၈. ကိမိလတ္ထေရဂါထာဝဏ္ဏနာ

ပါစီနဝံသဒါယမှီတိအာဒိကာ အာယသ္မတော ကိမိလတ္ထေရဿ ဂါထာ. ကာ ဥပ္ပတ္တိ? တဿ ပုဗ္ဗယောဂေါ သံဝေဂုပ္ပတ္တိ ပဗ္ဗဇ္ဇာ စ ဧကကနိပါတေ ‘‘အဘိသတ္တော’’တိ ဂါထာယ သံဝဏ္ဏနာယံ ဝုတ္တာယေဝ. တာယ စ ဂါထာယ ထေရေန အတ္တနော ဝိသေသာဓိဂမဿ ကာရဏံ ဒဿိတံ. ဣဓ ပန အဓိဂတဝိသေသဿ အတ္တနော အာယသ္မတာ စ အနုရုဒ္ဓေန အာယသ္မတာ စ နန္ဒိယေန သဟ သမဂ္ဂဝါသော ဒဿိတောတိ ဝေဒိတဗ္ဗံ. သမဂ္ဂဝါသံ ပန ဝသန္တာ တေ ယထာ စ ဝသိံသု၊ တံ ဒဿေန္တော –

၁၅၅. ‘‘ပါစီနဝံသဒါယမှိ၊ သကျပုတ္တာ သဟာယကာ၊

ပဟာယာနပ္ပကေ ဘောဂေ၊ ဥဉ္ဆေ ပတ္တာဂတေ ရတာ.

၁၅၆. ‘‘အာရဒ္ဓဝီရိယာ ပဟိတတ္တာ၊ နိစ္စံ ဒဠှပရက္ကမာ၊

ရမန္တိ ဓမ္မရတိယာ၊ ဟိတွာန လောကိယံ ရတိ’’န္တိ. – ဂါထာဒွယံ အဘာသိ၊

တတ္ထ ပါစီနဝံသဒါယမှီတိ ပါစီနဝံသနာမကေ ရက္ခိတဂေါပိတေ သဟပရိစ္ဆေဒေ ဝနေ. တဉှိ ဝနံ ဂါမဿ ပါစီနဒိသာယံ ဌိတတ္တာ ဝံသဂုမ္ဗပရိက္ခိတ္တတ္တာ စ ‘‘ပါစီနဝံသဒါယော’’တိ ဝုတ္တော၊ ဝံသဝနဘာဝေန ဝါတိ. သကျပုတ္တာတိ အနုရုဒ္ဓတ္ထေရာဒယော သကျရာဇကုမာရာ. သဟာယကာတိ သံဝေဂုပ္ပတ္တိပဗ္ဗဇ္ဇာသမဏဓမ္မကရဏသံဝါသေဟိ သဟ အယနတော ပဝတ္တနတော သဟာယကာ. ပဟာယာနပ္ပကေ ဘောဂေတိ ဥဠာရေန ပုညာနုဘာဝေန အဓိဂတေ ကုလပရမ္ပရာဂတေ စ မဟန္တေ ဘောဂက္ခန္ဓေ ဆဍ္ဍေတွာ. ‘‘သဟာယာနပ္ပကေ’’တိပိ ပါဠိ. ဥဉ္ဆေ ပတ္တာဂတေ ရတာတိ ဥဉ္ဆာစရိယာယ အာဘတတ္တာ ဥဉ္ဆေ ပတ္တေ အာဂတတ္တာ ပတ္တာဂတေ ပတ္တပရိယာပန္နေ ရတာ အဘိရတာ၊ သံဃဘတ္တာဒိအတိရေကလာဘံ ပဋိက္ခိပိတွာ ဇင်္ဃဗလံ နိဿာယ ဘိက္ခာစရိယာယ လဒ္ဓေန မိဿကဘတ္တေနေဝ သန္တုဋ္ဌာတိ အတ္ထော.

အာရဒ္ဓဝီရိယာတိ ဥတ္တမတ္ထဿ အဓိဂမာယ အာဒိတောဝ ပဂေဝ သမ္ပာဒိတဝီရိယာ. ပဟိတတ္တာတိ နိန္နပေါဏပဗ္ဘာရဘာဝေန ကာလေန ကာလံ သမာပဇ္ဇနေန စ နိဗ္ဗာနံ ပတိပေသိတစိတ္တာ. နိစ္စံ ဒဠှပရက္ကမာတိ ဝတ္တပဋိပတ္တီသု ဒိဋ္ဌဓမ္မသုခဝိဟာရာနုယောဂေန သဗ္ဗကာလံ အသိထိလပရက္ကမာ. ရမန္တိ ဓမ္မရတိယာ၊ ဟိတွာန လောကိယံ ရတိန္တိ လောကေ ဝိဒိတတာယ လောကပရိယာပန္နတာယ စ လောကိယံ ရူပါရမ္မဏာဒိရတိံ ပဟာယ မဂ္ဂပညာယ ပဇဟိတွာ လောကုတ္တရဓမ္မရတိယာ အဂ္ဂဖလနိဗ္ဗာနာဘိရတိယာ စ ရမန္တိ အဘိရမန္တီတိ.

ကိမိလတ္ထေရဂါထာဝဏ္ဏနာ နိဋ္ဌိတာ.