၉. ကောသလဝိဟာရိတ္ထေရဂါထာဝဏ္ဏနာ

သဒ္ဓါယာဟံ ပဗ္ဗဇိတောတိ အာယသ္မတော ကောသလဝိဟာရိတ္ထေရဿ ဂါထာ. ကာ ဥပ္ပတ္တိ? အယမ္ပိ ကိရ ပဒုမုတ္တရဿ ဘဂဝတော ကာလေ ကုသလဗီဇံ ရောပေတွာ တံ တံ ပုညံ အကာသိ. သေသံ အဉ္ဇနဝနိယတ္ထေရဝတ္ထုသဒိသမေဝ. အယံ ပန ဝိသေသော – အယံ ကိရ ဝုတ္တနယေန ပဗ္ဗဇိတွာ ကတပုဗ္ဗကိစ္စော ကောသလရဋ္ဌေ အညတရသ္မိံ ဂါမေ ဧကံ ဥပါသကကုလံ နိဿာယ အရညေ ဝိဟရတိ၊ တံ သော ဥပါသကော ရုက္ခမူလေ ဝသန္တံ ဒိသွာ ကုဋိကံ ကာရေတွာ အဒါသိ. ထေရော ကုဋိကာယံ ဝိဟရန္တော အာဝါသသပ္ပါယေန သမာဓာနံ လဘိတွာ ဝိပဿနံ ဥဿုက္ကာပေတွာ နစိရဿေဝ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၁.၁၁.၅၃-၆၁) –

‘‘ဟိမဝန္တဿာဝိဒူရေ၊ ဝသာမိ ပဏ္ဏသန္ထရေ၊

ဃာသေသု ဂေဓမာပန္နော၊ သေယျသီလော စဟံ တဒါ.

‘‘ခဏန္တာလုကလမ္ဗာနိ၊ ဗိဠာလိတက္ကလာနိ စ၊

ကောလံ ဘလ္လာတကံ ဗိလ္လံ၊ အာဟတွာ ပဋိယာဒိတံ.

‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော၊

မမ သင်္ကပ္ပမညာယ၊ အာဂစ္ဆိ မမ သန္တိကံ.

‘‘ဥပါဂတံ မဟာနာဂံ၊ ဒေဝဒေဝံ နရာသဘံ၊

ဗိဠာလိံ ပဂ္ဂဟေတွာန၊ ပတ္တမှိ ဩကိရိံ အဟံ.

‘‘ပရိဘုဉ္ဇိ မဟာဝီရော၊ တောသယန္တော မမံ တဒါ၊

ပရိဘုဉ္ဇိတွာန သဗ္ဗညူ၊ ဣမံ ဂါထံ အဘာသထ.

‘‘သကံ စိတ္တံ ပသာဒေတွာ၊ ဗိဠာလိံ မေ အဒါ တုဝံ၊

ကပ္ပါနံ သတသဟဿံ၊ ဒုဂ္ဂတိံ နုပပဇ္ဇသိ.

‘‘စရိမံ ဝတ္တတေ မယှံ၊ ဘဝါ သဗ္ဗေ သမူဟတာ၊

ဓာရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ.

‘‘စတုပညာသိတော ကပ္ပေ၊ သုမေခလိယ သဝှယော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ ဝိမုတ္တိသုခပ္ပဋိသံဝေဒနေန ဥပ္ပန္နပီတိဝေဂေန ဥဒါနေန္တော ‘‘သဒ္ဓါယာဟံ ပဗ္ဗဇိတော’’တိ ဂါထံ အဘာသိ.

၅၉. တတ္ထ သဒ္ဓါယာတိ ဘဂဝတော ဝေသာလိံ ဥပဂမနေ အာနုဘာဝံ ဒိသွာ၊ ‘‘ဧကန္တနိယျာနိကံ ဣဒံ သာသနံ၊ တသ္မာ အဒ္ဓါ ဣမာယ ပဋိပတ္တိယာ ဇရာမရဏတော မုစ္စိဿာမီ’’တိ ဥပ္ပန္နသဒ္ဓါဝသေန ပဗ္ဗဇိတော ပဗ္ဗဇ္ဇံ ဥပဂတော. အရညေ မေ ကုဋိကာ ကတာတိ တဿာ ပဗ္ဗဇ္ဇာယ အနုရူပဝသေန အရညေ ဝသတော မေ ကုဋိကာ ကတာ၊ ပဗ္ဗဇ္ဇာနုရူပံ အာရညကော ဟုတွာ ဝူပကဋ္ဌော ဝိဟရာမီတိ ဒဿေတိ. တေနာဟ ‘‘အပ္ပမတ္တော စ အာတာပီ၊ သမ္ပဇာနော ပတိဿတော’’တိ. အရညဝါသလဒ္ဓေန ကာယဝိဝေကေန ဇာဂရိယံ အနုယုဉ္ဇန္တော တတ္ထ သတိယာ အဝိပ္ပဝါသေန အပ္ပမတ္တော၊ အာရဒ္ဓဝီရိယတာယ အာတာပီ၊ ပုဗ္ဗဘာဂိယသတိသမ္ပဇညပါရိပူရိယာ ဝိပဿနံ ဝဍ္ဎေတွာ အရဟတ္တာဓိဂမေန ပညာသတိဝေပုလ္လပ္ပတ္တိယာ အစ္စန္တမေဝ သမ္ပဇာနော ပတိဿတော ဝိဟရာမီတိ အတ္ထော. အပ္ပမတ္တဘာဝါဒိကိတ္တနေ စဿ ဣဒမေဝ အညာဗျာကရဏံ အဟောသိ ကောသလရဋ္ဌေ စိရနိဝါသိဘာဝေန ပန ကောသလဝိဟာရီတိ သမညာ ဇာတာတိ.

ကောသလဝိဟာရိတ္ထေရဂါထာဝဏ္ဏနာ နိဋ္ဌိတာ.