၁၀. ကဏှဒိန္နတ္ထေရဂါထာဝဏ္ဏနာ

ဥပါသိတာ သပ္ပုရိသာတိ အာယသ္မတော ကဏှဒိန္နတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ပုညာနိ ဥပစိနန္တော ဣတော စတုနဝုတေ ကပ္ပေ ကုလဂေဟေ နိဗ္ဗတ္တိတွာ ဝိညုတံ ပတ္တော ဧကဒိဝသံ သောဘိတံ နာမ ပစ္စေကဗုဒ္ဓံ ဒိသွာ ပသန္နစိတ္တော ပုန္နာဂပုပ္ဖေဟိ ပူဇံ အကာသိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ ရာဇဂဟေ ဗြာဟ္မဏကုလေ နိဗ္ဗတ္တိတွာ ကဏှဒိန္နောတိ လဒ္ဓနာမော ဝယပ္ပတ္တော ဥပနိဿယသမ္ပတ္တိယာ စောဒိယမာနော ဓမ္မသေနာပတိံ ဥပသင်္ကမိတွာ ဓမ္မံ သုတွာ ပဋိလဒ္ဓသဒ္ဓေါ ပဗ္ဗဇိတွာ ဝိပဿနံ ဝဍ္ဎေတွာ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၂.၄၈.၆၁-၆၅) –

‘‘သောဘိတော နာမ သမ္ဗုဒ္ဓေါ၊ စိတ္တကူဋေ ဝသီ တဒါ၊

ဂဟေတွာ ဂိရိပုန္နာဂံ၊ သယမ္ဘုံ အဘိပူဇယိံ.

‘‘စတုန္နဝုတိတော ကပ္ပေ၊ ယံ ဗုဒ္ဓမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ အညံ ဗျာကရောန္တော –

၁၇၉. ‘‘ဥပါသိတာ သပ္ပုရိသာ၊ သုတာ ဓမ္မာ အဘိဏှသော၊

သုတွာန ပဋိပဇ္ဇိဿံ၊ အဉ္ဇသံ အမတောဂဓံ.

၁၈၀. ‘‘ဘဝရာဂဟတဿ မေ သတော၊ ဘဝရာဂေါ ပုန မေ န ဝိဇ္ဇတိ၊

န စာဟု န စ မေ ဘဝိဿတိ၊ န စ မေ ဧတရဟိ ဝိဇ္ဇတီ’’တိ. –

ဂါထာဒွယံ အဘာသိ.

တတ္ထ ဥပါသိတာတိ ပရိစရိတာ ပဋိပတ္တိပယိရုပါသနာယ ပယိရုပါသိတာ. သပ္ပုရိသာတိ သန္တေဟိ သီလာဒိဂုဏေဟိ သမန္နာဂတာ ပုရိသာ၊ အရိယပုဂ္ဂလာ သာရိပုတ္တတ္ထေရာဒယော. ဧတေန ပုရိမစက္ကဒွယသမ္ပတ္တိမတ္တနော ဒဿေတိ. န ဟိ ပတိရူပဒေသဝါသေန ဝိနာ သပ္ပုရိသူပနိဿယော သမ္ဘဝတိ. သုတာ ဓမ္မာတိ သစ္စပဋိစ္စသမုပ္ပါဒါဒိပဋိသံယုတ္တဓမ္မာ သောတဒွါရာနုသာရေန ဥပဓာရိတာ. ဧတေန အတ္တနော ဗာဟုသစ္စံ ဒဿေန္တော ပစ္ဆိမစက္ကဒွယသမ္ပတ္တိံ ဒဿေတိ. အဘိဏှသောတိ ဗဟုသော န ကာလေန ကာလံ. ဣဒဉ္စ ပဒံ ‘‘ဥပါသိတာ သပ္ပုရိသာ’’တိ ဧတ္ထာပိ ယောဇေတဗ္ဗံ. သုတွာန ပဋိပဇ္ဇိဿံ၊ အဉ္ဇသံ အမတောဂဓန္တိ တေ ဓမ္မေ သုတွာ တတ္ထ ဝုတ္တရူပါရူပဓမ္မေ သလက္ခဏာဒိတော ပရိဂ္ဂဟေတွာ အနုက္ကမေန ဝိပဿနံ ဝဍ္ဎေတွာ အမတောဂဓံ နိဗ္ဗာနပတိဋ္ဌံ တံသမ္ပာပကံ အဉ္ဇသံ အရိယံ အဋ္ဌင်္ဂိကံ မဂ္ဂံ ပဋိပဇ္ဇိံ ပါပုဏိံ.

ဘဝရာဂဟတဿ မေ သတောတိ ဘဝရာဂေန ဘဝတဏှာယ အနာဒိမတိ သံသာရေ ဟတဿ ဥပဒ္ဒုတဿ မမ သတော သမာနဿ၊ အဂ္ဂမဂ္ဂေန ဝါ ဟတဘဝရာဂဿ. ဘဝရာဂေါ ပုန မေ န ဝိဇ္ဇတီတိ တတော ဧဝ ပုန ဣဒါနိ ဘဝရာဂေါ မေ နတ္ထိ. န စာဟု န မေ ဘဝိဿတိ၊ န စ မေ ဧတရဟိ ဝိဇ္ဇတီတိ ယဒိပိ ပုဗ္ဗေ ပုထုဇ္ဇနကာလေ သေက္ခကာလေ စ မေ ဘဝရာဂေါ အဟောသိ၊ အဂ္ဂမဂ္ဂပ္ပတ္တိတော ပန ပဋ္ဌာယ န စာဟု န စ အဟောသိ၊ အာယတိမ္ပိ န မေ ဘဝိဿတိ၊ ဧတရဟိ အဓုနာပိ န စ မေ ဝိဇ္ဇတိ န စ ဥပလဗ္ဘတိ၊ ပဟီနောတိ အတ္ထော. ဘဝရာဂဝစနေနေဝ စေတ္ထ တဒေကဋ္ဌတာယ မာနာဒီနမ္ပိ အဘာဝေါ ဝုတ္တောတိ သဗ္ဗသော ပရိက္ခီဏဘဝသံယောဇနတံ ဒဿေတိ.

ကဏှဒိန္နတ္ထေရဂါထာဝဏ္ဏနာ နိဋ္ဌိတာ.

တတိယဝဂ္ဂဝဏ္ဏနာ နိဋ္ဌိတာ.