဂ္ဂပညာဓိဂမေန သဗ္ဗပညာဓိဂမေန သဗ္ဗပညာဝေပုလ္လပ္ပတ္တာ. ဝီရာတိ စတုဗ္ဗိဓသမ္မပ္ပဓာနဝီရိယသမ္ပန္နတာယ ဝီရာ၊ တတော ဧဝ အနဝသေသသံကိလေသပက္ခနိမ္မထနေန သဝါဟနံ ကိလေသမာရံ အဘိသင်္ခါရမာရံ ဒေဝပုတ္တမာရဉ္စ ဇေတွာ သဗ္ဗသော ဝိဇိတသင်္ဂါမာ နဒန္တိ သပ္ပညာတိ သမ္ဗန္ဓော.

ဧဝံ ဝိဇေတဗ္ဗဝိဇယေန သီဟနာဒံ ဒဿေတွာ ဣဒါနိ အာရာဓေတဗ္ဗသမာရာဓနေန ဣစ္ဆိတဗ္ဗသိဒ္ဓိယာ စ တံ ဒဿေတုံ၊ ‘‘သတ္ထာ စ ပရိစိဏ္ဏော မေ’’တိ ဒုတိယံ ဂါထမာဟ. တတ္ထ သတ္ထာ စ ပရိစိဏ္ဏော မေတိ မမ သတ္ထာ သမ္မာသမ္ဗုဒ္ဓေါ ယထာနုသိဋ္ဌံ ဩဝါဒါနုသာသနီကရဏေန မယာ ပရိစိဏ္ဏော ဥပါသိတော၊ န ဓမ္မာဓိကရဏံ ဝိသောသိတောတိ အဓိပ္ပါယော. ဓမ္မော သံဃော စ ပူဇိတောတိ နဝဝိဓောပိ လောကုတ္တရဓမ္မော၊ ယထာပဋိပတ္တိယာဂတမဂ္ဂါနုပ္ပတ္တိယာ သီလဒိဋ္ဌိသာမညဂမနေန အရိယသံဃော စ မယာ ပူဇိတော မာနိတော. အဟဉ္စ ဝိတ္တော သုမနော၊ ပုတ္တံ ဒိသွာ အနာသဝန္တိ မမ ပုတ္တံ အနာသဝံ သဗ္ဗသော ခီဏာသဝံ ဒိသွာ ဒဿနဟေတု အဟမ္ပိ ဝိတ္တော နိရာမိသာယ ပီတိယာ တုဋ္ဌော၊ တတောယေဝ နိရာမိသေန သောမနဿေန သုမနော ဇာတောတိ အတ္ထော.

ဘာရဒွါဇတ္ထေရဂါထာဝဏ္ဏနာ နိဋ္ဌိတာ.