၄. ဂင်္ဂါတီရိယတ္ထေရဂါထာဝဏ္ဏနာ

တိဏ္ဏံ မေ တာလပတ္တာနန္တိအာဒိကာ အာယသ္မတော ဂင်္ဂါတီရိယတ္ထေရဿ ဂါထာ. ကာ ဥပ္ပတ္တိ? အယံ ကိရ ပဒုမုတ္တရဿ ဘဂဝတော ကာလေ ကုလဂေဟေ နိဗ္ဗတ္တိတွာ ဝိညုတံ ပတ္တော သာသနေ အဘိပ္ပသန္နော ဟုတွာ ဘိက္ခုသံဃဿ ပါနီယမဒါသိ. သော တေန ပုညကမ္မေန ဒေဝလောကေ နိဗ္ဗတ္တိတွာ အပရာပရံ ပုညာနိ ကတွာ ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ သာဝတ္ထိယံ အညတရဿ ဂဟပတိဿ ပုတ္တော ဟုတွာ နိဗ္ဗတ္တိ၊ ‘‘ဒတ္တော’’တိဿ နာမံ အဟောသိ. သော ဝယပ္ပတ္တော ဃရာဝါသံ ဝသန္တော အဂမနီယဋ္ဌာနဘာဝံ အဇာနိတွာ ဝီတိက္ကမံ ကတွာ ပုန အဂမနီယဋ္ဌာနဘာဝံ ဉတွာ သံဝေဂဇာတော ပဗ္ဗဇိတွာ တံ ကမ္မံ ဇိဂုစ္ဆိတွာ လူခပဋိပတ္တိံ အနုတိဋ္ဌန္တော ပံသုကူလစီဝရံ ဆဝသိတ္တသဒိသံ မတ္တိကာပတ္တဉ္စ ဂဟေတွာ ဂင်္ဂါတီရေ တီဟိ တာလပတ္တေဟိ ကုဋိကံ ကတွာ ဝိဟာသိ၊ တေနေဝဿ ဂင်္ဂါတီရိယောတိ သမညာ အဟောသိ. သော ‘‘အရဟတ္တံ အပ္ပတွာ န ကေနစိ သလ္လပိဿာမီ’’တိ စိတ္တံ အဓိဋ္ဌာယ ပဌမံ သံဝစ္ဆရံ တုဏှီဘူတော ဝစီဘေဒံ အကရောန္တောဝ ဝိဟာသိ. ဒုတိယေ သံဝစ္ဆရေ ဂေါစရဂါမေ အညတရာယ ဣတ္ထိယာ ‘‘မူဂေါ နု ခေါ နော’’တိ ဝီမံသိတုကာမာယ ပတ္တေ ခီရံ အာသိဉ္စန္တိယာ ဟတ္ထဝိဟာရေ ကတေပိ ဩကိရိတေ၊ ‘‘အလံ၊ ဘဂိနီ’’တိ ဝါစံ နိစ္ဆရိ. တတိယေ ပန သံဝစ္ဆရေ အန္တရဝဿေဝ ဃဋယန္တော ဝါယမန္တော အရဟတ္တံ ပါပုဏိ၊ တေန ဝုတ္တံ အပဒါနေ (အပ. ထေရ ၂.၅၀.၅၁-၅၆) –

‘‘ပဒုမုတ္တရဗုဒ္ဓဿ၊ ဘိက္ခုသံဃေ အနုတ္တရေ၊

ပသန္နစိတ္တော သုမနော၊ ပါနီဃဋမပူရယိံ.

‘‘ပဗ္ဗတဂ္ဂေ ဒုမဂ္ဂေ ဝါ၊ အာကာသေ ဝါထ ဘူမိယံ၊

ယဒါ ပါနီယမိစ္ဆာမိ၊ ခိပ္ပံ နိဗ္ဗတ္တတေ မမ.

‘‘သတသဟဿိတော ကပ္ပေ၊ ယံ ဒါနမဒဒိံ တဒါ၊

ဒုဂ္ဂတိံ နာဘိဇာနာမိ၊ ဒကဒါနဿိဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟာ ပန ဟုတွာ အတ္တနော ပုဗ္ဗဘာဂပဋိပတ္တိယာ ဝိဘာဝနမုခေန အညံ ဗျာကရောန္တော –

၁၂၇. ‘‘တိဏ္ဏံ မေ တာလပတ္တာနံ၊ ဂင်္ဂါတီရေ ကုဋီ ကတာ၊

ဆဝသိတ္တောဝ မေ ပတ္တော၊ ပံသုကူလဉ္စ စီဝရံ.

၁၂၈. ‘‘ဒွိန္နံ အန္တရဝဿာနံ၊ ဧကာ ဝါစာ မေ ဘာသိတာ၊

တတိယေ အန္တရဝဿမှိ၊ တမောခန္ဓော ပဒါလိတော’’တိ. – ဂါထာဒွယံ အဘာသိ၊

တတ္ထ တိဏ္ဏံ မေ တာလပတ္တာနံ၊ ဂင်္ဂါတီရေ ကုဋီ ကတာတိ တာလရုက္ခတော ပဟိတေဟိ တီဟိ တာလပဏ္ဏေဟိ မယှံ ဝဿနပရိဟရဏတ္ထံ ဂင်္ဂါယ နဒိယာ တီရေ ကုဋိကာ ကတာ. တေန အတ္တနော သေနာသနသန္တောသံ ဒဿေတိ. ဝုတ္တဉှိ ဓမ္မသေနာပတိနာ –

‘‘ပလ္လင်္ကေန နိသိန္နဿ၊ ဇဏ္ဏုကေ နာဘိဝဿတိ၊

အလံ ဖာသုဝိဟာရာယ၊ ပဟိတတ္တဿ ဘိက္ခုနော’’တိ. (ထေရဂါ. ၉၈၅၊ မိ. ပ. ၆.၁.၁)၊

‘‘တာလပတ္တီန’’န္တိပိ ပါဌော၊ သော ဧဝတ္ထော. ဆဝသိတ္တောဝ မေ ပတ္တောတိ မယှံ ပတ္တော ဆဝသိတ္တသဒိသော၊ မတာနံ ခီရသေစနကုဏ္ဍသဒိသောတိ အတ္ထော. ပံသုကူလဉ္စ စီဝရန္တိ စီဝရဉ္စ မေ အန္တရမဂ္ဂသုသာနာဒီသု ဆဍ္ဍိတနန္တကေဟိ ကတံ ပံသုကူလံ. ပဒဒွယေန ပရိက္ခာရသန္တောသံ ဒဿေတိ.

ဒွိန္နံ အန္တရဝဿာနန္တိ ဒွီသု အန္တရဝဿေသု ပဗ္ဗဇိတတော အရဟတ္တမပ္ပတ္တသံဝစ္ဆရေသု. ဧကာ ဝါစာ မေ ဘာသိတာတိ ဧကာ၊ ‘‘အလံ၊ ဘဂိနီ’’တိ ခီရပဋိက္ခေပဝါစာ ဧဝ မယာ ဝုတ္တာ၊ အညော တတ္ထ ဝစီဘေဒေါ နာဟောသိ. တေန ဥက္ကံသဂတံ ကာယဝစီသံယမံ ဒဿေတိ. တတိယေ အန္တရဝဿမှီတိ တတိယဿ သံဝစ္ဆရဿ အဗ္ဘန္တရေ၊ တသ္မိံ အပရိပုဏ္ဏေယေဝ. တမောခန္ဓော ပဒါလိတောတိ အဂ္ဂမဂ္ဂေန တမောခန္ဓော ဘိန္နော၊ အဝိဇ္ဇာနုသယော သမုစ္ဆိန္နောတိ အတ္ထော. တေန တဒေကဋ္ဌတာယ သဗ္ဗကိလေသာနံ အနဝသေသပ္ပဟာနံ ဝဒတိ.

ဂင်္ဂါတီရိယတ္ထေရဂါထာဝဏ္ဏနာ နိဋ္ဌိတာ.