၇. နန္ဒကတ္ထေရဂါထာဝဏ္ဏနာ

ယထာပိ ဘဒ္ဒေါ အာဇညောတိ အာယသ္မတော နန္ဒကတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ပုညာနိ ကရောန္တော သိခိဿ ဘဂဝတော ကာလေ ပစ္စန္တဒေသေ ဥပ္ပဇ္ဇိတွာ ဝိညုတံ ပတ္တော ဝနစာရိကော ဟုတွာ ဝိစရန္တော ဧကဒိဝသံ သတ္ထု စင်္ကမနဋ္ဌာနံ ဒိသွာ ပသန္နစိတ္တော ဝါလုကာ ဩကိရိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ စမ္ပာယံ ဂဟပတိကုလေ နိဗ္ဗတ္တိ၊ တဿ နန္ဒကောတိ နာမံ အကံသု. ဇေဋ္ဌကဘာတာ ပနဿ ဘရတော နာမ. တဿ ပုဗ္ဗယောဂေါ အနန္တရဝတ္ထုသ္မိံ အာဝိဘဝိဿတိ. တေ ဥဘောပိ ဝိညုတံ ပတွာ အာယသ္မန္တံ သောဏံ ကောဠိဝိသံ ပဗ္ဗဇိတံ သုတွာ ‘‘သောဏောပိ နာမ တထာသုခုမာလော ပဗ္ဗဇိ၊ ကိမင်္ဂံ ပန မယ’’န္တိ ပဗ္ဗဇိံသု. တေသု ဘရတော နစိရဿေဝ ဝိပဿနံ ဝဍ္ဎေတွာ ဆဠဘိညော အဟောသိ. နန္ဒကော ပန ကိလေသာနံ ဗလဝဘာဝေန တာဝ ဝိပဿနံ ဥဿုက္ကာပေတုံ နာသက္ခိ၊ ဝိပဿနာယ ကမ္မံ ကရောတိ ဧဝ. အထဿ ဘရတတ္ထေရော အာသယံ ဉတွာ အဝဿယော ဘဝိတုကာမော တံ ပစ္ဆာသမဏံ ကတွာ ဝိဟာရတော နိက္ခမိတွာ မဂ္ဂသမီပေ နိသိန္နော ဝိပဿနာကထံ ကထေသိ.

တေန စ သမယေန သကဋသတ္ထေ ဂစ္ဆန္တေ ဧကော သကဋေ ယုတ္တော ဂေါဏော စိက္ခလ္လဋ္ဌာနေ သကဋံ ဥဒ္ဓရိတုံ အသက္ကောန္တော ပရိပတိ. တတော နံ သတ္ထဝါဟော သကဋာ မောစေတွာ တိဏဉ္စ ပါနီယဉ္စ ဒတွာ ပရိဿမံ အပနေတွာ ပုန ဓုရေ ယောဇေသိ. တတော ဂေါဏော ဝူပသန္တပရိဿမော လဒ္ဓဗလော တံ သကဋံ စိက္ခလ္လဋ္ဌာနတော ဥဒ္ဓရိတွာ ထလေ ပတိဋ္ဌာပေသိ. အထ ဘရတတ္ထေရော နန္ဒကဿ ‘‘ပဿသိ နော တွံ၊ အာဝုသော နန္ဒက၊ ဣမဿ ကမ္မ’’န္တိ တံ နိဒဿေတွာ တေန ‘‘ပဿာမီ’’တိ ဝုတ္တေ ‘‘ဣမမတ္ထံ သုဋ္ဌု ဥပဓာရေဟီ’’တိ အာဟ. ဣတရော ‘‘ယထာယံ ဂေါဏော ဝူပသန္တပရိဿမော ပင်္ကဋ္ဌာနတော ဘာရံ ဥဗ္ဗဟတိ၊ ဧဝံ မယာပိ သံသာရပင်္ကတော အတ္တာ ဥဒ္ဓရိတဗ္ဗော’’တိ တမေဝါရမ္မဏံ ကတွာ ဝိပဿနာယ ကမ္မံ ကရောန္တော နစိရဿေဝ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၂.၄၈.၉၀-၉၅) –

‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ၊

ဝါတမိဂံ ဂဝေသန္တော၊ စင်္ကမံ အဒ္ဒသံ အဟံ.

‘‘ဥစ္ဆင်္ဂေန ပုလိနံ ဂယှ၊ စင်္ကမေ ဩကိရိံ အဟံ၊

ပသန္နစိတ္တော သုမနော၊ သုဂတဿ သိရီမတော.

‘‘ဧကတိံသေ ဣတော ကပ္ပေ၊ ပုလိနံ ဩကိရိံ အဟံ၊

ဒုဂ္ဂတိံ နာဘိဇာနာမိ၊ ပုလိနဿ ဣဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ အတ္တနော ဇေဋ္ဌဘာတိကဿ ဘရတတ္ထေရဿ သန္တိကေ အညံ ဗျာကရောန္တော –

၁၇၃. ‘‘ယထာပိ ဘဒ္ဒေါ အာဇညော၊ ခလိတွာ ပတိတိဋ္ဌတိ၊

ဘိယျော လဒ္ဓါန သံဝေဂံ၊ အဒီနော ဝဟတေ ဓုရံ.

၁၇၄. ‘‘ဧဝံ ဒဿနသမ္ပန္နံ၊ သမ္မာသမ္ဗုဒ္ဓသာဝကံ၊

အာဇာနီယံ မံ ဓာရေထ၊ ပုတ္တံ ဗုဒ္ဓဿ ဩရသ’’န္တိ. – ဂါထာဒွယံ အဘာသိ၊

တတ္ထ ဘိယျော လဒ္ဓါန သံဝေဂံ၊ အဒီနော ဝဟတေ ဓုရန္တိ ‘‘မယှံ ဇာတိဗလဝီရိယာနံ အနနုစ္ဆဝိကမေတံ ယဒိဒံ အာဂတဿ ဘာရဿ အဝဟန’’န္တိ သံဝေဂံ လဘိတွာ အဒီနော အဒီနမာနသော အလီနစိတ္တော. ‘‘အလီနော’’တိ ဝါ ပါဌော၊ သော ဧဝ အတ္ထော. ဘိယျော ပုနပ္ပုနံ ဘိယျောသောမတ္တာယ အတ္တနော ဓုရံ ဘာရံ ဝဟတေ ဥဗ္ဗဟတိ. သေသံ ဟေဋ္ဌာ ရမဏီယဝိဟာရိတ္ထေရဿ ဂါထာဝဏ္ဏနာယံ ဝုတ္တနယမေဝ.

နန္ဒကတ္ထေရဂါထာဝဏ္ဏနာ နိဋ္ဌိတာ.